Twende kovidio oini

Twende komurya

Ovahongonone vaJehova

Toorora eraka Otjiherero

Eye tjiri atja tjata ku Mukuru

Eye tjiri atja tjata ku Mukuru

TU KARERA Jehova nu tu vanga okutjata ku ye, poo vi? Hapo nu Mukuru u tjaterwa i uṋe nu ondaya ye u yandja ku uṋe? Ovandu tjiva voruveze rwOmbeibela va yakurirwe i Mukuru nandarire kutja va tjitire ourunde ounene morukapitaveze. Varwe mbu va ri novikaṋena oviwa ka ve yakurirwe i Mukuru. Nambano mapeya atu ripura kutja, “Hapo nu Jehova omuini u vanga kutja omundu auhe ma tjite tjike?” Otjihorera tja Rehabeam, ombara ya Juda, matji yenene okutuvatera okumuna eziriro.

KAA RI NOMUHUNGA OMUSEMBA

Ihe ya Rehabeam wa ri Solomo, ngwa honapara moIsrael ozombura 40. (1 Ozomb. 11:42) Solomo wa ṱa mombura ndji 997 K.O.Z. Rehabeam arire tja i ko Sekem okuza ko Jerusalem okukatwirisiwa otjombara. (2 Ekuruh. 10:1) Mo munu kutja mape ya wa ri nomakeyakeyero wokutja mape ya a yata mozondambo za ihe Salomo, ngwa tjiukirwa kounongo we ouhimise? Mape ya Rehabeam aa munu vi kutja ondjiviro ye yokuzengurura omauzeu omanene mape ya ai rorwa tjamwa oruveze?

Rehabeam mape ya aa munu kutja oviṋa mavi rire ovizeu ku ye moIsrael oruveze ndo. Kombunda yoruveze, ovandu votjiwaṋa ve ya ku ye nu ave eta ondjemeno ya wo ama ve tja: “Iho Solomo wetu tatumisa tjinene nu wetu ungurisa noutwe. Tji wa puparisa omauzeu nga no tjiti kutja tu hupe nawa, indino matu ku karere.”—2 Ekuruh. 10:3, 4.

Rehabeam mape ya ee ri munu otja ngwa tu wa mepando! Tja yenenisa ozonḓero zovandu, eye neṱunḓu re, na imba mbe ri morumbo rwe mave sokuyarura ehupo ra wo ewa ombunda nu ave ha paha ovingi kovandu varwe. Munda mbo warwe, tje ha yenenisire ovihepwa vyovandu, ovandu mave mu pirukire. Nambano omundu ma tjiti vi? Ombara omutanda ngwi wa hungira ku novandu ovanene motjiwondo nu mbu vari ovayandjandunge ku Salomo. Nungwari, Rehabeam wina wa ka paha ondunge okuza kovandu omitanda, mangara omukura we nao. Mokuyakura ondunge yomitanda mbi, Rehabeam we rimanena okutjinda ovandu noutwe. Nu we ve zira atja: “Tate wa twire omitwaro omizeu ku eṋe; ami me tjiti kutja vi ririre ko omizeu. Eye iye mu tono nozongora; nungwari ami me mu tono nozongora zomakuiya.”—2 Ekuruh. 10:6-14.

Mo munu kutja twe rihongere ko tjike nai? Oukahu kutja, motjinyo tja munene muza tjimunyo tjawora nu kamuzu tjiraka tja woro. Mena rokutja ve nondjiviro nu va yata movingi, ve yenena okuripurira kovikongorere ko nu ave yandja ondunge ndji i ri yo.—Job 12:12.

 “OWO VA PURATENA KEMBO RA JEHOVA”

Mokuhungama ovapirukire, Rehabeam wa woronganisa ovarwe ve vovita. Posi yokutja Jehova wa ungurisa omuprofete Semaja, na tja: “Amu rwisa ovazamumwe veṋu oveni imba Ovaisrael. Auhe nga yaruke koye, orondu ihi tji tja tjitwa, otjo tja tjitwa i Ami.”—1 Ozomb. 12:21-24. *

A mu roro okutjita otjirwa? Ripura kutja otjiṋa hi tja yenena okukurungisa Rehabeam pu pe ṱa pi! Ripura kutja ovandu mave vara vi ombara ndja tirisa ovandu va yo kutja mai ve vere “nozongora zomakuiya” nu tjimanga ai zako mena rokutja ondando yayo ya pirukirwa? (Sasaneka 2 Ekuruhungi 13:7.) Nungwari, ombara novarwe va yo “va puratena kembo ra Jehova nu ave yaruka ko zo ya wo.”

Matu rihongere ko tjike? Ounongo okupurutena ku Mukuru nandarire kutja matu nyekererwa indu tji twa puratena ku ye. Tji tu nonḓuviro ku Mukuru tu tjata ku ye nu me tu sere ondaya.—Deut. 28:2.

Rehabeam wa muna ovikongorere ko vya ye? Mena rokutja wa kara nonḓuviro nu a ha rwisa otjiwaṋa tji tja zikama oupe, eye wa uta okuyandja ombango kokutunga otjihuro tjomuhoko wa Juda na Benjamin, eye wina mbya honaparere po. Eye wa sembamisa ovihuro ovingi “nomasa.” (2 Ekuruh. 11:5-12) Otjinanḓengu tjinene, eye wa kara nonḓuviro komatwako wa Jehova. Otja ouhona womihoko omurongo vya Israel kehi ya Jerobeam tjaa vi utu okurikotamena kovisenginina, ovengi okuzambo “va vatera Rehabeam” mokuyenda ko Jerusalem okukakara norupa momerikotameneno omakohoke. (2 Ekuruh. 11:16, 17) Okutja mo nao, onḓuviro ya Rehabeam ya sembamisa ouhonapare we.

OURUNDE—NOMERITANAURIRO

Indu ouhona we tji wa za nokuzikama nu au rire ounamasa, Rehabeam wa tjita otjiṋa tjarwe. Eye wa nakaura omatwako wa Jehova na utu okurikotamena kovisenginina! Nu omena ra ye? Ngahino aa popwa i ina ngwari Omuamoni, poo ngahino eṱunḓu re po? (1 Ozomb. 14:21) Momuano auhe mbwa kara po, otjiwaṋa atjihe tje mu kongorera. Mena rotjina hi, Jehova wa yandjera Ombara Sisak wa Engipte okukambura ovihuro vya Judea, nandarire kutja Rehabeam we vi zikamisa nomasa!—1 Ozomb. 14:22-24; 2 Ekuruh. 12:1-4.

Oviṋa vye ya kondjerera indu Sisak tja vaza mo Jerusalem, Rehabeam ma honaparere. Imba omuprofete Semaja opa etera ombuze ya Mukuru ku Rehabeam novahongore ve na tja: “Eṋe mwe Ndji esa; nambano Ami otji mbe mu esa mouvara waSisak!” Rehabeam wa raisa ongaro iṋe kombuze yomavyuriro ndji? Tjiri va tjita otjiṋa otjiwa! Ombeibela itja: “Ombara novanane ve risusuparisa nave tja: ‘Muhona Eye omusemba.’” Nu Jehova wa yama Rehabeam notjihuro Jerusalem kutja a ve ha nyonwa.—2 Ekuruh. 12:5-7, 12.

Okuzambo, Rehabeam wa kayenda komurungu okuhonaparera ouhona wokomamuho. Nu komurungu wonḓiro ye, eye wa yandja oviyandjewa kovantje ve nouharupu, nu pe munika aayo ya ri okuvanga kutja ovandu ave ha pirukire omuatje we, Abijah, ngwa sokuyarukira motjihavero tje. (2 Ekuruh. 11:21-23) Momuano mbo, Rehabeam wa raisa ozondunge nḓe hi na wa raisire rukuru.

WA TJITA OUWA POO WA TJITA OUVI?

Ouwa mbwa tjita mbwi wa ri omungandjo uriri, Mukuru kaa ri nonyuṋe na Rehabeam. Ombeibela i tja nai ohunga nouhonapare we: “Rehabaem wa tura ondjo.” Omena ra ye? Mena rokutja ka “kondjere okutjita ombango yaMuhona.”—2 Ekuruh. 12:14.

Ombara David wa ri omuṱakame, nungwari Rehabeam ka karere noupanga ouwa ku na Jehova

Ripurira kovikongorere ko mbi: Rehabeam aa kara nonḓuviro ku Mukuru povikando tjiva. Nu aa tjiti oviṋa oviwa mena rotjiwaṋa tja Jehova. Posi yokutja kaa ri nonḓero yokukara noupanga oupame ku na Jehova poo oupyuke wokutjita ombango ye. Mena ra nao, wa uta okutjita oviṋa ovivi nu e rikotamene kovisenginina. Ove mapeya o temwa: ‘Okutja Rehabeam tja yakura omavyuriro nga pewa, nangwari we ye yakura mena romapopero wa varwe, nu ka ku za komutima we omuini nu kaa ri nonḓero yokuritjatisa ku Mukuru?’ (2 Ekuruh. 11:3, 4; 12:6) Kombunda eye wa kauta okutjita  imbi ovivi mehupo re. Tjiri kaa ri tjimuna ihe omunene Ombara David! Ii, otjiperi kutja David wa tjita ozondataiziro, posi yokutja omuinyo we au hongorerwa i orusuvero ku Jehova, wa ri aa pyukira omerikotameneno wa tjiri, nu wa pokere kourunde mbwa tjitire.—1 Ozomb. 14:8; Eps. 51:1, 17; 63:1.

Eṱe tjiri tu notjiṋa tji matu rihongere ko ku Rehabeam ndino. Tjiri otjiṋa otjiwa tjinene omundu tji ma kondjo okuhupisa eṱunḓu re nokupaha okuyenenisa ozondando ze ozombwa. Nungwari kutja tu tjate ku Mukuru, rutengatenga nga tuyandje oruvara komerikotameneno wouatjiri nu tu kakatere ku wo.

Ihi matu tji yenenisa indu tji matu kurisa nokuṱakamisa orusuvero rwetu ku na Jehova. Otja tji tu hohiza omuriro kutja u kare omauyaka, orusuvero rwetu ku Mukuru ru sokukara omaru yaka wina mokurihonga Embo re aruhe, okuripurira oukoto ku imbi mbi matu rihongo, nokupanḓera pokukumba. (Eps. 1:2; Rom. 12:12) Orusuvero rwetu ku Jehova maru tjiti kutja avihe mbi matu tjiti vi tjate ku ye. Wina maru tu hingi kutja tu poke kouvi ngamwa mbu twa tjiti. Tjiri ngatu kakatere komerikotameneno omakohoke, nu atu kara otja Rehabeam.—Judas 20, 21.

^ par. 9 Mena rokuhinouṱakame kwa Solomo, Mukuru wa raisa rukuru kutja ouhona mau haṋewa.—1 Ozomb. 11:31.