Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 6

Pe nomaundjiro kaaṋi kovaṱi?

Pe nomaundjiro kaaṋi kovaṱi?

1. Ombuze iṋe ombwa ndji ri mOmbeibela ohunga novaṱi?

Indu Jesus tja vaza mu Betanie popezu na Jerusalem, wa kavaza Lasarus a ṱu oure womayuva yane. Jesus wa ya komayendo puna Marta na Maria, ovaṱena vomuṱi. Nu tjimanga ovandu va uta okuworongana. Ripura uriri kutja ooMarta na Maria va ri nondjoroka ndji ṱa pi indu tji va muna kutja Jesus wa pendura Lasarus movakoke!​—Lesa Johanes 11:21-24, 38-44.

Marta aa tjiwa ombuze ombwa ndji ri mOmbeibela ohunga novaṱi. Eye aa tjiwa kutja Jehova ma pendura ovaṱi kutja ve hupe kombanda yehi rukwao.​—Lesa Job 14:14, 15.

2. Ovaṱi ve ri mongaro iṋe?

Mukuru wa raera Adam “Ove oove oruuma, nu mo yaruka koruuma.”—GENESIS 3:19.

Ovandu va ungurwa poruuma. (Genesis 2:7; 3:19) Eṱe kaweṱe ozombepo nḓe norutu rwonyama. Oweṱe oviutwa vyonyama, okutja kape notjiṋa morutu rwetu tji tji hupa komurungu tji twa ṱu. Eyuva ndi twa koka, ouruvi wetu u isa okuungura, nomeripura wetu ye yandera mbo. Mena ranao, Lasarus kena pa hungira otjiṋa ohunga nongaro ma ri indu tja ṱire, orondu ovaṱi kave tjiwa otjiṋa.​—Lesa Epsalme 146:4; Omuzuvarise 9:5, 6, 10.

Mukuru u tatumisa ovandu mokuvenyosa momuriro tji va ṱu po? Ndovazu Ombeibela i honga kutja ovaṱi kave tjiwa otjiṋa, okutja omahongero wokutja ku notjovasengwa ovandu  ku ve kanyosiwa, tjiri omahongero wovizeze nge yamburura Mukuru. Omanyosiro wovandu momuriro otjiṋa tji tji mu yaukisa.​—Lesa Jeremia 7:31.

3. Ovaṱi mave yenene okuhungira kuna eṱe po?

Ovaṱi kave hungire nu kave zuu. (Epsalme 115:17) Posi yokutja pe novaengeli tjiva ovarunde mbe yenena okuhungirisa ovandu nave tjiti aayo owo ovandu mba ṱa. (Judas 6) Jehova u tu tjaera kutja atu hungire ku novaṱi poo okukapura kovaṱi.​—Lesa Deuteronomium 18:10, 11.

4. Oouṋe mbu mave munu ombendukiro?

Omangete omengi wovandu mba ṱa mave kotorwa komuinyo rukwao. Nandarire imba mbaave ha tjiwa Mukuru nu mbaave tjiti oviṋa ovivi mave pendurwa.​—Lesa Lukas 23:43; Oviungura 24:15.

Imba mba pendurwa movakoke mave munu oruveze rwokurihonga ouatjiri ohunga na Mukuru nokuraisa ongamburiro yawo mu Jesus mokukara nonḓuviro ku ye. (Omavandururiro 20:11-13) Imba mba pendurwa tji mave tjiti oviṋa oviwa mave yenene okukara nomuinyo kombanda yehi nga aruhe.​—Lesa Johanes 5:28, 29.

5. Ombendukiro yovaṱi i tu honga tjike ohunga na Jehova?

Mokuhinda Omuna we kutja me yekuṱira eṱe, Mukuru wa tjita kutja ovaṱi ve kare nomaundjiro wombendukiro. Okutja ombendukiro i tu raisira kutja Jehova we tu suvera nu u notjari. Indu ovaṱi tji mave pendurwa, ouṋe ngo tjo zera okumuna tjinene?​—Lesa Johanes 3:16; Ovaroma 6:23.