Twende kovidio oini

Twende komurya

Ovahongonone vaJehova

Toorora eraka Otjiherero

 ORUPA RWOMAKONḒONONENO 6

Rira omuṱakame!

Rira omuṱakame!

“Me kara pokutja hi nondjo nga keyuva ronḓiro yandje.”​—JOB 27:5.

EIMBURIRO 34 Okukayenda mousemba

OMAPU KU MATU KATARA *

1. Omomiano viṋe Ovahongonone va Jehova mba hungirwa moparagrafa ndji mu va panḓera pouṱakame wawo?

RIPURIRA kovihorera 3 mbi ma vi kamburire mo Ovahongonone va Jehova. (1) Eyuva rimwe ngunda omuatje omutanda e ri poskole omiṱiri ya ningira ovanatje avehe moklasa okukara norupa motjitjitwa tji tji ha yandja ondjozikiro ku Mukuru. Omukazona omutanda ngwi ma tjiwa nawa kutja omazemburukiro nga kaye tjata ku Mukuru, kunao momuano omuwa eye wa tja ke nokukara norupa movitjitwa mbyo. (2) Omuatje omuzandu omutanda wohoṋi ma zuvarisa okuza kondjuwo nga kondjuwo. Eye wa zemburuka kutja pondjuwo ndji mai kongorere ko pe kara omuatje ngu ve hita pamwe oskole, nu ngwaa pirukire Ovahongonone va Jehova. Nanadarire kutja aa tira omuatje omuzandu omutanda ngwi wa kongora ondjuwo ndjo. (3) Omurumendu ngu neṱunḓu u ungura oukukutu okutwapo omboroto potjitiha. Eyuva rimwe omuhona we e mu ningire kutja ma tjite otjineya. Nandarire kutja eye mape ya a pandjara oviungura vye, omurumendu ngwi wa kahurura komuhona we kutja ma sokukara nouatjiri mena rokutja Mukuru u undjira otjiṋa tjo kovakarere ve.​—Rom. 13:1-4; Hebr. 13:18.

2. Matu katara komapuriro yeṋe, nu omena ratjike?

2 Ovikaṋena viṋe mbi mo munu movandu 3 mba? Mape ya omunu ovikaṋena tjimuna, ouvanḓe nouatjiri. Nungwari avehe va raisa ouṱakame ku Jehova, tji tji ri otjikaṋena tjimwe otjinanḓengu. Auhe wawo wa tjita kutja aha teya omirari vya Mukuru. Ouṱakame wawo we ve hinga kutja ve tjite nao. Jehova tjiri ma kara nonyuṋe mu auhe wawo mokuraisa otjikaṋena hi. Eṱe wina tu vanga okutjita kutja Tate wetu womeyuru ma tjaterwe. Nambano matu katara komapuriro nga: Okurira omuṱakame ku heya tjike? Ongwaye tji tu hepa okurira ovaṱakame? Nokutja  matu yenene vi okupamisa onḓero yetu yokurira ovaṱakame momayuva omazeu nga?

OKURIRA OMUṰAKAME KU HEYA TJIKE?

3. (a) Okurira omuṱakame ku heya tjike? (b) Ovihorera viṋe mbi mavi tu vatere okuzuva omaheero wokurira omuṱakame?

3 Omomuano uṋe ovakarere va Mukuru mu ve raisa ouṱakame wawo? Omokusuvera Jehova nomutima auhe, nu orusuvero ndwo ru ve hinga okutjita imbi mbi tjata ku ye. Ngatu tare komuano embo ndi ouṱakame mu ri ungurisiwa mOmbeibela. MOmeibela embo rOtjiheberi ndi “ouṱakame” ri heya oumbomba, okuhinotjipo poo ouveruke. Otjotjihorera, Ovaisrael aave punguha ovinamuinyo ku Jehova, nu Omatwako aaye tja otjinamuinyo ka tji sokukara notjipo. * (Lev. 22:21, 22) Ovandu va Mukuru kaave yandjerwa okuyandja otjinamuinyo tji tji hina okurama, okutwi, poo tji tji neho rimwe, nu wina kaave yandjerwa okuyandja otjinamuinyo tji tja vera. Tja ri otjiṋa otjinanḓengu ku Jehova otjinamuinyo okurira otjimbomba, otjiveruke nu tji tji hi notjipo. (Mal. 1:6-9) Matu tjiwa nawa kutja ongwaye Jehova tje vanga kutja otjiṋa tji rire otjimbomba poo atji ha kara notjipo. Indu tji twa randa otjiṋa, kutja otjihape, embo, poo otjiungurisiwa ngamwa, eṱe katu vanga ihi tji tji nozondovi poo tji tji hi noviṋa tjiva. Eṱe tu vanga ihi tji tji ri otjimbomba, otjiveruke, poo tji tji hina otjipo. Jehova wina u noumune mbo tji peya korusuvero ndu matu mu raisire nouṱakame wetu. Matu sokuraisa ovikaṋena mbyo okuza komutima tjiri.

4. (a) Ongwaye omundu ngu he ri ohomonena tji ma yenene okurira omuṱakame? (b) Otja kEpsalme 103:12-14, Jehova u undjira tjike ku eṱe?

4 Hapo matu sokurira ohomonena kutja tu rire ovaṱakame? Kako, mena rokutja tu tjita ozondandaiziro ozengi. Ngatu tare komapu 2 wokutja ongwaye tji tu ha sokukara noumune wokutja tu sokurira ohomonena kutja tu rire ovaṱakame ku Mukuru. Otjitenga, Jehova ka yandja ombango kozondataiziro zetu. Embo re ma ri tja: “Tji mo keverere komauvi wetu aruhe, Muhona, owaṋi ngu ma sora okupenga omberero yoye?” (Eps. 130:3) Eye u tjiwa kutja kaweṱe ohomonena, tu nouvi, nu u tu isira. (Eps. 86:5) Otjitjavari, Jehova u tjiwa omasa nomasorero wetu, nu eye ka undjire ko ovingi kweṱe. (Lesa Epsalme 103:12-14.) Omomuano uṋe mu matu yenene okurira ovambomba poo okuura, nu atu ha kara notjipo momeho we?

5. Ongwaye ovakarere va Jehova tji ve hepa okukara norusuvero kutja ve rire ovaṱakame?

5 Ovakarere va Jehova, ve hepa okukara norusuvero kutja ve rire ovaṱakame. Orusuvero rwetu ku Mukuru, nouṱakame wetu ku ye otja Tate wetu womeyuru, mavi sokurira ovimbomba poo okuura nu mbi hi notjipo. Indu orusuvero rwetu tji rwa kara nao nandarire kehi yomarorero, okutja oweṱe ovaṱakame tjiri. (1 Ekuruh. 28:9; Mat. 22:37) Tara rukwao kovihorera vyOvahongonone 3 mba tamunwa pomautiro worupa ndwi. Ongwaye tji ve ritjinda momuano mbo? Hapo omukazona omutanda ka vanga okukara norupa moviṋa vyoskole, poo omuatje omuzandu omutanda ma zeri okupirukirwa pomuvero, poo omurumendu weṱunḓu ma vanga okupandjara oviungura vye? Kako katjiperi. Nungwari, mave tjiwa kutja omirari vya Jehova omisemba, nu owo ve yandja ombango ku imbi mbi yorokisa Tate wawo womeyuru. Orusuvero rwawo ku ye ru ve hinga kutja ve mu twepo omutenga mozondando zawo. Kunao va raisa kutja ovaṱakame.

ONGWAYE TJI TU HEPA OUṰAKAME?

6. (a) Ongwaye tji tu hepa okurira ovaṱakame? (b) Omomuano uṋe Adam na Eva mu ve hina va raisa ouṱakame?

6 Ongwaye atuhe tji tu hepa okurira ovaṱakame? Tu hepa okurira ovaṱakame mena rokutja Satan wa pirukira Jehova, nu eye wina u tu toka.  Omuengeli ngo we ritjita omuini okurira Satan, poo “Omupirukire” motjikunino tja Eden. Eye wa zunḓa ena ewa ra Jehova mokumukuminina kutja omuvi, u ripurira ku ye omuini, nu Omuhonapare ngu hina ouatjiri. Ouhumandu, Adam na Eva va toorora omunda wa Satan mokupirukira Jehova. (Gen. 3:1-6) Ehupo moEden re ve pere oviṋa ovingi oviwa mbya tja vi tjita kutja orusuvero rwawo ku Jehova rukurire ko. Posi yokutja oruveze ndo Satan tje ve toka, orusuvero rwawo karwa ri orumbomba poo okuura. Epu ndo, ra eta epuriro ndi: Hapo omundu mape ya a rire omuṱakame mena rorusuvero rwe ku Jehova Mukuru? Momambo warwe, hapo ovandu mape ya ave yenene okuraisa ouṱakame? Epuriro ndo ra zikama indu Job tja rorwa.

7. Otja tji pa raisiwa mu Job 1:8-11, Jehova wa ri noumune uṋe ohunga nouṱakame wa Job? Satan wa ri noumune uṋe ohunga nouṱakame wa Job?

7 Job wa hupire moruveze indu Ovaisrael tji va ri moEngipte. Kapa ri omundu omuṱakame tjimuna Job moruveze rwe. Tjimuna eṱe, omurumendu ngo ka ri ohomonena. Eye aa tjiti ozondataiziro. Nungwari, Jehova wa suverere Job mena rouṱakame we. Pe munika aayo Satan wa yamburura Jehova rukuru ohunga nouṱakame wovandu. Kunao Jehova wa nanena ombango ya Satan ku Job. Ehupo romurumendu ngo ra raisa kutja Satan omunavizeze! Satan wa vanga kutja ouṱakame wa Job u rorwe. Jehova wa ri nongamburiro mepanga re Job, kunao Eye wa yandjera Satan okumurora.​—Lesa Job 1:8-11.

8. Omomuano uṋe Satan ma rora Job?

8 Satan ke nombinḓu komutima, nu omuzepe. Eye wa yeka Job oviṋa avihe, a zepa ovakarere ve, nu a zunḓa ena re. Satan wa wira eṱunḓu ra Job, nu a zepa ovanatje ve 10 ovasuverwa. Okuzambo wa tjita kutja Job ma vere omutjise omuzeu, eye wa pitire ovirwarwo  morutu aruhe okuza kotjiuru nga kozombaze. Omukazendu wa Job wa ri nombameno nomuhihamwatima tjinene, kunao eye wa raera Job okuyamburura Ndjambi ma ṱokukoka. Nandarire kutja Job omuini aa zeri okukoka, eye wa panḓera pouṱakame we. Satan okuzambo wa rora Job momuano warwe rukwao. Eye wa ungurisa ovarumendu 3 mba ri omapanga wa Job. Ovarumendu 3 mbo va varura Job oure womayuva, nungwari kave mu pere omahuhumiṋino ngaa hepa. Nungwari owo ve mu hungira omambo omavi. Owo va tja Mukuru ongwe mu etere omauzeu ngo nu ke nakonatja nouṱakame we. Owo wina va tja Job omurumendu omurunde ngwa pwire okumuna omauzeu ngo!​—Job 1:13-22; 2:7-11; 15:4, 5; 22:3-6; 25:4-6.

9. Job wa panḓa okutjita tjike nandarire kutja wa ri kehi yomauzeu?

9 Hapo Job wa tjinda vi omauzeu aehe nga? Eye ka ri ohomonena. Momazenge eye wa hungira ovemuhuhumiṋe voposyo mbo, omambo kombunda eye nga kamuna kutja kaya ri omawa. Job ee rivara omusemba komurungu wa Ndjambi. (Job 6:3; 13:4, 5; 32:2; 34:5) Nungwari, nandarire indu ongaro ye tji ya ririra ko onḓeu, Job wa panḓa okupirukira Jehova Mukuru. Eye wa panḓa okukambura movizeze vyomapanga we. Job wa tja: ‘Ami himee tja eṋe varumendu mu ri osemba; me kara pokutja hi nondjo nga keyuva ronḓiro yandje.’ (Job 27:5) Omambo ngo ye raisa kutja Job we rimanena okuhina okuisa ouṱakame we kutja pe ya ye. Job wa panḓera pouṱakame we, eṱe wina matu yenene okutjita nao.

10. Omomuano uṋe ove mu u norupa mombata Satan ndja zikamisa ohunga na Job?

10 Hapo omomuano uṋe ove mu u norupa mombata Satan ndja zikamisa ohunga na Job? Mouatjiri, eye u tja ove ko ya suvera Jehova Mukuru, nokutja ove mo isa okumukarera kokutja u riyame omuini, nu u tja ove ko nokuyenena okuṱiza ouṱakame woye! (Job 2:4, 5; Omavan. 12:10) Iho matji ku ṱunu vi? Otjingaperi kutja otjihihamise tjinene kove? Posi yokutja, ripurira ku imbi: Jehova u yandjera Satan okurora ouṱakame woye. Eye u nongamburiro ndja yenene move, opezokukupa oruveze okuraisa ouṱakame woye mu ye, nu u raise kutja Satan omunavizeze. Jehova u nongamburiro kutja mo yenene okurira omuṱakame, nu Eye we ku kwizikira kutja me ku vatere okuṱiza ouṱakame woye. (Hebr. 13:6) Tjiri indjo ondjingonekero yapeke Omuhonapare wevaverwa arihe okukara nongamburiro move! Ongwaye ouṱakame tje ri otjiṋa otjinanḓengu tjinene? Ku tu vatera kutja tu raise kutja Satan omunavizeze, nu tu tongamise ena ewa ra Tate wetu, nokuyandja oruvara komananeno We. Matu sokutjita vi kutja tu rire ovaṱakame?

OKURIRA OVAṰAKAME MORUVEZE NDWI

11. Matu rihongere kotjike ku Job?

11 Omarorero wa Satan kovakarere va Mukuru ye ri rira ko omengi tjinene “momayuva omasenina” omazeu nga. (2 Tim. 3:1) Hapo motuveze otuzeu twi, matu yenene vi okukurisa ouṱakame wetu? Matu yenene okurihonga ovingi okuza ku Job. Povikando ovingi Job ngunda e hiya rorwa, eye aa tjiukirwa kouṱakame we. Tara koviṋa 3 mbi matu yenene okurihongera ku Job ohunga nokukurisa ouṱakame wetu.

Omomiano viṋe mu matu yenene okupanḓera pokukurisa ouṱakame wetu? (Lesa oparagrafa 12) *

12. (a) Otja pa tamunwa mu Job 26:7, 8, 14, ovikeṋa mbya vatera Job okukurisa ondengero ye ku Jehova? (b) Omomuano uṋe mu mape ya atu kurisa ondengero yetu ku Mukuru?

12 Job we kurisa orusuvero rwe ku Mukuru mokukara nondengero ku Jehova. Job aa twapo oruveze okuripurira koviutwa vya Jehova oviwa ovimanise. (Lesa Job 26:7, 8, 14.) Eye tji me ripurire koviutwa vya Jehova tjimuna ehi, eyuru, novikamba, notuṱuṱumo aa vi mu himisa tjinene, posi yokutja eye aa tjiwa kutja imbi  oviṋa oviṱiṱi uriri mbi ma tjiwa ohunga noviutwa avihe. Job wina wa raisa ounanḓengu womambo wa Jehova. Eye wa tja: “Mbi kongorera ombango Ye.” (Job 23:12) Job wa himisirwe i oviutwa vya Jehova nu ondengero ye ku Jehova ye mu hinga okumusuvera nokuvanga okumuyorokisa. Kunao Job we rimanena okupanḓera pouṱakame we nomasa tjinene. Matu hepa okutjita tjimuna Job tja tjita. Eṱe tu tjiwa ovingi ohunga noviutwa vya Jehova okukapita ovandu voruveze rwa Job. Eṱe wina tu nOmbeibela aehe okutuvatera okutjiwa Jehova nawa. Avihe mbi matu rihongo ma vi tu vatere okuurisa omitima vyetu noviṋa oviwa. Okuraisa ondengero kombango ya Jehova ku tu hinga kutja tu mu suvere nokukara nonḓuviro ku ye, nu tu kare nonḓero yokurira ovaṱakame.​—Job 28:28.

We strengthen ourselves to keep our integrity by rejecting pornography (See paragraph 13) *

13-14. (a) Otja tji pa raisiwa mu Job 31:1, Job wa raisa vi kutja wa ri nonḓuviro? (b) Omomuano uṋe mu mape ya atu horere kotjihorera tja Job?

13 Onḓuviro ya Job moviṋa avihe ye mu vatera okurira omuṱakame. Job aa tjiwa kutja ma hepa okukara nonḓuviro ku Jehova kutja ma rire omuṱakame. Mouatjiri, ovitjitwa vyetu vyonḓuviro vi pamisa onḓero yetu yokurira ovaṱakame. Eyuva arihe Job aa ungura oukukutu okukara nonḓuviro ku Mukuru. Otjotjihorera, eye aa tjiwa kutja u sokuritjinda vi kuna ovakazendu varwe. (Lesa Job 31:1.) Otjomurumendu ngwa kupa, eye aa tjiwa kutja ka nawa okunyanda orombe kuna omukazendu ngu he ri owe. Ndino, tu hupa mouye mbu tjita kutja i rire ouzeu kweṱe okurwisa oruvakiro. Otja Job, hapo matu nakaura ongaro yokuyandja ombango pu tu ha sere komundu ngu tu hiya kupasana? Hapo eṱe matu nakaura okutara koviṋa ovinanambango mbi ri ovihakohoke poo koviperendero vya kamuzu? (Mat. 5:28) Eṱe tji twa ungurisa omeritjaerero eyuva arihe, tji tu vatere kutja tu pamisa ouṱakame wetu.

We strengthen ourselves to keep our integrity by having a balanced view of material things (See paragraph 14) *

14 Job wina wa ri nonḓuviro ku Jehova koumune we ohunga nomauini. Job aa munu kutja tja twa mo ongamburiro ye momautumbe, eye ma tjiti ourunde mbwa pwire omberero. (Job  31:24, 25, 28) Ndino, tu hupa mouye wovandu mba suvera oviṋa vyouye tjinene. Tji tu noumune ouwa ohunga novimariva nomauini otja Ombeibla pu i tu rakiza, ihi matji pamisa onḓero yetu yokurira ovaṱakame.​—Omiano 30:8, 9; Mat. 6:19-21.

We strengthen ourselves to keep our integrity by keeping our hope alive (See paragraph 15) *

15. (a) Omaundjiro yeṋe nga vatera Job okupanḓera pouṱakame we? (b) Ongwaye okuripurira komaundjiro Jehova ngu me ke tu pa tji mape ya aye tu vatere?

15 Okuyandja ombango komaundjiro Mukuru ngu me ke mu pa kwa vatera Job okurira omuṱakame. Eye aa kambura kutja Mukuru u ripurira kouṱakame we. (Job 31:6) Nandarire tja ri kehi yomarorero, Job wa ri nongamburiro kutja komaandero Jehova me ke mu pa ondjambi. Ongamburiro ndji ye mu vatera kutja ma panḓere pouṱakame we. Nandarire kutja Job ka ri ohomonena, Jehova wa ri nonyuṋe mouṱakame we, kunao Eye we mu pa outumbe ouingi kombanda ya imbwi mbwa ri nawo rutenga! (Job 42:12-17; Jak. 5:11) Job wina ma kamuna ozondaya ozombwa kombanda yanao moruyaveze. Hapo ove u nongamburiro yomasa kutja Jehova ma kasera ondaya kouṱakame woye? Mukuru ka runduruka. (Mal. 3:6) Indu tji twa zemburuka kutja eye u vara ouṱakame wetu pondondo yokombanda, ihi matji tu vatere kutja tu kare nomaundjiro omawa woruyaveze nongamburiro yomasa.​—1 Tes. 5:8, 9.

16. Eṱe tu sokurimanena okutjita tjike?

16 Rimanena, okupanḓera pouṱakame! Povikando tjiva mape ya o rimunu kutja oove erike ngu panḓera pouṱakame, nungwari ka ove erike. Pe novandu omangete omengi ovaṱakame mouye auhe. Ove wina mo kara norupa moruteto rwovarumendu novakazendu mba panḓera pouṱakame wawo oruveze orukuru, nandarire kehi yoṋiṋikizire yonḓiro. (Hebr. 11:36-38; 12:1) Job wa tja: “Me kara pokutja hi nondjo.” Tjimuna Job eṱe atuhe ngatu panḓere pouṱakame wetu. Ngatu raisa ouṱakame wetu ku Jehova nga aruhe, kokutja tu mu yozike!

EIMBURIRO 124 Rira omuṱakame aruhe

^ par. 5 Okurira omuṱakame ku heya tjike? Ongwaye Jehova tje vanga kutja ovakarere ve ve kare notjikaṋena ho? Omena ratjike ouṱakame tje ri otjiṋa otjinahepero kourike wetu? Orupa ndwi maru ke tu vatera okumuna omaziriro komapuriro ngo, okuza mOmbeibela. Wina maru ke tu vatera okumuna omuano mu matu yenene okupanḓera pouṱakame wetu eyuva arihe. Okutjita nao maku tu etere ozondaya ozengi.

^ par. 3 Embo rOtjiheberi ndi “okuhinotjipo” ndi ungurisiwa kovinamuinyo ri hitasana nembo ndi “ouṱakame” ndi ungurisiwa kovandu.

^ par. 50 OMAKAHURURIRO WOVIPERENDERO: Matu munu Job otjomurumendu omutanda ma hongo ovanatje ve tjiva ohunga noviutwa vya Jehova ovinanambango.

^ par. 52 OMAKAHURURIRO WOVIPERENDERO: Omurumendu omukambure ma nakaura okutarera oviperendero vya kamuzu kuna ovandu mbu ve ungura pamwe.

^ par. 54 OMAKAHURURIRO WOVIPERENDERO: Omurumendu omukambure ma pirukire ouripura wokuranda o-tiivi onene ndji nondiru nu ndje hi nokuihepa.

^ par. 56 OMAKAHURURIRO WOVIPERENDERO: Omurumendu omukambure ma ungurisa oruveze rwe okukumba nokuripurira ko oukoto komaundjiro wOparadisa.