Twende kovidio oini

Twende komurya

Ovahongonone vaJehova

Toorora eraka Otjiherero

Mukuru me ke tu tjitira tjike?

Mukuru me ke tu tjitira tjike?

Otjiperi kutja tji u ri mouzeu otjovanga kutja epanga roye ri ku vatere. Kunao, tjiva ve muna kutja Mukuru kapanga rawo, orondu ve muna kutja katjiti otjiṋa okuvevatera. Ouatjiri owombwi wokutja Mukuru wa tjita oviṋa ovingi rukuru mbi tu vatera, nu wina ma toora omukambo wokuisapo omauzeu ngu tu muna ndino. Hapo Mukuru me ke tu tjitira tjike?

MA KAISAPO OURUNDE AUHE

Mukuru ma kaisapo omaurunde aehe mokuyandeka ingwi ngwa eta ourunde. Ombeibela i tjiukisa ingwi ngwa eta ourunde indu tji i tja: “Ouye auhe u ri kehi youhonapare waingwi umwe Omunaurunde.” (1 Johanes 5:19) Ingwi “umwe Omunaurunde” omundu umwe na ingwi Jesus ngwa isana “omuhonapare wouye mbwi,” Satan Omudiaboli. (Johanes 12:31) Satan ongu eta omauzeu aehe nge ri kombanda yehi. Nu hapo Mukuru me ke tu tjitira tjike?

Moruyaveze ropopezu Jehova Mukuru ma ungurisa Omuna we Jesus Kristus, “a yandeke ingwi ngu nomasa okuzepa ovandu, okutja eye ngwi Satan.” (Ovaheberi 2:14; 1 Johanes 3:8) Kombanda yanao, Ombeibela i raisa kutja Satan omuini u tjiwa kutja “u noruveze orusupi uriri” okuyandekwa. (Omavandururiro 12:12) Mukuru wina ma yandeke ouvi auhe na imba avehe mbe tjita ourunde.​—Epsalme 37:9; Omiano 2:22.

MA TJITI KUTJA EHI ARIHE RI RIRE OPARADISA

Tja zu nokuyandeka ourunde auhe kombanda yehi, Omuute wetu ma yenenisa ondando ye yokutja ovandu ohomonena ve hupe nga aruhe kombanda yehi. Matu kamuna ye moruyaveze?

Ohange ongarerere nondjeverero. “Ovanandjenda mave rumata ehi, nu mave vyarere ohange onene.”​—Epsalme 37:11.

Ovikurya ovingi nu oviveruke kovandu avehe. “Ngamu kare ovikokotwa ovingi mehi nga kozondomba zozondundu; ovyo ngavi takavare.”​—Epsalme 72:16.

Ozondjuwo ozombwa noviungura ovikovise. “Ovandu mave tungu ozondjuwo nave tura mo oveni; mave kunu omivite nave ri ovihape vyavyo. . . . Owo oveni mave ri imbi mbi va ungura nomake wawo oveni.”​—Jesaja 65:21, 22.

Hapo ove u nonḓero yokukamuna oviṋa mbi? Moruyaveze ropopezu mo yenene okuvimuna avihe.

MA KAISAPO OMITJISE NONḒIRO

Ndino ovandu avehe ve vera nokukoka, nungwari moruyaveze kape nokukara nao. Moruyaveze ropopezu Mukuru ma ungurisa ouwa wombunguhiro ya Jesus “kokutja auhe ngu ma kambura mu Ye a ha pandjara, nungwari a kare nomuinyo waaruhe.” (Johanes 3:16) Okuzambo ma tjiti vi?

Ma isapo omitjise avihe. “Nu kape nomundu ngwa tura mehi retu, ngu ma unauna rukwao kutja eye wa vera, nomauvi aehe maye isirwa.”​—Jesaja 33:24.

Ovandu kave nokukoka rukwao. “Muhona Ndjambi ma nyono onḓiro nga ko nga aruhe! Eye ma pyoṋa omahoze momeho waauhe.”​—Jesaja 25:8.

Ovandu mave hupu nga aruhe. “Otjiyandjewa tjotjari tja Ndjambi otjo omuinyo waaruhe moruwano na Kristus Jesus oMuhona wetu.”​—Ovaroma 6:23.

Imba mba ṱa mave kotorwa komuinyo. “Ovandu avehe ovawa novavi mave penduka movakoke.” (Oviungura 24:15) Imba mba ṱa mave kapendurwa mena rotjiyandjewa tja Mukuru tjotjisuta tjonguturiro.

Omomuano uṋe Mukuru mu ma yenenisa oviṋa mbi avihe?

 MA ZIKAMISA OHOROMENDE OHOMONENA

Mukuru ma yenenisa ondando ye kovandu nehi okupitira mohoromende ye yomeyuru, ndji mai honaparerwa po i Kristus Jesus. (Epsalme 110:1, 2) Indjo ohoromende poo ouhona, Jesus mbwa honga ovemukongorere okukumbira nomambo nga: “Tate yetu ngu u ri momayuru, . . . ouhona woye ngau ye.”​—Mateus 6:9, 10.

Ouhona wa Mukuru mau kahonapara kombanda yehi arihe, nu mau isapo omihihamo nomauzeu aehe kombanda yehi. Ouhona mbwi ohoromende osembasemba ovandu ndji mave kakara na yo! Jesus opa zokuzuvarisa “Ombuze Ombwa youhona” indu tja ri kombanda yehi, nu wa raera ovahongewa ve okutjita nao wina.​—Mateus 4:23; 24:14.

Mena rorusuvero rwe kovandu, Jehova Mukuru wa kwizika okuvetjitira oviṋa avihe oviwa mbi. Hapo otjiṋa hi katji nakukupa onḓero yokuvanga okutumbuka popezu na ye? Hapo tji wa toorora okutjiwa Mukuru maku ku etere ouwa waye? Orupa ndu maru kongorere ko maru kahurura.

MUKURU ME KE TU TJITIRA TJIKE? Mukuru ma kaisapo omitjise nonḓiro, nu ma kawaneka ovandu avehe kehi yOuhona we, na tjiti kutja ehi arihe ri rire oparadisa