Twende kovidio oini

Twende komurya

Ovahongonone vaJehova

Toorora eraka Otjiherero

Orusuvero​—⁠Otjikaṋena otjihuze

Orusuvero​—⁠Otjikaṋena otjihuze

JEHOVA wa hinga omuapostele Paulus okutjanga ohunga novikaṋena muvyu mbi za mombepo ondjapuke. (Gal. 5:22, 23) Ovikaṋena mbi avihe vi isanewa “ovihape vyOmbepo.” * Ovihape mbi wina vi notjiṋa ‘nomundu omupe’ Ovakriste ngu mave sokurihwikika. (Kol. 3:10) Tjimuna omuti tji wa tjatjwa nawa tji u eta ovihape, omundu wina ma kara novikaṋena oviwa, ombepo ondjapuke tji i ryanga oupupu mehupo re.—Eps. 1:1-3.

Otjikaṋena otjitenga tjombepo ondjapuke Paulus tja hungirira ko ya ri otjikaṋena otjihuze hi orusuvero. Otjo otjihuze pu pe ṱa pi? Paulus wa tja nokuhina orusuvero, eye ‘katjiṋa.’ (1 Kor. 13:2) Nu hapo orusuvero otjikeṋa, nu matu yenene vi okukara na ro nokururaisa eyuva arihe?

ORUSUVERO RU RAISIWA VI?

Nandarire kutja ouzeu okukahurura kutja orusuvero tjiri otjikeṋa, Ombeibela i kahurura kutja omundu worusuvero u ripura vi nu u tjita vi. Okutara kotjihorera, omundu worusuvero u “nomuretima, nounyaṋutima” nu u “yorokera ouatjiri.” Omundu tje norusuvero eye u ‘zara oviṋa avihe nu u nongamburiro moviṋa avihe, u nomaundjiro moviṋa avihe nu u nonḓaro orure mu avihe.’ Omundu otja ingo wina u suvera varwe tjinene, u rikendera ku wo, nu epanga eṱakame. Nungwari omundu tje hi norusuvero, eye u kara neruru, u rira omuritongamise, omundu wongaro ombi, ngu ripurira ku ye omuini uriri nu ngu ha isire varwe. Moruveze rwokuraisa ovikaṋena ovivi otja imbyo, eṱe tjiri matu sokuraisa orusuvero rwatjiri ku varwe, orusuvero ndu he “ripahere ombwiro yarwo.”—1 Kor. 13:4-8.

JEHOVA NA JESUS OVIHORERA OVIWA VYORUSUVERO

‘Ndjambi orusuvero.’ Nu ihi ootjikaṋena ketjiukirwa. (1 Joh. 4:8) Oviungura vye avihe novitjitwa vye avihe vi hongonona orusuvero rwe. Eye wa raisa orusuvero orunenenene kovandu indu tja hinda Jesus kutja me yekutatumisiwa nokutuṱira. Omuapostele Johanes wa tja: “Nu Ndjambi wa raisa orusuvero rwe ku eṱe, indu tja hinda Omuna we erike porwe kouye, kokutja eṱe tu mune omuinyo mu Ye. Norusuvero rwakatjotjiri ru ri nai: Kakutja oweṱe mbu twa suvera Ndjambi, nungwari Eye ongwe tu suvera na hindi Omuna we kokutja mu Ye eṱe tu isirwe omauvi wetu.” (1 Joh. 4:9, 10) Mena rorusuvero rwaMukuru, tu yenena okumuna ondjesiro komauvi wetu nu tu yenena okukara nomaundjiro nomuinyo.

Jesus wa raisa orusuvero rwe kovandu mokuyenenisa ombango yaMukuru nonḓero. Paulus wa tjanga kutja Jesus wa tja: “OwAmi ngwi, Ndjambi, mbi nonḓero okuyenenisa ombango yoye. . . . Jesus Kristus tjinga a tjita imbi Ndjambi mbya vanga, eṱe atuhe otjinga atwa kohororwa komauvi i ombunguhiro yorutu rwe omuini, nambano na aruhe.” (Hebr. 10:9, 10) Kape nomundu ngwaa yenene okuraisa orusuvero orunene otja indo. Jesus wa tja: “Orusuvero orunenenene omundu ndwe na ro komapanga we eendu tji me ve yandjere omuinyo we.” (Joh. 15:13) Nu hapo matu yenene okuhorera orusuvero ndu twa raisirwa i Jehova na Jesus nangarire kutja kaweṱe ohomonena? Ii matu yenene! Ngatu tare kutja matu yenene vi okutjita nao.

 “ONGARERO YEṊU NGAI RIRE OYORUSUVERO”

Paulus we tu tunduuza nomambo nga: “Eṋe tjinga amu ri ovanatje ovasuverwa vaNdjambi, kondjeye okuhorera ku Ye. Ongarero yeṋu ngai rire oyorusuvero otja Kristus tje tu suverere notja tja yandjere eṱe omuinyo we.” (Ef. 5:1, 2) Nu hapo etjangwa tji mari tja “ongarero yeṋu ngai rire oyorusuvero” mari hee tjike? Mari hee kutja matu sokuraisa orusuvero oruveze aruhe. Katu sokuhungira uriri kutja twa suvera varwe. Tu sokuraisa movitjitwa vyetu. Johanes wa tja: “Vanatje vandje, orusuvero rwetu aru rire omambo nokuhungira porwakwo; ngaru rire orusuvero rwouatjiri, nu ngaru riraise oruini movitjitwa.” (1 Joh. 3:18) Okutara kotjihorera, eṱe tu zuvarisa “Ombuze Ombwa yOuhona,” mena rokutja twa suvera Jehova novakwetu. (Mat. 24:14; Luk. 10:27) ‘Ongarero yetu i rira oyorusuvero’ indu tji tu nomuretima, tji tu raisa ouwa na tji tu isira varwe. Kunao, Ombeibela mai tu rongo nomambo nga: “Mamu sokuisirasana otja Muhona punga e mu isira.”—Kol. 3:13.

Tji matu rongo nokuvyura varwe, kaku nakuheya kutja katu ye ve suvera. Otjotjihorera, okanatje tji make riri, ovanene tjiva ve yandja oviṋa ngamwa avihe okanatje mbi make vanga kutja ke mwine. Posi yokutja omunene tja suvera okanatje ke tjiri, eye kamaa yandja atjihe omuatje tji ma vanga nungwari ma kara nongurameno tje ri ohepero. Momuano otjingewo, nandarire kutja Mukuru orusuvero, eye “u vyura ingwi ngwa suvera.” (Hebr. 12:6) Okutja okuyandja omavyuriro tje ri ohepero ku raisa orusuvero. (Omiano 3:11, 12) Posi yokutja zemburuka kutja atuhe kaweṱe ohomonena nu povikando tjiva katu raisa orusuvero. Kunao, atuhe matu yenene okutjita omarundurukiro momuano mbu tu raisa orusuvero. Matu yenene vi okutjita nao? Ngatu tare komiano vitatu mu matu yenene okutjita nao.

MATU YENENE VI OKUKARA NORUSUVERO?

Rutenga, ningira Mukuru kutja me ku pe ombepo ye ondjapuke ndji tu pa orusuvero. Jesus wa tja nai ohunga na Jehova: “Ku imba mbu mave ningire Eye me ve pe Ombepo ondjapuke!” (Luk. 11:13) Kunao, eṱe matu yenene okukara nongamburiro kutja tji twa ningire ombepo ondjapuke natu yandjere kutja i tu vatere, matu yenene okukara norusuvero. (Gal. 5:16) Otjotjihorera, tji u ri omunene wombongo, ove mo yenene okuningira ombepo ondjapuke kutja i ku vatere okuraisa orusuvero tji mo rongo varwe okuza mOmbeibela. Poo tji u ri omunene, mo yenene okuningira ombepo ondjapuke i ku vatere kutja o ha vyura ovanatje voye momapindi nungwari u ve vyure momuano worusuvero.

Omuano outjavari, ripurira oukoto komuano Jesus mbwa raisa orusuvero nandarire kutja varwe aave mu tjindi navi. (1 Petr. 2:21, 23) Indu omundu tje ku pindikisa poo tji wa tjindwa navi, ripura omuini kutja, ‘Jesus atja tjita vi?’ Omukazendu omukambure wena Leigh wa muna kutja okuripura epuriro ndo, ku mu vatera okuripura ngunda e hiya toora omukambo ngamwa auhe. Eye wa tja: “Otjikando tjimwe, omukwetu ngu tu ungura pamwe wa hinda oimeila, ndjaai hungire oviṋa ovivi ohunga na ami noviungura mbyee ungura, kovakwetu varwe mbu tu ungura pamwe. Tjiri otjiṋa hi tje ndji hihamisa tjinene. Posi yokutja mbe ripura omuini kutja, ‘Me yenene vi okuhorera ku Jesus momuano mbu me tjindi omundu ngwi?’ Tji mba za nokuripurira ku imbi Jesus mbya tja tjita, ami mba tya kutja otjiṋa hi me tje sa tji kapite uriri. Kombunda, ami mba kazuva kutja omukwetu ngwi wa vera tjinene nu wa ri kehi yombameno. Ami mba kamuna kutja mape ya kandja ri ondando ye okutjanga oviṋa mbya tjanga ohunga na ami. Okuripurira kotjihorera tjaJesus tjokuraisa orusuvero nandarire indu tjaa tumbwa navi, tje ndji vatera okuraisa orusuvero otjingero komukwetu ngu tu ungura pamwe.” Tji twa horere ku Jesus, eṱe aruhe matu raisa orusuvero ku varwe.

Omuano outjatatu, rihonga okuraisa orusuvero nombepo yomeriyandjerero. Indwi oorusuvero ndu tjiukisa ovakongorere vaJesus vatjiri. (Joh. 13:34, 35) Jesus omuini wa ri norusuvero ndwi nu we tu raisira otjihorera otjisemba. Omomuano uṋe? Mokuisa omaturiro we weyuru, eye “we risusuparisa” mena retu, “nga konḓiro.” (Fil. 2:5-8) Tji matu horere korusuvero nombepo  yaJesus yomeriyandjerero, omeripura noumune wetu mau sana ku imbwi owe, nu eṱe matu twa ovihepwa vyovakwetu komurungu wa imbi ovyetu. Ouwa waye mbu za mokuraisa orusuvero?

OUWA MBU ZA MOKURAISA ORUSUVERO

Tji matu raisa orusuvero, tu muna ouwa ouingi. Ngatu tare kovihorera vivari:

Mokuraisa orusuvero mu nouwa waye?

  • EṰUNḒU ROVAKAMBURE MOUYE AUHE: Mena rokutja twa suverasana, eṱe tu tjiwa kutja ovakambure ovakwetu mouye auhe mbe ri mozombongo ngamwa azehe nḓu mape ya atu ryangere, mave tu yakura norusuvero. Tjiri ondaya onene okutjiwa kutja ‘mouye auhe ovakambure ovakwetu’ ve tu suvera! (1 Petr. 5:9) Orusuvero otja indwi matu yenene okuruvaza mokati kovakarere vaMukuru porwawo.

  • OHANGE: Tji matu ‘zarasana norusuvero’ ku tjita kutja tu kare ‘nohange ndji za ku Ndjambi ndji tu waneka kumwe.’ (Ef. 4:2, 3) Ohange ndji, tu i muna pozombongarero zetu zombongo, pomaworonganeno worukondwa na inga owotukondwa. Ko nakuitavera kutja ombepo yohange otja indji otjiṋa tjapeke mouye mbwa haṋika mbwi? (Eps. 119:165; Jes. 54:13) Tji matu paha ohange kuna varwe, tu raisa kutja tjiri twe ve suvera, nu ihi tji yorokisa omutima waTate wetu womeyuru.—Eps. 133:1-3; Mat. 5:9.

“ORUSUVERO RU TUNGA”

Paulus wa tja: “Orusuvero ru tunga.” (1 Kor. 8:1) Ihi matji hee tjike? MOvakorinte ovatenga ekondwa 13, ovandu tjiva ndu ve isana “Epsalme rorusuvero,” eye wa kahurura kutja orusuvero ru tunga vi. Orusuvero ru paha ombwiro poo ouwa wa varwe nokurikendera kovihepwa vya varwe. (1 Kor. 10:24; 13:5) Nu mena rokutja orusuvero ru ripurira kotjiṋa, ru ripurira ku varwe, ru nomuretima nu ru raisa ouwa, orwo ru tunga omaṱunḓu worusuvero nozombongo nḓa wana.—Kol. 3:14.

Pe nomiano omingi mu matu yenene okuraisa orusuvero ku varwe, posi yokutja orusuvero ku Mukuru oorunanḓengu tjinene nu ndu tunga porusuvero ngamwa aruhe. Ongwaye tji matu tja nao? Mena rokutja orusuvero rwetu ku Jehova ru tu waneka! Ovandu mba za mozongaro azehe, nomihoko nomaraka aehe ve rikotamena ku Jehova pamwe, nu “owo avehe” ve mu karera. (Sef. 3:9) Ngatu rimanene okuraisa otjikaṋena otjihuze tjombepo yaMukuru ondjapuke hi eyuva arihe.

^ par. 2 Indwi orupa orutenga rwotupa muvyu tu matu kahurura otjikaṋena atjihe tjombepo ondjapuke.