ONDANDO YEKONDWA NDI

Mena rokutja va ri ovaṱakame kOuhona waMukuru, ovakarere vaMukuru kavena pu va kara norupa mouye

1, 2. (a) Omurari uṋe mbwa hongorera ovakongorere vaJesus nga kundino? (b) Ovanavita na eṱe va kondja vi okututaara, nu kwa kongorera tjike?

JESUS wa kuramene momurungu waPilatus, eye ngwa ri omupangure omunamasa tjinene motjiwaṋa tjOvajuda na hungire omambo nga hongorera ovakongorere ve nga ku ndino. Jesus wa tja: “Ouhona wandje kawouye mbwi. Andakuzu ouhona wandje owouye mbwi, ovendjikongorere itjave kondja kutja e ha yandjewa kovanane vOvajuda. Nungwari ouhona wandje kawamuno.” (Joh. 18:36) Pilatus wa tjita kutja Jesus ma zepewe, posi yokutja ondoṋeno yawo ndjo kai karere orure. Orondu Jesus wa pendurwa. Ovanane vOuhona waRoma ounamasa va kondjisa okuyandeka ovakongorere vaKristus, posi yokutja kave toṋene. Ovakriste va handjaura ombuze yOuhona mouye auhe oukuru.—Kol. 1:23.

2 Ouhona tji wa za nokuzikwa mombura ndji 1914, ovira vyovita tjiva ovinamasa otja komakuruhungi vya kondja okuyandeka ovakarere vaMukuru. Nungwari kape na tji tja toṋa. Ozohoromende ozengi novira vyopolitika vya kondjisa okutuṋiṋikiza kutja tu kare norupa movirwa vyawo. Owo kave toṋene okutuhaṋa. Kundino, imba mbe riwisa kehi yOuhona waMukuru va tura koṋa akuhe mouye nu va za momihoko avihe. Posi yokutja, eṱe twa wana otjeṱunḓu ratjiri mouye auhe nu katu ritwa movitjitwa vyozopolitika zouye. Ombwaneno yetu ndji i raisa oukahu kutja Ouhona waMukuru u honapara nokutja Ombara Jesus Kristus i kayenda komurungu okuhongorera, okukohorora nokutjevera ovakongorere va yo. Ngatu tare komuano Ombara mu ya tjita nao, nu ngatu yandje ombango kondoṋeno oyanḓiparise motjombanguriro oyo ndje tupa, otja tji matu kayenda komurungu okuritjaera kutja ‘atu ha rire ovouye.’—Joh. 17:14.

Epu nda rira enanḓengu

3, 4. (a) Ovitjitwa viṋe mbya tjitwa indu Ouhona waMukuru tji wa zikwa? (b) Ovakarere vaMukuru va ri nondjiviro ombwa ohunga nepu rokuhina okutoorora omunda poo indee? Kahurura.

3 Ouhona tji wa za nokuzikwa pa tjitwa ovita meyuru, nu okuzambo Satan wa nakaurirwa kombanda yehi. (Lesa Omavandururiro 12:7-10, 12.) Kombanda yehi wina kwa ri ovita mbya rora ongurameno yovakarere vaMukuru. Owo ve rimanenene kutja mave horere ku Jesus nu ave ha kara norupa moviṋa vyouye. Posi yokutja rutenga kaave tjiwa nawa kutja okuhinokukara norupa moviṋa avihe vyopolitika aaku kamburire mo tjike.

4 Okutara kotjihorera, embo oritja-6 ndi Millennial Dawn, kombunda  nda uta okuisanewa Studies in the Scriptures, * nu nda pitisiwa mombura ndji 1904 ra tunduuza Ovakriste kutja ave kara norupa movita. Posi yokutja, oro aari tja indu Omukriste tja ṋiṋikiziwa okukara norupa movita vyehi, eye ma sokupaha omuano wokuungura oviungura vyarwe mbi hi notjiṋa novita. Ndovazu katoṋene na hindwa kovita, eye ma sokukondja kutja a ha zepa ovandu. Mbuti Herbert Senior ngwa turire moBritanje nu ngwa papitisiwa mombura ndji 1905 oruveze ndwo wa hungirira kongaro ndji, na tja: “Pari ongurunguse onyingi mokati kovakambure nu owo kaave tjiwa nawa kutja ngave ṱakamise vi omirari mbi.”

5. Okambo nga The Watch Tower 1 raNdengaṋi 1915, ka uta vi okuṱuna omazuviro wetu?

5 Nungwari okambo nga The Watch Tower 1 ra Ndengaṋi 1915, ka kahungira oukahu ohunga nepu ndi. Ohunga noumune mbwa yandjwa membo ndi Studies in the Scriptures, okambo ngo ka tja: “Matu ripura uriri kutja okurikuta korupa rwovita nokukaungura oviungura mbi hi notjiṋa novita, hapo nao kaku teya omirari vyetu vyOukriste.” Nu indu Omukriste tja tirisiwa kutja tje ha zarere omuzaro wovita nokuungura morupa rwovita ma yahwa, aa sokutjita vi? Orupa rwokambo nga rwa tja: “Tji wa pewa ouyara wokutoorora pokati kokuyahwa mena rouṱakame kOmbara yOhange no panḓa okukatuka erakiza re, nokuyahwa ngunda au ri moviungura vyovahona vouye nu ngunda amo yandja oruvara ku wo nokunakaura omahongero wOmbara yOmeyuru, mo toorora omukambo uṋe? Otjiperi kutja matu zeri okutoorora okuṱa mena rOmbara yOmeyuru.” Nakombanda yomambo omanamasa ngo, orupa ndwo rwa tja: “Eṱe katu nokumuṋiṋikiza kutja mu tjite nao. Nungwari matu mu pe oumune wetu uriri.”

6. Matu rihongere tjike kotjihorera tjaMbuti Herbert Senior?

6 Ovakambure tjiva va zuva epu ndi nawa kutja ouposyo okukara norupa movita nu ve rimanenene kutja mave yakura ovikongorere ko ngamwa avihe mbi mavi ya ku wo. Mbuti Herbert Senior ngwa tamunwa rukuru wa tja: “Ku ami tjiri kapa ri ombangu pokati kokuyaha omundu nokuungura oviungura vyokutwamo ozohanga mondjembo kutja i yahe omundu.” (Luk. 16:10) Mbuti Senior wa twarewa kondeko mena rokupanḓa okukarwa ovita. Eye novakambure 4 varwe va ri motjimbumba tjovandu 16 mba panḓa okukarwa ovita mena romeritjiviro wawo womomutima, novarumendu vozongamburiro zarwe mba ri mondeko yaRichmond moBritanje. Owo kombunda va katjiukwa otja Richmond 16. Otjikando tjimwe, Herbert novakwao va hindwa movineya kotuveze omarwiro wovita moFrance mu ye ri omazeu. Ingo va pewa omberero yokuyahwa. Eye novakwao ovengi va kuramisirwe komurungu ovarwe paave yahasanene, nungwari kave na pu va zepewa. Moruveze rwanao, owo va pewa omberero yozombura 10 mondeko.

“Ami mbe rihonga kutja ovakarere vaMukuru mave sokukara nohange ku novandu avehe nandarire tji pe novita.”—Simon Kraker (Tara koparagrafa 7)

7. Pomautiro wOvita vyOuye Ovitjavari, ovakarere vaMukuru va uta okumuna tjike?

 7 Indu Ovita vyOuye Ovitjavari tji vya tambuka, ovakarere vaJehova avehe va uta okumuna oukahu kutja okuhina okutoorora omunda moviṋa vyouye ku heya tjike nokutja tji mave vanga okuhorera ku Jesus ovikeṋa mbyaavi undjirwa ku wo. (Mat. 26:51-53; Joh. 17:14-16; 1 Petr. 2:21) Okutara kotjihorera, okambo nga The Watchtower, 1 raTjikukutu 1939 ka ri norupa orunanḓengu tjinene ndwa ri nepu rOtjiingirisa ndi “Okuhina okutoorora omunda,” nu ndwa tja: “Omurari mbu mau sokuhongorera ovakarere vaJehova owombwi wokuhina okutoorora omunda pokati koviwaṋa mbi mavi ru ovita.” Ohunga norupa ndwo, Mbuti Simon Kraker kombunda ngwa kakarera pomberoo ohongora moBrooklyn, tjaNew York wa tja: “Ami mbe rihonga kutja ovakarere vaMukuru mave sokukara nohange ku novandu avehe nandarire tji pe novita.” Ovikurya vyombepo mbyo vya yandjwa moruveze ndu ri ro nu vya vatera okurongerisa ovakarere vaMukuru kondatumisire ohimise ndja rora ouṱakame wawo kOuhona waMukuru.

Va muna “omupupo” wondatumisire

8, 9. Omakwizikiro womuapostele Johanes ya yenenisiwa vi?

8 Omuapostele Johanes wa kwizika kutja kombunda yomazikiro wOuhona mombura ndji 1914, otjitjupamuriro tji tji ri Satan Omudiaboli matji kondjo okuyandeka ovandu mbe yandja oruvara kOuhona waMukuru mokutjupa omupupo womeva okuza motjinyo tjatjo. * (Lesa Omavandururiro 12:9, 15.) Omakwizikiro waJohanes ngo ya yenenisiwa vi? Okuza mozombura nḓa 1920 na komurungu wanao, pa kara omapirukiro omengi kovakarere vaMukuru. Otja ovakambure ovakwetu mba turire kOmanene waAmerika moruveze rwovita vyouye ovitjavari, Mbuti Kraker wina wa tuwa mondeko mena rouṱakame we kOuhona waMukuru. Nu  moruveze rwovita mbyo, Ovahongonone vaJehova omba ri ovandu ovengi tjinene mba tuwa mozondeko mOmahi Omakutasane waAmerika mena rokupanḓa okuyenda kovita.

9 Omudiaboli na imba mbe mu karera va ri nonḓero yokutjita kutja ovakarere vaMukuru koṋa akuhe ku ve ri ve ise okuyandja oruvara kOuhona. MoAfrika aihe, moEuropa na mOmahi Omakutasane waAmerika, ovakarere vaMukuru va etwa komurungu wovyombanguriro na komurungu wovimbumba mbi tya kutja omukamburwa ma sokuisiwa ngunda ozombura ze zomberero aye hiya yenena poo indee. Mena rokutja ve rimanenene okuhina okutoorora omunda, owo va tuwa mondeko, va tonwa nokutatumisiwa tjinene. MEhi rOvandoitji, ovakarere vaMukuru va muna oṋiṋikizire ohimise mena rokupanḓa okutja “heil Hitler” poo okukara norupa movita. Ovakarere vaMukuru ape 6 000 va tuwa mondeko moruveze Hitler ndwaa hongorere ehi, nu Ovahongonone vokombanda 1 600 tjiva mba ri Ovandoitji na tjiva mbe ha ri Ovandoitji va ṱa komake wovevetatumise. Nungwari Omudiaboli kena pa yenena okuyandeka ovakarere vaMukuru oparukaze.—Mar. 8:34, 35.

“Ehi” ra ṋiṋa “omupupo womeva”

10. “Ehi” ri kuramena po tjike, nu oro ra vatera vi ovakarere vaMukuru?

10 Omakwizikiro nga tjangwa i omuapostele Johanes ya raisa kutja “ehi,” oro ndi kuramena po ozonongo zouye mbwi, mari ṋiṋa “omupupo womeva” poo mari isapo ondatumisire onyingi ndjo, kunao aze vatere ovakarere vaMukuru. Orupa rwomakwizikiro ndwo rwa yenenisiwa vi? Mozombura nḓa kongorera kOvita vyOuye Ovitjavari, “ehi” povikando ovingi ra vatera ovakarere ovaṱakame vOuhona mbu honaparerwa i Messias. (Lesa Omavandururiro 12:16.) Okutara kotjihorera, ovyombanguriro tjiva ovinamasa vya vatera okutjevera ousemba wOvahongonone vaJehova wokupanḓa okukara norupa movita nokukara norupa momikandi vyomihoko mehi. Rutenga, ngatu tare kondoṋeno onene Jehova ndja yandja kovakarere ve ohunga nepu rokupanḓa okukara norupa movita.—Eps. 68:20.

11, 12. Omauzeu waye Mbuti Sicurella na Thlimmenos ngu va muna nu kwa kongorera tjike?

11 Omahi Omakutasane waAmerika. Anthony Sicurella we kurisiwa i ovanene mba ri Ovahongonone vaJehova. Eye wa papitisiwa tja ri nozombura 15. Indu tja ri nozombura 21 we ritjangisa kotjira tjovita otjomuzuvarise wombuze ombwa. Ozombura 2 kombunda yanao mombura ndji 1950, eye wa tjita omaningiriro wokutja ma varwe otjomundu ngu ha vanga okukara norupa movita. Nandarire kutja Orupa Orukonḓonone rwOmakatukiro woveta kaaru munu otjipo momaningiriro nga, Orupa rwOmbanguriro rwa nakaura omaningiriro we. Kombunda yovihungiriro pekepeke, Otjombanguriro tjaAmerika tjOkombanda tja puratena kotjiposa tjaMbuti Sicurella na tji yakura omaningiriro waMbuti Sicurella. Ondyero ndji ya vatera ovature varwe mOmahi Omakutasane waAmerika mbaave ha vanga okukara norupa moviungura mbi mavi tjama novita.

12 OGreece. Mombura ndji 1983, Iakovos Thlimmenos wa kamburwa mena rokupanḓa okuzara ozombanda zovita na katuwa  mondeko. Tja za nokupitisiwa mondeko, wa tjita omaningiriro koviungura vyokuungura nomambo wozongetjefa, posi yokutja aye ha yakurwa mena rokutja wa ri nena evi rokutja wa katuka oveta. Eye wa twara otjiposa tje kotjombanguriro, nungwari tja za nokupandjara otjiposa tje motjombanguriro tjaGreece, eye wa tjita omaningiriro kOtjombanguriro tjaEuropa tjOusemba wOvandu. Mombura ndji 2000, Otjimbumba tjOvapangure vOtjombanguriro tjaEuropa tjOusemba wOvandu, tji tja zikama movapangure 17 tja toorora omunda we na tji raisa kutja ondoorora otjiṋa tji tji hina okuyakurwa oparukaze. Komurungu wondyero ndji, ovakambure ovakwetu vokombanda 3 500 moGreece va ri nena evi rokutja ve katuka oveta, orondu va tuwa mondeko mena rokupanḓa okukara norupa movita. Ondyero ndji tji ya za nokutjitwa, Ohoromende yaGreece ya zikamisa etwako nda kutura ovakambure mbo kena evi. Nu wina ya zikamisa oveta ndja yandja ouyara kovature vaGreece wokutoorora okuungura oviungura vyarwe mbi hina otjiṋa novita. Oveta ndjo, ya yandjwa ozombura ozonḓiṱi komurungu wanao nai ṋunisiwa rukwao indu oveta yehi raGreece tji ya zikamisiwa.

“Komurungu wokuhita motjombanguriro, ami mba kumba nomasa ku Jehova nu okuzambo mba muna omuano mbwe ndji pa oupore.”—Ivailo Stefanov (Tara koparagrafa 13)

13, 14. Matu rihongere tjike koviposa mbyaavi tjama ohunga na Ivailo Stefanov na Vahan Bayatyan?

13 OBulgaria. Mombura ndji 1994, Ivailo Stefanov tja ri nozombura 19 otja hindwa korupa rwovita. Eye wa panḓa okukara norupa movita poo okuungura oviungura ngamwa avihe mbi mavi tjama novita. Eye wa tuwa oure womieze 18 mondeko, posi yokutja wa tjita omaningiriro kutja ondyero ndji i rundururwe, otjomuture ngu nousemba wokunakaura oviungura otja imbyo. Otjiposa tje korusenina tja hindwa kOtjombanguriro tjaEuropa tjOusemba wOvandu. Mombura ndji 2001, komurungu womapanguriro wotjiposa hi pa tjitwa onḓuvasaneno kuna Mbuti Stefanov. Ohoromende yaBulgaria ya ningira ondjesiro ku Mbuti Stefanov na kovature avehe vaBulgaria mba ri nonḓero yokuungura oviungura vyarwe mbi hi notjiṋa novita. *

14 OArmenia. Mombura ndji 2001, pa munikwa kutja Vahan Bayatyan wa pwire okuungura oviungura morupa rwovita. * Eye wa panḓa okuungura oviungura morupa rwovita, posi yokutja ovyombanguriro mehi ndo kavina pu vya yakura omaningiriro we wokutja vi tare kotjiposa tje. Mu Ndengaṋi 2002, eye otja twarewa kondeko mena romberero ndja pewa yozombura 2 nohinga, nungwari wa pitisiwa kombunda yomieze 10 nohinga. Moruveze ndwo, eye wa tjita omaningiriro kOtjombanguriro tjaEuropa tjOusemba wOvandu, notjo tja yakura okupuratena kotjiposa tje. Nungwari tji ya ri 27 ku Seninaṋi 2009, Otjombanguriro ho wina tje mu muna ondjo. Ondyero yotjombanguriro ndjo aai munika tjimuna ovakambure ovakwetu moArmenia mba ri motjiposa hi kava ri nondoṋeno. Posi yokutja Otjimbumba tjOvapangure vOtjombanguriro tjaEuropa tjOusemba wOvandu tja tara rukwao kondyero ndji. Tji ya ri 7 ku Suramazeva 2011, Otjombanguriro tja raisa kutja Vahan Bayatyan kari nondjo. Ihi tja ri otjikando otjitenga kOtjombanguriro tjaEuropa tjOusemba wOvandu okuyakura kutja ongurameno yetu ndja zikamena kongamburiro yetu yOukriste  yokuhina okuvanga okukara norupa movita, mai sokuyakurwa otja kousemba mbu tu na wo wokukara nouyara womeripura, womeritjiviro womomutima nouyara wokukara nongamburiro yetu. Ondyero ndjo kai tjeverere ousemba wOvahongonone vaJehova uriri, nungwari wina ya tjevera ousemba wovandu omangete omengi momahi nge ri ouṋepo wo-Council of Europe. *

Ovakambure ovakwetu moArmenia va pitisiwa mondeko kombunda yondyero yOtjombanguriro tjaEuropa tjOusemba wOvandu

Epu ndi mari tjama nomikandi vyokutunduuza ombangu pokati komihoko

15. Ongwaye Ovahongonone vaJehova tji ve ha kara norupa momikandi mbi tunduuza ombangu pokati komihoko?

15 Ovakarere vaJehova ve raisa ouṱakame kOuhona waMukuru mbu honaparerwa i Messias, nu kakokupanḓa okukara norupa moviungura mbi mavi tjama novita uriri, nungwari wina omokupanḓa okukara norupa momikandi mbi tunduuza ombangu pokati komihoko. Nu tjinenenene okuza koruveze indu Ovita vyOuye Ovitjavari tji vya tambuka, mouye auhe mwa ri nombepo yombangu pokati komihoko. Ovature vomahi omengi aave undjirwa ko okutjita oruyano rwokurira ovaṱakame kehi rawo, okuimbura eimburiro rehi nokuminika erapi rehi otjomuano wokuyandja ko  ondengero. Posi yokutja, eṱe tu rikotamenena ku Jehova porwe. (Eks. 20:4, 5) Mena rotjiṋa hi, eṱe twa muna ondatumisire onene. Nungwari Jehova rukwao wa ungurisa “ehi” poo ovandu ozonongo zouye mbwi okuisapo ondatumisire kovakarere ve. Ngatu tare kondoṋeno ohimise Jehova ndje tupa moviṋa mbi okupitira mu Kristus.—Eps. 3:8.

16, 17. Ouzeu waye Lillian na William Gobitas mbu va muna, nu we rihongere tjike kotjiposa vyawo?

16 Omahi Omakutasane waAmerika. Mombura ndji 1940, movapangure 9 mOtjombanguriro tjaAmerika tjOkombanda, omupangure umwe uriri ongwa toorora omunda wOvahongonone vaJehova motjiposa tjopokati koMinersville School District na Gobitis. Lillian Gobitas, * ngwa ri nozombura 12 nomuṱena William, ngwa ri nozombura 10, aave vanga okukara nouṱakame ku Jehova nu otji va panḓa okuminika erapi rehi poo okutjita oruyano rwokurira ovaṱakame kehi rawo. Owo va rambwa moskole mena rotjiṋa hi. Otjiposa tjawo tja twarewa kOtjombanguriro tjOkombanda, nu Otjombanguriro tja raisa kutja omukambo woskole u ri mombwaneno noveta yOmahi Omakutasane waAmerika, orondu oyo ya tjita otjiṋa tji matji tunduuza “ombwaneno yotjiwaṋa.” Ondyero ndjo ya eta ondatumisire onḓeu kovakarere vaJehova. Ovanatje ovengi vOvahongonone vaJehova va rambwa moskole, ovanene ave pandjara oviungura vyawo nu otjivaro otjingi tjOvahongonone vaJehova tja muna ondatumisire onyingi okuza kovevepirukire. Embo ndi The Lustre of Our Country ra tja: “Ondatumisire ndja tjitwa kOvahongonone vaJehova okuza kombura ndji 1941 nga 1943, oombangu onenenene ndja tjitwa kozongamburiro moAmerika meserewondo 20.”

17 Ondoṋeno yovapirukire vaMukuru ya ri oyokaruveze okasupi uriri. Mombura ndji 1943, Otjombanguriro tjOkombanda tja tara kotjiposa tjarwe tji tja ri tjimuna otjaGobitis. Otjo aatji tjiukwa otjotjiposa tjopokati koWest Virginia State Board of Education na Barnette. Otjikando hi Otjombanguriro tjOkombanda tja yandja ondoṋeno kOvahongonone vaJehova. Ihi tja ri otjikando otjitenga mekuruhungi raAmerika, Otjombanguriro tjOkombanda okutjita ondyero otja indjo ohunga notjiposa moruveze orusupi nao. Kombunda yondyero ndjo, ondatumisire ndjaai tjitwa kOvahongonone vaJehova moAmerika ya yaruka ombunda. Nu ya tjita kutja ovature avehe moAmerika ve kare nouyara wokuungurisa ongamburiro yawo.

18, 19. Pablo Barros wa tja otjikeṋa tji tje mu vatera okuyanḓipara, nu ovakarere vaJehova varwe mave yenene vi okuhorera ku ye?

18 OArgentina. Paplo na Hugo Barros, votjiwondo tjopokati kozombura 8 na 7 va rambwa moskole mena rokupanḓa okukara norupa mokuyera erapi rehi mombura ndji 1976. Otjikando tjimwe otjiuru tjoskole tja undura Pablo na tji mu tono motjiuru. Kombunda yoskole, otjo tja ṱizira ovazandona 2 mbo poskole, na tji ve ṋiṋikiza kutja ve kare norupa momikandi vyehi. Tji ma zemburuka omarorero ngo Pablo wa tja: “Nokuhina ombatero yaJehova, ketje yenena okutuurunga oṋiṋikizire ndjo nondoṋeno”

19 Indu otjiposa tji tja twarewa kotjombanguriro, omupangure wa raisa kutja kauposyo okuramba Pablo na Hugo moskole. Nungwari otjiposa tjawo tja hindwa kOtjombanguriro tjaArgentina  tjOkombanda. Mombura ndji 1979, Otjombanguriro tjOkombanda tja nakaura ondyero yotjombanguriro tjokehi na tji tja: “Omberero yokuramba ovanatje moskole mai pirukire oveta yehi ndji yandjera ovanatje okukara nousemba wokurihonga (Article 14) notjiungura tjOhoromende tjokuvatera kutja ovanatje ve mune omahongero (Article 5).” Ondoṋeno ndji ya vatera ovanatje wOvahongonone vaJehova ape 1 000. Oyo ya vatera kutja ovanatje imba ovarwe ave ha rambwa nu Pablo na Hugo va yakurwa rukwao moskole.

Omitanda omingi vyOvahongonone vaJehova vya ṱakama kehi yomarorero

20, 21. Otjiposa tji matji tjama na Roel na Emily Embralinag, matji yanḓiparisa vi ongamburiro yoye?

20 OFilippine. Mombura ndji 1990, Roel Embralinag * wozombura 9 nomuṱena Emily wozombura 10 novahongwa varwe vokombanda 65 vOvahongonone va rambwa moskole mena rokupanḓa okuminika erapi rehi. Ihe yaRoel na Emily, wena Leonardo wa kondjisa okuhungira kuna ovanane voskole posi yokutja kena pa toṋa. Leonardo tja muna kutja oviṋa vya ririre ko ovivi, wa tjita omaningiriro kOtjombanguriro tjOkombanda. Leonardo kari novimariva nu kari nohahende ndji mai mu kuramene po. Eṱunḓu re riyarikaṋa mongumbiro ku Jehova kutja me ve pe omuhunga.  Ovanatje vawo ngunda aave tokwa nokutjitwa ouhahu. Leonardo aa munu kutja kamaa toṋa motjiposa tje hi orondu kari nondjiviro ombwa ohunga noveta.

21 Oviṋa kombunda vya karunduruka, nu eṱunḓu raLeonardo ra kuramenwa po i Felino Ganal, ngwa ri ohahende rukuru ndjaai ungura ponganda ondjiukwa yozohahende mehi. Mbuti Ganal aa ungura otjohahende, nungwari oruveze otjiposa hi tjaatji kayendisiwa tjandje ka ungura rukwao ponganda onene yozohahende paa ungura, neye wa rira Omuhongonone waJehova. Indu otjiposa hi tji tja etwa kOtjombanguriro tjOkombanda, otjo tja tjita ondyero ndja toorora omunda wOvahongonone nu ndja isako erakiza rokuramba ovanatje moskole. Rukwao, imba mba kondja okutjita kutja ovakarere vaMukuru ave ha rire ovaṱakame ku ye, kave toṋene.

Okuhina okutoorora omunda ku eta ombwaneno

22, 23. (a) Ongwaye tji twa muna ondoṋeno onene nao movyombanguriro? (b) Okukara neṱunḓu mouye auhe rovakambure mbe nohange, ku tu raisira tjike?

22 Ongwaye ovakarere vaJehova tji va muna ondoṋeno moviposa ovingi nao? Eṱe katu norupa moviṋa vyopolitika. Posi yokutja, okuza kehi rimwe nga ku rarwe, notjombanguriro tjimwe nga ku tjarwe, ovapangure mbe hi nondoorora ve tu yama kovapirukire nu mena ranao, va tjita ozondyero nḓa rira oveta yehi. Nokuhina omakeyakeyero, Kristus we tu vatera mozongondjero zetu kutja tu mune ondoṋeno onene ndjo. (Lesa Omavandururiro 6:2.) Ongwaye tji tu twara oviposa vyetu kotjombanguriro? Onḓero yetu kayokurundurura oveta zehi. Nungwari tu zera okukayenda komurungu okukarera Ombara yetu Jesus Kristus nokuhina ovandu mbu mave tu tjaere.—Oviung. 4:29.

23 Mouye mbwa haṋwa i ozondjakaha zopolitika nonyengo ndji ri mourekoto wovandu, Ombara yetu Jesus Kristus ndji honapara nai, ya sera ondaya kozongondjero zovakongorere va yo mouye auhe kutja ve yenene okuṱakama momarorero. Satan kena pa toṋa mozongondjero ze zokutuhaṋa nokututaara. Ouhona wa woronganisa ovandu omangete omengi mbe he “rirongerere okurwa ovita rukwao.” Okukara neṱunḓu mouye auhe rovakambure mbe nohange, epu ewa ndi tu raisira kutja Ouhona waMukuru u honapara!—Jes. 2:4.

^ par. 4 Embo ndi wina aari tjiukirwa kena ndi The New Creation. Omambo nga Millennial Dawn kombunda ya uta okutjiukwa otja Studies in the Scriptures.

^ par. 8 Tji mo vanga omakahururiro wokomurungu ohunga nomaprofetero nga tara membo ndi Revelation—Its Grand Climax At Hand!, ekondwa 27, pomukuma 184-186.

^ par. 13 Ondyero ndjo wina aai undjire kOhoromende yaBulgaria okuyandja oviungura vyarwe mbi hi norupa novita ku avehe mbe ha vanga okuungura oviungura mbi notjiṋa novita.

^ par. 14 Tji mo vanga okuzuva ehungi arihe, tara mokambo nga The Watchtower, 1 raTjikukutu 2012, pomukuma 29-31.

^ par. 14 Moure wozombura 20, ohoromende yaArmenia ya twa omitanda vyOvahongonone vokombanda 450 mondeko. Mu Tjikukutu 2013, ovarumendu omitanda mba serwe mondeko otji va pitisiwa.

^ par. 16 Ena reṱunḓu ndi, ra tjangwa navi mozombapira zotjombanguriro.

^ par. 20 Ena reṱunḓu ndi, ra tjangwa navi otja Ebralinag mozombapira zotjombanguriro.