Motupa twokambo nga, twe rihongo ohunga noviṋa mbi mavi tu vatere okuzira epuriro ndi, Hapo Mukuru omungendu? Twe rihongo mOmbeibela kutja ena re oJehova, nokutja otjikaṋena tje otjinanḓengu tjinene orusuvero. Wina twa tara kutja ovikeṋa mbya tjita, nokutja ma katjita tjike moruyaveze mbi mavi eta ouwa kovandu avehe. Ngunda pe novingi okurihonga ohunga na Mukuru, ngahino mo ripura kutja, okurihonga ohunga na Mukuru maku eta ouwa waye kove.

Jehova wa kwizika kutja “tji mo Mu paha, Eye me rimunikisa kove.” (1 Ekuruhungi 28:9) Otja tji mo paha Mukuru natji mo yende amo mu tjiwa nawa, mo yenene okuhara otjiṋa otjihuze tjinene, oupanga wopopezu kuna Jehova, orondu eye “u wana na imba mbe nonḓuviro ku Ye.” (Epsalme 25:14) Nu hapo oupanga otja imbwi mau ku etere ouwa waye?

Ondjoroka yatjiri nouṋingandu. Jehova u tjiukwa otja “Mukuru omunauṋingandu.” (1 Timoteus 1:11, EEP) Okutumbuka popezu na ye nokukongorera omirari vye, maku tu etere ondjoroka yatjiri ndji mai yenene okutuvatera momuinyo, momeripura na korutu. (Epsalme 33:12) Ove wina mo yenene okukara nondjoroka mehupo, mokuhina okuritjinda mongaro ndji mai ku twa moumba, nokuritjinda mongaro ombwa, nokukara noupanga ouwa kuna varwe. Ove mo utu okukupasana nomambo womutjange wepsalme ngwa tja: “Nu ku ami okokuwa okukara popezu na Ndjambi.”​—Epsalme 73:28.

Mukuru me ku tjevere nawa nokukupa ombango. Jehova wa kwizikira ovakarere ve na tja: “Me ku rongo, neho randje mari kara kombanda yoye.” (Epsalme 32:8) Ihi matji raisa kutja Jehova u tjevera ovakarere ve avehe kourike wawo, nu u yandja otjiṋa omukarere we auhe tji ma hepa kourike we. (Epsalme 139:1, 2) Tji wa kara noupanga ouwa kuna Jehova, mo utu okumuna kutja eye aruhe ma kara mbo okukuvatera.

Omaundjiro omawa woruyaveze. Jehova ke tu vatere okumuna ouṋingandu nokukara nohange mehupo nai uriri, nungwari wina u tu vatera kutja tu kare noruyaveze oruwa. (Jesaja 48:17, 18) Ombeibela mai tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.” (Johanes 17:3) Moruveze rouzeu ndwi, omaundjiro Mukuru nge yandja ye ri tjimuna otjihande tjomuinyo ‘otjizikame nu tji tji ha nyinganyinga.’​—Ovaheberi 6:19.

Inga itjiva womapu omaṱiṱi uriri ngu maye sokutuhinga okutjiwa Mukuru nawa nokutunga oupanga wopopezu kuna ye. Tji mo vanga ondjiviro yokomurungu, mo yenene okuhungira ku nOvahongonone va Jehova, poo kavarure orungovi ndwi jw.org/hz.