Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 17

Okuhonga ovazuvarise vOuhona

Okuhonga ovazuvarise vOuhona

ONDANDO YEKONDWA NDI

Ozoskole zOuhona za vatera vi ovazuvarise vOuhona okuyenenisa oviungura vyawo?

1-3. Jesus wa neneparisa vi oviungura vyokuzuvarisa, nu kwa kongorera omapuriro yeṋe?

OURE wozombura 2 Jesus wa zuvarisa ombuze moGalilea atjihe. (Lesa Mateus 9:35-38.) Eye wa ya kovihuro novirongo ovingi pekepeke, okukazuvarisa ombuze ombwa ohunga nOuhona mozondjuwo zomaworonganeno wombongo. Apehe paa zuvarisa ovimbumba vyovandu aavi rauka ku ye. Jesus wa muna kutja “omakondero vari omengi,” nu aape hepa ovaungure ovengi.

2 Jesus wa rongerisa omuano wokuneneparisa otjiungura tjokuzuvarisa. Omomuano uṋe? Omokuhinda ovaapostele ve 12 “okukazuvarisa ouhona waNdjambi.” (Luk. 9:1, 2) Ovaapostele mape ya va ri nomapuriro ohunga nokutja otjiungura hi mave sokutjiungura vi. Komurungu wokuvehinda, Jesus we ve pa otjiṋa Ihe tje mu pa, nu otjiṋa hi omahongero.

3 Nambano pe nomapuriro omengi wokutja, Jesus hapo wa muna omahongero waye okuza ku Ihe? Omahongero waye Jesus nga yandja kovaapostele ve? Nu tjike kundino? Ombara yOuhona waMukuru ya honga ovakongorere vayo kutja ve yenenise otjiungura tjawo tjokuzuvarisa poo indee? Ndovazu ya tjita nao, omomuano uṋe?

“Mbi hungira omambo nga porwawo Tate nge Ndji honga”

4. Jesus wa hongwa ruṋe i Ihe nu oporungeveze?

4 Jesus wa raisa oukahu kutja eye wa hongwa i Ihe. Indu tjaa ungura otjiungura tjokuzuvarisa, Jesus aruhe aa tja: “Mbi hungira omambo nga porwawo Tate nge Ndji honga.” (Joh. 8:28) Jesus wa hongerwa pi nu ya ri ruṋe? Omahongero we ngahino ya uta indu eye tja za nokumemwa. (Kol. 1:15) Eye tja ri puna Ihe meyuru oure wozombura ozengi tjinene aa puratene nokuṱakamisa omaronga ngaa pewa i “omuhonge omunenenene.” (Job 36:22) Nu kunao, Jesus wa muna omahongero wonḓengu yapeke ohunga novikaṋena, oviungura, nozondando zaIhe.

5. Jehova wa yandja omirari viṋe kOmuna we ohunga notjiungura tjokuzuvarisa tjaa sokukaungura kombanda yehi?

5 Otja oruveze tjaaru kayenda Jehova wa honga Omuna we ohunga notjiungura tjokuzuvarisa tji ma kaungura kombanda yehi. Ripurira komakwizikiro nga hungira ohunga noupanga pokati kOmuhonge omunenenene nOmuna we. (Lesa Jesaja 50:4, 5.) Omakwizikiro ngo ye tja, Jehova aa pendura omuna we “omuhuka auhe.” Omambo nga maye tu raisire kutja eye uri otja  omuhonge ngu pendura omuhongewa we omuhuka auhe kutja me mu honge. Omakonḓononeno yemwe wOmbeibela ya tja: “Pasanene tjimuna Jehova . . . ee mu toora e mu twa moskole tjimuna omuhongwa nu e mu hongo kutja ovikeṋa mbi ma sokuhonga varwe nokutja ma sokuvehonga vi.” “Momahongero” ngo Jehova wa honga Omuna we kutja ‘nga tje vi nu nga hungire tjike.’ (Joh. 12:49) Eye wina wa yandja omaronga kOmuna we ohunga nomuano mbwa sokukahonga. * Nu Jesus tja ri kombanda yehi wa ungurisa omaronga ngo nawa motjiungura tje tjokuzuvarisa, na wina mokuhonga ovakongorere ve kutja ve yenenise otjiungura tjawo tjokuzuvarisa.

6, 7. (a) Jesus wa yandja omahongero yeṋe kovaapostele ve nu omahongero ngo ye ve vatera okuyenenisa tjike? (b) Jesus wa kondja kutja ovakongorere ve voruveze rwetu ve mune omahongero waye?

6 Omahongero yeṋe Jesus nga yandja kovaapostele ve, otja tji pa tamunwa pomautiro? Otja ku Mateus ekondwa 10 Jesus wa yandja omahongero kovahongewa ve ohunga nomuano mbu mave sokuzuvarisa, tjimuna: kutja mave sokukazuvarisa pi (mezeva 5, 6), ombuze iṋe ndji mave sokukazuvarisa (mezeva 7), ounahepero wokukara nongamburiro mu Jehova (mezeva 9, 10), omuano wokuuta ehungi ku nomunionganda (mezeva 11-13), kutja mo sokutjita vi indu ovandu tji mave pirukire ombuze yoye (mezeva 14, 15), nomuano wokutjinda omarorero (mezeva 16-23). * Omahongero omawa Jesus nga yandja kovaapostele ve ya tjita kutja ve pwire okuuta oviungura vyokuzuvarisa ombuze ombwa meserewondo 1.

7 Nambano tjike ohunga noruze mu tu hupa? Ombara yOuhona waMukuru, Jesus wa yandja oviungura ovinanḓengu tjinene kovemukongorere, ovyo mbiri oviungura vyokuzuvarisa “Ombuze Ombwa yOuhona mouye auhe i rire omahongononeno koviwaṋa avihe.” (Mat. 24:14) Hapo Ombara ye tu honga okuyenenisa otjiungura otjinanḓengu hi poo indee? Ii, ya tjita nao! Okuza meyuru, Ombara ya kondja kutja imba mbe i kongorera ve mune omahongero ohunga nokutja mave sokuzuvarisa vi nokutja mave yenenisa vi oviungura vyawo mombongo.

Okuhonga ovazuvarise kutja ve rire ovapyuke

8, 9. (a) Ondando onenenene yOskole yOviungura vyOkuzuvarisa oyatjike? (b) Oskole yOviungura vyOkuzuvarisa ye ku vatera vi kutja u rire omupyuke motjiungura tjokuzuvarisa?

8 Oure wozombura ozengi otjira tjaJehova tja ungurisa omaworonganeno omanene nozombongarero zombongo tjimuna Ombongarero yOviungura vyOkuzuvarisa kutja tji honge ovakarere vaMukuru. Posi yokutja okuza mozombura nḓa 1940, ovarumendu ovakambure mbaave hongorere pomberoo ohongora va uta okuṱuna oviṋa kutja ve honge ovakarere vaMukuru okupitira mozoskole pekepeke.

9 Oskole yOviungura vyOkuzuvarisa. Otja tji twe rihonga mekondwa nda zu ko, oskole ndji ya uta okutjitwa mombura ndji 1943. Nu hapo ondando yoskole ndji oyokuhonga ovandu kutja ve yandje omahungi omawa mombongo uriri poo indee? Kako, katjiperi. Okuza korukuru ondando onanḓengu yoskole ndji oyokuhonga ovakarere vaMukuru kutja ve ungurise otjiyandjewa tjawo tjokuhungira, kutja ve tange Jehova motjiungura  tjokuzuvarisa. (Eps. 150:6) Oskole ndji, i vatera Ovakriste avehe ovarumendu novakazendu mbe ritjangisa ku yo kutja ve rire ovazuvarise ovapyuke vOuhona.

10, 11. Oouṋe mbu mave yenene okuritjangisa kOskole yaGilead, nu ondando yomahongero woskole ndji oyatjike?

10 Oskole yaGilead. Oskole ndji, ya uta 1 raTengarindi 1943. Kotjirutenga oskole ndji ya utirwe kutja i honge ovakandjira novandu varwe mbe ungurira Jehova oruveze aruhe kutja ve kaungure otjovahindwa komahi pekepeke mouye. Posi yokutja, okuza mu Seninaṋi 2011, imba mbu mave ritjangisa koskole ndji aave sokurira ovandu mbe karera Jehova oruveze aruhe tjimuna ovakandjira vapeke, ovatarere mbe varura ozombongo novakazendu vawo, imba mbe ungura pObetel, novahindwa ngunda mbe hiya ya koskole ndji.

11 Ondando yOskole yaGilead oyatjike? Omurumendu umwe omukambure ngwa honga poskole ndji oure wozombura ozengi wa tja: “Ondando yayo oyokuyanḓiparisa ongamburiro yovahongwa okupitira momahongero omakoto wEmbo raMukuru nokuvevatera kutja ve kare novikaṋena mbi heperwa po kutja ve ungure oviungura vyawo nondoṋeno nandarire kehi yomauzeu. Ondando yarwe onanḓengu yoskole ndji oyokuvatera ovahongwa kutja ve kare nonḓero onene yokukara norupa motjiungura tjokuzuvarisa.”—Ef. 4:11.

12, 13. Oskole yaGilead ya ṱuna vi kotjiungura tjokuzuvarisa mouye auhe? Yandja otjihorera.

12 Oskole yaGilead ya vatera vi oviungura vyokuzuvarisa mouye auhe? Okuza mombura ndji 1943, ovandu vokombanda 8 500 va pitira moskole ndji, * nu ovahindwa mba pitira moskole ndji ve karera momahi wokombanda 170 mouye auhe. Ovahindwa mba va ungurisa ondjiviro yawo ndji momuano omuwa, owo va raisa ovihorera oviwa vyokurira omapatje motjiungura tjokuzuvarisa nokuhonga varwe kutja ve tjite nao wina. Povikando ovingi, ovahindwa mba va uta oviungura vyokuzuvarisa momaturiro mu mwa ri notjivaro otjiṱiṱi tjovazuvarise vOuhona.

13 Tara ku imbi mbya tjitwa moJapan, indu oviungura vyokuzuvarisa tji vya hara okuyanda oparukaze moruveze rwOvita vyOuye Ovitjavari. Mu Katjose 1949, pa ri novazuvarise vokehi 10 moJapan. Nungwari komaandero wombura ndjo, ovahindwa 13 mba pitira mOskole yaGilead aave ungura oukukutu motjiungura tjokuzuvarisa moJapan. Ovahindwa varwe ovengi va hindwa ngo wina. Rutenga, ovahindwa mba aave yandja ombango onyingi kovihuro ovinene, nu kombunda va tjindira kovihuro vyarwe oviṱiṱi. Ovahindwa aave tunduuza ovahongewa vawo na varwe kutja ve kare norupa motjiungura tjoukandjira. Ozongondjero ozongukutu zovahindwa mba, za eta ovihape oviwa tjinene. Nai, pe novazuvarise vOuhona vokombanda 216 000 moJapan, nu ozoperesende ape 40 mu wo ve karera otjovakandjira! *

14. Ozoskole zOuhona ze raisa tjike? (Wina tara kokaongo nga “ Ozoskole nḓe honga ovazuvarise vOuhona.” )

14 Ozoskole zarwe zOuhona. Oskole yOviungura vyOvakandjira, Oskole yOmbeibela yOvakriste Ovakupasane nOskole yOmbeibela yOvarumendu Ovakombe za vatera imba mbe ritjangisa  ku zo kutja ve kure mouatjiri nokutja ve hongorere oviungura vyokuzuvarisa noupatje. * Ozoskole zOuhona azehe nḓa ze raisa kutja Ombara i honga imba mbe i kongorera nawa kutja ve yenenise otjiungura tjawo.—2 Tim. 4:5.

Okuhonga ovarumendu Ovakriste kutja ve yenenise oviungura vyawo

15. Ovarumendu mbe nomerizirira mombongo ve vanga okuhorera Jesus momuano uṋe?

15 Zemburuka omakwizikiro waJesaja nge hungira ohunga na Jesus ngu ma hongwa i Mukuru. “Momahongero” ngo, Omuna we rihonga ‘imbi mbi ma sokuhungira, kokutja ma zeuparise imba mba wotama.’ (Jes. 50:4) Jesus wa ṱakamisa omirari mbyo, orondu tja ri kombanda yehi, eye wa kovisa imba mba “pungarisiwa i okutjinda omitwaro omizeu.” (Mat. 11:28-30) Mokuhorera ku Jesus, ovarumendu ovakambure mbe nomerizirira mombongo ve kondja kutja ve kovise ovakambure ovakwao. Kunao, pa zikamisiwa ozoskole pekepeke kutja ze vatere ovarumendu ovakambure mbe nomerizirira mombongo okuvatera ovakambure ovakwao momuano omuwa.

16, 17. Ondando yOskole yOviungura vyOuhona oyatjike? (Wina tara komambo wokehi.)

16 Oskole yOviungura vyOuhona. Omahongero omatenga  woskole ndji, ya uta tji ya ri 9 ku Seninarindi 1959, moSouth Lansing tjaNew York. Ovatarere mbe varura ozombongo novanene mbe hongorera ovitjitwa vyombongo va ningirwa kutja ve ritjangise koskole ndji, ndja kara oure womueze. Kombunda omahongero nga ya torokwa momaraka warwe okuza kOtjiingirisa nu oskole ndji ya uta okuhonga ovarumendu ovakambure mouparanga wouye. *

Ingwi oMbuti Lloyd Barry ngu ma hongo pOskole yOviungura vyOuhona moJapan, 1970

17 Ohunga nondando yOskole yOviungura vyOuhona, embo ndi 1962 Yearbook of Jehovah’s Witnesses ra tja: “Mouye mbu noviungura ovingi mbwi, omutarere wombongo aihe yOvahongonene vaJehova ma sokurira omurumendu ngu ma yenene okuṱuna oviṋa mehupo re kutja ma yandje ombango kovandu avehe mombongo nu me ve vatere momuano omuwa. Moruveze otjingerwo wina ka sokurira omurumendu ngu yandja ombango tjinene kombongo nga tje hi noruveze rwokuyandja ombango keṱunḓu re, nungwari ma sokukara nozondunge ozombaera. Ovarumendu mbe karera otjovanene mbe hongorera ovitjitwa vyombongo mouye auhe ve kara nondjoroka yokuya pamwe pOskole yOviungura vyOuhona kutja ve mune omahongero nge ve vatera  kutja ve yenenise imbi mbi undjirwa komutarere otja Ombeibela pu mai hee!”—1 Tim. 3:1-7; Tit. 1:5-9.

18. Oskole yOviungura vyOuhona i vatera vi ovakarere vaMukuru avehe?

18 Oskole yOviungura vyOuhona ya vatera ovakarere vaMukuru avehe. Omomuano uṋe? Indu ovanene novavatere vombongo tji mave ṱakamisa oviṋa mbi va hongwa poskole ndjo, owo mave yenene okurira ovandu mbu mave kovisa ovakambure ovakwao tjimuna Jesus tjaa tjiti. Ove ngahino u kara nondangi tji mo raerwa omambo omawa, tji mo puratenwa poo tji we yekuryangerwa i omunene poo omuvatere wombongo ngu raisa kutja u rikendera kove. (1 Tes. 5:11) Ovarumendu mbe nondjiviro ombwa mbo tjiri ve vatera ombongo tjinene!

19. Ozoskole zeṋe zarwe Okomiti ohonge nḓu i hongorera nu ozoskole nḓo za utwa nondando yatjike?

19 Ozoskole zarwe zOuhona. Okomiti ohonge yOrutu Orunane i hongorera ozoskole zarwe nḓe honga ovarumendu ovakambure mbe nomerizirira motjira tjaJehova. Ozoskole nḓa za zikamisirwa kutja ze vatere ovarumendu ovakambure mbe noviungura ovingi tjimuna ovanene vombongo, ovatarere mbe varura ozombongo, nouṋepo wOkomiti yOrutavi rwOmberoo kutja ve yenenise oviungura vyawo nondoṋeno. Omahongero nga zikamena kOmbeibela nga ye tunduuza ovarumendu ovakambure mba kutja ve kare noupanga ouwa kuna Jehova nokuṱakamisa omirari vyOmbeibela indu tji mave tjevere ozonḓu zaJehova nḓu va pewa kutja ve tjevere.—1 Petr. 5:1-3.

Otjimbumba otjitenga tjovahongwa vOskole yOmbeibela yOvarumendu Ovakombe ndja tjitirwa moMalawi, 2007

20. Omena ratjike Jesus tja yenena okutja atuhe tu ‘hongwa’ i Jehova, nu ove we rimanene okutjita tjike?

20 Oukahu kutja Ombara Messias ya kondja kutja imba mbe mu kongorera ve hongwe nawa. Omahongero aehe nga ya kayenda mongongorasaneno: Jehova wa honga Omuna we, nu Omuna a hongo ovemukongorere. Kunao, Jesus opa zokutja atuhe tu ‘hongwa’ i Jehova. (Joh. 6:45; Jes. 54:13) Okutja, ngatu rimanene okuungurisa omahongero aehe Ombara yetu ngu i tu pa tjimuna pOskole yOviungura vyOkuzuvarisa, poo pozombongarero zarwe zombongo poo pozoskole zarwe nḓa tamunwa mekondwa ndi. Nu ngatu zemburuke kutja ondando onene yozoskole nḓa oyokutja tu kare noupanga ouwa kuna Jehova nokutja tu yenenise otjiungura tjetu tjokuzuvarisa.

^ par. 5 Matu tjiwa vi kutja Jehova wa honga Omuna we omuano wokuhonga? Ripurira ku imbi: Omuano Jesus mbwaa ungurisa ovihorera momahongero we wa yenenisa omakwizikiro nga tjangerwe omaserewondo omengi komurungu wanao. (Eps. 78:2; Mat. 13:34, 35) Oukahu kutja, Omutjange womakwizikiro ngo, Jehova, we rimanenene rukuru kutja Omuna we ma hongo mokuungurisa ovisanekero poo ovihorera.—2 Tim. 3:16, 17.

^ par. 6 Omieze omiṱiṱi kombunda yanao, Jesus wa “toororere ovakuao omirongo hambombari, ne ve hindi kovevarivari” kutja ve kazuvarise. Eye wina we ve pa omahongero.—Luk. 10:1-16, EEP.

^ par. 12 Ovandu tjiva mbe ritjangisa va pitira mOskole yaGilead povikando vyokombanda yatjimwe.

^ par. 13 Tji mo vanga ondjiviro yokomurungu ohunga nomuano ovahindwa mba hongwa kOskole yaGilead mu va vatera motjiungura tjokuzuvarisa, tara kekondwa 23 rembo ndi Jehovah’s Witnesses—Proclaimers of God’s Kingdom.

^ par. 14 Ozoskole 2 ozosenina nḓa za uta okutjiukwa otjOskole yOvazuvarise vOuhona.

^ par. 16 Nai ovanene vombongo ovengi ve muna ombatero momahongero wOskole yOviungura vyOuhona ndji tjitwa kombunda yozombura ozonḓiṱi. Okuza kombura ndji 1984, ovavatere vombongo wina va muna omahongero poskole ndji.