Twende kovidio oini

Twende komurya

Ovahongonone vaJehova

Toorora eraka Otjiherero

Raisa otjari ‘kovandu avehe’

Raisa otjari ‘kovandu avehe’

INDU Jesus tjaa hongo ovahongewa ve okuzuvarisa ombuze ombwa, eye we ve raera kutja ombuze ohunga nOuhona wa Mukuru kaaruhe tji mai yakurwa. (Luk. 10:3, 5, 6) Motjiungura tjetu tjokuzavarisa, mape ya atu hakaene ku novandu tjiva mbu ma ve nakaura ombuze ndji mongaro ombi. Nu ongaro otja indjo i tji tjita kutja i rire ouzeu kweṱe okuvehungirisa momuano omupore poo okuraisa otjari.

Omundu wotjari u muna ouzeu wa varwe mbu ve na wo, nokuveṱira ondjenda, nu tji mu hingi okuvevatera. Posi yokutja, indu tji twa utu okuhina okuraisa otjari kovandu mbu twa hakaene motjiungura tjokuzuvarisa, mape ya atu pandjara ombango nonḓero motjiungura tjokuzuvarisa. Nungwari tji twa raisa otjari poo ondjenda, iri tjimuna matu twako ozonguṋe komuriro, momuano mbo tu kara nombango nonḓero motjiungura tjokuzuvarisa!—1 Tes. 5:19.

Hapo matu raisa vi otjari nandarire indu tje ri ouzeu okutjita nao? Ngatu tu tare kovandu vetatu mbu matu yenene okuhorera—Jehova, Jesus nomuapostele Paulus.

HORERA KOTJARI TJA JEHOVA

Oure wozombura ozengi, Jehova wa raisa omuretima komakuminino nga tjitwa kena re. Nandarire kutja wa tjitwa nao, eye u raisa ‘ouwa ku imba mbe ha tja okuhepa na kovarunde.’ (Luk. 6:35) Omuretima we u raisa otjari tje kovandu. Jehova u nonḓero yokutja “ovandu avehe” ve yamwe. (1 Tim. 2:3, 4) Nandarire kutja Mukuru wa tonda ouvi, eye u vara ovandu otjovihuze vye nu ka vanga umwe nandarire okupandjarisa omuinyo we.—2 Petr. 3:9.

Jehova u tjiwa omuano Satan me pukisa ovandu. (2 Kor. 4:3, 4) Ovengi okuza kouṱiṱi wa wo va hongwa omahongero woposyo nomeritjindiro omavi, tji tji tjita kutja i rire ouzeu ku wo okuyakura ouatjiri. Jehova u nonḓero okuvatera ovandu otja imbo. Hapo matu tjiwa vi?

Nga tu tare koumune wa Jehova ohunga nOtjiwaṋa tja Ninive. Kehi yongaro yawo yourunde, Jehova wa raera Jona kutja: “Ami hi sokuṱotjari na Ninive, ihi otjihuro otjinene, tji tji novature ovehinandjiviro mbe ri komurungu yomayovi esere rimwe nomirongo vivari?” (Jona 4:11) Jehova wa vara ovature va Ninive otjovandu mbe hi nondjiviro, nu mena rotjari tje wa ningira Jona okukeverakiza.

Tjimuna Jehova, eṱe wina tu vara ovandu otjovihuze. Matu yenene okuhorera ku ye mokukara nonḓero yokuvatera imba mbu mave puratene, nandarire kutja kave nokuraisa onḓero.

HORERA KOTJARI TJA JESUS

Tjimuna Ihe, Jesus, wa ṱondjenda novandu mba ri nouhepe wondjiviro youatjiri. “Nu Jesus tja muna otjimbumba tjovandu omutima we arire tji wa hara ondjenda na wo, owo tjinga ava kurungisirwe nu ava ningisire ondjenda tjimuna ozonḓu nḓe hi nomurise.” (Mat. 9:36) Jesus wa muna ongaro ya wo mu vari; eye wa muna kutja imba mbe ya okumupuratena ku ye va hongerwe omahongero woposyo nu aa ve tjindwa navi kovanane vozongamburiro. Nandarire kutja Jesus aa tjiwa kutja ovengi vawo mave yandjere ozongaro tjiva nḓu maze vetjaere okupuratena, eye wa kayenda komurungu ‘okuvehonga oviṋa ovingi.’—Mar. 4:1-9.

Atu pindike indu omundu tja raisa ongaro ombi pomautiro

Otja ehupo romundu pu mari runduruka, ongaro ye wina i runduruka, nu wina ongaro yomundu kouatjiri i runduruka

Indu ovandu tji ve hi nokuraisa ombango kombuze ombwa, tu sokukara noumune ouwa nokuripura kutja ongwaye tji mave raisa ongaro ndjo. Tjiva mape ya ave kara noumune ouvi  ohunga nOmbeibela poo ohunga nongaro yOukriste mena rovihorera ovivi mbi ve muna okuza kovandu mbe ri tja Ovakriste. Tjiva mape ya va hongwa ovizeze ohunga nongamburiro yetu. Nu varwe ve nemuma rokutja ovazamumwe va wo mave tjavi tji ve tu yakura momuano omuwa.

Tjiva mbu tu hakaena motjiungura tjokuzuvarisa mape ya ave tu yakura momuano omuvi mena roviṋa ovivi mbya tjitwa ku wo nu mbye ve ṱuna tjinene. Omuhindwa umwe wena Kim wa tja: “Momaturiro tjiva, ovandu ovengi va ṱunwa i ovita nu va pandjara omauini wawo aehe. Nu ongaro ndji ya tjita kutja ve rihahize oparukaze. Nu wina ye vepa ombameno nu ya tjita kutja ave ha kara nongamburiro movandu varwe. Momaturiro ngo, tu hakaena novandu mbe pirukira ombuze ombwa. Otjikando tjimwe, mba tonwa ngunda ame zuvarisa.”

Hapo Kim u raisa vi otjari kehi yongaro ndji? Eye wa tja: “Indu tji mba tjindwa navi, mbi kondja okuripurira ketjangwa rOmiano 19:11, ndi tja: ‘Tji u ri omunazondunge mo kara nomuretima.’ Tji me ripurire komauzeu ovandu mba ngu va muna, ku ndji vatera kutja mbi ve raisire otjari. Nu kavandu avehe mbe raisa ongaro ndjo. Momaturiro ngo, tu novandu mba raisa onḓero mbu tu kavarura.”

Ripura omuini omapuriro nga: ‘Hapo ami e tje puratena kombuze yOuhona ndji me zuvarisirwa, andakuzu mbi ri mozongaku zawo?’ Otjotjihorera, rumwe mba raerwa ovizeze ohunga nOvahongonone va Jehova? Mozongaro otja inḓo, mape ya eṱe wina atu ha yakura ombuze ombwa natu vanga okuraisirwa otjari. Indu tji twe rizemburukisa ohunga nomambo wa Jesus nge tu rakiza okutjinda ovakwetu otja tjinga amatu vanga okutjindwa, tji tu hinga okuraisa otjari nandarire kutja ouzeu okutjita nao.—Mat. 7:12.

HORERA KOTJARI TJA PAULUS

Omuapostele Paulus aa raisa otjari nandarire kovapirure ovanatjitandi. Omena raye? Eye ka zembire mbya tjitire rukuru. Eye wa tja: “Nandarire kutja momayuva nga kapita ami mbe Mu teturura, e Mu tatumisa ne Mu yamburura. Nungwari Ndjambi we ndji tjariparera, tjinga mokuhinangamburiro kwandje tji ye ha tjiwa imbi mbye tjiti.” (1 Tim. 1:13) Eye wa zemburuka kutja Jehova na Jesus ve mu raisira otjari otjinene. Eye aa munu ongaro ye onguru mu imba tjiva mba zuvarisire.

Povikando tjiva, Paulus wa hakaena novapirure ovanamasa vozongamburiro zoposyo. Eye wa raisa ongaro iṋe? Oviungura 17:16 ri tja ngunda Paulus e ri moAtene, “wa kurungisirwe tjinene indu tja munine kutja motjihuro mu noviserekarera novisenginina ovingi tjinene.” Nungwari, Paulus wa ungurisa ongurunguse ndji momuano omuwa wokuyandja omahongononeno omawa.  (Oviung. 17:22, 23) Eye aa rundurura omuano we wokuzuvarisa okuisira kozongaro zovandu pekepeke, ‘kokutja ma yame nangarire tjiva.’—1 Kor. 9:20-23.

Matu yenene okuhorera ku Paulus indu tji matu zuvarisa tji twa hakaene novandu vozongaro ozombi poo wozongamburiro zoposyo, nu okuzambo momuano wounongo atu tanaurire ehungi ndi ‘mombuze ombwa, indji ombuze yohange noyondjamo.’ (Jes. 52:7) Omukambure omukazendu wena Dorothy wa tja: “Momaturiro wetu, ovandu ovengi va hongwa kutja Mukuru ke notjari nu u muna ozondataiziro zetu uriri. Ami mbi tanga ovandu otja imbo kongamburiro ya wo yomasa mu Mukuru nu okuzambo mbi ve raisira imbi mbya tjangwa mOmbeibela kutja Jehova u novikaṋena vyorusuvero nu we tu kwizikira oruyaveze oruwa.”

‘URA OUVI AMO TJITI OUWA’

Otja mbu tu ri kuṱa komaandero ‘womayuva omasenina,’ katjikumise kutja ozongaro zovandu ku tuzuvarisa maze yenene okurunduruka a maze “ryamene ko mouvi.” (2 Tim. 3:1, 13) Posi yokutja atu yandjere ozongaro otja inḓo okutjita kutja atu ha raisa otjari poo okutupandjarisa ondjoroka yetu motjiungura tjokuzuvarisa. Jehova me tu pe omasa tu yenene ‘okuura ouvi ama tu tjiti ouwa.’ (Rom. 12:21) Omukandjira wena Jessica wa tja: “Potuingi mbi hakaena novandu overitongamise mbe he tu raisire ondengero nu mbe ha raisa ondengero kombuze yetu. Ongaro ndji i yenena okutupindikisa. Kombunda yokuhungira ku nomundu, ami mbi kumba momutima ku Jehova ne ningire ombatero kutja mbi mune omundu ngo otja Jehova tje mu muna. Ihi tji isako omamuino wandje omavi nu e yenene okuripura kutja me vatere vi omundu ngo.”

Eṱe tu kayenda komurungu okupaha imba mba pwira omuinyo waaruhe

Tjiva ve raisa ongaro ombwa kozongondjero nḓu tu tjita okuvevatera okuṱuna oupanga wawo kuna Jehova

Wina twa sokuripura kokutja matu tunduuza vi ovakwetu mbu tu zuvarisa pamwe. Jessica wa tja: “Omukwetu tja raisirwa ongaro ombi ndji, ami mbi kondja okuhinokuhungirira ko. Nungwari, ami mbi kondja okurundurura ehungi ndi mehungi ewa, tjimuna oviṋa oviwa mbi tu muna motjiungura tjetu tjokuzuvarisa nandarire kehi yozongaro ozombi nḓu tu muna.”

Jehova u tjiwa nawa omatokero aehe ngu tu muna motjiungura tjokuzuvarisa. Nokutja u yoroka pu pe ṱa pi indu tji matu horere kotjari tje! (Luk. 6:36) Otjingaperi kutja, katu sokuundjira ko kutja Jehova ma kara pokuturaisira otjari nokuhina omaandero. Posi yokutja tu nongamburiro yokutja eye omuini ma tjiwa kutja oruveze orusemba ndu ma yandisa oviṋa mbi ooruṋe. Ngunda oruveze ndo aruhi ye ya, otjiungura tjokuzuvarisa otjinahepero. (2 Tim. 4:2) Ngatu kayende komurungu okuzuvarisa nonḓero nokuyarisa otjari ‘kovandu avehe.’