Twende kovidio oini

Twende komurya

Ovahongonone vaJehova

Toorora eraka Otjiherero

Omakwizikiro ngu maye yenenisiwa

Omakwizikiro ngu maye yenenisiwa

Ombuze ombwa yOuhona wa Mukuru i zuvarisiwa mouye auhe, otja Jesus pa he ya. (Mateus 24:14) Embo ra Daniel ri tu raera kutja Ouhona mbwi ohoromende ya Mukuru. Ekondwa 2 rembo ndo ri nomaprofetero nge raisa ongongorasaneno yozohoromende poo omauhonapare omanamasa wouye mbwi, okuza ku Babilon otjikuru nga ku ndino. Mokuturaera ondjira komurungu, ezeva 44 ri tja:

“Ndjambi weyuru ma ziki ouhona mbu hi na indu maau yanda ko. Owo kamaau haverwa ko, nungwari mau nyono omauhona aehe ngo, nu tjazumba owo au karerere nga aruhe.”

Omaprofetero nga na warwe, ye tja Ouhona wa Mukuru mau pingene ozohoromende azehe zovandu nu au yeta omazikameno omawa nomaunguriro omawa mouye. Hapo ouye imbwi mau sana pi kehi yOuhona Ouhatoi mbu hi neraka komaprofetero nga yenenisiwa? Pe nomakwizikiro omahimangongo ngu maye yenenisiwa tjamwa oruveze.

  • OVITA MAVI YANDA

    Epsalme 46:9: “Eye [Mukuru] u yandisa ovita mouye auhe, u teya omauta nomanga, nu u ningiririsa omatemba wovita nomuriro.”

    Ripura kutja hapo ouye atja u sana pi, andakuzu ovimariva nozongondjero azehe nḓe tjitwa okuungura ovizepe vi tanaurirwa mokuungura oviṋa mbi mavi eta ouwa kovandu pendje nokuvezepa! Tjiri ouye mau sana ngo kehi yOuhona wa Mukuru.

  • OUVERE MAU YANDA

    Jesaja 33:24: “Nu kape nomundu ngwa tura mehi retu, ngu ma unauna rukwao kutja eye wa vera.”

    Ripura nouye mu mu hi nokukara nomitjise vyomutima, omutjise wonyota, omalaria, poo ngamwa omutjise. Tjiri oruveze ndo ka maa tu ka hepa ozonamiti nomiti omipange rukwao. Ovandu avehe mouye mave rire ovaveruke.

  • ONDJARA MAI YANDA

    Epsalme 72:16: “Ngamu kare ovikokotwa ovingi mehi nga kozondomba zozondundu.”

    Ovikurya ma vi takavara mouye auhe, nu ka pe nomundu ngu ma kara nondjara. Okutja omitjise mbi etwa i ouhepe wovitunge vyorutu handje kavipo rukwao wina.

  • OMIHIHAMO, OMARIRIRO, NONḒIRO MAVI YANDA

    Omavandururiro 21:4: “Eye [Mukuru] ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao. Oviṋa ovikuru vya kapita.”

     Okutja nao mape hee omuinyo waaruhe nu omuhomonena moparadisa! Nu imbi Omuute wetu, Jehova Mukuru, ombye tu kwizikira.

“MARI YENENISA OTJIṊA NGAMWA ATJIHE”

Hapo ove mokambura moviṋa mbi? Nandarire kutja ovandu ovengi ve tjaterwa i omakwizikiro womuinyo waaruhe nge ri mOmbeibela, mena romapu pekepeke, ovengi ve muna kutja ouzeu okukambura kutja mo yenene okuhupa nga aruhe nokuhina okukoka. Posi yokutja ka navi okumuna nao, orondu ka pe nomundu ngwa rora okuhupa omuinyo mbwa sana ngo okuturaera.

Mouye mbwi twa pandekwa i ouvi nonḓiro, omihihamo, omauzeu, noviwonga oure woruveze orure tjinene, nga ovandu ovengi tji va yakura omuano wokuhupa mbwi aayo indi eehupo ndi ri ko opuwo. Posi yokutja indji ka ndja ri ondando yOmuute wetu, Jehova Mukuru, kovandu.

Kutja tu kare nongamburiro momakwizikiro we, Mukuru wa tja nai ohunga nembo re: “Oro mari yenenisa ihi Ami tji mbe ripurira ro, nu mari yenenisa otjiṋa ngamwa atjihe Ami tji mba hindira ro okutjita.”​—Jesaja 55:11.

Ombeibela i tja Jehova o Ndjambi “ngu ha wovisa.” (Titus 1:2) Nambano otja ngwe tu kwizikira oruyaveze oruwa ndwi, ma rire ounongo kweṱe okuripura oveni kutja: Hapo tjiri ovandu mape ya ave hupu nga aruhe mOparadisa ndja kwizikwa kombanda yehi? Hapo matu sokutjita vi kutja tu mune ouwa momakwizikiro wa Mukuru nga? Omikuma mbi mavi kongorere mba, ma vi ku pe ondjivisiro ndji mai ziri omapuriro ngo.