“Ndjambi wetu, matu ku tjere okuhepa, nu matu hivirike ena roye enene.”—1 EKURUH. 29:13.

OMAIMBURIRO: 1, 48

1, 2. Jehova u ungurisa vi oviṋa mbya uta?

JEHOVA oMukuru ondjandje. Oviṋa avihe mbi tu na vyo vya za ku ye. Jehova ongu ri omuini wongoldo nosilveri noviṋa vyarwe avihe mbi za mehi, neye u vi ungurisa okutupa mbi matu hepa kutja tu kare nomuinyo. (Eps. 104:13-15; Hag. 2:8) MOmbeibela mu nomahungi omengi nge raisa kutja Jehova wa ungurisa vi oviṋa mbya uta okuparura na vyo ovakarere ve momiano omihimise.

2 Oure wozombura 40, Jehova wa parura otjiwaṋa tja Israel nomana nomeva, indu tji tja ri mokuti onguza. (Eks. 16:35) Kunao, Eye “we ve pa avihe mbi va hepere.” (Neh. 9:20, 21) Okupitira momuprofete Elisa, Jehova wa tjita otjihimise na tjiti kutja omaze womiṋinga womuhepundu omuṱakame nga ri omaṱiṱi ye rire omengi. Otjiyandjewa Mukuru tje mu pa tje mu vatera kutja ma yenene okusuta ozondjo ze, nu okuzambo ma kare novimariva mbya yenene ku ye novazandu ve. (2 Ozomb. 4:1-7) Nombatero ya Jehova, Jesus nangarire wa yandja ovikurya kovandu novimariva, indu tjaa pe heperwa po.—Mat. 15:35-38; 17:27.

3. Matu kahungirira ku ye morupa ndwi?

3 Jehova u yenena okuungurisa otjiṋa ngamwa atjihe tji ma vanga  kutja ma parure oviutwa vye kombanda yehi. Posi yokutja eye u ningira ovakarere ve kutja ve ungurise omauini wawo okuvatera oviungura vyotjira tje. (Eks. 36:3-7; lesa Omiano 3:9.) Ongwaye Jehova tje undjira ko kutja tu ungurise omauini wetu okuyandja ku ye? Ovakarere va Jehova ovaṱakame vorukapitaveze va yandja vi ombatero yotjimariva kovakuramene po va Jehova? Otjira tja Jehova ndino tji ungurisa vi ovimariva mbi tji pewa otjoviyandjewa vyouharupu? Omapuriro nga maye kazirwa morupa ndwi.

ONGWAYE TJI TU YANDJA KU JEHOVA?

4. Tji matu yandja ombatero koviungura vya Jehova tu raisa tjike?

4 Tu yandja ku Jehova mena rokutja twe mu suvera, nu tu nondangi koviṋa mbye tu tjitira. Tji matu ripurire koviṋa avihe Jehova mbye tu tjitira, ku tu ṱuna tjinene momuinyo. Indu Ombara David tjaa kahurura ohunga noviṋa mbi mavi hepwa komatungiro wondjuwo ondjapuke, eye wa raisa kutja ngamwa otjiṋa tji matu yandja ku Jehova, matji zu mu imbi Jehova mbye tu pa rukuru.—Lesa 1 Ekuruhungi 29:11-14.

5. Omatjangwa maye raisa vi kutja okuyandja orupa orunanḓengu momerikotameneno wetu?

5 Tu yandja ku Jehova mena rokutja imbwi omuano umwe mu tu rikotamena ku ye. Motjirimunikise, omuapostele Johanes wa zuva ovakarere va Jehova meyuru amave tja nai: “Muhona, Ndjambi wetu, Ove wa pwa ondjozikiro nondengero nomasa; orondu Ove wa uta oviṋa avihe; novyo avihe vya utwa navi pewa omuinyo i ombango yoye.” (Omavan. 4:11) Ko nakuitavera kutja Jehova tjiri wa pwa okupewa ondjozikiro nondengero aihe? Ihi matu yenene okutjita mokumupa omauini wetu inga omasembasemba. Okupitira mu Moses, Jehova wa rakiza otjiwaṋa tja Israel okukara nomayuva yetatu omanene otjikando tjimwe mombura. Otjiṋa tjimwe tjaave undjirwa ko okutjita, tji va ri nomayuva omanene nga, ya ri okuyandja ku Jehova. Aave undjirwa ko kutja ve “eterere otjiyandjewa.” (Deut. 16:16) Kundino wina, okuyandja orupa orunanḓengu rwomerikotameneno wetu. Tji twa tjiti nao matu raisa kutja tu nondangi nu tu vanga okuyandja ombatero kotjiungura tjotjira tja Jehova tjokombanda yehi.

6. Ongwaye tje ri otjiṋa otjiwa ku eṱe okuyandja? (Tara kotjiperendero pomautiro worupa ndwi.)

6 Okuyandja ku eta ouwa ku eṱe oveni. Otjiṋa otjiwa ku eṱe okuyandja, nungwari kaku pewa uriri. (Lesa Omiano 29:21.) Ripura nomuatje ngu ma yandja otjiyandjewa kovanene ve okuza koumariva ouṱiṱi owo mbu ve mu pa. Otjiyandjewa hi matji ṱunu vi kovanene ve? Poo ripura nomuatje ngu ungura otjomukandjira posi yokutja ngu kara pu novanene ve, nu ngu ve pa ovimariva otjomuano wokuvatera okusuta oruveze poo okuranda ovikurya. Otjiperi kutja ovanene ve kave undjire ko kutja eye me ve pe otjiṋa, posi yokutja tje ve pe otjiṋa, mape ya ave kambura. Omena raye tji mave kambura? Mena rokutja mave tjiwa kutja imbo omuano omuatje wawo mu me ve raisire ondangi koviṋa mbi ve mu tjitira. Momuano otjingewo, Jehova u tjiwa kutja tji matu yandja okuza movihuze vyetu mbi tu na vyo, otjiṋa tji tji tu etera ouwa.

OVAKARERE VA JEHOVA RUKURU AAVE YANDJA VI?

7, 8. Ovakarere va Jehova voruveze orukuru va raisa vi otjihorera otjiwa tjokuyandja (a) ombatero koviungura vyorive mbya ri po? (b) ombatero kotjiungura ngamwa atjihe?

7 Ombeibela i raisa kutja ovakarere va Jehova voruveze orukuru aave yandja ombatero kotjiungura tje. Povikando tjiva aave yandja ombatero kotjiungura tjorive. Okutara kotjihorera, Moses wa tunduuza otjiwaṋa tja Israel okuyandja ombatero komatungiro wondanda yomaturiro, tjimuna Ombara David tja tjita komatungiro wondjuwo ondjapuke. (Eks. 35:5; 1 Ekuruh. 29:5-9) Moruveze rwounane wOmbara Joas, ovapristeri va ungurisa ovimariva mbi va wonga okuṱuna ondjuwo ondjapuke ya Jehova. (2 Ozomb. 12:4, 5) Indu ovakambure mombongo yOvakriste tji va raerwa ohunga nouhepe mbwa ri po mena rourumbu,  owo “va tya kutja auhe wawo ma yenene okuhinda po otjiṋa otja pu ma sora okuvatera ovakambure ovakwao mba tura mehi ra Judea.”—Oviung. 11:27-30.

8 Ovakarere va Jehova wina aave yandja ombatero yotjimariva ku imba mbaave hongorere otjiungura tja Jehova. Kehi yOmatwako wa Moses, Ovalevi kaave pewa otjirumatwa tjimuna omihoko vyarwe. Posi yokutja Ovaisrael aave yandja otjitjamurongo, tjaatji vatere Ovalevi okuyandja ombango kotjiungura tjawo pondanda yomaturiro. (Num. 18:21) Momuano otjingewo, pa ri ovakazendu ozondjandje “mbuyave vatere Jesus novahongewa ve nouini wawo oveni.”—Luk. 8:1-3.

9. Oviyandjewa vyouharupu mbyaavi yandjwa rukuru aavi zu pi?

9 Otjiperi kutja oviyandjewa mbi aavi zu momiano pekepeke. Ovaisrael tji va yandja oviyandjewa komatungiro wondanda yomaturiro mokuti ongaango, owo mape ya va yandja oviṋa mbi va isa koEngipte. (Eks. 3:21, 22; 35:22-24) Meserewondo etenga, Ovakriste tjiva va randisa oviṋa mbi va ri na vyo, tjimuna omahi womakunino poo ozondjuwo, nave eta ovimariva kovaapostele. Ovaapostele va haṋa ovimariva mbi mu imba avehe mba ri nouhepe. (Oviung. 4:34, 35) Varwe aave pwike otjimariva aruhe nave tji yandja otjoviyandjewa kombatero yoviungura. (1 Kor. 16:2) Kunao, ovandu mba za mozongaro azehe zehupo, okuza ku imba ovatumbe tjinene nga ku imba ovasyona tjinene, va ri norupa mokuyandja.—Luk. 21:1-4.

OKUYANDJA NDINO

10, 11. (a) Matu yenene vi okuhorera kongaro yokuyandja ovakarere va Jehova voruveze orukuru ndji va raisa? (b) Ove u noumune uṋe ohunga nondjingonekero ndji u na yo yokuyandja ombatero kotjiungura tjOuhona?

10 Kundino wina, mape ya atu ningirwa okuyandja otjimariva koviungura vyorive mbi ri po. Okutara kotjihorera, hapo pe nondando yokutunga Etuwo rOmerikotameneno epe ndi mari ungurisiwa i ombongo yeṋu? Poo Etuwo reṋu rOmerikotameneno mari ṱunwa? Mape ya atu raerwa ohunga nouhepe wotjimariva mbu ri po okuvatera nomaṱunino worutavi rwetu rwomberoo, omaworonganeno wotukondwa ku matu i, poo ombatero ndji mai sokuyandjwa kovakambure ovakwetu mba ri moumba. Wina tu yandja oviyandjewa vyouharupu kombatero ya imba mbe ungura pomberoo yetu ohongora na potutavi twomberoo mouye auhe. Oviyandjewa vyetu mbi vi vatera ovahindwa, ovakandjira vapeke, na imba mbe ri motjiungura tjokuvarura ozombongo. Nu ombongo yeṋu mape ya i nonḓuvasaneno ndji ya tjita yokuyandja ombatero yotjimariva koprograma youye auhe yokutunga Omatuwo wOmaworonganeno omanene nOmatuwo wOmerikotameneno. Nu ihi tji vatera ovakambure ovakwetu mouye auhe.

11 Atuhe matu yenene okukara norupa mokuvatera oviungura Jehova mbye yenenisa momayuva omasenina nga. Oviyandjewa ovingi vyouharupu mbi yandjwa kavi tjiukwa kutja vi za ku uṋe. Eṱe tu twa ovimariva vyetu moukesa wovimariva mbu ri pEtuwo rOmerikotameneno nokuhina okuraera varwe kutja twa yandja vingapi. Poo tu yenena okuyandja oviyandjewa vyetu okupitira morungovi ndwi jw.org. Mape ya atu munu kutja oumariva wetu mbu twa yandja ouṱiṱi tjinene. Ouatjiri owombwi wokutja, ovimariva ovingi mbi yandjwa kotjira tja Jehova, vi za koumariva ouingi ouṱiṱi mbu yandjwa, moruveze rwokuza ku tjiva imbi ovinene tjinene. Ovakambure ovakwetu nangarire mbe hina ovingi, ve ri otja ovakambure moMakedonie mba ri ‘ovasyona tjinene.’ Nungwari ngunda apa ri nao, owo ve riheka nokuriyarikaṋa kutja ve kare norupa motjiungura tjokuyandja kovakambure ovakwao.—2 Kor. 8:1-4.

12. Otjira tja Jehova tji kondja vi okuungurisa ovimariva mbi yandjwa kotjiungura tje momuano omusemba?

12 Orutu Orunane ru kumba ohunga nondando ngamwa aihe ndji mave toora, nu ve kondja nomasa okurira ovaṱakame novanazondunge  momuano mu ve ungurisa ovimariva vyotjira tja Jehova. (Mat. 24:45) Owo ve tya nawa komurungu woruveze ohunga nomuano mu mave ungurisa ovimariva, nu okuzambo ave ungurisa momuano mbwo. (Luk. 14:28) Moruveze orukuru, ovarumendu ovakambure mbaave ungura novimariva mbya yandjwa i ovakambure ovakwao otjoviyandjewa, aave kondjo kutja ovimariva mbyo vi ungurisiwe kondando mbi vya yandjerwa. Okutara kotjihorera, Esra wa ya koJerusalem noviyandjewa mbya pewa i Ombara ya Persie—ongoldo, osilveri noviungurisiwa vyarwe kundino mbi nonḓengu yozondola za Amerika zokombanda omangete 100. Esra aa vara oviṋa mbi otjoviyandjewa mbya yandjwa ku Jehova. Nu wa twapo omirari omikahu mbi mavi tjevere oviyandjewa mbi, tji mavi tjindisiwa okupitira momaturiro nga ri omanaumba. (Esra 8:24-34) Ozombura ozengi kombunda yanao, omuapostele Paulus wa wonga ovimariva okuvatera ovakambure ovakwao moJudea mba ri nouhepe. Eye wa tjita ozongondjero zokutja imba mbu mave twara ovimariva mbyo ve vi ungurise “pu pe ri osemba, nu kakomurungu wa Muhona porwe, nungwari wina komurungu wovandu.” (Lesa 2 Ovakorinte 8:18-21.) Otjira tjetu ndino wina tji horera ku Esra na Paulus, nu tji kongorera omirari omikukutu momuano mu tji ungurisa ovimariva mbi yandjwa otjoviyandjewa kotjiungura tja Jehova.

13. Omarundurukiro nga za nokutjitwa oupe motjira tja Jehova matu sokuyevara vi?

13 Eṱunḓu mape ya ari hepa okutjita omarundurukiro otja tji mari kondjo okusasaneka ovimariva vyawo ovihite kuna imbi ovipite, kutja ave ha ungurisa ovimariva ovingi pu imbi mbi ve muna. Poo mape ya ave hepa okuhendurura oviṋa tjiva mehupo rawo otjomuano wokukara nehupo ndi hi novingi, kutja ve yenene okuungura ovingi motjiungura tja Jehova. Otjiperi nao wina motjira tja Jehova. Mozombura nḓa kapita, motjira tja Jehova mwa ri oviṋa poo oviungura ovipe, nu povikando tjiva aape piti ovimariva ovingi pu imbi mbi hita. Kunao, tjimuna eṱunḓu tji ri tjita, otjira tja Jehova tja uta okutara komiano vyokuhendurura omaungurisiro wotjimariva nokuhendurura oviungura tjiva, kutja tji yenene okuungura ovingi novimariva mbi mu yandja.

OMBATERO NDJI ZA MOVIYANDJEWA VYEṊU

Oviyandjewa vyoye vyouharupu vi vatera oviungura vyetu vyouye auhe (Tara koparagrafa 14-16)

14-16. (a) Ovikeṋa tjiva mbi yenenisiwa i oviyandjewa vyoye vyouharupu? (b) Ove omuini wa muna vi ombatero okuza koviyandjewa mbi?

14 Ovakarere va Jehova ovengi mbu ve mu karera ozombura ozengi ve tja, nai ve muna ombatero onyingi okuza kotjira tja Jehova, nungwari rukuru katji pa ri nao. Nai tu no-jw.org no-JW Broadcasting. Tu no-New World Translation of the Holy Scriptures momaraka warwe omengi. Mombura ndji 2014/2015, pa tjitwa omaworonganeno  wotukondwa wouye auhe, womayuva 3 nga ri nepu ndi “Keep Seeking First God’s Kingdom!” Omaworonganeno nga ya tjitirwa potupare twomanyando otunenenene movihuro 14 mouye auhe. Avehe mba ri mbo va ri nondjoroka onene!

15 Ovengi va raisa ondangi onene kouwa mbu ve muna okuza kotjira tja Jehova. Okutara kotjihorera, omurumendu nomukazendu we mbe karera moAsia va tja nai ohunga no-JW Broadcasting: “Eṱe tu ungura mokahuro okaṱiṱi. Nu ihi tji tjita kutja tu rimune ourike povikando tjiva, nokuzemba ounene wotjiungura tja Jehova. Posi yokutja tji twa zu nokutarera o-JW Broadcasting, tu zemburuka kutja tu neṱunḓu enene rovakambure ovakwetu mouye auhe. Ovakambure ovakwetu ovasuverwa muno ve tjaterwa i o-JW Broadcasting. Tu ve zuva amave tja tji va zu nokutarera ozoprograma zomueze auhe nḓa, ve rimuna okutumbuka popezu nOrutu Orunane. Nai ve nonyuṋe onene okurira ouṋepo motjira tja Mukuru.”

16 Omatuwo wOmerikotameneno ape 2 500 mouye auhe nai ye tungwa poo okuṱunwa. Ouṋepo wombongo imwe moHonduras va tja aave zeri okukara nEtuwo rOmerikotameneno rawo oveni. Nu nai tji va uta okuungurisa Etuwo rawo rOmerikotameneno epe va tja: “Tjiri tu nondjoroka kutja oweṱe orupa rweṱunḓu ra Jehova mouye auhe, nokutja tu neṱunḓu ewa nao rovakambure mouye auhe. Tjiva vawo ve tu vatera okuyenenisa onḓero yetu yokukara nEtuwo rOmerikotameneno momaturiro wetu.” Ovengi va raisa ongaro otjingeyo tji va za nokumuna Ombeibela nomambo warwe nga torokwa meraka rawo, na tji va za nokumuna ombatero kombunda youmba. Poo tji va za nokumuna omuano omazuvarisiro wopoutemba mu ya vatera ovandu momaturiro wawo.

17. Omuano otjira tja Jehova mu tji ungura ndino ku raisa vi kutja Jehova ongu tji pa omasa?

17 Ovandu ovengi mbe heri Ovahongonone va Jehova, ve himwa kutja tu yenena vi okuungura oviṋa avihe mbi nombatero yoviyandjewa vyouharupu uriri. Omunane umwe ngu ungura ponganda onene, wa katara oruveze rwetu rumwe rwomapirindiro. Nu tja za nokurumuna wa himinwe tja zuva kutja oviungura avihe mbyo vi yenenisiwa i ovaungure mbe ha sutwa, nokutja vi yenenisiwa i oviyandjewa vyouharupu nokuhina oviṋa mbi ve randisa poo omiano vyokuwonga ovimariva. Eye wina wa tja eṱe tu yenenisa oviṋa mbi vi hina maavi yenene okutjitwa. Otjiperi! Matu tjiwa kutja tu yenena okutjita avihe mbi mena rokutja Jehova ongu tu pa omasa.—Job 42:2.

OZONDAYA NḒE ZA MOKUYANDJA KU JEHOVA

18. (a) Ozondaya zaye nḓu matu munu tji matu yandja ombatero kotjiungura tjOuhona? (b) Matu yenene vi okuhonga ovanatje vetu na imba ovape ounanḓengu wokuyandja?

18 Jehova u tupa ondjozikiro yokuyandja oruvara kotjiungura tjOuhona. Eye me tu kwizikire kutja tji twa tjiti nao, me tu sere ondaya. (Mal. 3:10) Jehova ma kwizike kutja tji matu yandja nouharupu, matu ṋingapara. (Lesa Omiano 11:24, 25.) Tji matu yandja wina tu kara nenyando, orondu “mokuyandja mu nenyando tjinene pokupewa.” (Oviung. 20:35) Momambo na movihorera vyetu, eṱe tu nondjingonekero yokuhonga ovanatje vetu na imba ovape, okumuna ounanḓengu wokuyandja, kokutja owo wina ve mune ozondaya ozengi.

19. Orupa ndwi rwe ku tunduuza vi?

19 Oviṋa avihe mbi tu na vyo vi za ku Jehova. Tji matu yandja ku ye rukwao tu raisa kutja twe mu suvera nu tu nondangi koviṋa avihe mbye tu tjitira. (1 Ekuruh. 29:17) Indu otjiwaṋa tjaatji yandja oviyandjewa komatungiro wondjuwo ondjapuke, otjo “tja kara nombango okuyandja ku Muhona, nowo va yoroka mena rokutja oviṋa ovingi nai vya yandjwa.” (1 Ekuruh. 29:9) Eṱe wina ngatu kayende komurungu okukara nondjoroka nonḓero yokuyandja ku Jehova imbi mbi twa isa ku ye.