Twende kovidio oini

Twende komurya

Ovahongonone vaJehova

Toorora eraka Otjiherero

Omapuriro okuza kovalese

Omapuriro okuza kovalese

Omambo nge ri mEpsalme 144:12-15 mOmbeibela ndji “o-New World Translation of the Holy Scriptures,” ndja pitisiwa mombura ndji 2013, ye ṱuna kovakarere va Mukuru. Ongwaye omambo ngo tji ya rundururwa?

Omambo wOtjiheberi, ye yandjera omaheero ayeevari. Kunao, omarundurukiro nga tjitwa, ya zikamena komapu ngu maye kongorere mba:

  1. Omarundurukiro nga tjitwa momazeva nga, ye hitasana neraka. Ombwaneno ndji ri pokati kEpsalme 144:12-15 nomazeva wokomurungu wa ingo, mai rekareka komaheero nga yandjwa kembo etenga ndi ri mezeva 12. Oro embo rOtjiheberi ndi asher. Embo ndi asher, ri yenena okuungurisiwa momiano omingi. Okutara kotjihorera, oro ri yenena okuungurisiwa otjepingenambo, tjimuna “mbu.” Embo ndi “mbu” ondaari ungurisiwa momatorokero inga omakuru. Kunao, oviṋa oviwa mbya tamunwa mezeva 12 nga 14, aavi tjama novarunde mba tamunwa momazeva wokomurungu wa ingo. Posi yokutja embo ndi asher wina ri yenena okuraisa ovikongorereko nu ri yenena okutorokwa nai: “kutja,” “kokutja,” poo “okuzambo.” Embo ndi “okuzambo,” onda ungurisiwa mOmbeibela ndja pitisiwa mombura ndji 2013 na momatorokero wozOmbeibela zarwe.

  2. Omambo nga rundururwa nga, ye hitasana nawa nepsalme arihe. Omaungurisiro wembo ndi “okuzambo” mezeva 12 ye raisa kutja, ozondaya nḓa tamunwa mezeva 12 nga 14, ze tjama novasemba. Okutja owo ombe ningira ‘okuyamwa’ kovarunde (ezeva 11). Omarundurukiro nga wina ya raisiwa mezeva 15, embo ndi “otjiṋingandu” pu ri munika povikando 2, nu pu ri tjama novandu otjingewo mba “mbe na Jehova otja Mukuru wawo!” Wina yandja ombango kokutja, omambo wOtjiheberi omakuru, kaya ri noviraise vyokulesa, tjimuna oviraise oviyarurepo. Okutja, ovatoroke mave sokutara oveni kutja omuano uṋe womatorokero mbu ri omusemba, nu mave sokuyandja ombango komuano Otjiheberi otjikuru maa tji tjangwa, nepu, nomatjangwa wOmbeibela ngu maye tjama norupa ndo.

  3. Omambo nga rundururwa nga, ye hitasana nawa notupa twarwe twOmbeibela tu tu kwizika ozondaya za Mukuru kovakarere ve ovaṱakame. Kunao, mena romarundurukiro nga tjitwa kembo ndi asher, epsalme nambano ri raisa omaundjiro David nga ri na wo, wokutja Mukuru tja zu nokukutura otjiwaṋa tjOvaisrael kovanavita na wo, Eye ma sere otjiwaṋa tje ondaya youṋingandu nondjeverero. (Lev. 26:9, 10; Deut. 7:13; Eps. 128:1-6) Okutara kotjihorera, Deuteronomium 28:4 ri tja: “Ngo serwe ondaya korukwato rwezumo ranyoko, na kovihape vyehi roye romakunino, na korukwato rwovinamuinyo vyoye, na korukwato rwozongombe norwozonyanda zoye.” Nu tjiri indu omuzandu wa David, wena Salomo tja ri ombara, otjiwaṋa tja ri mohange nondjeverero. Nu kombanda yanao, oviuṋe tjiva mouvara wa Salomo vi sasaneka ouvara wa Messias.​—1 Ozomb. 4:20, 21; Eps. 72:1-20.

Nu korusenina, omarundurukiro nga tjitwa mEpsalme 144, kaye rundurura ondjiviro ndji tu na yo ohunga nomahongero wOmbeibela. Posi yokutja ye tjita kutja epsalme arihe ri raise nawa omaundjiro ovakarere va Jehova ngu ve na wo. Nu omaundjiro ngo, omayandekero wovarunde ngu maye kongorerwa i ohange ongarerere nondjeverero kovasemba.​—Eps. 37:10, 11.