1. Ozongamburiro azehe ozombwa?

Mozongamburiro azehe muna ovandu ovawa. Ombuze ombwa oyondji yokutja Mukuru u muna ovandu mba nu u rikendera wo. Ouhumandu, ovandu ve ungurisa ozokereka okutjitira mo oviṋa ovivi. (2 Ovakorinte 4:3, 4; 11:13-15) Otja kozongoramambo, ozokereka tjiva ze norupa mozondjito zokuzepa ovandu, ovita, nomatjerero wovanatje. Imbi tjiri oviṋa ovihihamise ku imba mba suvera Mukuru tjiri!​—Lesa Mateus 24:3-5, 11, 12.

Ngunda ongamburiro youatjiri ai yozika Mukuru, ozongamburiro zoposyo ze zunḓa ena re. Ozo ze honga oviṋa mbi he ri mOmbeibela, tjimuna omahongero woposyo ohunga na Mukuru nomahongero woposyo ohunga novakoke. Nungwari Jehova u vanga kutja ovandu ve tjiwe ouatjiri ohunga na ye.​—Lesa Omuzuvarise 9:5, 10; 1 Timoteus 2:3-5.

2. Ozongamburiro maze katjitwa vi?

Ouṋingandu Mukuru ka wovisiwa i ozongamburiro nḓe tja ze mu suvera nungwari nḓa suvera ouye waSatan mbwi. (Jakobus 4:4) MEmbo raMukuru ozongamburiro azehe zoposyo ze isanewa “Babilon otjinene.” Babilon ena nda za kotjihuro otjikuru ku kwa utira ozongamburiro zoposyo kombunda yOmupupo woruveze rwaNoa. Moruyaveze rwopopezu, Mukuru ma yandeke ozongamburiro nḓe wovisa ovandu nokuveṋiṋikiza.​—Lesa Omavandururiro 17:1, 2, 5, 16, 17; 18:8.

Pe nombuze yarwe ombwa. Jehova ke ya zemba ovandu mbe vanga okumukarera tjiri nu nai mbe ri mozongamburiro zoposyo mouye auhe. Eye u wonga ovandu mbo mokuvehonga ouatjiri.​—Lesa Mika 4:2, 5.

 3. Ovandu mbe vanga okukarera Jehova tjiri mave sokutjita vi?

Ongamburiro youatjiri i wanisa ovandu

Jehova u rikendera kovandu mba suvera ouatjiri nouwa. Eye u ve rakiza kutja ve pite mongamburiro yoposyo. Imba mba suvera Mukuru ve rimana okurundurura ongaro yawo yehupo kutja ve tjate ku ye.​—Lesa Omavandururiro 18:4.

Meserewondo etenga, ovandu mbaave vanga okukarera Jehova tji va za nokuzuva ombuze ombwa kovaapostele, owo ve i yakura nenyando. Jehova we ve honga omuano omupe wokuhupa, omuano wehupo rondjoroka nde ve pa omuhunga nomaundjiro omawa woruyaveze. Owo otjihorera otjiwa ku eṱe ndino mena rokutja va yakura ombuze ombwa mokutoorora Jehova otjomundu omutenga mehupo rawo.​—Lesa 1 Ovatesalonika 1:8, 9; 2:13.

Imba mba poka kozongamburiro zoposyo, Jehova u ve yakura meṱunḓu re rOvakriste vatjiri. Indu tji wa yakura omaṋangero waJehova worusuvero nga, ove mo rire epanga re no rire epanga reṱunḓu epe rovakarere vaJehova mbe norusuvero, nu mo kamuna omuinyo waaruhe.​—Lesa Markus 10:29, 30; 2 Ovakorinte 6:17, 18.

4. Mukuru ma eta vi ondjoroka mehi arihe?

Ombanguriro yozongamburiro zoposyo ndji mai ya, tjiri ombuze ombwa. Oyo mai eta onguturiro koṋiṋikizire ndji ri mouye auhe. Ongamburiro yoposyo kamaai roro okupukisa nokuhaṋa ovandu rukwao. Ovandu avehe mbu mave kahupa kombanda yehi mave kerikotamena ku Mukuru watjiri mongamburiro imwe.​—Lesa Omavandururiro 18:20, 21; 21:3, 4.