Twende kovidio oini

Twende komurya

Ovahongonone vaJehova

Toorora eraka Otjiherero

‘Ohange yaNdjambi ndja kapita ozondunge azehe’

‘Ohange yaNdjambi ndja kapita ozondunge azehe’

“Nohange yaNdjambi ndja kapita ozondunge azehe zovandu mai ṱakamisa omitima vyeṋu.”​—FIL. 4:7.

OMAIMBURIRO: 39, 141

1, 2. Ovitjitwa viṋe moFilipi mbya tjita kutja Paulus na Silas ve yumbwe motjovakamburwa? (Tara kotjiperendero pomautiro worupa ndwi.)

YA RI ape mokati kouṱuku. Nu ovahindwa vevari ooPaulus na Silas va ri motjovakamburwa metuwo romoukoto, motjihuro tjaFilipi. Ozombaze zawo za kutirwe koviti ovizeu nu omatambo wawo aaye hihamwa mena rozongora nḓu va za nokutonwa. (Oviung. 16:23, 24) Tjiri oviṋa mbi vya hakahana okutjitwa! Nokuhina erakiza, owo va kamburwa kotjomasa i otjimbumba tjovandu ave ve twara koruveze rwomarandero nave ve eta komurungu wovahongore. Ozombanda zawo za taurwa, nowo va tonwa tjinene nozongora. (Oviung. 16:16-22) Tjiri imbi vya ri ovitjitwa ovihasemba! Paulus wa ri omuture waRoma, nu wa ri nouyara wokupewa ombanguriro osemba. *

2 Paulus tja ri motjovakamburwa mape ya ee ripurire koviṋa mbya tjitwa meyuva ndo na kovandu mba tura moFilipi. Owo nangarire kava ri nondjuwo yomaworonganeno wombongo yOvajuda tjimuna ovihuro vyarwe Paulus mbya kavarura. Okutja Ovayuda aave sokukerikotamena  meṋe yonḓonḓu pendje yotjihuro. (Oviung. 16:13, 14) Hapo ya ri mena rokutja kamwa ri ovarumendu Ovajuda 10 motjihuro? Ihi ootjivaro tjaatji undjirwa ko kutja ve yenene okukara nondjuwo yomaworonganeno wombongo. Ovandu vaFilipi aave tjaterwa tjinene kutja va rira ovature vaRoma nangarire kutja kava ri ovakwatera vehi ndo. (Oviung. 16:21) Nu hapo epu ndi mape ya onda tjita kutja ave ha munu kutja Ovajuda mba, ooPaulus na Silas mape ya ave rire ovature vaRoma? Katu nakutjiwa, posi yokutja matu tjiwa kutja ya ri posyo ku wo okuyumbwa motjovakamburwa.

3. Ongwaye Paulus tja himinwe indu tja karira omundu womotjovakamburwa, posi yokutja eye wa raisa ongaro iṋe?

3 Paulus mape ya wina ee ripura ohunga novitjitwa mbya tjitwa momieze tjiva mbya kapita. Eye wa ri munda mbwina wOkuvare kwaAegea, mehi raAsie. Ngunda e ri ngo, ombepo ondjapuke ye mu tjaera povikando ovingi kutja a ha zuvarisa motuveze tjiva. Ya ri tjimuna ombepo ondjapuke aai mu hingi okuyenda koruveze rwarwe. (Oviung. 16:6, 7) Nu hapo ku pi? Eziriro reya motjirimunikise ngunda e ri moTroas. Paulus wa raerwa kutja, “Konda nguno koMakedonie!” Paulus tja muna otjiraisiro otjikahu ohunga nombango yaJehova, eye wa yakura omaṋangero nga tjimanga. (Lesa Oviungura 16:8-10.) Ovikeṋa mbya tjitwa kombunda yanao? Tjimanga tja za nokuvaza moMakedonie, eye wa karira omundu womotjovakamburwa! Ongwaye Jehova tja yandjera kutja otjiṋa hi tji tjitwe ku Paulus? Nu ma kara oure mbu ṱa pi motjovakamburwa? Nangarire kutja Paulus ee ripurire komapuriro otja inga, eye kena pa yandjera kutja ye ngundiparise ongamburiro nondjoroka ye. Eye na Silas va uta ‘okukumba nokuimburira Ndjambi omatangero.’ (Oviung. 16:25) Omitima nomeripura wawo ya porisiwa i ohange yaMukuru.

4, 5. (a) Matu yenene vi okukara mongaro tjimuna oyaPaulus? (b) Ongaro Paulus ma ri ya hakahana vi okurunduruka ngunda e hiya undjira ko?

4 Ngahino otjaPaulus, ove wa rora okuningira Mukuru kutja me ku vatere okutoora omukambo worive nu mboo munu kutja mau hongorerwa i ombepo ondjapuke. Posi yokutja kombunda yanao okakara nomauzeu omengi poo okahepa okutjita omarundurukiro omanene mehupo roye. (Omuzuv. 9:11) Otja tji mo tara kombunda ngahino wa kasewa a wa himwa kutja ongwaye Jehova tje yandjera oviṋa tjiva okutjitwa. Tji pe ri nao, otjikeṋa tji matji ku vatere okupanḓera po nongamburiro yomasa mu Jehova? Okumuna eziriro, ngatu yaruke kehungi raPaulus na Silas.

5 Ngunda Paulus na Silas amave imbura omatangero, pa tjitwa oviṋa mbi ve ha undjirire ko. Tjimanga pa tjitwa omanyinganyingiro wehi omazeu. Omivero vyotjovakamburwa vya paturuka nu omapando wovapandekwa ya poka. Paulus wa tjaera omutjevere wotjovakamburwa kutja e he rizepa omuini. Omutjevere wotjovakamburwa neṱunḓu re arihe va papitisiwa. Meyuva ependukirwa, ovanauvara va hinda ovakarere vouhona kutja ve kapitise Paulus na Silas motjovakamburwa. Ovanauvara ve ve ningira kutja ve pite motjihuro mohange. Okuzambo tji va muna kutja Paulus na Silas ovature vaRoma, ovanauvara va muna kutja va tjiti ondataiziro onene, nu otji ve ya oveni okuyekuṱika ovarumendu vevari mba. Posi yokutja Paulus na Silas va ningira kutja rutenga ve kavirikize omukazendu wena Lidia ngwa za nokupapitisiwa oupe. Nu wina va ungurisa oruveze ndwi okuyanḓiparisa ovakambure ovakwao. (Oviung. 16:26-40) Oviṋa tjiri vya hakahana okurunduruka!

YA “KAPITA OZONDUNGE AZEHE”

6. Ovikeṋa mbi matu kahungirira ko nai?

6 Matu rihongere tjike kovitjitwa mbi? Jehova u yenena okutjita oviṋa mbi tu hina okuundjira  ko, okutja katu sokurikenda tji tu ri mouzeu. Paulus we rihongera ovingi kotjiṋa hi. Nu ihi matu munu ku imbi mbya katjanga kombunda morutuu kovakambure moFilipi ohunga nozongendo, nohange yaMukuru. Rutenga ngatu tare komambo waPaulus nge ri mOvafilipi 4:6, 7. (Lesa.) Okuzambo, matu katara kovihorera vyarwe vyOmatjangwa ohunga nomuano Jehova me tjita oviṋa mbi tu ha undjire ko. Korusenina, matu katara kutja ‘ohange yaNdjambi’ i yenena vi okutuvatera okupanḓera po, nokukara nongamburiro yomasa mu Jehova.

7. Epu riṋe Paulus nda ṋunisa indu tja katjanga orutuu kovakambure moFilipi, neṱe matu rihongere ko tjike komambo we?

7 Ovakambure moFilipi tji va za nokulesa orutuu rwaPaulus, mape ya va zemburuka oviṋa mbya tjitwa ku ye. Nu mape ya wina va zemburuka omuano Jehova ma tjita oviṋa mbi ve ha undjirire ko. Paulus we ve honga tjike? We ve honga kutja ave rikende, ngave kumbe uriri nu mave pewa ohange yaMukuru. Yandja ombango kokutja ‘ohange yaNdjambi ya kapita ozondunge azehe.’ Omambo nga maye hee tjike? Ovatoroke tjiva va toroka omambo nga otja “ndja kapita oturoto twetu atuhe” poo otja “ndja kapita ozondando azehe zovandu.” Okutja Paulus aa tja ‘ohange yaNdjambi’ ohimise momuano mbu tu hina okuyenena okuripurira ko. Kunao, nangarire kutja koumune wovandu katu nakumuna omuano wokupita momauzeu wetu, Jehova ma tjiwa nu ma yenene okutjita oviṋa mbi tu hina okuundjira ko.—Lesa 2 Petrus 2:9.

8, 9. (a) Nangarire kutja Paulus wa munine omauzeu nomauhasemba moFilipi, ovikwaye oviwa mbya kongorera ko mena rovitjitwa mbyo? (b) Ongwaye ovakambure moFilipi tjaave yenene okuyandja ombango yapeke komambo waPaulus?

8 Tu nongamburiro kutja orutuu rwaPaulus rwa yanḓiparisa ovakambure moFilipi indu tjaave ripurire koviṋa Jehova mbye ve tjitira ozombura 10 nḓa kapita. Oviṋa Paulus mbya tjanga vya ri ouatjiri. Nangarire kutja Jehova wa yandjera omauhasemba okutjitwa, imbi kombunda ombya kavatera kutja ‘Ombuze Ombwa i yeurwe mombanguriro nokuhongonona ouatjiri wayo.’ (Fil. 1:7) Ovanauvara votjihuro ho nai mave ripura tuvari amaave tjiti otjiṋa ngamwa atjihe kombongo yOvakriste ndja za nokuzikwa oupe motjihuro tjawo. Ngahino mena rokutja Paulus wa tamuna kutja eye omuture waRoma, ombya vatera omuhongewa wena Lukas kutja ma kare moFilipi ooPaulus na Silas tji va za nokuyenda. Lukas aa yenene okuyandja ombatero ndjaai heperwa po kOvakriste ovape mba ri motjihuro ho.

9 Ovakambure moFilipi tji va lesa orutuu rwaPaulus, owo aave tjiwa kutja omambo ngo kaya ri oumune we omuini uriri. Paulus tjiri wa munine omauzeu omanene. Nangarire tjaa tjanga orutuu ndwi kovakambure mbo, eye wa ri omukamburwa mondjuwo ye moRoma. Posi yokutja eye wa raisa kutja wa ri “nohange yaNdjambi.”—Fil. 1:12-14; 4:7, 11, 22.

“AMU RIKENDERE OTJIṊA”

10, 11. Tji tu nozongendo ohunga nouzeu mbu tu na wo matu sokutjita vi, nu matu yenene okuundjira ko tjike?

10 Otjikeṋa tji matji tu vatere kutja atu he rikendere otjiṋa nokutja tu kare “nohange yaNdjambi”? Omambo waPaulus kOvafilipi maye raisa kutja otjiṋa tji tji vatera okuisapo ozongendo, ongumbiro. Okutja tji tu nozongendo, matu sokurundururira ozongendo zetu mozongumbiro. (Lesa 1 Petrus 5:6, 7.) Kumba ku Jehova nongamburiro yomasa, amo tjiwa kutja eye u rikendera ove. Tji mo kumbu itja “okuhepa ku Ye,” kozondaya nḓe ku sera. Ongamburiro yetu mu ye mai kuru indu tji matu zemburuka kutja eye u yenena “okutjita ovingi okukapita eṱe pu matu sora okukumba poo okuripura.”—Ef. 3:20.

11 Otja tji pa tjitwa ku Paulus na Silas moFilipi, eṱe mape ya atu himisiwa i oviṋa Jehova mbi  me tu tjitire kourike wetu. Mape ya aha rire oviṋa ovinene poo ovihimise, posi yokutja aruhe ma rire oviṋa mbi matu hepa. (1 Kor. 10:13) Kaku nakuheya kutja matu sokuhirimana uriri nokuhina okutjita otjiṋa, nokuundja ku Jehova kutja ma ṱune ongaro poo ouzeu wetu. Matu sokutoora omikambo mbi mavi hitasana nozongumbiro zetu. (Rom. 12:11) Omikambo vyetu vi raisa kutja tu nouatjiri nu ku hinga Jehova kutja me tu sere ondaya. Posi yokutja atu zembi kutja Jehova u yenena okutjita ovingi kombanda ya imbi mbi twe mu ningire okutjita poo mbi matu undjire ko kutja ma tjiti. Povikando tjiva u tu werereka mokutjita oviṋa mbi tu hiya undjira ko. Nambano ngatu tare komahungi tjiva wOmbeibela nge yanḓiparisa ongamburiro yetu momasa waJehova wokututjitira oviṋa mbi tu hina okuundjira ko.

OMUANO JEHOVA ME TJITA OVIṊA MBI TU HINA OKUUNDJIRA KO

12. (a) Ombara Hiskija ya tjita vi indu tji ya kuramenenwe i oumba mbwa etwa i Ombara Sanherib yaAsur? (b) Matu rihongere ko tjike komuano Jehova ma ṱuna ouzeu mbwi?

12 Tji matu konḓonona Omatjangwa, povikando ovingi tu muna ovihorera vyaJehova vyokutjita oviṋa mbi tu ha undjire ko. Ombara Hiskija ya hupire moruveze indu Ombara Sanherib yaAsur tji ya wira Juda nai kambura ovihuro avihe ovinamasa, pendje na Jerusalem. (2 Ozomb. 18:1-3, 13) Okuzambo Sanherib wa uta okuyandja ombango kotjihuro Jerusalem. Ombara Hiskija ya tjita vi indu tja kuramenenwe i oumba mbwi? Oyo ya kumba ku Jehova nu ayi i komuprofete waJehova wena Jesaja okukapaha omuhunga. (2 Ozomb. 19:5, 15-20) Hiskija wina wa kondja okuraisa ongaro ombwa mokusuta ondjambi yomberero Sanherib ndja ningira. (2 Ozomb. 18:14, 15) Korusenina Hiskija we rirongera omawiro omanene. (2 Ekuruh. 32:2-4) Nu hapo ouzeu mbwi wa ṱunwa vi? Jehova wa hinda omuengeli ngwa yandeka ovarwe vaSanherib 185 000 mouṱuku umwe uriri. Ihi tjiri katjiṋa Hiskija tja undjira ko!—2 Ozomb. 19:35.

Matu rihongere tjike ku imbi mbya tjitwa ku Josef?—Gen. 41:42 (Tara koparagrafa 13)

13. (a) Matu rihongere ko tjike ku imbi mbya tjitwa ku Josef? (b) Otjikwaye tji tja tjitwa ku Sara eye tje hina aa undjire ko?

13 Ripurira ku imbi mbya tjitwa komurumendu omutanda wena Josef, ngwa ri omuzandu waJakob. Indu tja ri motjovakamburwa, eye u na pe ripurira ko kutja mape ya aka zikwa otjomundu omunanḓengu outjavari moEngipte poo kutja ma kaungurisiwa i Jehova okuyama eṱunḓu re kourumbu? (Gen. 40:15; 41:39-43; 50:20) Otjiperi kutja oviṋa Jehova mbya tjita, Josef ka mbyaa undjire ko oparukaze. Wina ripurira ku Sara ina yaihe yaJosef omukururume. Eye hapo aa undjire ko kutja Jehova me mu yandjere okupanduka omuatje we omuini, nu kaye ngwi ngu ma isa momukarere we omusuko? Ongwatero yaIsak tjiri katjiṋa Sara tjaa undjire ko oparukaze.—Gen. 21:1-3, 6, 7.

14. Ongamburiro yaye ndji matu yenene okukara na yo mu Jehova?

14 Katu undjire ko kutja Jehova ma isapo  omauzeu wetu aehe momuano omuhimise ngunda ouye oupe au hiye ya. Nu wina katu undjire ko kutja Jehova nge tu tjitire oviṋa ovinene novihimise mehupo retu. Posi yokutja tu tjiwa kutja Jehova wa vatera ovakarere ve momiano omihimise morukapitaveze. (Lesa Jesaja 43:10-13.) Ihi tji tu pa ongamburiro mu ye. Matu tjiwa kutja eye ma yenene okutupa otjiṋa ngamwa atjihe tji matu hepa, kutja tu yenenise ombango ye aihe. (2 Kor. 4:7-9) Matu rihongere ko tjike komahungi wOmbeibela nga? Matu rihongo kutja tji twa ṱakama mu Jehova, eye ma yenene okutuvatera okutoṋa moviṋa mbi munika aayo kamaatu yenene okutoṋa mo, tjimuna tji twa munu movihorera vyaHiskija, Josef na Sara.

Tji twa ṱakama mu Jehova, eye ma yenene okutuvatera okutoṋa moviṋa mbi munika aayo kamaatu yenene okutoṋa mo

15. Otjikeṋa tji matji tu vatere okukara “nohange yaNdjambi,” nu omomuano uṋe mu matu yenene okutjita nao?

15 Matu yenene vi okukara “nohange yaNdjambi” nangarire indu tji tu nouzeu? Omokuṱiza oupanga ouwa kuna Mukuru wetu, Jehova. Matu yenene okukara noupanga otja imbo porwawo okupitira “mu Kristus Jesus,” ngwa yandja omuinyo we otjotjisuta tjonguturiro. Otjiyandjewa tjotjisuta tjonguturiro itjimwe tjoviungura vyaTate wetu ovihimise. Jehova u ungurisa otjisuta tjonguturiro hi okuisira omauvi wetu, nu matu yenene okukara nomeritjiviro omawa womomutima nokutumbuka popezu na ye.—Joh. 14:6; Jak. 4:8; 1 Petr. 3:21.

MAI ṰAKAMISA OMITIMA VYETU NOURIPURA WETU

16. Mape tjitwa tjike tji twa munu ‘ohange yaNdjambi ndja kapita ozondunge azehe’? Sasaneka.

16 Ovikeṋa mbi kongorera ko indu tji twa munu ‘ohange yaNdjambi ndja kapita ozondunge azehe’? Omatjangwa ye zira kutja, “mai ṱakamisa omitima vyeṋu nouripura weṋu mu Kristus Jesus.” (Fil. 4:7) Embo reraka orini ku kwa torokerwa embo ndi “ṱakamisa” aari ungurisiwa movita. Oro aari hee otjimbumba tjovarwe vovita mbaave tjevere otjihuro oruveze orukuru. Ovature vaFilipi aave tjeverwa i otjimbumba otja iho. Owo aave yenene okurara nawa uṱuku, orondu aave tjiwa kutja pe novarwe mbaave tjevere otjihuro tjawo. Momuano otjingewo, tji twa munu ‘ohange yaNdjambi,’ omitima vyetu nouripura wetu vi kara morusuvo. Matu tjiwa kutja Jehova u rikendera eṱe nu u vanga kutja tu kare nondoṋeno. (1 Petr. 5:10) Ondjiviro ndji i tu vatera kutja atu ha ngundiparisiwa i ozongendo.

17. Otjikeṋa tji matji tu vatere okukara nongamburiro mu Jehova moruveze rwondatumisire ondirise?

17 Moruyaveze rwopopezu ondatumisire ondirise mai ya kovandu avehe kombanda yehi. (Mat. 24:21, 22) Katu nakutjiwa nawa kutja ovikeṋa mbi mavi tjitwa kweṱe kourike wetu. Posi yokutja katu nokuhepa okurikenda tjinene. Nangarire kutja katu nokutjiwa oviṋa avihe Jehova mbi ma tjiti, eṱe matu tjiwa Mukuru wetu nawa. Eṱe matu tjiwa imbi mbya tjitira ovakarere ve voruveze orukuru. Nu twa muna kutja kainatja kutja pa tjitwa tjike, Jehova ma yenenisa ondando ye. Povikando tjiva u tjita nao momuano mbu tu hina okuundjira ko. Kunao, otjiṋa ngamwa atjihe Jehova tji me tu tjitire nai, tji tu pa oruveze rwokumuna ‘ohange yaNdjambi ndja kapita ozondunge azehe’ momuano omupe.

^ par. 1 Pe munika aayo Silas wina wa ri omuture waRoma.—Oviung. 16:37.