MOMARAKA mu ya tjangerwe rutenga Ombeibela i ungurisa embo rOtjiheberi tjeol nekwao rOtjigrike ndi ri hades ovikando vyokombanda 70. Omambo ayeevari nga ye notjiṋa nonḓiro. Ozombeibela tjiva za toroka omambo ngo otja “eyendo,” “otjovasengwa,” “ohela” poo “ondimba.” Nungwari momaraka omengi kamu nomambo nge twa po nawa omaheero womambo yOtjiheberi nOtjigrike nga. Ombeibela yOtjiherero povikando ovingi ya toroka omambo nga otja “otjovakoke.” Omambo nga tjiri ye heya tjike? Ngatu tare kutja ya ungurisiwa vi motupa tjiva twOmbeibela.

Omuzuvarise 9:10 mari tja: “Kaku noviungura nomeripuriro nondjiviro nounongo motjovakoke [tjeol] hapo ku mo i.” Ihi katji nakuheya kutja otjovakoke eyendo rorive tjimuna mu mwa pakwa umwe wovasuverwa vetu. Indu Ombeibela tji mai hungire ohunga neyendo oyo i ungurisa omambo warwe wOtjiheberi nowOtjigrike. Oyo kai ungurisa tjeol na hades. (Genesis 23:7-9; Mateus 28:1) Ombeibela wina kai ungurisa embo ndi tjeol indu tji mai hungire ohunga nomayendo mu mwa pakwa ovandu ovengi pamwe, tjimuna yovazamumwe poo eyendo rovandu ovengi motjitoto tjimwe.—Genesis 49:30, 31.

Embo ndi otjovakoke ri heya tjike? Embo raMukuru ri raisa kutja omambo nga “tjeol” na “hades,” nga torokwa otjovakoke ye heya otjiṋa otjinene okukapita nandarire omayendo mu mwa pakwa ovandu ovengi. Okutara kotjihorera, Jesaja 5:14 mari raisa kutja tjeol poo otjovakoke “tja mwahurura otjinyo tjatjo amatji munika oruyewo orunene.” Nandarire kutja otjovakoke [tjeol] tja ṋiṋa rukuru ovaṱi mbu tu hi nakuyenena okuvara, otjo ngunda tji munika aayo katjikuta. (Omiano 30:15, 16) Otjo katji ri tjimuna omayendo wakauriri nge yenena okuura, nungwari ‘otjovakoke katji kuta.’ (Omiano 27:20) Mape hee kutja otjovakoke katji roro okuura. Okutja tjeol poo hades kaye heye omayendo oyeni nge ri poṋa porive, nungwari omambo nga ye sasaneka ongaro ovaṱi ovengi mu ve ri, kutja va pakwa poo kave pakerwe.

Omahongero wOmbeibela ohunga nombendukiro ye tu vatera kutja tu mune ondjiviro yokomurungu ohunga nomaheero womambo nga “tjeol” na “hades.” Embo raMukuru ri waneka tjeol na hades (otjovakoke) ku nonḓiro ndji mai kakara nombendukiro. *  (Job 14:13; Oviungura 2:31; Omavandururiro 20:13) Embo raMukuru wina ri raisa kutja imba mbe ri mu tjeol poo hades, kawomba porwawo mbaave karere Jehova, nungwari wina ve kamburira mo ovandu ovengi mbaave he mu karere. (Genesis 37:35; Epsalme 55:15) Ombeibela opu i zokuhonga kutja “ovandu avehe ovawa novavi mave penduka movakoke.”—Oviungura 24:15.

^ par. 1 Posi yokutja, Ombeibela i tja ovaṱi mbu ve hi nokumuna ombendukiro owomba mbe ri mu “Gehenna,” ndi heya otjovasengwa poo otjomuriro, nungwari kawomba mbe ri mu tjeol poo hades. (Mateus 5:30; 10:28; 23:33) Tjimuna tjeol na hades tje ri ovisanekero, Gehenna wina otjisanekero uriri.