ONDANDO YEKONDWA NDI

Konḓonona kutja Jesus aa hongo tjike ohunga nOuhona waMukuru

1, 2. Ovaapostele vaJesus vetatu va zuva omambo yeṋe Jehova nga hungira, nowo va tjita vi?

INDU Jehova Mukuru tje ku ningire okutjita otjiṋa, ove mo tjiti vi? Katjiperi kutja mo kara nonḓero yokutjita otjiṋa ngamwa atjihe tje kuningire? Ii, otjiperi mo tjiti nao!

2 Oruveze orusupi kombunda yOpaska yombura ndji 32, ovaapostele vaJesus vetatu, ooPetrus, Jakobus na Johanes va ningirwa i Jehova okutjita otjiṋa. (Lesa Mateus 17:1-5.) Owo va karonda ‘kondundu onde’ puna Omuhona wawo, nave kamuna Jesus otjOmbara yomeyuru motjirimunikise. Otjirimunikise hi aatji munika tjimuna otjiṋa tjaatji tjitwa tjiri ngandu ndi Petrus tja kondja okukara norupa mu tjo. Ngunda Petrus ama hungire, owo va koverwa i otjikamba. Okuzambo Petrus novakwao va zuva otjiṋa tji tja zuvakwa i ovandu ovaṱiṱi uriri, owo va zuva eraka raJehova omuini. Kombunda yokuraisa kutja Jesus Omuna we, Jehova wa hungira oukahu a tja: “Purateneye ku Ye!” Ovaapostele va yandja ombakatwi komambo waJehova ngo. Owo va yandja ombakatwi koviṋa Jesus mbyaa hongo nu aave rakiza varwe okutjita nao wina.—Oviung. 3:19-23; 4:18-20.

Jesus tjinene aa hungire ohunga nOuhona waMukuru okukapita ngamwa omapu warwe

3. Ongwaye Jehova tje vanga kutja tu puratene kOmuna we, nu epu riṋe ndi matu sokukonḓonona?

3 Omambo nga: “Purateneye ku Ye!” ya tjangwa mOmbeibela kutja tu rihongere ko. (Rom. 15:4) Ongwaye tji maku zu nao? Omena rokutja Jesus ongu ri omuhungirire po waJehova nu otjikando atjihe Jesus tjaa hongo, eye aa hongo oviṋa Ihe mbyaa vanga kutja tu tjiwe. (Joh. 1:1, 14) Mena rokutja Jesus tjinene aa hungire ohunga nOuhona waMukuru, mbu ri ohoromende yomeyuru ndji honaparerwa i ye novahonapare va puna ye 144 000 okukapita ngamwa omapu warwe, otji ma rire nawa ku eṱe okukonḓonona epu enanḓengu ndi nawa. (Omavan. 5:9, 10; 14:1-3; 20:6) Posi yokutja, rutenga ngatu konḓonone kutja ongwaye Jesus tjaa hungire ohunga nOuhona waMukuru tjinene nao.

“Otjinyo tji hungira imbi mbye ura momutima . . . ”

4. Jesus wa raisa vi kutja Ouhona otjiṋa otjinanḓengu tjinene ku ye?

4 Jesus u rikendera kOuhona waMukuru tjinene. Ongwaye tji matu yenene okutja nao? Omena rokutja omambo ye raisa imbi mbi ri momutima womundu, pu mape hee kutja owo ye raisa oviṋa mbi ri ovinanḓengu tjinene ku eṱe. Jesus omuini wa tja: “Otjinyo tji hungira imbi mbye ura momutima.” (Mat. 12:34)  Oruveze aruhe ndwa munu, Jesus aa hungire ohunga nOuhona waMukuru. Povikando vyokombanda 100, Omaevangeli yane ya hungira ohunga nOuhona, nu omengi yawo yari omambo nga hungirwa i Jesus. Ouhona waMukuru ombwa ri epu enene eye kaa hungirire tji ma zuvarisa, nu opa zokutja: “Ami me sokukazuvarisa Ombuze Ombwa youhona waNdjambi kovihuro vyarwe wina, orondu otjo otji mba hindirwa i Ndjambi.” (Luk. 4:43) Nandarire tja za nokupendurwa, Jesus wa kayenda komurungu okuhungira ohunga nOuhona ku novahongewa ve. (Oviung. 1:3) Omutima waJesus we urire nondangi kOuhona nu otjiṋa hi tje mu hinga okuhungira ohunga na wo.

5-7. (a) Matu tjiwa vi kutja Ouhona otjiṋa otjinanḓengu tjinene ku Jehova? Sasaneka. (b) Matu yenene okuraisa vi kutja Ouhona otjiṋa otjinanḓengu tjinene ku eṱe?

5 Ouhona otjiṋa otjinanḓengu tjinene ku Jehova wina. Otjiṋa hi matu tji tjiwa vi? Zemburuka kutja Jehova wa hinda Omuna we omukwatwaerike mouye; Jehova ongu ri omburo yoviṋa avihe Omuna we mbyaa hungire nokuhonga. (Joh. 7:16; 12:49, 50) Jehova wina ongu ri omburo yoviṋa avihe mbya tjangwa mOmaevangeli yane nge hungira ohunga nehupo raJesus notjiungura tje tjokuzuvarisa. Ripura kaṱiṱi kutja ihi matji hee tjike.

Auhe wetu u sokuripura omuini kutja, ‘Ouhona waMukuru otjiṋa otjinanḓengu tjinene ku ami poo indee?’

6 Ngatu tje mo toorora oviperendero vyeṱunḓu roye mbi mo vanga okuturika kekuma rondjuwo. Nu u noviperendero ovingi mbi mo sokutoorora, posi yokutja u noruveze oruṱiṱi uriri pu mo sokuturika. Ove mo tjiti vi? Mape ya mo toorora tjiva uriri mu imbyo okuturika. Momuano otjingewo, Omaevangeli nga ye ri tjimuna oviperendero imbi mbya turikwa kekuma rondjuwo okutuvatera kutja tu tjiwe Jesus nawa. Jehova kena pa hinga ovatjange vOmaevangeli kutja ve tjange oviṋa avihe Jesus mbya hungira na mbya tjita indu tja ri kombanda yehi. (Joh. 20:30; 21:25) Moruveze rwanao, ombepo yaJehova ya hinga ovatjange mba kutja ve tjange omambo novitjitwa mbi mavi tu vatere okuzuva ondando yomazuvarisiro waJesus nokutjiwa ihi tji tji ri otjinanḓengu tjinene ku Jehova. (2 Tim. 3:16, 17; 2 Petr. 1:21) Nu mena rokutja, Omaevangeli ye ura nomahongero waJesus ohunga nOuhona waMukuru, matji tu pe omasa wokutja Ouhona ounanḓengu tjinene ku Jehova. Jehova u vanga kutja tu tjiwe oviṋa avihe ohunga nOuhona we!

7 Auhe wetu u sokuripura omuini kutja, ‘Ouhona waMukuru otjiṋa otjinanḓengu tjinene ku ami poo indee?’ Ndovazu pe ri nao, matu kara nonḓero onene yokupuratena ku imbi Jesus mbya hungira nokuhonga ohunga nOuhona mbwo, tjimuna ounanḓengu wOuhona nokutja mau ya ruṋe.

“Ouhona woye ngau ye”—Omomuano uṋe?

8. Jesus wa raisa vi kutja Ouhona ounanḓengu?

8 Ripurira kongumbiro ndji Tate yetu ngu ri momayuru. Nomambo omakahu, Jesus wa tjiukisa ounanḓengu wOuhona na raisa kutja owo mau yenenisa tjike. Ongumbiro ndjo i omaningira hambombari. Omaningira yetatu omatenga, ohunga nozondando zaJehova zokuyapura ena re, omeero wOuhona we, nomayenenisiro wombango ye kombanda yehi otja meyuru.  (Lesa Mateus 6:9, 10.) Omaningiriro yetatu ngo ye hitasana. Jehova ma ungurisa Ouhona we mbu honaparerwa i Messias, okuyapura ena re nokuyenenisa ombango ye.

9, 10. (a) Ouhona waMukuru mau ya momuano uṋe? (b) Omakwizikiro yeṋe yOmbeibela ngo tjo zera kutja ye yenenisiwe?

9 Ouhona waMukuru mau ya momuano uṋe? Indu tji matu kumbu kutja “Ouhona woye ngau ye,” okutja nao tu ningira kutja Ouhona u toore omikambo. Indu Ouhona tji we ya, owo mau raisa omasa wawo mouye auhe. Owo mau ye ku isapo ouye ourunde mbwi, mbu mau kamburire mo ozohoromende azehe zovandu nu mau eta ouye oupe nousemba. (Dan. 2:44; 2 Petr. 3:13) Okuzambo, Ouhona mbwi mau tjiti kutja ouye auhe u rire oparadisa. (Luk. 23:43) Imba mbe ri mourizemburuka waMukuru, mave kotorwa komuinyo nave hakaene ku novasuverwa vawo rukwao. (Joh. 5:28, 29) Ovandu mbe nonḓuviro mave rire ohomonena nave yorokere omuinyo mbu hi nomaandero. (Omavan. 21:3-5) Kombunda yanao, ombango yaMukuru mai tjitwa kombanda yehi, otja tji ya tjitwa meyuru! U nonḓero yokumuna omayenenisiro womakwizikiro wOmbeibela ngo? Zemburuka kutja otjikando atjihe tji mo kumbire Ouhona waMukuru u ye, mo kumbu kutja omakwizikiro omawa ngo ye yenenisiwe.

10 Oukahu kutja Ouhona waMukuru ngunda kau “ye ya” okuyenenisa ongumbiro ndji Tate yetu ngu ri momayuru. Ozohoromende zovandu ngunda onḓe honapara nu ouye oupe wousemba ngunda kau ye ya. Posi yokutja pe nombuze ombwa. Ouhona waMukuru wa zikwa, otja tji matu kamuna mekondwa ndi mari kongorere ko. Nambano ngatu konḓonone imbi Jesus mbya hungira ohunga nokutja Ouhona mbwi mau honapara ruṋe meyuru nokutja mau ya ruṋe kombanda yehi.

Ouhona waMukuru mau zikwa ruṋe?

11. Jesus wa raisa tjike ohunga nomazikiro wOuhona waMukuru?

11 Jesus wa raisa kutja Ouhona kau nokuzikwa meserewondo etenga, nandarire kutja ovahongewa ve tjiva va ri nomaundjiro otja ingo. (Oviung. 1:6) Ripurira ku imbi Jesus mbya hungira momahungi yevari pekepeke, rimwe ape mombura ndji 31 na rarwe mombura ndji 33.

12. Ehungi ohunga novikokotwa nozondombora ra raisa vi kutja Ouhona kau zikirwe meserewondo etenga?

12 Ehungi ohunga novikokotwa nozondombora. (Lesa Mateus 13:24-30.) Jesus tja za nokuserekarera ehungi ndi ape mombura ndji 31, we ri kahurura kovahongewa ve wina. (Mat. 13:36-43) Omaheero wehungi ndi owonga: Kombunda yonḓiro yovaapostele, Omudiaboli me yekukuna ozondombora (Ovakriste voposyo) mokati kovikokotwa (“ovanatje vouhona,” poo Ovakriste ovatwirisiwa). Ozondombora novikokotwa mavi yandjerwa okuhapa mumwe nga oruveze rwomakondero, ndu ri “omaandero wouye” tji rwa yenene. Kombunda yomautiro woruveze rwomakondero, ozondombora maze wongwa. Okuzambo, ovikokotwa mavi wongerwa pamwe. Ehungi ndi mari raisa kutja Ouhona mau zikwa, kombunda yoruveze rwomakondero tji rwa yenene, nungwari ka u zikirwe meserewondo etenga. Otja tji pa kara, oruveze rwovikokotwa nozondombora okuhapa mumwe  rwe ya komaandero, nu omakondero wavyo ya uta mombura ndji 1914.

13. Jesus wa sasaneka vi kutja kena ku zikwa otjOmbara tjimanga tja zu nokuyaruka keyuru?

13 Omasanekero wovimariva ovingoldo. (Lesa Lukas 19:11-13.) Jesus wa serekarera ehungi ndi mombura ndji 33 indu tja ri mondjira okuyenda koJerusalem otjikando otjisenina. Tjiva wovapuratene ve aave ripura kutja eye ma ziki Ouhona we tjimanga tji va vaza moJerusalem. Okuṱuna oumune mbwi nokuraisa kutja Ouhona mau kazikwa kombunda moruyaveze, Jesus we risasaneka ‘nomurumendu ngwa zire monganda ondjingona’ nu ngwaa sokuyenda ‘kehi rokokure a kazikwe okurira ombara.’ * Ku Jesus, ‘ehi rokokure’ ndi ra ri eyuru, eye kaa katwirisirwa otjOmbara i Ihe. Posi yokutja, Jesus aa tjiwa kutja eye kena okuzikwa otjOmbara tjimanga tja zu nokuyaruka keyuru. Nungwari, eye ma kahaama kokunene kwaMukuru nokuundja oruveze ndu ma pewa ouvara. Otja tji pa kara, okuundja ngwi kwa kambura oruveze orure.—Eps. 110:1, 2; Mat. 22:43, 44; Hebr. 10:12, 13.

Ouhona waMukuru mau ya ruṋe?

14. (a) Jesus wa zira vi epuriro nda purwa i ovaapostele ve vane? (b) Omayenenisiro womakwizikiro waJesus ye tu raera tjike ohunga nomeero we nOuhona?

14 Omuyuva omaṱiṱi komurungu wonḓiro yaJesus, ovaapostele ve vane ve mu pura nave tja: “Tu raera kutja oviṋa avihe mbi mavi tjitwa ruṋe nokutja otjiraisiro tjomeero woye notjomaandero wouye mbwi ma rire tjiṋe?” (Mat. 24:3; Mar. 13:4) Jesus wa zira epuriro ndo mokuserekarera omakwizikiro nge ri mu Mateus ekondwa 24 no 25. Jesus wa kahurura oviṋa ovingi mbi mavi tjitwa mouye auhe na mbi mavi rire otjiraisiro tjoruveze  ndu isanewa ‘omeero’ we. Omeero waJesus aaye sokuutira tjimwe nomazikiro wOuhona, nu aaye sokuyanda oruveze otjingerwo nomeero wOuhona. Tu notjiraisiro tji tja yenene tjokutja omakwizikiro waJesus ya uta okuyenenisiwa okuza mombura ndji 1914. * Okutja, omeero waJesus nomazikiro wOuhona ya uta mombura ndjo.

15, 16. Omambo nga “omuhoko mbui” maye tjama na uṋe?

15 Nu hapo Ouhona waMukuru mau ya ruṋe? Jesus kena pa hungira oukahu kutja mau ya ruṋe. (Mat. 24:36) Nungwari wa hungira otjiṋa tji matji tupe ongamburiro yokutja Ouhona waMukuru u ri pokuya. Jesus wa raisa kutja Ouhona mau ya indu “ovandu mbe nomuinyo nai, [poo ‘omuhoko mbui,’ EEP]” tji wa zu nokumuna omayenenisiro wotjiraisiro tji tja kwizikwa. (Lesa Mateus 24:32-34.) Omambo nga “omuhoko mbui” maye tjama na uṋe? Ngatu konḓonone omambo waJesus nga nawa.

16 “Omuhoko mbui.” Hapo Jesus aa hungire ohunga novahakambura? Kako. Ripurira kovandu kaa hungire omambo ngo. Jesus wa raera ovaapostele ve tjiva ‘mbe ya ku Ye aveyerike’ ohunga nomakwizikiro nga. (Mat. 24:3) Moruveze rwatjimanga ovaapostele aave sokutwirisiwa nombepo ondjapuke. Wina yandja ombango kepu rehungi raJesus. Ngunda e hiya hungira ohunga ‘nomuhoko mbui,’ Jesus wa tja: “Nu rihongereye komukuyumbwa. Otutavi twawo tji twa rire otutarazu atu eta omaso, indino otji mamu tjiwa kutja okurooro kwa tumbuka. Momuhingo otjingewo mbwi eṋe tji mamu munu oviṋa avihe mbi, mamu tjiwa kutja omayuva ngo ya tumbuka, ye ri pomuvero.” Ovakongorere vaJesus ovatwirisiwa ombu mave munu oviṋa eye mbya kwizika nu ombu mave yenene okutjiwa omaheero wavyo, tjimuna inga wokutja Jesus u “ri pomuvero,” nungwari kavandu imba ovahakambura. Kunao, indu Jesus tja hungira ohunga ‘nomuhoko mbui,’ eye aa hungire ohunga novakongorere ve ovatwirisiwa.

17. Omambo nga “omuhoko” na inga “oviṋa avihe mbi” ye nomaheero watjike?

17 “Oviṋa avihe mbi mavi tjitwa, ovandu mbe nomuinyo nai ngunda ave hiya koka avehe.” Omambo nga maye yenenisiwa vi? Okuzira epuriro ndo, matu sokutjiwa oviṋa vivari mbi: omaheero womambo nga “omuhoko” na inga “oviṋa avihe mbi.” Embo ndi “omuhoko” potuingi ri heya ovandu voviwondo pekepeke nu mba hupire moruveze rumwe. Omuhoko kau hupu orure tjinene nu u yanda. (Eks. 1:6) Omambo nga “oviṋa avihe mbi” ye kamburira mo oviṋa avihe mbya kwizikwa moruveze rwomeero waJesus, okuza komautiro wombura ndji 1914 nga koruveze ‘ozombamisiro ozonene tjinene’ tji maze utu.—Mat. 24:21.

18, 19. Omambo waJesus ohunga ‘nomuhoko mbui,’ matu sokuyezuva vi, nu matu yenene okuya kepu riṋe?

18 Nu hapo omambo waJesus ohunga ‘nomuhoko mbui,’ matu sokuyezuva vi? Omuhoko mbwi mau zikama movimbumba vivari vyovatwirisiwa mba hupire moruveze rumwe. Otjimbumba otjitenga, tja zikama movatwirisiwa mba muna ombutiro yomayenenisiro wotjiraisiro mombura ndji 1914 nu ihi otjitjavari, otjovatwirisiwa mba hupire moruveze rumwe notjimbumba ihi otjitenga oure woruveze orusupi. Posi yokutja, tjiva  motjimbumba ihi otjitjavari mave munu omautiro wozombamisiro ozonene tjinene nḓu maze ya moruyaveze. Ovimbumba vivari mbi mavi rire omuhoko umwe mena rokutja ovyo vya hupire moruveze rumwe otjOvakriste ovatwirisiwa oure woruveze orusupi. *

19 Okutja matu yenene okuya kepu riṋe? Otjiraisiro tjomeero waJesus otjOmbara yOuhona waMukuru tji munika oukahu mouye auhe. Nu wina tu muna kutja ovatwirisiwa mbe nomuinyo ngamba, nu mbe norupa ‘momuhoko mbui’ ve yenda amave kurupa. Posi yokutja, kave nakuṱa avehe ngunda ozombamisiro ozonene tjinene aze hiya uta. Okutja matu yenene okuya kepu rokutja moruyaveze rwopopezu Ouhona waMukuru mau ya nau utu okuhonapara kombanda yehi! Tjiri ma rire otjiṋa otjiete tjondjoroka onene okumuna omayenenisiro wongumbiro Jesus ndje tu honga, ndji tja: “Ouhona woye ngau ye”!

20. Epu riṋe enanḓengu ndi mari kahungirirwa membo ndi, nu matu kahungirira ku ye mekondwa ndi mari kongorere ko?

20 Ngaatu roro okuzemba omambo Jehova omuini nga hungira okuza keyuru ohunga nOmuna we indu tja tja: “Purateneye ku Ye.” OtjOvakriste vatjiri, matu sokukara nonḓero yokuyandja ombakatwi kerakiza raMukuru ndo. Tu nonḓero tjinene moviṋa avihe Jesus mbya hungira nokuhonga ohunga nOuhona waMukuru. Oviṋa avihe Ouhona mbwi mbi wa yenenisa rukuru na mbi mau kayenenisa moruyaveze, oomapu omananḓengu ngu maye kahungirirwa membo ndi. Ekondwa ndi mari kongorere ko mari kakahurura oviuṋe ovinanḓengu mbi mavi tjama nomazikiro wOuhona waMukuru meyuru.

^ par. 13 Ehungi raJesus mape ya ra zemburukisa ovapuratene ve ohunga na Arkelaus, omuzandu waHerodus Omunene. Komurungu wonḓiro ye, Herodus wa urika Arkelaus okurira ombara yaJudea nomahi warwe, moruveze rwe. Posi yokutja, komurungu wokuuta ouvara we, Arkelaus aa sokutoora ouyenda oure okuyenda koRoma okukapaha okuyakurwa i ombara yokombanda Augustus.

^ par. 14 Tji mo vanga ondjivisiro yokomurungu, tara mekondwa 9 rembo ndi Ombeibela tjiri i honga tjike?

^ par. 18 Ngamwa omundu ngwa twirisiwa kombunda yonḓiro yovatwirisiwa ovasenina motjimbumba ihi otjitenga, okutja, okombunda ya imba mba muna “ombutiro yozongama” mombura ndji 1914, ke nokukara norupa ‘momuhoko mbui.’—Mat. 24:8.