ONDANDO YEKONDWA NDI

Ombara ya honga vi ovakarere vayo okuyandja ondengero komirari vyaMukuru ohunga nongaro yomeritjindiro?

Ngatu tje mo rimunu amo hiti momuvero worumbo rwondjuwo ondjapuke yaMuhona onene

1. Esekiel wa muna tjike tji tji tu tjatera?

OVE andakuzu wa ri mongaro tjimuna yomuprofete Esekiel ozombura 2500 nḓa kapita, otjo tjita vi? Ripurira ku imbi: Ngatu tje mo yendere ondjuwo ondjapuke yaMuhona onene nongeṋangeṋe. Omuengeli omunamasa u ri mbo okukuraisira oruveze oruwa ndwi! Ove orondo ozondondo 7 nḓu maze ku twara komivero 3. Tji wa hiti moukoto arire tji wa tjaterwa i oviṋa mbi mo munu. Oruveze rwopomahitiro ru noutonga wozometa 30. Potuveze twomahitiro twi pe nomatuwo wovatjevere. Nu mu novisanekero oviwa vyomavare mbya kororwa kekuma romoukoto nda tara koruhito.—Esek. 40:1-4, 10, 14, 16, 22; 41:20.

2. (a) Ondjuwo ondjapuke motjirimunikise i kuramena po tjike? (Wina tara komambo wokehi.) (b) Matu rihongere tjike koviuṋe mbi ri pomahitiro wondjuwo ondjapuke?

2 Ihi otjirimunikise tjondjuwo ondjapuke yaMuhona. Esekiel wa hungirira oukoto kondjuwo ondjapuke yaMuhona ndji nga ehungi re tji re urisa ekondwa 40 nga kekondwa 48 rembo nda tjanga. Ondjuwo ondjapuke ndji i kuramena po ondyero yaJehova yomerikotameneno wouatjiri. Otjiuṋe atjihe tjondjuwo ondjapuke ndji, tji ṱuna komerikotameneno wetu momayuva omasenina nga. * Omivero ominene mbi vi kuramena po tjike? Ovyo vi tu raisira kutja imba mbe norupa mondyero yaJehova yomerikotameneno wouatjiri mave sokuṱakamisa omirari vyaMukuru vyousemba. Nu nandarire ovisanekero vyomavare mbya kororwa kekuma vi ṋunisa epu otjingero, orondu mOmbeibela omavare povikando tjiva ye kuramena po ousemba. (Eps. 92:12) Omatuwo wovatjevere ye kuramena po tjike? Ye raisa kutja imba mbe hi nokuyandja ondengero komirari vyaMukuru kave nokuyandjerwa okuhita momerikotameneno wouatjiri nu nge twara komuinyo waaruhe.—Esek. 44:9.

3. Omena ratjike ovakongorere vaKristus tjaave hepa omakohororero aruhe?

3 Otjirimunikise tjaEsekiel tja yenenisiwa vi? Otja tji twa muna mEkondwa 2 rembo ndi, Jehova wa ungurisa Kristus okukohorora ovakarere ve okuza kombura ndji 1914 nga komautiro wombura ndji 1919. Omakohororero ngo ya yandera mbo? Kako! Moure weserewondo nda kapita, Kristus wa kayenda komurungu okuṱakama momirari vyaJehova ohunga nongaro yomeritjindiro. Ovemukongorere aave hepa omakohororero wokomurungu. Omena ratjike? Omena rokutja Kristus aa wongo ovemukongorere okuza mouye mbwa zunḓaka mbwi nu Satan kaisa okukondja  okuvenanena mongaro ombi yomeritjindiro. (Lesa 2 Petrus 2:20-22.) Ngatu konḓonone omiano 3 Ovakriste vatjiri mu va kohororwa. Rutenga matu katara komakohororero tjiva wongaro yomeritjindiro nga tjitwa, okuzambo matu katara kombatero ndja yandjwa okuvatera okuṱiza ombongo oukohoke nu korusenina matu katara kondyero yeṱunḓu.

Omakohororero wongaro yomeritjindiro

4, 5. Otjikeṋa Satan tja ungurisa okuza korukuru, nu wa kara nondoṋeno yatjike?

4 Ovakarere vaJehova aruhe va ri nonḓero yokukara nongaro ombwa yomeritjindiro. Kunao, owo va yakura omirari mbyaavi kahukire ko ohunga nepu ndi. Ngatu tare kovihorera tjiva.

5 Oruvakiro. Jehova tja uta omahakaeneno womonyama wa vanga kutja ye rire otjiṋa otjiwa notjikohoke pokati kovakupasane porwawo. Satan u ungurisa otjiyandjewa otjihuze hi Mukuru tja yandja kovandu nu u tjita kutja tji rire otjiṋa tjombonḓi otjomuano wokupindikisa Mukuru. Satan wa ungurisa ombate ndji nondoṋeno momayuva waBileam, nu ngamba u i ungurisa tjinene momayuva omasenina nga.—Num. 25:1-3, 9; Omavan. 2:14.

6. Oruyano ruṋe ndwa pitisirwe mokambo nga o-Watch Tower, aaru ungurisiwa vi nu ongwaye tji ru hina rwa kayenda komurungu okuungurisiwa? (Wina tara komambo wokehi.)

6 Okupirukira ozongondjero zaSatan nḓa, okambo nga o-Watch Tower 15 ku Ngarano 1908 ka pitisa oruyano ndwaaru ṱunu kouṱakame mbwi: “Ami tji mbi ri omurumendu poo omukazendu, me tjindi omukazendu poo omurumendu ngu tu hiya kupasana momuano mbwe tje mu tjinda tji tu ri mokati kovandu.” * Nandarire kutja oruyano ndwi karwa ri otjiṋa tjaatji undjirwa ko, ovengi va yandja omana wawo kovapitise vokambo nga Zion’s Watch Tower. Ozombura ozengi kombunda yanao, otjira tjaJehova tja muna kutja oruyano ndwi nandarire kutja aaru vatere ovengi, rwa ri otjiṋa ovandu tji ve tjita uriri. Posi yokutja, omirari vyaJehova vyousemba oruyano ndwi mbyaaru kuramene po aavi varwa pondondo yokombanda.

7. Mombura ndji 1935, okambo nga The Watchtower ka hungirira kouzeu uṋe nu oko ka ṋunisa omurari uṋe?

7 Omarorero waSatan ya ririra ko omengi. Okambo nga The Watchtower 1 raSeninarindi 1935, ka hungirira oukahu kouzeu mbwaau kurire ko mokati kovakarere vaMukuru. Tjiva aave munu kutja tji va kara norupa motjiungura tjo, okutja kave nokuhepa okuṱakamisa omirari vyaJehova ohunga nongaro yomeritjindiro mehupo rawo. Okambo nga The Watchtower ka tja: “Omundu auhe ma sokutjiwa kutja okukara norupa motjiungura tjokuzuvarisa, katji tjiri otjiṋa atjiyerike tji tji undjirwa kovakarere vaMukuru. Ovahongonone vaJehova, ovakuramene po vaJehova nu otji ve nomerizirira wokukuramena po Jehova nouhona we momuano omusemba.” Orupa ndwo okuzambo rwa yandja eronga ekahu ohunga norukupo noruvakiro, kunao rwa vatera ovakarere vaMukuru ‘okuisa oruvakiro.’—1 Kor. 6:18.

8. Omena ratjike okambo nga The Watchtower tjaake hungirire tjinene komaheero wembo rOtjigrike ohunga noruvakiro?

8 Mozombura ozonḓiti nḓa kapita, okambo nga The Watchtower ka hungirira oukahu komaheero omasemba wembo nda ungurisiwa mOmatjangwa wOtjigrike kembo ndi oruvakiro, poo porneya. Omaheero wembo ndi kaye hee omahakaeneno womonyama uriri. Nungwari embo ndi porneya ri ṱuna kozongaro pekepeke  zomeritjindiro, nu tjinene nḓe notjiṋa novitjitwa vyehambaneno nokuhinomeritjaerero, tjimuna imbi mbi tjitwa mozonganda zokurirandisa moruvakiro. Kunao, ovakongorere vaKristus va yamwa komauzeu nge za movitjitwa vyombonḓi vyoruvakiro ovengi mouye mbi ve tjita ndino.—Lesa Ovaefese 4:17-19.

9, 10. (a) Mombura ndji 1935, okambo nga The Watchtower ka hungirira kongaro iṋe yomeritjindiro? (b) Ombeibela i honga tjike ohunga nomaungurisiro womavinu?

9 Omaungurisiro omavi womeva wamururu. Okambo nga The Watchtower 1 raSeninarindi 1935, ka hungirira kepu rarwe ndi mari ṱunu kongaro yomeritjindiro indu tji ka tja: “Pa munikwa kutja tjiva ve kara norupa motjiungura tjokuzuvarisa nokuungura oviungura vyarwe motjira tjaJehova ngunda ave ri kehi [yomavinu]. Otja kOmatjangwa, omaungurisiro yeṋe womavinu nge yakurwa? Ma rire nawa okuungurisa omavinu pondondo ndji mai ṱunu kotjiungura tjetu motjira tjaMuhona poo indee?”

10 Eziriro kepuriro ndo ra kahurura oumune ousemba mbu ri mEmbo raMukuru mbu matu sokukara na wo ohunga nomeva wamururu. Ombeibela kai tjaere omaungurisiro omaṱiṱi womavinu, nungwari i tjaera okuṱomeva wamururu. (Eps. 104:14, 15; 1 Kor. 6:9, 10) Ohunga nokuungurisa omavinu ngunda amave ungura oviungura vyaJehova, ovakarere vaMukuru va zemburukisiwa ohunga novazandu vaAaron, Mukuru mba zepa mena rokutja va punguhira oviṋa mbyaave ha sere potjipunguhiro tjaMukuru. Ousupi kombunda yanao, Ombeibela i tu raera kutja ovikeṋa mbya tjita kutja ovarumendu mbo ve tjite otjiṋa otjivi ho. Mukuru wa yandja etwako rokutja ovapristeri kave sokunwa omavinu ngunda amave ungura oviungura oviyapuke. (Lev. 10:1, 2, 8-11) Mokuṱakamisa omurari mbwo ndino, ovakongorere vaKristus ve kondja kutja ave ha ungurisa omavinu ngunda amave ungura oviungura oviyapuke.

11. Okumuna ondjivisiro onyingi ohunga nomavinu kwa vatera vi ovakarere vaMukuru?

11 Mozombura ozonḓiṱi nḓa kapita, ovakongorere vaKristus va serwa ondaya yokumuna ondjiviro osemba ohunga nokuritjaera kokunwa omavinu okukapita etota, okuungurisa omavinu nokuhina omeritjaerero nokurira omukarere womaungurisiro omavi womeva wamururu. Okuhepa kovikurya vyombepo mbi ya moruveze ndu ri ro, orondu vya vatera ovengi okuṱuna ongaro yawo ndji nawa nokuṱuna ehupo rawo. Ovengi va vaterwa okupoka kouzeu mbwi. Kape sokukara omundu ngu ma ungurisa omeva wamururu momuano omuvi, orondu ye wisa onḓengu yovandu, ye haṋa omaṱunḓu nu tjinenenene ye hita pokati koviungura vyawo vyokukarera Jehova.

“Kamaatu undjire kOmuhona wetu okuṋuka omakaya poo okutwa otjiṋa ngamwa atjihe motjinyo tje tji matji zunḓa orutu rwe.”—C. T. Russell

12. Ovakongorere vaKristus va ri noumune uṋe ohunga nomaungurisiro womakaya komurungu womayuva omasenina?

12 Omaungurisiro womakaya. Ovakongorere vaKristus va uta okunakaura omaungurisiro womakaya rukuru ngunda omayuva omasenina aye hiya uta. Ozombura ozengi nḓa kapita, omurumendu omunene motjiwondo wena Charles Capen u zemburuka otjikando otjitenga tja hakaena kuna Mbuti Charles Taze Russell komaandero weserewondo 19. Oruveze ndwo Mbuti Capen wa ri nozombura 13 nu eye nerumbi novangu ve 2 va haamene pozondondo zOnganda yozOmbeibela moAllegheny, tjaPennsylvania. Mbuti Russell tja kapita pu wo wa pura na tja: “Mamu pepe omakaya? Me ṋuka ese romakaya.” Owo ve mu raera kutja kave  nokupepa omakaya. Okuzambo aave tjiwa kutja Mbuti Russell wa ri noumune uṋe ohunga nepu ndi. Mokambo nga o-Watch Tower 1 raKatjose 1895, Mbuti Russell wa hungirira 2 Ovakorinte 7:1, na tja: “Ami hi tjiwa kutja Omukriste ngamwa auhe tji ma ungurisa omakaya, maku eta vi ondjozikiro ku Mukuru poo okueta ouwa ku ye omuini. . . . Kamaatu undjire kOmuhona wetu okuṋuka omakaya poo okutwa otjiṋa ngamwa atjihe motjinyo tje tji matji zunḓa orutu rwe.”

13. Omakohororero waye womongaro yomeritjindiro nga tjitwa mombura ndji 1973?

13 Mombura ndji 1935, okambo nga The Watchtower ka tja: Omakaya ye ri otja “omuti wondova” nu ka raisa kutja omundu ngamwa auhe ngu pepa omakaya kamaa yenene okuungura poBetel poo okukarera otjomukuramene po wotjira tjaMukuru moviungura vyoukandjira poo okurira omutarere ngu varura ozombongo. Mombura ndji 1973, pe ya omakahururiro warwe wokomurungu. Okambo nga The Watchtower 1 raNgarano ka kahurura kutja kape nOmuhongonone waJehova ngu ma kara nongurameno ombwa mombongo indu tje norupa motjitjitwa otjizepe notjizunḓe tji tji ha raisa orusuvero hi. Ovandu avehe mbaave ha vanga okuisa okuungurisa omakaya aave sokukondwa kombongo. * Kristus wa toora omukambo warwe wokukohorora ovemukongorere.

14. Omirari vyaMukuru ohunga nombinḓu ooviṋe, nu pe ya vi omaungurisiro wombinḓu ye ute okuungurisiwa tjinene momapangero?

14 Omaungurisiro omavi wombinḓu. Momayuva waNoa, Mukuru wa tja okurya ombinḓu otjiṋa otjivi. Eye wa yarukira po otjiṋa hi rukwao mOmatwako nga yandja kotjiwaṋa tjOvaisrael, nu wina wa rakiza ombongo yOvakriste na tja: “amu ri ko ombinḓu.” (Oviung. 15:20, 29; Gen. 9:4; Lev. 7:26) Katjikumise kutja ndino Satan wa paha omuano wokutjita kutja ovandu ovengi ave ha raisa onḓuviro keronga raMukuru ndi. Meserewondo 19, ozonganga aaze ungurisa ombinḓu momapangero wawo, posi yokutja tji va za nokutjiwa kutja ku nomihoko pekepeke vyombinḓu, omaungurisiro wombinḓu momapangero ya handjaukira ko. Mombura ndji 1937, ombinḓu ya uta okuwongwa nokupwikwa mozonganda zombinḓu, nu okuzambo omapakerero wombinḓu ya perwa ko omasa i Ovita vyOuye Ovitjavari. Tjimanga, omapakerero wombinḓu ya uta okuyakurwa mouye auhe.

15, 16. (a) Ovahongonone vaJehova va toora ongurameno iṋe ohunga nomapakerero wombinḓu? (b) Ovakongorere vaKristus va pewa ombatero iṋe ohunga nomapakerero wombinḓu nomapangero nge hi nombinḓu, nu kwa kongorera tjike?

15 Pomautiro wombura ndji 1944, okambo nga The Watchtower ka raisa kutja omapakerero wombinḓu ya ri omuano warwe wokurya ombinḓu. Mombura ndja kongorera ku indjo, ouatjiri wOmbeibela mbwo wa harera ko omasa nu wa kahukira ko. Mombura ndji 1951, pa pitisiwa omapuriro nomaziriro kutja ye vatere ovakarere vaMukuru tji mave hungire ku nozonganga. Mouye auhe ovakongorere vaKristus ovaṱakame aave toora ongurameno osemba, nu popengi ya ri kehi yomayambururiro, omapirukiro nondatumisire. Posi yokutja Kristus aa hingi otjira tje kutja tji yandje omayanḓiparisiro ngaaye heperwa po. Pa pitisiwa oumbo notupa tu twa konḓononwa nokukahururwa nawa.

16 Mombura ndji 1979, ovanene vombongo tjiva va uta okuryangera ozonamiti kutja ve vatere ozonganga okuzuva ongurameno yetu nawa ohunga nomapu nga zikamena kOmatjangwa,  nomapangero warwe nge ha ungurisa ombinḓu. Mombura ndji 1980, ovanene vombongo movihuro 39 mOmahi Omakutasane waAmerika va muna omahongero moviungura mbi. Kombunda yoruveze, Orutu Orunane rwa yandjera kutja Ozokomiti zomapangero ze utwe mouparanga wouye. Ozongondjero azehe nḓa ze notjiṋa otjiwa nḓu za eta otja ozombura tjaaze kayenda poo indee? Kundino, ozonganga ozengi za uta okuraisa ondengero kovavere mbe ri Ovahongonone vaJehova indu tji mave vanga okupangwa nokuhina omaungurisiro wombinḓu. Ozonamiti ozengi nai ze yandja omapangero nge hi nombinḓu, nu tjiva ze vara omuano womapangero mbwi otjomuano omusembasemba womapangero. Katjinyandise tjomutima nao okuripurira komiano Jesus ma ṱakamisa ovemukongorere kozongondjero zaSatan zokuvanga okuvezunḓa?—Lesa Ovaefese 5:25-27.

Ozonamiti ozengi nai ze yandja omapangero nge hi nombinḓu, nu tjiva ze vara omuano womapangero mbwi otjomuano omusembasemba womapangero

17. Matu yenene okuraisa vi kutja tu nondangi komuano Kristus ma kohorora ovemukongorere?

17 Ma rire nawa tji twe ripura oveni kutja, ‘Hapo tu raisa ondangi komuano Kristus ma kohorora ovemukongorere nokutuhonga kutja tu ṱakamise omirari vyaJehova vyousemba?’ Ndovazu pe ri nao, okutja ngatu tjiwe kutja Satan ma kara pokukondja okutupora ku Jehova na Jesus mokutjita kutja atu ha kara nondengero komirari vyaMukuru vyousemba. Kutja atu ha wirwe mongwehe ndjo, otjira tjaJehova aruhe tji tu pa omarakiza  worusuvero nokutuzemburukisa ohunga nozongaro ozombi zouye mbwi. Okutja ngatu kondje okukara katumba nokuraisa onḓuviro kombatero ndji tu pe wa.—Omiano 19:20.

Okutjevera ombongo kozongaro ozombi

18. Otjirimunikise tjaEsekiel matji tu zemburukisa tjike ohunga na imba mbe pirukira omirari vyaMukuru owina?

18 Omakohororero warwe ngaaye hepa okutjitwa ya ri okutjevera ombongo kozongaro ozombi. Ouhumandu, kavandu avehe mba yakura omirari vyaJehova vyousemba nave riyandja ku Mukuru mbe panḓera pondando yawo. Tjiva kombunda ve ka kara nomeripura warwe nave pirukire omirari vyaJehova mbyo. Ovandu otja imbo ve sokutjitwa vi? Matu rihongo otjiṋa tjimwe okuza kotjirimunikise tjaEsekiel ohunga nondjuwo ondjapuke yaMuhona tji twa hungirire ko pomautiro wekondwa ndi. Mo zemburuka omivero ominene mbya tamunwa motjirimunikise tjaEsekiel? Pomahitiro aehe pa ri nomatuwo wovatjevere. Ovatjevere ve tjevera ondjuwo yaMuhona ondjapuke, okutjaera kutja imba mbe “hi nonḓuviro” ave ha hiti. (Esek. 44:9) Ihi otjiraisiro otjikahu tjokutja omerikotameneno wouatjiri ondjingonekero ndji yandjwa ku imba porwawo mbe kondja okuhupa otja komirari vyaJehova ohunga nongaro yomeritjindiro. Momuano otjingewo, ondjingonekero yokukara noupanga ku nOvakriste ovakwetu momerikotameneno katjiṋa ovandu avehe tji mave yenene okukara na tjo ndino.

19, 20. (a) Kristus wa vatera vi ovemukongorere okutjiwa omuano omusemba wokuṱuna ourunde ounene mombongo? (b) Omapu yeṋe 3 ngu maye tjiti kutja omundu ngu he ritanaura komauvi we ma kondwe kombongo?

19 Mombura ndji 1892, okambo nga o-Watch Tower ka raisa kutja “tu nomerizirira wokukonda Ovakriste kombongo mbe pataṋa kutja Kristus wa ṱira ovandu avehe otjotjisuta tjongutururiro.” (Lesa 2 Johanes 10.) Mombura ndji 1904, embo ndi The New Creation ra raisa kutja imba mbe panḓera pokutjita oviṋa ovivi ve zunḓa ombongo. Oruveze orukuru, ombongo aihe aai kara norupa “momauzeu wokereka,” okukonḓonona ourunde ounene mbwa tjitwa. Nungwari imbi kaviṋa mbyaavi tjitwa tjinene. Mombura ndji 1944, okambo nga The Watchtower ka raisa kutja ovarumendu mbe nomerizirira mombongo porwawo ombe sokuṱuna omauzeu otja ingo. Mombura ndji 1952, mokambo nga The Watchtower mwa pitisiwa omirari vyOmbeibela ohunga nokutjinda omauzeu mombongo, nake ṋunisa epu omundu ngu he ritanaura komauvi we ndi ma sokukonderwa kombongo kutja ombongo i rire ongohoke.

20 Mozombura nḓa kongorera ko, Kristus wa vatera ovemukongorere kutja ve tjiwe okukahurura nokuṱuna omuano wokutjinda omauzeu wovandu mba tjiti ourunde. Ovanene vombongo ve hongwa nawa omuano wokuṱuna omauzeu mombongo momuano Jehova mbwe undjira ko mousemba notjari. Kundino tu muna oukahu omapu yetatu wokutja ongwaye omundu ngu he ritanaura komauvi we tji ma sokukondwa kombongo: (1) okutjaera kutja ena raJehova ari ha zunḓaka, (2) okutjevera ombongo kutja ai ha zunḓwa i ovikongorere ko vyourunde ounene, (3) okuvatera omundu ngwa katuka okuritanaura komauvi we.

21. Omomuano uṋe ondyero yokukonda ovandu kombongo mu ya vatera ovakarere vaMukuru?

21 Ove mo munu omuano ondyero yokukonda omundu kombongo  mu ya eta ozondaya ozengi kovakongorere vaKristus ndino? MoIsrael otjikuru, ovatjite vouvi potuingi aave zunḓa otjiwaṋa, nu nandarire aave pukisa ovandu ovengi nga otjivaro tjawo tji tja ruruma imba mba ri ovaṱakame ku Jehova. Kunao, otjiwaṋa potuingi aatji zunḓa ena raJehova na tji pandjara oupanga kuna ye. (Jer. 7:23-28) Kundino Jehova kaungura ku notjiwaṋa tjorive, nungwari u ungura ku notjimbumba tjovarumendu novakazendu mbe noupanga ouwa kuna ye. Mena rokutja ovatjite vouvi mbe ha vanga okuritanaura komauvi wawo ve kondwa kombongo, okutja kave yenene okuungurisiwa i Satan okuetera ko ouvi mombongo nokuizunḓa. Kunao, otjotjimbumba tu nongamburiro yokutja matu yenene okukara noupanga ouwa kuna Jehova. Zemburuka omakwizikiro waJehova ngu maye tja: “Kape notjirwise tji matji yenene okukuhihamisa.” (Jes. 54:17) Hapo tu yandja oruvara aruhe kovanene vombongo mbe nomerizirira omanene wokuṱuna omauzeu mombongo poo indee?

Hivirika ingwi ngwa uta omaṱunḓu aehe

22, 23. Ongwaye tji matu tja okuhepa tjinene kOvakriste ovakwetu mba hupire momautiro weserewondo 20, nungwari otjikeṋa tjaatji raisa kutja owo aave hepa okuungurira koviṋa tjiva ohunga neṱunḓu?

22 Omuano omutjatatu ovakongorere vaKristus mu va muna omakohororero, wa ri ohunga norukupo neṱunḓu. Otja ozombura tjaaze kayenda, oumune wetu ohunga neṱunḓu wa runduruka poo indee? Ii, wa runduruka. Okutara kotjihorera, tji twa lese ohunga novakarere vaMukuru momautiro weserewondo 20, tjiri matu tjaterwa i ombepo yawo yomeriyandjerero. Matu tja okuhepa komuano mbu va twa otjiungura tjaJehova poruveze orutenga mehupo rawo. Nungwari wina tu muna kutja aave hepa okuyandja ombango komerizirira wawo warwe. Ongwaye tji matu tja nao?

23 Ovakambure ovengi kaave munu kutja otjiṋa otjivi okuyakura oviungura mbyaavi ve twara kokure nomaṱunḓu wawo oure womieze omingi, tjimuna oviungura vyokuzuvarisa poo vyokukavarura ozombongo. Omambo wetu povikando tjiva aaye tjaere orukupo tjinene okukapita oumune mbu ri mOmatjangwa nu kaaye hungirire tjinene kokukara norukupo orunamasa. Mokati kovakongorere vaKristus mu nombepo otjingeyo ndino poo indee? Kako, katjiperi!

Katu yakura okuungura oviungura vyaJehova ndovazu okutjita nao maku tu tjaere okuyandja ombango keṱunḓu retu

24. Kristus wa vatera vi ovemukongorere ovaṱakame okukara noumune ouwa ohunga norukupo neṱunḓu?

24 Kundino, katu yakura okuungura oviungura vyaJehova ndovazu okutjita nao maku tu tjaere okuyandja ombango keṱunḓu retu. (Lesa 1 Timoteus 5:8.) Kristus wina wa tjita kutja ovakongorere ve ovaṱakame kombanda yehi ve mune ombatero noumune ouwa ohunga nomirari vyOmbeibela mbi mavi tjama norukupo nehupo reṱunḓu. (Ef. 3:14, 15) Mombura ndji 1978, mwa pitisiwa embo ndi Making Your Family Life Happy. Nu kombunda yozombura 18 pa pitisiwa embo rarwe ndi The Secret of Family Happiness. Okambo nga The Watchtower wina aake kara notupa twaatu vatere ovakupasane okuṱakamisa omirari vyOmbeibela morukupo rwawo.

25-27. Otja ozombura tjaaze kayenda, ovihepwa vyovanatje vozombura pekepeke vya yenenisiwa vi?

25 Omitanda vya vaterwa vi? Otja ozombura tjaaze kayenda, ovihepwa vyawo vya pewa ombango tjinene. Otjira tjaJehova tja  yandja oviṋa oviwa kovanatje vozombura pekepeke. Oviṋa mbyaavi ha munika oupupu mbi, nambano vya takavara. Okutara kotjihorera, orupa rwOtjiingirisa ndwi “Omakonḓononeno wOmbeibela womitanda” aaru pitisiwa mokambo nga The Golden Age okuza kombura ndji 1919 nga 1921. Okuzambo pa pitisiwa okambo nga The Golden Age ABC mombura ndji 1920 na inga Children mombura ndji 1941. Mozombura nḓa 1970, pa pitisiwa omambo nga Listening to the Great Teacher, Your Youth—Getting the Best out of It, na indi Embo randje romahungi wOmbeibela. Mombura ndji 1982, mokambo nga o-Awake! mwa uta okupitisiwa otupa twOtjiingirisa twi “Omapuriro omitanda ngu ve pura” nu kombunda mombura ndji 1989, pa pitisiwa embo ndi Questions Young People Ask—Answers That Work.

Okambo nga Omahongwa wandje wOmbeibela ka yakurwa nondjoroka pomaworonganeno wotukondwa mEhi rOvandoitji

26 Kundino tu nomambo yevari omape nga Young People Ask, nu morungovi rwetu ndwi jw.org mu pitisiwa otupa komitanda. Wina tu nembo ndi Learn From the Great Teacher. Orungovi rwetu ru noviṋa ovingi komitanda tjimuna oukarata ohunga novandu vOmbeibela, oviungura vyomakonḓononeno wOmbeibela kovanatje ovaṱiṱi novanene, ouvidio, omahungi wOmbeibela nga perendwa  nomahongwa wOmbeibela kovanatje vozombura ndatu nokehi yanao. Ihi otjiraisiro otjikahu tjokutja oumune waKristus ohunga novanatje kau ya runduruka okuza koruveze indu tja pukata ovanatje meserewondo etenga. (Mar. 10:13-16) Eye u vanga kutja imba omitanda mokati ketu ve mune kutja va suverwa nokutja ve pewa ovikurya vyombepo.

27 Jesus wina u vanga kutja ovanatje ve tjeverwe koumba. Otja ouye mbwa zunḓaka mbwi tji mau ririre ko ouvi, omatatumisiro wovanatje ya ririra ko omengi tjinene. Kunao, pa pitisiwa oviungurisiwa mbi vatera ovanene okutjevera ovanatje vawo kozongaro ozombi otja inḓo. *

28. (a) Ku undjirwa tjike ku eṱe kutja tu kare norupa momerikotameneno watjiri otja tji pa raisiwa motjirimunikise tjaEsekiel? (b) Ove we rimanene okutjita tjike?

28 Katjinyandise tjomutima nao okumuna omuano Kristus mbwa kohorora ovakongorere ve, mokuvehonga okutenga omirari, okuṱakamisa nokumuna ombatero momirari vyaJehova? Ripura rukwao ohunga notjirimunikise tjondjuwo ondjapuke Esekiel tja muna. Ripurira komivero ominene. Otjiperi kutja ondjuwo ondjapuke yaMuhona kaya ri oruveze rwatjiri, nungwari yari oruveze rwopambepo. Nu hapo tu ru vara otjoruveze rwakatjiri poo indee? Katu yenene okuhita mu yo uriri tji matu i kEtuwo rOmerikotameneno poo tji matu lese Ombeibela poo tji matu kongora ondjuwo yomundu tji matu zuvarisa. Imbi ovitjitwa mbi munikwa i ovandu varwe. Nu omunatjavivi ma yenene okutjita oviṋa avihe mbi, posi yokutja aha yenene okuhita mondjuwo ondjapuke yaJehova. Tji matu tjiti oviṋa otja imbyo, nokuṱakamisa omirari vyaJehova vyomeritjindiro natu kara norupa momerikotameneno wouatjiri nongaro nomutima omusemba, okutja nao twa hiti moruveze oruyapuke tjinene okukapita otuveze twarwe nu matu karere Jehova. Orwo ondyero yaJehova Mukuru yomerikotameneno wouatjiri! Aruhe ngatu raise ondangi kondjingonekero ndji twa pewa ndjo. Wina ngatu kayende komurungu okukondja pu matu yenene okuhorera kouyapuke waJehova mokuṱakamisa omirari vye vyousemba!

^ par. 2 Mombura ndji 1932, Orupa 2 rwembo ndi Vindication rutenga rwa raisa kutja omakwizikiro wOmbeibela nge yandja ombango komakotorero wotjiwaṋa tjaMukuru kehi rawo ya yenenisiwa moruveze mu tu hupa nai nu kakotjiwaṋa tjaIsrael otjini, nungwari ya yenenisiwa ku Israel tjaMukuru. Omakwizikiro nga aaye hungirire komakotorero womerikotameneno omakohoke. Okambo nga The Watchtower 1 raSeninarindi 1999, ka kahurura kutja ondjuwo ondjapuke Esekiel ndja muna motjirimunikise, ya ri omakwizikiro womakotorero womerikotameneno ngo nu kunao tji nomayenenisiro omananḓengu momayuva omasenina nge notjiṋa noupanga wetu kuna Jehova.

^ par. 6 Oruyano ndwi rwa tjaera omurumendu nomukazendu okukara aveyerike metuwo nda patwa, pendje na indu tji va paturura omuvero poo pendje na indu tji va kupasana poo tji ve ri ovazamumwe vopopezu. Oure wozombura ozengi, oruyano ndwi aaku hungirirwa eyuva arihe pongongorasaneno yoBetel yOmerikotameneno womuhuka.

^ par. 13 Omaungurisiro omavi womakaya tjimuna okuyepepa, okunwa oseni poo okukuna omakaya nondando yokuyeungurisa momuano mbwi.

^ par. 27 Okutara kotjihorera, tara mekondwa 32 rembo ndi Learn From the Great Teacher; wina tara pomukuma 3-11 wokambo nga o-Awake! kaSeninaṋi 2007.