Ombeibela i tja omaronga wayo “ye nonḓengu onene yokuhonga ouatjiri nokupirukira omahongero woposyo, nokuvyura ozondataiziro.” (2 Timoteus 3:16) Hapo imbwi ouatjiri? Ngatu tare komuano ounongo wOmbeibela mu wa vatera ovandu okuyepa omauzeu tjiva omanene.

OKUNWA OTJIKARIHA OKUKAPITISA ETOTA

Elizabeth ngwa tamunwa morupa ndwa kapita, ee rimunu aayo omauzeu we aaye mu hingi okunwa otjikariha tjinene. Ombeibela kai tjaere omundu okunwa otjikariha kaṱiṱi, nungwari i tja: “O rikutu kuna ovandu mbe nwa omavinu tjinene.” (Omiano 23:20) Pa munikwa kutja okunwa otjikariha okukapitisa etota, ku ṱuna kouveruke wovandu, ku teya oupanga kuna varwe, nu itjimwe tjoviṋa mbi zepa ovandu ovengi ombura aihe. Omauzeu omengi nga maye yenene okunakaurwa, indu ovandu tji va ṱakamisa eronga rOmbeibela ndi.

Elizabeth wa tjita nao. Eye nai u tja: “Ami mba muna kutja otjikariha kaatji isapo ozongendo zandje. Ami mba ṱakamisa omambo wounongo nge ri mOvafilipi 4:6, 7, nge tja: ‘Amu rikendere otjiṋa, nungwari . . . ningireye ku Ndjambi imbi mbi mwa hepa.’ Ongurova aihe tji mba ri nomeripura omengi na tjee hara ozongendo, ami ee riyarikaṋa ku Jehova. Ami mbe mu raera ohunga nomuano mbwee rimunu moukoto, omazenge, nomuhihamwatima, nomerihahiziro ngu mba ri na wo, nu mbe riheka ku ye kutja me ndji vatere okupaha omuano wokuhara omeripura omawa. Omuhuka omunene, ami ee kondjo nomasa kutja e ha kara nomeripura otja ingo. Okukumba aruhe ku Jehova, kwe ndji vatera okuyandja ombango ku imbi mbi mbi na vyo, moruveze rwokuyandja ombango ku imbi mbi mbi hari na vyo. Ami mba tya kutja hi nokunwa otjikariha rukwao. Mena rokutja ohange ndji mba muna ndji, ya ri otjiṋa otjihuze kwami, ami tjiri hee vanga okuipandjara oparukaze.”

 ORUVAKIRO

Oruvakiro itjimwe tjoviṋa mbi eta omauzeu omengi nomihihamo. Posi yokutja omirari vyOmbeibela mavi yenene okutuvatera kutja atu ha munu omauzeu ngo. Oyo i tu vatera okunakaura oviṋa mbi eta omauzeu ngo, tjimuna okunyanda orombe, nokutarera oviṋa vyakamuzu. Omurumendu omutanda wena Samuel wa tja: “Ya ri oupupu tjinene okunyanda orombe. Nu povikando tjiva hee nanukirwa i yomundu ngwee nyandisa orombe. Posi yokutja ee yenene okumuna kutja eye u ndji vanga, nu ihi aatji tjiti kutja okunyanda orombe ku rire enyando ewa.” Samuel wa muna kutja, eye u kuminiwa tjinene kutja u nyanda orombe, nandarire kutja kandja ri ondando ye. Nu ihi tje mu hinga kutja ma ute okunyanda orombe owina. Posi yokutja, ongaro ndji aa i mu kurungisa tjinene momuinyo. Eye wa tja: “Okunyanda orombe otjiṋa tji tji eta oumba, orondu tji tjita kutja omundu ma ute okuripurira ku ye omuini.”

Samuel wa lesa orupa komitanda, ndwa pitisiwa morungovi ndwi jw.org. Nu e ripurire komambo nge ri mOmiano 20:11, nge tja: “Nandarire omuatje u raisa movitjitwa vye kutja eye omukendu; ove mo yenene okuserekarera kutja eye omuṱakame nomukohoke poo indee.” Omambo nga, ye mu vatera vi? Samuel wa muna kutja, okunyanda orombe katjiṋa otjikohoke poo otjisemba okutjita. Eye nai u tja: “Ami wina mbe rihonga kutja, omutanda ngu nyanda orombe u hara ovikaṋena mbi tjita kutja ma karire omurumendu omuvi komukazendu we. Ami mba uta okuripurira kokutja, indu tji mba kupu, omukazendu wandje mape ya a munu ko vi tji me ndji munu ame nyanda orombe kuna omukazendu warwe. Ihi tja tjita kutja mbi ute okumuna kutja, okunyanda orombe katjiṋa tjomanyando. Nandarire kutja oupupu okunyanda orombe, kaku hee kutja otjiṋa otjisemba.” Samuel wa rundurura ongaro ye. Okuisa okunyanda orombe wina kwe mu vatera kutja ma nakaure oruvakiro.

Antonio wa ri moumba ounene wokutjita oruvakiro, orondu eye wa ri omukarere woviṋa vyakamuzu. Nandarire kutja eye wa ri a kupa omukazendu ngwa suverere tjinene, eye povikando ovingi ee kerimuna ama tara oviṋa mbi. Eye wa tja, okuripurira ku 1 Petrus 5:8 tjiri kwe mu vatera tjinene. Oro ri tja: “Kareye nomuungutima nu mu kare katumba! Omunavita na eṋe, ingwi Satan, u ryanga otja ongeyama, ndji mai tye ovimboro amai paha ingwi ngu mai vanga okuteta.” Antonio wa tja: “Oviperendero vyakamuzu vye ura mouye mbwi, novyo vi yenena okukakatera mourizemburuka womundu. Etjangwa ndo tjiri re ndji vatera okuripurira ku ingwi ku ku za omarorero ngo. Ee hepa okurihonga okuzemburuka tjimanga kutja oviperendero ovivi mbyo, vi za ku Satan. Nai mbi tjiwa kutja, oJehova erike uriri ngu ma yenene okundjivatera kutja mbi ‘kare nomuungutima nu mbi kare katumba,’ kutja mbi yenene okurwisa omarorero nga nge ya mourizemburuka, momutima, na morukupo rwandje.” Antonio wa muna ombatero ndjaa hepa, nu wa isa ongaro ye ombi ndji. Nu ihi tje mu vatera kutja ma kare kokure nomaumba warwe omanene.

Oukahu kutja, Ombeibela i tupa omirari mbi yenena okutuvatera kutja atu ha kara nomauzeu omanene. Nu hapo tji tu nomauzeu nga kakatera momiinyo vyetu nu nge munika aayo kaye nomaandero, matu yenene okutjita vi? Ngatu tare kutja Embo ra Mukuru mari yenene vi okutuvatera okuzengurura omauzeu otja ingo.

Omirari vyOmbeibela mavi yenene okutuvatera okuyepa omauzeu tjiva