Mutu mozemburuka ekuruhungi ra Croesus tja pukisiwa i omupristeri wa Delphi, nga tja ka haverwa i ombara ya Persie. Ombeibela, wina, i nomaprofetero wa peke ohunga nombara ya Persie nga yenenisiwa mondja.

Ozombura 200 komurungu wa nao, omuprofete Jesaja wa tamuna ombara Kirus kena ngunda oyo ai hiya kwatwa, nu wa kahurura omuano mu mai havere otjihuro otjinamasa Babilon.

Jesaja 44:24, 27, 28: “OwAmi Muhona, Omukuture woye; . . . ’Ami mbi pwirisa omuronga nozonḓonḓu nembo romarakiza. Ku Sirus me tja nai: “Oove ngu mo honapara moruveze rwandje; mo tjiti imbi Ami mbi me vanga kutja u tjite. Mo rakiza kutja Jerusalem tji tungururwe, nokutja omazikameno wOndjuwo ondjapuke yaMuhona ye tungwe.”’”

Otja konongo yomakuruhungi Herodotus wa Grike, orupa rwovita rwa Kirus rwa hendurura omeva wOnḓonḓu Eufrats, ndjai pupu okutuurunga motjihuro Babilon. Omuano Kirus mbwa ungura wa tjita kutja i rire oupupu kuwo okuhita otjihuro ho. Tji va za nokuhavera otjihuro, Kirus wa kutura Ovajuda mba ri mouhuura wa Babilon ne ve yandjere okuyaruka okukatungurura Jerusalem, tji tja yandekerwe ozombura 70 komurungu wa nao.

Jesaja 45:1: “Muhona wa toorora Kirus kutja a rire ombara! Eye we mu zika kutja a havere oviwaṋa; Eye me mu hindire okukayeka ozombara ouvara wazo; nu Muhona ma patururire Kirus omivero vyovihuro. Muhona ma tja nai ku Kirus.”

Ovapersi va hitira otjihuro momivero vya tjo, mbi vya isirwe kamwaha mokuhinakonatja. Andakuzu Ovababilona aave tjiwa imbi Kirus mbya tanda, owo atja ve pata omivero avihe mbya paturukira konḓondu. Posi yokutja, otja tji pa hunganekwa, otjihuro ka tja ri nomasa wokurivatera.

Omaprofetero nga yenenisiwa mondja nga, i yemwe womaprofetero wOmbeibela nga yenenisiwa osemba. * Omaukiro wovandu ye za koomukuru vawo wovisenginina, nungwari omaprofetero wOmbeibela ye za ku Mukuru, ngu tja: “Okuza kombutiro Ami mba tjivisire oruveze ndu maru ya. Okuza korukuru Ami mba zuvarisira ko imbi mbi mavi katjitwa. Ami mba tja omeripuriro wandje kamaaye tataiza ko, nokutja Ami me yenenisa ngamwa atjihe tji mba vanga okutjita.”​—Jesaja 46:10.

O Mukuru watjiri erike uriri, wena Jehova, ongu ma yenene okutja nao. Ena re ri heya kutja, “U yenenisa atjihe tje ripurire ko.” Ihi tji raisa kutja tjiri  eye ongu yenena okutjiwa nokutwapo oruyaveze otja kombango ye. Nu ihi tji tu pa ouatjiri wokutja eye u yenenisa embo re nu ma yenenisa imbi mbya kwizike.

OMAPROFETERO NGE YENENISIWA NDINO

Hapo ove movanga okutjiwa kutja omaprofetero wOmbeibela ye tja vi ohunga nomayuva wetu? Ozombura 2 000 nḓa kapita, Ombeibela ya hunganeka kutja “momayuva omasenina mamu kara otuveze otuzeu.” Omayuva omasenina waye? Ka maandero wouye poo wovandu, nungwari owozombameno nomaumba, oṋiṋikizire, nomauzeu nga ṱuna kovandu oruveze orure tjinene. Ngatu konḓonone pamwe omaprofetero nge raisa kutja tu ri “momayuva omasenina.”

2 Timoteus 3:1-5: “Momayuva omasenina mamu kara otuveze otuzeu. Ovandu mave ripahere oveni ouwa, nu mave rire omakorokope noverihive noveritongamise novayamburure novehinanḓuviro kovanene vawo novehinakutjokuhepa, nu kape na tji matji rire otjiyapuke ku wo; owo mave rire ovehinarusuvero nu mbe ha hangana, ovayamburure vovakwawo, ovanautwe novindandi mba tonda ouwa; owo mave rire ovahorore vomovineya, ovanakaṋa, noveriyere vatjinene; owo mave rarukire oviṋa komeho yokusuvera Ndjambi; owo kombanda ve munika aayo ovakambure, nungwari inga omasa wongamburiro ve ye nakaura.”

Hapo ko nokuitavera kutja ovandu ndino ve novikaro mbi, nu vi ri rira ko ovivi? Mutu u muna kutja twa koverwa i ovandu mbe risuvera oveni, mba suvera ovimariva nu overitongamise. Ove u muna kutja ovandu ve vanga ovingi, nu kave vanga okutjita ohange kuna varwe? Nu ngahino wina wa muna kutja ovanatje ka ve nondengero kovanene vawo nokutja owo ve rarukira oviṋa komeho yokusuvera Ndjambi. Nu oviṋa avihe mbi vi ri rira ko ovivi eyuva arihe.

Mateus 24:6, 7: “Eṋe mamu zuu ombosiro yovita popezu nozombuze zovita kokure tjinene. . . . Otjiwaṋa tjimwe matji sekamene otjiwaṋa otjikwao, nouhona umwe au rwisa ouhona oukwao.”

Ovakonḓonone va konḓonona kutja okuza kombura ndji 1914 ovandu kombanda 100 000 000 va ṱa movita, nu ihi otjivarero tji tja kapita otjivaro tjovature vomahi omengi. Ripura uriri ohunga noruhoze nomaririro nomihihamo omaumba omanene ngo mbi vi eta. Hapo ovandu ve rihongera kozondataiziro zawo nḓo nu ve paha omuano wokuisapo ovita?

Mateus 24:7: “Koṋa akuhe maku kara ondjara nomanyinganyingiro wehi. “

Orutu ndwi o-World Food Programme ru tja: “Nandarire kutja mouye mu ungurwa ovikurya ovingi mbya yenene kovandu avehe, ovandu 815 000 000 ve rara nondjara. Nu wina umwe movandu vetatu, u kara nomutjise wokuhina okurya ovikurya oviveruke.” Pa munikwa kutja ovanatje ape omangete yetatu ve ṱa mena rondjara ombura aihe.

Lukas 21:11: “Mamu kara omanyinganyingiro wehi omatirise.”

Ombura aihe omanyinganyingiro wehi ape 50 000 ye ṱuna kovandu. Nu popengi ye eta onyoneno onene kozondjuwo, nu ombura aihe mu kara omanyinganyingiro omahimise. Ongonḓononeno imwe ya raisa kutja pokati kozombura nḓa 1975 no 2000, omanyinganyingiro wehi ya zepa ovandu 471 000.

Mateus 24:14: “Indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.”

Ovahongonone va Jehova, vokombanda yomangete hambondatu, ve zuvarisa nokuhongonona ombuze ombwa yOuhona wa Mukuru mouye auhe. Owo ve zuvarisa ombuze ombwa movihuro, mozoresevate, mozohambo na mokuti na ngamwa akuhe ku ku va zewa ovandu. Otjiungura tjokuzuvarisa hi tji tja manuka, otja kombango ya Mukuru omuini, omaprofetero ya tja: “Nomaandero indino otji maye ya.” Iho ma tji hee tjike? Ma tji hee omaandero kouhonapare wovandu, nombutiro yOuhona wa Mukuru okuhonapara kombanda yehi. Hapo Ouhona wa Mukuru mau eta tjike? Lesa komurungu kutja u mune eziriro.