Twende kovidio oini

Twende komurya

Ovahongonone vaJehova

Toorora eraka Otjiherero

Hapo u tjita kutja ouripura wa Jehova u rire o woye?

Hapo u tjita kutja ouripura wa Jehova u rire o woye?

“Ndjambi nge mu yarure koupe mourekoto womitima vyeṋu.”​—ROM. 12:2.

OMAIMBURIRO: 56, 123

1, 2. Ovikwaye mbi tu ri honga otja tji matu kurisa oupanga wetu kuna Jehova? Sasaneka.

OMUATJE omuṱiṱi wa pewa otjiyandjewa. Nu ovanene ve arire tji ve mu raera ave tja, “Muatje itja ndangi.” Omuatje ngwi a pose ondangi mena rokutja wa raerwa nao uriri. Otja tji me kuru, ma kara nondangi komeripura wovanene ve notjari tja muna okuza ku varwe. Nu nai eye u yenena okuposa ondangi ku ye omuini okuza komutima we. Omena raye? Mena rokutja okuraisa ondangi tja rira otjiṋa tji tjiri momeripura we.

2 Momuano tjingewo mbo, indu tji twa uta okutjiwa ouatjiri, twe rihonga ounanḓengu wokukara nonḓuviro komatwako wa Jehova. Nungwari tjitwa uta okukurisa oupanga wetu kuna Jehova, eṱe twe rihonga ovingi ohunga nomuano Jehova me ripura, kutja u vanga ye nu ka vanga ye, nomuano eye me vara oviṋa. Nu mokurihonga okukara nongaro tjimuna eye ndje na yo, eṱe tu yandjera kutja ouripura we u ṱune komikambo na kozondando zetu oveni, tu tjita kutja ouripura wa Jehova u rire imbwi owetu oveni.

3. Ongwaye tje he ri oupupu okukondja kutja omeripura wa Jehova ye rire o wetu oveni?

3 Nandarire kutja okukondja okuripura tjimuna Jehova otjiṋa  tji tji yeta ondjoroka, posi yokutja kaupupu okutjita nao. Nu povikando, mape ya atu he ripura momuano omusemba mena rouhahomonena wetu. Otjotjihorera, mape ya a rire ouzeu okuzuva oumune wa Jehova ohunga notuvakiro, okuripahera omawini, omazuvarisiro, omaungurisiro wombinḓu, poo noviṋa vyarwe. Eṱe matu yenene okutjita vi? Matu kaenda vi komurungu okutjita kutja omeripura wa Mukuru ye rire o wetu oveni? Nu okutjita nao maku ṱunu vi kozondando nḓu matu toora nai na moruyaveze rwetu?

OKUTJITA KUTJA OURIPURA WA JEHOVA U RIRE O WETU

4. Omambo wa Paulus nga: ‘okuyarurwa koupe mourekoto womitima vyetu,’ ye kamburira mo tjike?

4 Lesa Ovaroma 12:2. Omuapostele Paulus imba wa raisa kutja okuripura otja Jehova ku kamburira mo tjike. Kutja atu ha “horere komihingo vyouye mbwi,” eṱe ma tu sokuritjaera kutja atu ha kara noumune nozongaro zouye mbwi, otja tji twe rihongere morupa ndwa kapita. Paulus wina wa tamuna ounanḓengu ‘wokuyarurwa koupe mourekoto womitima vyetu.’ Imbi mavi kamburire mo okurihonga Embo ra Mukuru nondando yokuvanga okutjiwa omeripura we, nokuripurira ko oukoto, nokukondja okueta ouripura wetu mombwaneno na imbwi owa Mukuru.

5. Kahurura ombangu pokati komalesero wakauriri nokutjita omakonḓononeno.

5 Okukonḓonona ku kamburira mo ovingi, nungwari ka ku lesa nokupaha omaziriro nokunana ko omikoka mozoparagrafa uriri. Indu tji matu konḓonona, tu tara kutja imbi mbi matu lese ma vi tu hongo tjike ohunga na Jehova, ozondjira ze, nomuano mbwe ripura. Tu kondja okutjiwa kutja ongwaye Mukuru tje yakura otjiṋa tjimwe nu a nakaura tjarwe. Eṱe wina tu yandja ombango komarundurukiro ngu matu sokutjita mehupo na momeripura wetu wina. Nandarire kutja kaaruhe tji tu yandja ombango koviṋa avihe mbya tamunwa kombanda momakonḓoneno wetu, posi yokutja tu muna ouwa indu tji twa twapo oruveze, nandarire ohinga yomakonḓononeno wetu, okuripurira oukoto ku avihe mbi matu lese.​—Eps. 119:97; 1 Tim. 4:15.

6. Tji matu ripurire oukoto koumune wa Jehova tu muna ouwa waye?

6 Eṱe tji matu ripurire oukoto kembo ra Mukuru aruhe, tu muna ouwa tjinene. Eṱe matu yenene ‘okutjiwa kutja ihi tji tji ri otjiwa nEye me nonyuṋe, nu tji tja pwira Ye, otjikeṋa,’ nu matu rimunine oveni kutja oumune wa Jehova ohunga noviṋa ousemba. Tu uta okukara noumune we ohunga noviṋa, nu tu yakura kutja oumune we ombu ri ousemba. Omeripura wetu ye ‘yarurwa koupe,’ nu tu kara noumune oupe ohunga noviṋa. Mouatjiri, eṱe tu tjita kutja ouripura wa Jehova u rire owetu.

OMERIPURA WETU YE ṰUNA KOVITJITWA VYETU

7, 8. (a) Jehova u noumune uṋe ohunga nomawini? (Tara koviperendero pomautiro worupa ndwi.) (b) Indu tji twa tjiti kutja ouripura we urire o wetu, otjikeṋa ku matu utu okuyandja ko ombango tjinene?

7 Ngaatu nangarasi okuripura oviṋa uriri. Okuripura nokutjita otjiṋa vi ungura kumwe. (Mar. 7:21-23; Jak. 2:17) Ngatu tare kovihorera tjiva mbi mavi yenene okutuvatera okutjita nao. Otjotjihorera, Omaevangeli ye tupa oumune wa Jehova ohunga nomawini. Tara komuano Mukuru ma toorora ovanene mbu mave kurisa Omuatje we, eye wa toorora ovakupasane mbe ha ri noviṋa ovingi. (Lev. 12:8; Luk. 2:24) Indu Jesus tja pandukwa, Maria we “mu rareke metemba rozonyanda, owo tjinga ave ha ri noruveze mondjuwo yovayenda.” (Luk. 2:7) Andakuzu Jehova aa vanga kutja Omuatje we ma kwaterwe poruveze orusemba, eye a tja tjita nao, nu iho ka tja tji mu ura. Otjiṋa otjinene Jehova tjaa yandja ko ombango ya ri ongaro Jesus  mu me kurisirwa ndji mai kurisa oupanga we kuna Ye.

8 Okuza kehungi rOmbeibela ohunga nongwatero ya Jesus ndi, matu yenene okumuna oumune wa Jehova ohunga nomawini. Ovanene tjiva ve vanga omawini omengi kovanatje vawo, nandarire kutja ihi matji teya oupanga wawo kuna Mukuru. Oukahu kutja Jehova u vara oupanga wetu na Ye otjotjiṋa otjinanḓengu. Hapo ove wa tjita kutja ouripura wa Jehova urire o woye? Ongaro yoye i raisa ye?​—Lesa Ovaheberi 13:5.

9, 10. Matu raisa vi kutja tu noumune wa Jehova ohunga nokuputarisa varwe?

9 Otjihorera tjarwe ohunga noumune wa Jehova, okuputarisa varwe. Jesus wa tja: “Nu auhe ngu ma putarisa umwe waimba ouṱiṱi mba mba kambura mu Ami, ku ye itja rira kokuwa tjinene, ewe rotjikweyero tji ra kutwa mosengo ye, nu a yumbwa momeva kokuvare.” (Mar. 9:42) Omambo nga ye noumune ounanḓengu! Mena rokutja Jesus wa sisiwa i Ihe okuura, matu yenene okumuna ongahukiro kutja Jehova u ṱunwa vi i omundu ngu putarisa ovakongorere va Jesus owina.​—Joh. 14:9.

10 Hapo eṱe tu noumune wa Jehova na Jesus? Twa tjita kutja oumene wawo mbo u rire o wetu oveni? Omuano mbu tu ri tjinda u raisa ye? Ngatu tje, eṱe matu nanukirwa i yokuvanga okurihwikika momuano umwe, mbu mau putarisa poo nandarire mbu mau pendura ozonḓuma momeripura wa varwe. Hapo mape ya atu rundurura omeripura wetu ngo mena rokutja twa suvera ovakambure ovakwetu, nu ka tu nokuvanga okuveputarisa poo matu kaenda komurungu nongaro ndjo?​—1 Tim. 2:9, 10.

11, 12. Okukara noumune wa Jehova ohunga novitjitwa ovivi nokukara nomeritjaerero, maku tu tjevere vi kokutjita oviṋa ovivi?

11 Otjihorera otjitjatatu: Jehova wa tonda ouhasemba. (Jes. 61:8) Nandarire kutja eye u tjiwa kutja kaupupu kweṱe okutjita imbi ovisemba aruhe mena rouhahomonena mbu twa kwatwa na wo, eye utu ningira kutja tu ripure nokutonda ouhasemba tjimuna eye nao. (Lesa Epsalme 97:10.) Okuripurira oukoto koviṋa Jehova mbya tonda maku tu vatere okukara noumune we, nu ma tji tu pe omasa wokupirukira oviṋa eye mbya tonda.

12 Okukara noumune wa Jehova ohunga nouhasemba, wina maku tu vatere okumuna ovitjitwa ovivi, nandarire kutja ka vi tamunine ongahukiro membo ra Mukuru. Otjotjihorera, omapundiro ya kamuzu i vimwe vyovitjitwa mbya uta okutakavara mouye tjinene. Tjiva ve paha ombitira po, mokumuna kutja oviṋa otja imbyo kaviṋa vimwe nokutjita orukatuko oruni. * Hapo ovitjitwa otja imbyo vi raisa ouripura wa Mukuru, ngwa tonda oviṋa avihe ovivi? Ngatu riṱizire kokure novitjitwa avihe ovivi mokukara nomeritjaerero nokutonda oviṋa avihe Jehova mbya tonda.​—Rom. 12:9.

RIPURA NAI KUTJA MOTJITIVI MORUYAVEZE

13. Ongwaye tji matu sokuripurira oukoto koumune wa Jehova ohunga noviṋa nai, kokutja tu toore ozondando nḓe ri zo moruyaveze?

13 Indu tji matu tjiti omakonḓononeno wetu, matu sokuripura kutja oumune wa Jehova mau hitasana vi nozongaro nḓu mape ya atu munu moruyaveze. Momuano mbo, indu tji twa kara mongaro ndji mai hepa kutja tu toore omukambo wa tjimanga, matu yenene okutjiwa kutja otjikwaye tji twa sokutjita. (Omiano 22:3) Tara kovihorera vyOmbeibela mbi.

14. Matu rihongere ko tjike komuano Josef ma pirukira omukazendu wa Potifar?

14 Mokuhakahana okupirukira omukazendu  wa Potifar, Josef wa raisa kutja eye we ripurira oukoto koumune wa Jehova ohunga nokukara nouṱakame morukupo. (Lesa Genesis 39:8, 9.) Kunao, eye wa tja nai komukazendu wa Potifar: “Me sokutjitira tjike otjiṋa tjouvi ounene mbu ṱa mba, nokukatuka komurungu wa Ndjambi?” tji tja raisa kutja eye ee ripura tjimuna Jehova. Hapo nu tjike na eṱe? Ngatu tje rumwe omundu ngu mu ungura pamwe wa utu okunyanda orombe kuna ove. Poo wa hindirwa ombuze ndji notjiṋa nokutunduuza ozonḓuma zotuvakiro poo oviperendero vya kamuzu kongoze yoye? * I rira oupupu okupirukira omarorero otja ingo indu tji twe ripurira ko rukuru koumune wa Jehova otja kozongaro nḓo, nu tji twa rongera nawa tjiri kutja matu tjiti vi mozongaro otja inḓo.

15. Matu tjiti vi kutja atu ha nyenuṋa ouṱakame wetu ku Jehova, tjimuna Ovaheberi vetatu?

15 Nambano ngatu tare kotjihorera tjOvaheberi vetatu mbaave tjiukwa otja Sadrak na Mesak na Abed-Nego. Omuano mbu va pirukira okurikotamena kotjiserekarerwa tjongoldo tji tja ungurirwe i Ombara Nebukadnesar nomuano mbu ve mu zira wa raisa kutja ve ripurira ku imbi mbi heperwa po okukara nouṱakame ku Jehova. (Eks. 20:4, 5; Dan. 3:4-6, 12, 16-18) Ngatu tje omuhona woye we ku ningire okuyandja ohambwarakaṋa yokamariva kotjitjitwa tji tji norupa nozongamburiro zoposyo. Ove mo tjiti vi? Pendje nokuundja ozongaro otja inḓo okuya, mape tjiti vi tji wa konḓonona oumune wa Jehova ohunga noviṋa mbyo nai? Nu tji wa ka kara mouzeu mbo, ma rire oupupu kove okutjita nokuhungira oviṋa ovisemba, tjimuna Ovaheberi vetatu mbo.

Ove wa tjita omakonḓononeno, wa tjanga okakarata koye kombinḓu, nu wa hungira ku nonganga yoye? (Tara koparagrafa 16)

16. Okutjiwa oumune wa Jehova nawa maku tu vatere vi okurirongerera kouvere mbwe tu wire tjimanga?

16 Okuripurira kouṱakame wetu ku Jehova ku yenena okutuvatera indu tji twa wire mouvere wa tjimanga. Nandarire kutja twa tya kutja katu nokupakerwa poo okuyandja ombinḓu yetu poo nandarire oundondi wombinḓu, omiano tjiva vyomapangero vi hepa kutja u toore omukambo mbu mau zikamene komirari vyOmbeibela mbu mau raisa omeripura wa Jehova. (Oviung. 15:28, 29) Mouatjiri oruveze orusemba rokuripurira koviṋa mbyo kaondi tji u ri monasareta uriri, poo indu tji tu ri kehi yomihihamo poo kehi yoṋiṋikizire yokutoora  omukambo wa tjimanga. Nai ooruveze orusemba rokutjita. *

17-19. Ounanḓengu waye wokukara noumune wa Jehova mozongaro pekepeke nai? Yandja ovihorera otja kozongaro mu matu sokurirongerisa.

17 Korusenina, tara komuano Jesus mbwa hakahana okuzira indu Petrus tje mu raera kutja: “Ape ha kara nao, Muhona!” Jesus mape ya we rizemburuka nombango wa Mukuru ohunga na ye, nOmatjangwa nga hunganeka ehupo re nonḓiro ye kombanda yehi. Ondjiviro ndjo ya zikamisa ondando ye yokukara omuṱakame, nokuyandja omuinyo we nokuhinokuivaiva.​—Lesa Mateus 16:21-23.

18 Ndino, ombango ya Mukuru kovandu ve o yokukurisa oupanga kuna ye nokukara norupa ndwa yenene motjiungura tje. (Mat. 6:33; 28:19, 20; Jak. 4:8) Tjimuna tji pa tjitwa ku Jesus, ovandu vopopezu na eṱe poo mbu matu tjiwasana mape ya ave kondjo okutupora kongurameno yetu ndjo. Otjotjihorera, motjitivi indu omuhona woye poviungura tje ku pe otjihako tjokombanda nu a yere otjimariva tjoye, nungwari oviungura mbi wa pewa mbyo vya utu okuhina okukuyandjera okukara pozombongarero zombongo aruhe poo okupita motjiungura tjokuzuvarisa na moviṋa vyarwe oviyapuke? Poo tji uri moskole, ngatu tje wa patururirwa omivero okuyenda kwarwe kokure nonganda kutja u ka ryamise omahongero woye komurungu. Hapo moiri ndjo otji mo utu okutjita omakonḓononeno nokuhungira ku novanene voye, poo nandarire ovanene vombongo, nu okuzambo arire tji wa tara kutja motjitivi? Ongwaye tji u hi nokuuta nai okukonḓonona oumune wa Jehova ohunga noviṋa tjimuna mbyo nokukondja okutjita kutja u kare noumune we? Nu tji we ri vaza mongaro otja indjo, ma rire oupupu okupirukira omarorero otja ingo. Ove mo kara a motjiwa kutja mosokutjita vi mena rokutja u nozondando nḓu wa twapo rukuru zokuungurira Jehova.

19 Mape ya wina o ripura nozongaro zarwe nḓu mape ya o kara mo moruyaveze au hi nokuundjira ko. Otjingaperi, kutja ka maatu rirongerere koviṋa avihe mbi mavi ka tjitwa kweṱe. Posi yokutja tji twe ripurire oukoto koumune Jehova momakondononeno wetu oveni, maku rire oupupu kweṱe okuzemburuka nokuyenena okuṱakamisa mbi twe rihonga otja kozongaro mu tu ri. Kunao, ngatu yandje ombango indu tji matu tjiti omakonḓononeno wetu komuano Jehova mbwe ripura ohunga nozongaro pekepeke, nokukondja kutja ouripura we u rire o wetu, nokutara kutja okukara nouripura tjimuna wa Mukuru maku tu ṱunu vi nai na moruyaveze.

OMERIPURA WA JEHOVAH NORUYAVEZE ROYE

20, 21. (a) Ongwaye tji matu yorokere onguturiro mouye oupe? (b) Matu kara vi nondjoroka nai?

20 Atuhe tjiri tu nomaundjiro wouye oupe. Otjingi tjetu tu nomaundjiro wokuhupa nga aruhe moparadisa kombanda yehi. Kehi yomananeno wOuhona wa Mukuru, eṱe matu kuturwa komihihamo nomauzeu ngu tu muna mouye mbwi nai. Nu mouye oupe eṱe wina matu kaenda komurungu okukara nouyara wokuritoororera oveni. Omundu auhe me ritoororere omuini oviṋa mbi ma vanga okutjita poo oviṋa mbi mu pa onyuṋe.

21 Otjingaperi kutja nandarire kutja tu nouyara, matu sokutjiwa kutja ouyara wetu mbo u nopoṋa pu mau sokuyandera. Indu ovanandjenda tji mave sokutoorora pokati kouwa nouvi, owo mave tjiti nao mokuṱaṱera kozoveta na kouripura wa Jehova. Nu ihi matji rire otjiṋa otjiwa, tji matji ve etere ondjoroka onene nohange ya tjiri. (Eps. 37:11) Ngunda oruveze ndo aru hi ye ya, eṱe wina matu yenene okukara nondjoroka nai otja tji matu tjiti kutja omeripura wa Jehova ye rire owetu oveni.

^ par. 12 Omapundiro wa kamuzu omapundiro tjinene nge tjitwa mozoklaba, omundu me nyandera komatumbo womundu warwe muzu. Otjitjitwa hi tja sana nokutjita oruvakiro nu ku rira ohepere ovanene vombongo okuzikamisa okomiti ombangure okuisira komapu ngu va munu. Omukriste ngwa kara norupa movitjitwa otja imbi u sokuningira ombatero yovanene vombongo.​—Jak. 5:14, 15.

^ par. 14 Okuhinda ozombuze, oviperendero poo ozovidio nḓe sekamisa ozonḓuma zotuvakiro, okupitira mozongoze ku isanewa kutja o sexting. Okuisira koviṋenge mbya kara po, mape ya okomiti ombangure ai heperwa po. Povikando tjiva, ovandu mba kara norupa mokuhinda ozombuze nḓo va pewa omberero i omauhonapare. Tji mo vanga ondjiviro yokomurungu, twende korungovi ndwi jw.org nu u lese orupa membo ndi “Young People Ask​—What Should I Know About Sexting?” (Tara kehi yorupa ndwi BIBLE TEACHINGS > TEENAGERS.) Poo lesa orupa ndwi “How to Talk to Your Teen About Sexting” mo-Awake! ya Novemba 2013, pomuk. 4-5.

^ par. 16 Omirari vyOmbeibela mbi mavi tjama nomapakerero wombinḓu vya kahururwa momambo wetu. Otjotjihorera, lesa embo ndi, Matu riṱizire vi morusuvero rwa Mukuru?, pomuk. 246-249.