1. Ourunde wa uta vi?

Mukuru wa yandja oruveze ndwa yenena kovandu okurihonaparera oveni nu ve rimunine kutja kamaave isapo omauzeu wovandu

Ourunde wa uta indu Satan tja kora otjizeze otjitenga. Kotjirutenga Satan wa ri omuengeli ohomonena, posi yokutja “keya rora okuungurira ouatjiri.” (Johanes 8:44) Eye wa uta okunanukira omerikotameneno nga pwira Mukuru porwe. Satan wa korera omukazendu omutenga, Eva, ovizeze ne mu pukisa kutja ma kare nonḓuviro ku ye moruveze rwokukara nonḓuviro ku Mukuru. Adam we rikuta kuna Eva mokuhinokukara nonḓuviro ku Mukuru. Omukambo Adam mbwa toora wa eta onḓiro nomauzeu.​—Lesa Genesis 3:1-6, 19.

Indu Satan tja tjita kutja Eva ma teye etwako raMukuru, eye wa pirukira ousemba waMukuru womananeno. Ovandu ovengi ve rikuta kuna Satan mokupirukira Mukuru otjOmunane wawo. Kunao, Satan wa rira “omuhonapare wouye mbwi.”​—Lesa Johanes 14:30; 1 Johanes 5:19.

2. Oviutwa vyaMukuru vya ri notjipo?

Oviungura vyaMukuru avihe oviwa. Ovandu novaengeli Mukuru mba mema aave yenene okukara nonḓuviro ku ye pondondo yokombanda. (Deuteronomium 32:4, 5) Mukuru we tu ungura nouyara wokuritoororera oveni kutja matu tjiti ouwa poo ouvi. Ouyara mbwo u tu pa oruveze rwokuraisa orusuvero rwetu ku Mukuru.​—Lesa Jakobus 1:13-15; 1 Johanes 5:3.

3. Ongwaye Mukuru tja yandjera ovandu okumuna ouzeu nga ku nai?

Okuza komapirukiriro motjikunino tjaEden, Jehova wa isa ovandu ve pirukire ousemba we womananeno. Omena ratjike? Okuveraisira kutja ozongondjero zawo zokurihonaparera oveni kaze nouwa kangamwa mbu maze eta. (Omuzuvarise 7:29; 8:9)  Kombunda yozombura 6 000, omakuruhungi wovandu ye raisa oukahu kutja kave nouwa mbu ve rietera. Ovandu mbe nana va urwa okuisapo ovita, ozondjito zoutwe, ouhasemba nomitjise.​—Lesa Jeremia 10:23; Ovaroma 9:17.

Ouhona waMukuru wa panguka ku imbwi wovandu, orondu owo u yandja ouwa ku imba mbe u yakura. (Jesaja 48:17, 18) Moruyaveze rwopopezu, Jehova ma isapo ozohoromende zovandu azehe. Ovandu mba yakura omananeno waMukuru porwawo ombu mave kahupa kombanda yehi.—Jesaja 11:9.​—Lesa Daniel 2:44.

4. Omuretima waMukuru u tu pa oruveze rwokutjita tjike?

Satan wa tja ovandu katjave karera Jehova andakuzu kave nouwa mbu ve muna mo. Ove ko nakuvanga okuraisa kutja ihi tjiri otjizeze? Mo yenene okutjita nao, orondu omuretima waMukuru u tu pa oruveze rwokuraisa kutja tu vanga okuhonaparerwa i Ye poo i ovandu. Omuano mbu tu hupa ombu raisa kutja eṱe tu ri munda uṋe.​—Lesa Job 1:8-12; Omiano 27:11.

5. Matu yenene okutoorora vi Mukuru otjOmunane wetu?

Ozondando zetu ze raisa kutja tu vanga Mukuru otjOmuhonapare wetu poo indee

Eṱe matu yenene okutoorora Mukuru otjOmunane wetu indu tji twe rihongo natu ungurisa ongamburiro youatjiri ndja zikamena kEmbo raMukuru, Ombeibela. (Johanes 4:23) Matu yenene okupirukira ouhonapare waSatan indu tji twe riṱizire kokure noviṋa vyopolitika novita otja Jesus tjaa tjiti.​—Lesa Johanes 17:14.

Satan u ungurisa omasa we okumunikisa ozongaro ozombi zomeritjindiro novitjitwa ovivi aayo oviwa. Eṱe tji twa nakaura ovitjitwa mbyo, omapanga poo ovazamumwe vetu mape ya ave tu pirukire nokutuhungira navi. (1 Petrus 4:3, 4) Okutja matu sokutoorora kutja matu kara puna ovandu mba suvera Mukuru poo indee? Matu ṱakamisa omatwako we worusuvero nounongo poo indee? Tji twa tjiti nao, eṱe matu raisa kutja Satan wa kora ovizeze indu tja tja kape nomundu ngu ma ṱakama ku Mukuru indu tje ri mouzeu.​—Lesa 1 Ovakorinte 6:9, 10; 15:33.

Orusuvero rwaMukuru kovandu ondu kwizika kutja ourunde nokumuna omauzeu maku yanda. Imba mbe raisa kutja ve kambura moviṋa mbi mave kayorokera omuinyo kombanda yehi nga aruhe.​—Lesa Johanes 3:16.