Twende kovidio oini

Twende komurya

Ovahongonone vaJehova

Toorora eraka Otjiherero

Omuretima—Onḓarorure ndji nomaundjiro

Omuretima—Onḓarorure ndji nomaundjiro

MENA rozombamisiro nḓe ku rira ko “momayuva omasenina” nga, ovakarere va Jehova ve hepa okukara nomuretima tjinene. (2 Tim. 3:1-5) Eṱe twa koverwa i ovandu mbe ripahera oveni ouwa, mbe ha hangana, nu mbe hi nomeritjaerero. Imba mbe raisa ozongaro nḓo ve raisa kutja kave nomuretima oparukaze. Kunao, ma rire nawa Omukriste auhe tje ripura kutja: ‘Hapo mba uta okuhinokukara nomuretima tjimuna ovandu vouye mbwi? Okukara nomuretima tjiri ku heya tjike? Me tjiti vi kutja mbi kare notjikaṋa otjiwa tjOukriste hi oure womuinyo wandje?’

OKUKARA NOMURETIMA KU HEYA TJIKE

MOmbeibela, embo ndi omuretima ri kamburira mo oviṋa vyarwe wina pendje nokuundja otjiṋa uriri. Omundu ngu nomuretima u kara nomaundjiro. Eye ka twapo ozonḓero ze poruveze orutenga, nungwari u ripurira komuano wokuṱuna ondjakaha ndja kara na yo ku nomundu warwe nokuvatera omundu ngo. Mena ra nai, omundu ngu nomuretima tja tjindwa navi, eye ka yumbu ohama nungwari u kondja okuṱuna oupanga mbo. Okutja kaukumise, Ombeibela tji i tamuna “omuretima” otjotjikaṋena otjitjavari vya imbi oviwa okukongorera korusuvero. * (1 Kor. 13:4) Embo ra Mukuru wina ri tamuna “omuretima” otja tjimwe ‘tjovihape vyOmbepo.’ (Gal. 5:22, 23) Hapo, nambano tu hepa ye kutja tu kare notjikaṋena hi?

OMUANO WOKUKARA NOMURETIMA

Kutja tu kare nomuretima, nga tu ningire ombepo ya Jehova ondjapuke mongumbiro, eye ndje yandja ku imba mbe kambura mu ye nokuṱaṱera ku ye. (Luk. 11:13) Nandarire kutja ombepo ya Mukuru i nomasa, eṱe wina tu hepa okuyeta orupa rwetu nokuungura mombwaneno nozongumbiro zetu. (Eps. 86:10, 11) Mape hee kutja eṱe oveni nga tu kondje okukara nomuretima kutja tu hare omize vya wo eyuva arihe. Nu wina matu hepa okuungura ovingi kombanda ya nao, kutja omuretima u rire otjiṋa ku matu tjiukirwa oure womuinyo wetu. Nu ovikwaye vyarwe mbi mavi tu vatere?

Matu yenene okukara nomuretima indu tji matu konḓonona omuano Jesus mbwaa raisa omuretima na tu horere ku ye. Mokuripurira kotjihorera ho, omuapostele Paulus wa hingwa i ombepo ondjapuke indu tjaa hungire ohunga “nomundu omupe,” wina ngu sokukara “nomuretima,” okuzambo wetu raera kutja “ohange Kristus ndje yandja ngai honapare mongaro yeṋu.” (Kol. 3:10, 12, 15) Matu yenene okuyandjera kutja ohange ndjo i “honapare” momitima vyetu indu tji matu horere kongamburiro ya Jesus ndji ha teratera, yokutja Mukuru omuini ma ṱunu oviṋa mbi tu hihamisa mouye mbwi oruveze rwe tji rwa yenene. Tji twa horera ku Jesus, eṱe ka maa tu pandjara omuretima wetu mena roviṋa ovivi mbi mavi tjitwa ongondoroka na eṱe.—Joh. 14:27; 16:33.

Nandarire kutja tjiri tu vanga kutja ouye oupe Mukuru mbwa kwizika u ye nai, ngunda tu hepa okukara nomuretima tjimuna Jehova  tje nomuretima na eṱe. Omatjangwa ye tu zemburukisa ouatjiri mbwi: ‘Muhona ka wombo okutjita imbi mbya kwizika otja tjiva tji ve ripura. Moruveze rwanao Eye u nomuretima na eṱe, tjinga e ha vanga kutja omundu nangarire umwe a yandekwe, nungwari tjinga e vanga kutja atuhe tu ritanaure komauvi wetu.’ (2 Petr. 3:9) Ndovazu Mukuru u nomuretima na eṱe pu pe ṱa mbo, hapo ka tja tu kara nomuretima novandu varwe? (Rom. 2:4) Nu hapo oruṋe tji tu hepa okukara nomuretima?

OZONGARO MU TU HEPA OKUKARA NOMURETIMA

Tu hepa okukara nomuretima mehupo retu reyuva arihe. Ngatu tje rumwe u notjiṋa otjinanḓengu tji movanga okuhungira ngunda varwe ama ve hungire, mo hepa okukara nomuretima nu oundju kaṱiṱi kutja o ha ri ovakweṋu omaraka. (Jak. 1:19) Nu rukwao mape ya o hepa okukara nomuretima indu tji uri pu novakambure ovakweṋu mbe tjita oviṋa mbi ku ungura kotjiuru. Pendje nokuvepindikira, ma rire ounongo okuzemburuka omuano Jehova na Jesus mu ve kara nomuretima koungundipare wetu. Owo ka ve yandja ombango kozondataiziro nḓu tu tjita. Moruveze rwa nao, owo ve muna oviṋa oviwa mbi tu tjita na ve kara nomuretima na eṱe indu tji matu tjiti ozongondjero okutjita ouwa.—1 Tim. 1:16; 1 Petr. 3:12.

Ongaro yarwe omuretima wetu mu mau yenene okurorwa eendu rumwe omundu tje tu raere kutja twa hungire poo tu notjiṋa tji twa tjiti navi. Popengi, tu toora omazenge tjimanga nokukondja okuraisa kutja ka tu tjitire nao. Nungwari, Embo ra Mukuru ri tu raera omuano warwe. Oro ri tja: “Omundu ngu nomuretima eye omusemba pu ingwi ngu ritongamisa. O hakahana okupindika mombepo, orondu omapindi owo ohama momutima weyova” (Omuzuv. 7:8, 9) Okutja, nandarire kutja matu kumininwa, nga tu kare nomuretima nu tu ripure kutja matu ziri vi. Jesus wina wa tjita nao indu tja kumininwa nokuhungirwa omambo omavi.—Mat. 11:19.

Nu ovanene tjinene wina ve hepa okukara nomuretima tji va munu kutja ovanatje vawo va utu okuraisa ongaro ombi, okunanukirwa i ozonḓuma zourunde noviṋa vyarwe mbi kara movanatje. Tara kotjihorera tja Mattias, ngu karera po Betel ya Scandinavia. Otjomutanda, Mattias wa munine omatokero omazeu moskole mena rongamburiro ye. Pomautiro, ovanene ve kaa ve tjiwa otjiṋa hi. Nungwari, owo aa ve munu ongaro ombi omuatje ndja raisa mena roviṋa mbya vi tjitwa ku ye, nga tja uta okuripura kutja hapo nai imbwi ouatjiri. “Otjiṋa hi tjiri aa tji hepa omuretima,” Gillis, ihe ya Mattias wa tja nao. Mattias aa pura oviṋa tjimuna: “Mukuru ouṋe? Hapo tjike Ombeibela tji ri heri Embo ra Mukuru? Matu tjiwa vi kutja tjiri o Mukuru ngu vanga oviṋa mbi tu tja u vanga na mbye ha vanga?” Nu wina aa hungire ku ihe kutja: “Ongwaye tji me sokupangurwa indu tji mbi ha munu oviṋa nokukambura moviṋa eṋe mbi mu kambura?”

Gillis wa hungira komurungu na tja: “Povikando omuatje wetu aa pura oviṋa nomapindi, kaa pindikire ami poo ina, nungwari aa pindikire ouatjiri, mbwa munu kutja ombu mu yetera ouzeu.” Gillis wa ṱuna vi otjiṋa hi? “Povikando tjiva ami nomuatje wandje aa tu hama atu hungire oure wozoiri. Povikando ovingi ami ee  puratene ku ye nokumupura omapuriro wakauriri kutja mbi mune kutja ouzeu we auhe u ri pi. Povikando tjiva ee mu raera oviṋa okuripurira ko omayuva omaṱiṱi ngunda atu hi ya yaruka nehungi retu rukwao. Povikando vyarwe, ee mu raere kutja me hepa omayuva omaṱiṱi okuripurira koviṋa eye mbye ndji raerere. Okupitira momahungi nga, Mattias wa uta okuzuva oviṋa nawa nokuyakura oviṋa tjimuna otjisuta tjonguturiro, nousemba wa Mukuru womananeno, norusuvero rwa Jehova. Pa kambura oruveze, nu kaa ri oupupu, posi yokutja, wa uta okusuvera Jehova okuza komutima. Ami nomukazendu wandje tu nondjoroka kutja okukara nomuretima tjaa tu vatere omuatje wetu moumutanda we kwa yeta ondjambi ombwa.”

Gillis nomukazendu we va ṱaṱera kombatero ya Jehova tjaa ve vatere omuatje wawo nomuretima. Tji ma zemburuka oruveze ndo, Gillis wa tja: “Popengi ee raere Mattias kutja omuano mbu twe mu suvera we tu hinga kutja ami na ina tu mu kumbire nomasa kutja Jehova me mu vatere okuzuva oviṋa nawa.” Tjiri ovanene mbo ve nondangi kutja va raisa otjikaṋena otjinanḓengu tjomuretima!

Kombanda yokuvatera varwe okukurisa oupanganga wawo na Jehova, Ovakriste va tjiri wina ve kara nomuretima norusuvero indu tji mave vatere omusuverwa wawo ngwa vera orure poo omapanga wawo. Tara kotjihorera tja Ellen, * ngu kara moScandinavia wina.

Ozombura ape hambondatu nḓa kapita, omurumendu wa Ellen wa wa orumbembera povikando vivari ndwe mu ṱuna kouruvi. Mena ra nao, eye ka yenene okukara nondjenda novandu rukwao, poo nondjoroka, poo nandarire okuhihamwa omutima. Otjiṋa hi tjiri otjizeu ku Ellen. Eye u tja: “Tjiri pe hepa omuretima nozongumbiro, etjangwa ndi ndji huhumiṋa tjinene Ovafilipi 4:13, ndi tja: ‘Ami me yenene okutjinda avihe, Kristus tjinga e ndji pa omasa womasorero.’” Okuhepa komasa ngo, Ellen u tjinda otjiṋa hi nomuretima nongamburiro yomasa mombatero ya Jehova.—Eps. 62:5, 6.

HORERA KOMURETIMA WA JEHOVA

Otjiperi kutja, tji matu sokuraisa omuretima, Jehova ee mundu ngu matu sokuhorera ko. (2 Petr. 3:15) MEmbo ra Mukuru mu nomahungi omengi womuano Jehova ma raisa omuretima tjinene. (Neh. 9:30; Jes. 30:18) Otjotjihorera, hapo Jehova wa raisa ongaro iṋe indu Abraham tja pura ongurameno ye yokunyona Sodom? Kotjirutenga, Jehova kena pa wira Abraham momambo ngunda ama hungire. Nungwari, Jehova wa puratena omapuriro ayehe wa Abraham nomuretima. Okuzambo Jehova wa raisa kutja wa puratena ku Abraham nawa, nu aya rukire moviṋa Abraham mbya hungire, nu e mu raere kutja ke nokunyona Sodom nandarire kutja mu novarumendu omurongo ovasemba motjihuro ho uriri. (Gen. 18:22-33) Tjiri iho otjihorera otjiwa tjomuretima okupuratena nokuhinokutoora omazenge!

Tjiri okukara nomuretima otjiṋa otjinanḓengu nu otjikaṋena tjomundu omupe Ovakriste avehe tji va sokukara na tjo. Tji twa ungura oukukutu okukara notjikaṋena ho, tu hivirika Tate wetu worusuvero nu ngu nomuretima, nu matu varwa mu na ‘imba mbe nongamburiro nomuretima, kokutja tu rumate imbi Ndjambi mbya kwizika.’—Hebr. 6:10-12.

^ par. 4 Orusuvero rwa hungirirwa ko morupa orutenga rotupa muvyu tongongorasaneno yovihape vyombepo ya Mukuru ondjapuke.

^ par. 15 Ena ra rundururwa.