YA RI omaandero waNovemba mombura ndji 1932 mOtjihuro tjaMexico. Otjo otjihuro tji tji kara noviungura ovingi mu mu kara ovandu vokombanda yengete rimwe. Omayuva nga kapita, motjihuro hi mwa zire nokutuwa omarambe otjikando otjitenga. Posi yokutja pe notjiṋa tjarwe tji matji yandja ondjoroka kovandu. Ovatjivise vombuze ve ri pomakurameno womahina noviperende vyawo mbya rongerisiwa, nu mave undju omuyenda omunanḓengu ngu ma sokuya. Nu hapo ouṋe? Eye oMbuti Joseph F. Rutherford, ngwa ri opresidenta yo-Watch Tower Society. Ovahongonone vaJehova motjihuro ho wina aave undju Mbuti Rutherford, ngwe ya komaworonganeno wawo wotukondwa womayuva yetatu.

Okambo nga The Golden Age ka tja: “Nokuhina omakeyakeyero omaworonganeno wotukondwa nga maye tjiukwa momakuruhungi otjotjitjitwa otjinanḓengu tjinene” mozongondjero zokuhandjaura ouatjiri moMexico. Posi yokutja inga ya ri omaworonganeno omaṱiṱi nga ri novandu 150. Nu hapo ongwaye tji ya ri omananḓengu tjinene nao?

Komurungu womaworonganeno ngo, ouatjiri kawa ri awa handjauka tjinene moMexico. Okuza kombura ndji 1919, mwa ri omaworonganeno omaṱiṱi uriri, posi yokutja otjivaro tjozombongo tja yaruka kehi mozombura nḓa kongorera ko. Indu tji mwa paturuka orutavi rwomberoo mOtjihuro tjaMexico mombura ndji 1929, aape munika tjimuna ongaro ndjo mai runduruka kouwa, posi yokutja ngunda pa ri ovipwite tjiva mbyaavi sokutuurungwa. Otjira tjaJehova tja raera ovayandje vomambo (colporteurs), (otja ovakandjira tjaave tjiukwa), kutja ave tjiti ozongetjefa ngunda amave zuvarisa. Omuyandje umwe womambo wa pindikire tjinene ohunga notjiṋa hi nga tja isa ouatjiri na kauta otjimbumba tje omuini tjovakonḓonone vOmbeibela. Moruveze ndwo, mena rokutja omutarere worutavi rwomberoo aa tjiti oviṋa ovivi, aape hepa okuzikwa omutarere warwe. Ovahongonone vaJehova moMexico aave hepa okuyanḓiparisiwa.

Indu Mbuti Rutherford tje yekuvarura ovakarere ovaṱakame mba, eye we ve yanḓiparisa nomahungi yevari pomaworonganeno wotukondwa nomahungi yetano nga pitisiwa moradio. Ya ri otjikando otjitenga ku wo okuungurisa oradio okuhandjaura ombuze ombwa moMexico. Kombunda yomaworonganeno, pa zikwa omutarere omupe worutavi rwomberoo kutja ma kayendise oviungura. Ovahongonone vaJehova nambano va ri nonḓero onene, nu nombatero yaJehova owo va kayenda komurungu notjiungura tjokuzuvarisa.

Omaworonganeno wotukondwa wombura ndji 1941, mOtjihuro tjaMexico

Mombura ndja kongorera ko, ombura 1933, mwa tjitwa omaworonganeno yevari omanene mehi, yemwe moVeracruz na yarwe mOtjihuro tjaMexico. Ovakambure va ungura oukukutu momaturiro ngo nu va muna ovikongorere ko oviwa. Okutara kotjihorera, mombura ndji 1931 mwa ri ovazuvarise 82. Komaandero wombura ndji 1941, mwa ri ovazuvarise ovengi kombanda yanao povikando 10! Ovandu ape 1 000 ve ya kOtjihuro tjaMexico kOmaworonganeno worukondwa wombura ndji 1941.

“OMAHITIRO WOMOMIVANDA”

Mombura ndji 1943 Ovahongonone vaJehova va uta okutjivisa Omaworonganeno worukondwa nga ri nepu ndi “Free Nation” nga tjitwa movihuro 12 vyaMexico. * Owo va  tjita nao mokuhwikika oviplakata. Ovyo vya ri oviplakata vivari ovinene mbya tuwa kumwe navi hwikikwa koviṱuve nu otjiraisiro tjimwe tja ri komurungu nu tjarwe tja ri kongotwe. Ovahongonone vaJehova aave ungurisa oviplakata mbi okutjivisa omaworonganeno wawo wotukondwa okuza kombura ndji 1936.

Okarupa okuza membo rombura ndji 1944 ku make raisa ovandu mba hwikike oviplakata mOtjihuro tjaMexico

Okutjivisa noviplakata mbi kwa ri nondoṋeno onene mOtjihuro tjaMexico nga embo ndi La Nación tji ra tjanga nai ohunga nOvahongonone vaJehova mba ri pomaworonganeno: “Eyuva etenga, owo va ningirwa kutja ve ṋange ovandu ovengi kombanda yanao. Eyuva nda kongorera ko owo va ruruma otjivaro tji tji yandjerwa poruveze rwomaworonganeno.” Okereka yOkatolika kaya ri nohange nondoṋeno ndji, nu otji va pirukira Ovahongonone vaJehova. Nungwari ovakambure mba kava ri nemuma. Owo va kayenda komurungu okutjivisa omaworonganeno. Orupa rwarwe mo-La Nación rwa tja: “Otjihuro atjihe tje ve muna.” Orwo rwa tja ovakambure mbo va “rira ‘oviplakata’ ovitjivise.” Orupa ndwo wina rwa raisa otjiperendero tjovarumendu ovakambure momivanda vyOtjihuro tjaMexico. Kehi yotjiperendero kwa ri nomambo nga: “Omahitiro womomivanda.”

“OZOMBETE NḒE HE RI OZONGUKUTU NU ZOUPYU PORUPARE RWOSAMENDE”

Mozombura nḓo, Ovahongonone vaJehova ovengi aave hepa okutjita ozongondjero ozonene kutja ve yenene okukara pomaworonganeno tjiva ngaaye tjitirwa moMexico. Ovengi va za kovirongo vyokokure ku ku ha va za omahina poo nandarire ku ku hina ozondjira. Kunao, ovandu ovengi aave sokukavira kovimori poo okukayenda pehi oure womayuva omengi kutja ve va ze pomahina ndji mai ve twara kotjihuro tjomaworonganeno.

Ovahongonone vaJehova ovengi va ri ovasyona, nu kaave yenene okusuta ouyenda umwe komaworonganeno. Nu tji va kavaza ngo, ovengi aave kakara pu nOvahongonone vaJehova mba tura ngo, mba patururira ovakambure ovakwao ozondjuwo zawo. Varwe aave rara mOmatuwo wOmerikotameneno. Otjikando tjimwe, Ovahongonone ape 90 va kakara porutavi rwomberoo, pu va ṱuninwa “ovimbakete 20 vyomambo mbya ri moruteto otjozombete zawo.” Ehungi nda pita membo ndi Yearbook ra tja ovayenda mba ri nondangi mba va muna kutja “ozombete nḓa kazongukutu nu ze noupyu porupare rwosamende.”

Ovahongonone vaJehova mbo va ri nondangi okuworongana pu novakambure ovakwao nga tjaave munu kutja ozongondjero nḓu va tjita kaza ri omungandjo. Ovahongonone vaJehova ape engete rimwe mbe ri moMexico ndino ve nondangi otjingeyo. * Omatjivisiro nga pitisiwa membo ndi 1949 Yearbook ya tja ozongondjero ovakambure nḓu va tjita kaze ngundiparisire onḓero yawo yokurikotamena ku Jehova. Omaworonganeno aehe ngu va ri na yo onga ri “epu romahungi wawo oruveze orure kombunda yanao.” Epuriro ovakambure mba ndu va pura okuyarukira po ra ri: “Oruṋe tji matu kara nomaworonganeno rukwao?” Omatjivisiro ngo ouatjiri ndino, otja tji pa ri oruveze ndwo.—Omakuruhungi nga pwikwa moCentral America.

^ par. 9 Otja kembo ndi 1944 Yearbook, omaworonganeno nga ya tjita kutja “ovahongonone vaJehova ve tjiukwe moMexico.”

^ par. 14 Ovandu 2 262 646 moMexico, va ri pOmariro Omayapuke mombura ndji 2016.