Twende kovidio oini

Twende komurya

Tji wa zepaisa umwe wovasuverwa woye

Tji wa zepaisa umwe wovasuverwa woye

“Ami e rimunu ondjo omuṱena kwandje omunene tja ṱa. Omieze vyokombunda yanao, tje rizemburuka na ye ee hihamwa tjinene, ya ri tjimuna ee twerewa noruvyo momutima. Povikando tjiva ee pindike, nu ee ripura kutja ongwaye omuṱena kwandje tja ṱa? Ee rimunu ondjo, mena rokutja tjaa ri nomuinyo ami he kara puna ye tjinene.”​—Vanessa, wa Australia.

INDU tji wa zepaisa umwe wovasuverwa woye, ove mape ya orimunu ourike, okuhinokurivatera, okara nomapindi, nu orimunu ondjo, nemuma. Ngahino mape ya oripura kutja hapo ohepero okukayenda komurungu okuhupa.

Zemburuka kutja okukara noruhoze oruveze orure katjiṋa otjivi. Ihi tji raisa kutja ove tjiri wa suverere omusuverwa woye ngo. Hapo mape ya omunu omahuhumiṋino koruhoze rwoye?

TJIVA VA TJINDA VI ORUHOZE

Nandarire kutja pemunika aayo omuhihamo woye mbwi ka mau yanda, ove mo yenene okumuna omahuhumiṋino moruhoze rwoye, indu tji wa kongorere omirari mbi:

RIYANDJERA OKURIRA

Ovandu avehe ve raisa oruhoze momiano pekepeke. Okurira ku tjita kutja u kuturwe komihihamo kaṱiṱi. Vanessa, ngwa tamunwa rukuru, wa tja: “Ami ee riri, nu ee hepa okukuturwa komihihamo mbi.” Sofía, ngwa zepaisa omuangu we monḓiro yatjimanga, wa tja: “Tji me ripurire koviṋa mbya tjitwa, i ri tjimuna okupatura nokukoha otjirwaro tji tja woro. Okutjita nao ku eta omihihamo omingi, posi yokutja ku tjita kutja otjirwaro tji veruke.”

HUNGIRA OHUNGA NOMERIPURA NOUMUNE WOYE

Povikando tjiva mape ya ovanga okukara erike. Posi yokutja oruhoze omutwaro omuzeu okutjinda erike. Jared wozombura 17, ngwa zepaisa ihe wa tja: “Ee hungire ku novandu varwe ohunga nomuhihamwatima wandje. Mape ya ovandu kaave zuu kutja ee vanga okutja vi, posi yokutja ya ri otjiṋa otjiwa okuhungira kuna wo.” Janice, ngwa tamunwa pomautiro worupa ndwi, komurungu wa tja: “Okuhungira ku novandu varwe a ku ndji huhumiṋa tjinene. Ee munu kutja ovandu aave ndji zuu nawa nu ke rimunu ourike.”

YAKURA OMBATERO

Onganga imwe ya tja: “Omundu ngu ri moruhoze tji ma yandjere omapanga novazamumwe ve okumuvatera kombunda yonḓiro yomusuverwa we, ku tjita kutja i rire oupupu okukayenda komurungu.” Raera omapanga woye kutja ngave ku vatere natjike. Owo mape ya ave vanga okukuvatera posi yokutja ave ha tjiwa kutja ngave ku vatere momuano uṋe.​—Omiano 17:17.

TUMBUKA POPEZU NA MUKURU

Tina wa tja: “Indu omurumendu wandje tja ṱa mena romutjise wokangera, ami he yenene okumuraera rukwao ohunga nomauzeu, ozongendo, noumune wandje, kunao ee raere Mukuru oviṋa avihe! Eyuva arihe Ee mu ningire kutja me ndji vatere okutuurunga eyuva ndo. Mukuru tjiri we ndji vatera momiano ovingi pekepeke.” Tarsha, ngwa ri nozombura 22 indu tja zepaisa ina, wa tja: “Okulesa Ombeibela eyuva arihe kwe ndji huhumiṋa tjinene, nu okutjita nao aa ku tjiti kutja mbi ripure noviṋa oviyanḓiparise.”

RIPURIRA KOMBENDUKIRO

Tina komurungu wa tja: “Rutenga, omaundjiro wombendukiro kaaye ndji huhumiṋa mena rokutja ee hepa omurumendu wandje, nu ovanatje vandje ovazandu aave hepa ihe. Nungwari nai, oure wozombura 4 mba kakatera komaundjiro nga. Omaundjiro nga ye ndji huhumiṋa. Mbi ripura noruveze ndu me ke mu muna rukwao, nu ihi tji ndji pa ohange nondjoroka!”

Ove komohakahanene po okukara nawa. Posi yokutja, otjihorera tja Vanessa matji yenene okukuvatera. Eye wa tja: “Ove u rimuna kutja komo roro okukara nawa, posi yokutja kouṱiṱi mo yende amo kara nawa.”

Zemburuka kutja aruhe mo kara pokuhihamenwa i yomusuverwa woye ngo, posi yokutja ohepero okuhupa. Nombatero ya Mukuru yorusuvero, ove mo yenene okuyorokera oupanga ouwa nu mo kara nondando mehupo. Moruveze rwatjimanga Mukuru ma kapendura ovakoke. Eye u vanga kutja u kapukate ovasuverwa voye rukwao. Okuzambo omuhihamo mbo mau verukisiwa nga aruhe!