Mukuru u vanga kutja ovandu ve yorokere ehupo rawo kombanda yehi. Eye wa mema ehi noviṋa avihe kombanda yehi mena rokutja wa suvera ovandu. Moruyaveze rwopopezu eye ma toora omikambo vyokuyandja ehupo ewa kovandu avehe kombanda yehi. Eye ma kutura ovandu koviṋa avihe mbi ve etera ouzeu.​—Lesa Jeremia 29:11.

Kape nohoromende na imweimwe ndja rora okutoṋa okuisapo ozondjito zoutwe, omitjise nonḓiro. Nungwari pe nombuze ombwa yokutja moruyaveze rwopopezu Mukuru ma ziki ohoromende ye ndji mai pingene inḓa zovandu. Imba mbe riwisa kehi yohoromende yaMukuru mave kayorokera ohange nomberukiro.​—Lesa Jesaja 25:8; 33:24; Daniel 2:44.

Okumuna ouzeu maku yanda indu Mukuru tja isapo ovandu ovavi kombanda yehi. (Sefanja 2:3) Imbi mavi tjitwa ruṋe? Embo raMukuru ra kwizika ohunga nozongaro nai nḓe twa ovandu moumba. Oviṋa ovivi mbi tjitwa kombanda yehi vi raisa kutja oruveze rwaMukuru rwokutoora omikambo ru ri popezu.​—Lesa 2 Timoteus 3:1-5.

Matu sokurihonga ohunga na Mukuru okuza mEmbo re Ombeibela. Oyo i ri tjimuna orutuu okuza ku tate omunarusuvero. I tu raera omuano wokukara nehupo ewa nai nomuano wokukara nomuinyo waaruhe moruyaveze kombanda yehi. Otjiperi kutja tjiva kamaave kara nenyando indu ove tji mo yakura ombatero yokuzuva Ombeibela nawa. Nungwari okukara noruyaveze oruwa otjiṋa otjiwa tjinene tji tu hi na maatu vanga okupandjara.​—Lesa Omiano 29:25; Omavandururiro 14:6, 7.