Twende kovidio oini

Twende komurya

Ovahongonone vaJehova

Toorora eraka Otjiherero

Ove mo yenene okuhupa nga aruhe kombanda yehi

Ove mo yenene okuhupa nga aruhe kombanda yehi

TJIRI INGO OMAUNDJIRO OMAWA! Omuute wetu wa kwizika okutupa omuinyo waaruhe, imba kombanda yehi. Ovandu ovengi ka ve kambura momakwizikiro ngo. Ovengi ve muna kutja ‘okukoka otjiṋa tji tja tu wa po i Mukuru nu orupa rwokuhupa’. Varwe ve muna kutja matu yenene okuhupa nga aruhe, posi yokutja ka kombanda yehi mba. Ve tja omuinyo waaruhe uri meyuru indu tji wa zu nokukoka. Ove mo tja vi?

Ngunda au hi ya zira epuriro ndo, mape tjiti vi tji wa tara komaziriro wOmbeibela komapuriro yetatu nga: Omuano omundu ma ungurwa u raisa tjike ohunga norure ndu ma sokuhupa? Ondando ya Mukuru kehi novandu o ya tjike? Onḓiro ye ya vi kovandu?

OVANDU OVIUTWA VYA PEKE

Moviutwa avihe Mukuru mbya mema, tjiri ovandu oviutwa vya peke. Omomuano uṋe? Ombeibela i raisa kutja ovandu va ungrwa “kombunikiro na kosaneno” ya Ndjambi. (Genesis 1:26, 27) Ihi ma tji hee tjike? Ma tji hee kutja ovandu va pewa ovikaṋena novitjiukwa vyoundu tjimuna imbi ovya Mukuru omuini, otja orusuvero nokusuvera ousemba.

Kombanda ya nao, ovandu va ungurwa okuyenena okuungurisa omeripura wawo, nokupangura pokati kouwa nouvi nokukara nonḓero yokutjiwa Mukuru nokukara noupanga ku na ye. Omena ra nao tji tu kara nondangi komuano omuhimise ouye nevavarwa noviutwa vyarwe mu vya ungurwa, na wina okuungura nokumema oviṋa, okuimbura, nokumema omiimbo. Kombanda yaavihe mbi, ovandu ve yenena okurikotamena kOmuute. Ovikaṋena otja imbi tjiri vya twa po ombangu onene pokati kovandu noviutwa vyarwe kombanda yehi.

Ko i tji ripura nai: Hapo Mukuru mape ya a tja yandja ovikaṋena nounongo mbwa sana ngo kovandu, nomuano mbu ve kurira ko mounongo wawo, andakuzu wa vanga kutja ve hupe ozombura ozonḓiṱi uriri? Ouatjiri owombwi wokutja Mukuru wa yandja ovikaṋena vya peke nomasa nounongo kovandu kutja ve yorokere omuinyo imba kombanda yehi nga aruhe.

ONDANDO YA MUKURU

Tjiva ve tja Mukuru ka ungurire ovandu okuhupa kombanda yehi nga aruhe. Owo ve rizuvisa kutja ouye wa ungurirwa ovandu okukara mo oruveze orusupi uriri, otjomuano wokutarewa kutja ovandu veṋe mbu va pwire okuyenda keyuru okukakara pu na Mukuru nga aruhe. Tjinangara imbo ouatjiri, okutja Mukuru o ngu nomeriziririra koviṋa ovivi mbi tjitwa kombanda yehi, poo vi? Imbo ka watjiri orondu Mukuru ke ri nao. Ombeibela i tja nai ohunga naye:  “Ozondjira ze azehe tjinga aze ri ozosemba; Eye Ndjambi omuṱakame nomunausemba; Eye omusemba nomunauatjiri.”​—Deuteronomium 32:4.

Mukuru wa raisa ondando ye kehi mOmbeibela nomambo nga: “Eyuru oro oraMuhona porwe, nungwari indi ehi Eye wa yandja kovandu.” (Epsalme 115:16) Mukuru wa ungura ehi kutja ri rire oruveze oruwa, nu orukarerere kovandu okukara mo, na twa mo oviṋa ngamwa avihe ovinanyuṋe ovandu mbi ve hepa kutja ve yorokere ehupo ra wo nga aruhe.​—Genesis 2:8, 9.

“Eyuru oro oraMuhona porwe, nungwari indi ehi Eye wa yandja kovandu.”​—Epsalme 115:16

Ombeibela wina i raisa oukahu ohunga nondando ya Mukuru kovandu. Eye wa raera ovakupasane ovatenga kutja: ‘Kwatasaneye, takavareye nu mu urise ehi, noro ngari kare kehi yeṋu; nu kareye nouvara kombanda . . . yovinamuinyo avihe, mbi ri kombanda yehi.’ (Genesis 1:28) Tjiri ya ri ondjingonekero ya peke ku wo okuṱakamisa nokuneneparisa otjikunino tjOparadisa nga tji ma tji kambura ouye auhe! Okutja tjiri oukahu kutja Adam na Eva nozondekurona zawo aave sokuhupa kombanda yehi nga aruhe, nungwari ka meyuru.

ONGWAYE TJI TU KOKA?

Nambano, ongwaye tji tu koka? Ombeibela i raisa kutja umwe woviutwa vyombepo, kombunda ngwa ka tjiukwa otja Satan Omudiaboli, wa kondja okuteya ondando ya Mukuru moEden. Omomuano uṋe?

Satan wa tjita kutja ovanene ve tu ovatenga, Adam na Eva, ve rikute ku na ye mokupirukira Mukuru. Indu Satan tja tja Mukuru u pata ovandu oviṋa oviwa, ousemba wokuritoororera oveni mbi mave vanga okutjita kombango ya wo, owo ve rikuta ku na Satan nave pirukire Mukuru. Kwa kongorera tjike? Kombunda yoruveze, owo va ṱa, otja Mukuru pa he ya. Owo va pandjara oruyaveze rwa wo rwokuhupa nga aruhe mOparadisa kombanda yehi.​—Genesis 2:17; 3:1-6; 5:5.

Omapirukiriro wa Adam na Eva ya ṱuna kovandu avehe nga ku ndino. Embo ra Mukuru ri tja: “Ouvi wa zira momundu umwe [Adam] nau ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe.” (Ovaroma 5:12) Eṱe tu koka mena rokutja twa rumata ouvi nonḓiro kovanene vetu ovatenga, nungwari ka mena rokutja Mukuru wa twapo kutja pe kare nao, poo kutja wari ‘nondando’ yarwe ndji ha tjiukwa i ovandu.

OVE MO HUPU NGA ARUHE KOMBANDA YEHI

Omapirukiriro nga tjitwa mo Eden kaye teyere ondando ya Mukuru kovandu nehi. Orusuvero rwa Mukuru ohomonena nomuano mbwa suvera ousemba, rwe mu hinga okutukutura koukarere wouvi nonḓiro mbu twa rumata. Omuapostele Paulus wa tja: “Orondu omasutiro wouvi owo onḓiro; nungwari otjiyandjewa tjotjari tjaNdjambi otjo omuinyo waaruhe moruwano na Kristus Jesus oMuhona wetu.” (Ovaroma 6:23) Mena rorusuvero rwe orunene, Mukuru wa “yandja Omuna we omukwatwaerike [Jesus Kristus], kokutja auhe ngu ma kambura mu Ye a ha pandjara, nungwari a kare nomuinyo waaruhe.” (Johanes 3:16) Mokuriyandja otjombunguhiro yotjisuta tjonguturiro, Jesus wa suta avihe mbya pandjarisiwa i Adam. *

Tjamwa oruveze nai, omakwizikiro wa Mukuru wOparadisa maye yenenisiwa tjiri. Oruyaveze oruwa ndwi rwa kwizikirwa ove indu tji wa yandja ombakatwi komambo wa Jesus nga: “Hitireye momuvero omumango, omuvero mbwi mbu twara kombandjarero tjinga au ri omuparanga, nondjira ndji yenda ngo ai ri ombupu, nu imba mbe ryangera mu yo ava takavara. Nungwari omuvero mbwi mbu twara komuinyo owo omumango, nondjira ndji yenda ngo i neputi, novehinanḓengu imba mbe i muna.” (Mateus 7:13, 14) Ii, tjiri oruyaveze rwoye ru ri momake woye omuini. Nambano mo tjiti vi?

^ par. 17 Tji movanga ondjivisiro yokomurungu ohunga notjisuta tjonguturiro, lesa ekondwa 5 rembo ndi Ombeibela mai yenene okutuhonga tjike? nda pitisiwa i Ovahongonone va Jehova nu mo yenene okurivaza morungovi ndwi www.jw.org.