• Otjisuta tjonguturiro otjikeṋa?

  • Otjo tja yandjwa vi?

  • Matji hee tjike kove?

  • Ove mo raisa vi ondangi yoye ku tjo?

1, 2. (a) Oruṋe otjiyandjewa tji tji rira otjinanḓengu tjinene kove? (b) Ongwaye tji mape ya atu tja otjisuta tjonguturiro ootjiyandjewa otjinanḓengu tjinenenene?

OTJIYANDJEWA tjiṋe otjinenenene tji wa rora okupewa? Otjiyandjewa katji hepa okurira otjondiru okuraisa ounanḓengu watjo. Nakombanda yanao, onḓengu yotjiyandjewa tjiri kai sanekerwa kotjimariva tji tja kosa. Nungwari indu otjiyandjewa tji matji ku etere ouṋingandu poo tje ri otjiṋa tjoo hepa tjiri, okutja otjo matji rire otjinanḓengu tjinene kove.

2 Moviyandjewa avihe mbi wa rora okupewa, pe na tjimwe tji tji nonḓengu ndja kapita avihe vyarwe. Otjo otjiyandjewa Mukuru tja yandja kovandu. Jehova we tu pa oviṋa ovingi, nungwari otjiyandjewa otjinenenene eye tje tu pa ombunguhiro yomuinyo wOmuna we Jesus Kristus. (Mateus 20:28) Otja tji matu kamuna mekondwa ndi, ihi ootjiyandjewa otjinanḓengu tjinenenene, orondu matji ku etere ouṋingandu ouingi tjinene nu matji ku vatere movihepwa vyoye ovingi. Ombunguhiro yaJesus ndji, tjiri ootjiraisiro otjinenenene tjorusuvero rwaJehova kove.

 OTJISUTA TJONGUTURIRO OTJIKEṊA?

3. Otjisuta tjonguturiro otjikeṋa, nu matu sokuzuva tjike rutenga kutja tu yenene okuraisa ondangi kotjiyandjewa otjinanḓengu hi?

3 Ousupi uriri, otjisuta tjonguturiro omuano waJehova wokukutura poo okuyama ovandu kouvi na konḓiro. (Ovaefese 1:7) Kokutja tu zuve omahongero wOmbeibela nga nawa, matu sokuripura ohunga na imbi mbya tjitwa motjikunino tjaEden. Tji twe rihongo ohunga na imbi Adam mbya pandjara indu tja katuka, otji matu kazuva nawa kutja ongwaye otjisuta tjonguturiro tji tji ri otjiyandjewa otjihuze.

4. Okurira ohomonena aaku hee tjike ku Adam?

4 Indu Jehova tja mema Adam, eye we mu pa omuinyo ohomonena, nu ihi tjiri tja ri otjiṋa otjihuze. Ripura uriri kutja ihi aatji hee tjike ku Adam. Mena rokutja eye wa ungurwa norutu nouripura ouhomonena, eye katja vera ,nu katja kurupa poo okukoka. Otjomundu ohomonena, eye wa ri noupanga wapeke na Jehova. Ombeibela mai tja Adam wa ri “owaNdjambi,” pu mape hee kutja wa ri omuzandu waMukuru. (Lukas 3:38) Okutja Adam wa ri noupanga woposengo na Jehova Mukuru, tjimuna oupanga mbu kara pokati komuatje omuzandu na ihe worusuvero. Jehova aa hungire ku nomuzandu we wokombanda yehi Adam, indu tjee mu pe oviungura oviyorokise nokumutjivisa imbi eye mbyaa undjire ko ku ye.—Genesis 1:28-30; 2:16, 17.

5. Ombeibela i heya tjike indu tji i tja Adam wa memwa “kombunikiro yaNdjambi”?

5 Adam wa memwa “otja kombunikiro yaNdjambi.” (Genesis 1:27) Ihi matji hee ye? Otja tji twe rihonga mEkondwa 1 rembo ndi, Jehova u norutu rwombepo. (Johanes 4:24) Okutja Jehova ke norutu rwombinḓu nonyama. Okumemwa kosaneno yaMukuru maku hee kutja Adam wa memwa novitjiukwa vyoundu tjimuna ovyaMukuru, ovyo mbi ri orusuvero, ounongo, ousemba nomasa. Adam wa ri otja Ihe momuano warwe omunanḓengu. Eye wa ri nousemba wokuritoororera omuini. Okutja Adam ka ri tjimuna omahina  ndji yenena okuungura imbi mbi ya ungurirwa okutjita uriri. Moruveze rwanao eye aa yenene okurityera nokuritoororera omuini ouwa nouvi. Andakuzu Adam wa toorora okupuratena ku Mukuru, eye atja hupa nga aruhe mOparadisa kombanda yehi.

6. Indu Adam tje ha puratenene ku Mukuru, eye wa pandjara tjike nu ihi tja ṱuna vi kozondekurona ze?

6 Indu Adam tje ha puratenene ku Mukuru, eye wa muna omberero yokuṱa, nu ihi tjiri tje mu pandjarisa otjiṋa otjinanḓengu tjinene. Ourunde we wa tjita kutja ma pandjare omuinyo we ohomonena nozondaya azehe. (Genesis 3:17-19) Otjihihamise okongwi kutja Adam ka pandjarisire omuinyo we porwawo, nungwari wina wa pandjarisa imbwi wozondekurona ze. Embo raMukuru mari tja: “Ouvi wa zira momundu umwe nau ya mouye, nonḓiro ai zu mouvi. Komuhingo mbwi onḓiro otji ya tuurunga movandu avehe, owo avehe tjinga ava tjita ouvi.” (Ovaroma 5:12) Ii, eṱe atuhe twa rumata ouvi ku Adam. Ombeibela opu i zokutja eye we ri ‘randisa’ omuini na randisa ovanatje ve moukarere wouvi nonḓiro. (Ovaroma 7:14) Adam na Eva kava ri nomaundjiro rukwao mena rokutja owo va katukira owina oveta yaMukuru. Nungwari pe ri vi ohunga na eṱe mbu tu ri ozondekurona ze?

7, 8. Embo ndi otjisuta tjonguturiro ri kamburira mo ovikeṋa vivari?

7 Jehova we ya okuyama ovandu notjisuta tjonguturiro. Embo ndi otjisuta tjonguturiro ri heya tjike? Embo ndi orini ri kamburira mo oviṋa vivari. Rutengatenga, otjisuta tjonguturiro otjimariva tji tji sutwa okukutura poo okukotora otjiṋa tji tja pandjarere. Mape ya atu tji sasaneke notjimariva tji tji sutwa okukutura omukamburwa movita. Otjitjavari, otjisuta tjonguturiro tja sana notjimariva tji tji sutwa okuyarura po onḓengu konyonokero ndja tjitwa kotjiṋa. Okutara kotjihorera, indu omundu tja tjiti oumba, eye ma sokusuta otjimariva tjonḓengu ndji ṱa potjiṋa tji tja nyonoka.

8 Onyonokero Adam ndja eta kweṱe atuhe atja i sutwa vi nu atja tu kuturwa vi kouvi na konḓiro? Indjeye tu tare  kotjisuta tjonguturiro Jehova tja yandja nokutja otjo matji hee tjike kove.

OMUANO JEHOVA MBWA YANDJA OTJISUTA TJONGUTURIRO

9. Otjisuta tjonguturiro tjaa tji heperwa po otjaye?

9 Mena rokutja omuinyo mbwa pandjara wa ri omuinyo womundu ohomonena, okutja aape hepa omundu ohomonena okusutira po omuinyo mbwi. (Epsalme 49:7, 8) Aape hepa otjisuta tjonḓengu yaimbwi mbwa pandjara. Ihi tji ri mombwaneno nomazikamisiro wousemba ohomonena nge ri mEmbo raMukuru ngu maye tja: “Omuinyo komuinyo.” (Deuteronomium 19:21) Nambano, otjikeṋa tja tja tji yarura po onḓengu yomuinyo ohomonena Adam mbwa pandjara? Aape hepa omuinyo womundu ohomonena okurira otjisuta tji tja yenene.—1 Timoteus 2:6.

10. Omomuano uṋe Jehova mbwa yandja otjisuta tjonguturiro?

10 Omomuano uṋe Jehova mbwa yandja otjisuta tjonguturiro? Eye wa hinda umwe wovazandu ve vombepo ohomonena okuza meyuru me ye kombanda yehi. Nungwari Jehova ka hindire ngamwa otjiutwa tjombepo. Eye wa hinda ingwi omuingona we, Omuna we omukwatwaerike. (1 Johanes 4:9, 10) Omuna ngwi mombango ye omuini wa isa omaturiro we womeyuru. (Ovafilipi 2:7) Otja tji twe rihonga mEkondwa 4 rembo ndi, Jehova wa tjita otjihimise indu tja tanaurira omuinyo wOmuna we mezumo raMaria. Mokuyenenisa hi eye wa ungurisa ombepo ye ondjapuke, okutja Jesus wa kwatwa otjomundu ohomonena nu ka rumatere ourunde.—Lukas 1:35.

Jehova we tu pa Omuna we omukwatwaerike otjotjisuta tjonguturiro

11. Pe ya vi omundu umwe ma rire onguturiro yovengi?

11 Pe ya vi omundu umwe ma rire onguturiro yovengi? Rutenga ripura kutja, ovandu avehe pe ya vi ve rire ovanandjo. Zemburuka kutja indu Adam tja katuka, eye wa pandjarisa omuinyo we ohomonena, tji tja ri otjiṋa otjihuze. Mena ranao eye kaa yenene okurumatisa ouhomonena mbwi kovanatje  ve. Ouvi nonḓiro porwavyo ombya rumatisa ku wo. Jesus, ngu isanewa “Adam ingwi omusenina” mOmbeibela, wa ri omundu ohomonena nu kena pa turire ondjo. (1 Ovakorinte 15:45) Pu ma pe hee kutja Jesus wa pingena Adam ne yekutuyama. Jesus wa punguha omuinyo we ohomonena nu mokutjita hi eye wa raisa onḓuviro yatjiri ku Mukuru. Komuano mbwi, eye wa suta ourunde waAdam na etere ovanatje vaAdam omaundjiro.—Ovaroma 5:19; 1 Ovakorinte 15:21, 22.

12. Omauzeu Jesus nga muna ya raisa tjike?

12 Ombeibela i raisa oukahu ouzeu Jesus mbwa tjinda komurungu wonḓiro ye. Eye wa tonwa ozongora, a paperwa na ṱu onḓiro ombi nondetarise komuti wondatumisire. (Johanes 19:1, 16-18, 30; Tara kOviweziwako porupa ndwi, “Omena ratjike Ovakriste vatjiri tji ve ha ungurisa otjikroise momerikotameno wawo?”) Ongwaye tja ri ohepero ku Jesus okumuna ouzeu tjinene nao? Mekondwa rimwe ndi mari ya membo ndi matu kerihonga kutja Satan u tja kape novakarere vaJehova mbu mape ya ave ṱakama ku ye kehi yomarorero. Mokuṱakama kehi yondatumisire onene ndji, Jesus wa yandja eziriro esembasemba komatokero waSatan. Jesus wa raisa kutja omundu ohomonena ngu nousemba wokurityera ouwa nouvi, ma yenene okuṱakama nokuhi nokuteratera ku Mukuru nandarire kutja Omudiaboli we mu roro pupe ṱa pi. Tjiri, Jehova wa yoroka tjinene mena rouṱakame wOmuna we omusuverwa!—Omiano 27:11.

13. Otjisuta tjonguturiro tja sutwa momuano uṋe?

13 Otjisuta tjonguturiro tja sutwa momuano uṋe? Meyuva oritja-14 komueze wOvajuda, Nisan, mombura 33 O.Z., Jehova wa yandjera Omuna we ohomonena nu ngu ha ri nondjo kutja ma ṱe. Komuano mbwi, Jesus wa punguha omuinyo we ohomonena woundu “nambano na aruhe.” (Ovaheberi 10:10) Meyuva oritjatatu kombunda yonḓiro ye, Jehova we mu pendura komuinyo otjomundu wombepo. Indu Jesus tja ya meyuru eye wa yandja onḓengu yomuinyo we ohomonena ku Mukuru, mbwa punguha otja otjisuta  tjonguturiro kovanatje vaAdam. (Ovaheberi 9:24) Jehova wa yakura onḓengu yombunguhiro yaJesus otjotjisuta tjonguturiro tjaatji hepwa okukutura ovandu kouvi nonḓiro.—Ovaroma 3:23, 24.

OMBUNGUHIRO YAJESUS MAI KU VATERE VI?

14, 15. Eṱe tu sokutjita vi tji matu vanga ‘okuisirwa omauvi wetu’?

14 Nandarire kutja kaweṱe ohomonena, eṱe matu yenene okuyorokera ozondaya nḓe hi nomaandero mena rombunguhiro yaJesus ndji. Indjeye tu tare koviṋa oviwa otjiyandjewa otjinenenene hi mbi matji tu etere nai namoruyaveze.

15 Omauvi wetu maye isirwa. Indu tji matu vanga okutjita ouwa, pe kara ongondjero tjiri mena rokutja kaweṱe ohomonena. Eṱe atuhe tu katuka momambo na movitjitwa. Nungwari mena rotjisuta tjonguturiro, matu yenene ‘okuisirwa omauvi wetu.’ (Ovakolose 1:13, 14) Indu tji matu vanga okuisirwa omauvi wetu, twa sokuritanaura tjiri. Eṱe wina matu sokuriheka ku Jehova, natu ningire ondjesiro mena rongamburiro motjisuta tjonguturiro tjOmuna we.—1 Johanes 1:8, 9.

16. Otjikwaye tji tji tjita kutja tu rikotamene ku Mukuru nomeritjiviro omawa womomutima, nu onḓengu yawo oyatjike?

16 Omeritjiviro omawa womomutima komurungu waMukuru. Omeritjiviro omavi womomutima ye tu ngundiparisa nu ye tu tjita kutja tu rihahize. Nungwari mena rotjisuta tjonguturiro Jehova u tu isira omauvi nu kunao u tu vatera okurikotamena ku ye nomeritjiviro omawa womomutima nandarire kutja kaweṱe ohomonena. (Ovaheberi 9:13, 14) Ihi tji tjita kutja tu hungire ku na Jehova noupupurukwe. Okutja ma rire oupupu okutumbuka ku ye mongumbiro. (Ovaheberi 4:14-16) Omeritjiviro omawa womomutima nga ye tu pa oupupurukwe, ye tjita kutja tu rimune ounanḓengu komurungu waMukuru, nu ye tu pa ondjoroka.

17. Ozondaya zeṋe nḓa yenenisiwa mena ronḓiro yaJesus?

 17 Omaundjiro womuinyo waaruhe moparadisa kombanda yehi. Ovaroma 6:23 mari tja: “Omasutiro wouvi owo onḓiro.” Ezeva otjingero mari weza kutja, “nungwari otjiyandjewa tjotjari tjaNdjambi otjo omuinyo waaruhe moruwano na Kristus Jesus oMuhona wetu.” MEkondwa 3 rembo ndi, eṱe twe rihonga ohunga nozondaya zOparadisa ndji mai ya kombanda yehi. (Omavandururiro 21:3, 4) Ozondaya azehe nḓo zoruyaveze, nomuinyo waaruhe nouveruke ohomonena, vya yenenisiwa mena rokutja Jesus wa ṱira eṱe. Kokutja tu yakure ozondaya nḓa, eṱe matu hepa okuraisa ondangi kotjiyandjewa tjotjisuta tjonguturiro.

OVE MO RAISA VI ONDANGI YOYE?

18. Omena ratjike tji matu sokuraisa ondangi ku Jehova kotjiyandjewa tjotjisuta tjonguturiro?

18 Omena ratjike tji matu sokutja okuhepa tjinene ku Jehova kotjisuta tjonguturiro? Matu tjiwa kutja otjiyandjewa tji rira otjihuze indu omutjiyandje tja ungurisa oruveze rwe, poo otjimariva poo tje tji yandja nongondjero. Eṱe tu nyaṋuka tjinene tji twa munu kutja ingwi ngwe tji yandja we tu suvera tjiri. Otjisuta tjonguturiro ootjiyandjewa otjihuzehuze moviyandjewa avihe vyaMukuru, orondu otjo tje mu ningira  ovingi tjinene. Johanes 3:16 mari tja: “Orondu Ndjambi wa suverere ouye tjinene nai nga tja yandja Omuna we omukwatwaerike.” Otjo ootjiraisiro otjinenenene tjorusuvero rwaJehova kweṱe. Nu wina tja raisa orusuvero rwaJesus kweṱe, orondu eye we riyandjera omuini okuṱira eṱe. (Johanes 15:13) Otjiyandjewa tjotjisuta tjonguturiro matji sokutuhonga kutja Jehova nOmuna we va suvera kangamwa auhe wetu.—Ovagalate 2:20.

Okurihonga ovingi ohunga na Jehova omuano umwe mbu matu raisa ondangi kotjiyandjewa tjotjisuta tjonguturiro

19, 20. Omomuano uṋe mu matu yenene okuraisa ondangi kotjiyandjewa tjaMukuru tjotjisuta tjonguturiro?

19 Ove mo raisa vi ondangi kotjiyandjewa tjaMukuru tjotjisuta tjonguturiro? Rutengatenga, rihonga ovingi ohunga nOmuyandje Omunene Jehova. (Johanes 17:3) Omakonḓononeno wOmbeibela nombatero yembo ndi mavi ku vatere okutjita nao. Otja ondjiviro yoye ohunga na Jehova tji mai kuru, orusuvero rwoye ku ye wina otji maru kuru. Norusuvero ndo maru tjiti kutja u tjite imbi mbi tjata ku ye.—1 Johanes 5:3.

20 Raisa ongamburiro mombunguhiro yaJesus yotjisuta tjonguturiro. Ohunga na Jesus, kwa za nai: “Auhe ngwa kambura mOmuna, u nomuinyo waaruhe.” (Johanes 3:36) Eṱe matu raisa vi ongamburiro mu Jesus? Ongamburiro otja indjo kayomotjinyo porwayo. Jakobus 2:26 mari tja: “Ongamburiro nokuhinoviungura wina otjinga aya koka.” Ii, ongamburiro yatjiri i raisiwa ‘moviungura,’ okutja omovitjitwa vyetu. Omuano umwe mu matu yenene okuraisa ongamburiro mu Jesus, omokukondja pu twa yandera okumuhorera, mu imbi mbi matu hungire na movitjitwa wina.—Johanes 13:15.

21, 22. (a) Omena ratjike tji twa sokukara pomazemburukiro wOmariro Omayapuke waMuhona wombura aihe? (b) Ovikeṋa mbi mavi kakahururwa mEkondwa 6 no 7?

21 Kara pomaworonganeno wombura aihe wokuzemburuka Omariro Omayapuke waMuhona. Ongurova yomayuva 14 ku Nisan 33 O.Z., Jesus wa zikamisa omazemburukiro wapeke, mOmbeibela nge isanewa “Omariro Omayapuke  waMuhona.” (1 Ovakorinte 11:20; Mateus 26:26-28) Owo wina ye isanewa Omazemburukiro wonḓiro yaKristus. Jesus wa zikamisa eyuva ndi okuvatera ovaapostele ve, nOvakriste vatjiri avehe wokombunda yawo okuvezemburukisa kutja monḓiro ye otjomundu ohomonena, eye wa yandja omuinyo we okuvekutura kouvi na konḓiro. Ohunga nomazemburukiro nga, Jesus wa yandja eraa ndi: “Ihi tjiteye kokuzemburuka Ami.” (Lukas 22:19) Omazemburukiro wOmariro Omayapuke ye tu zemburukisa orusuvero orunene Jehova na Jesus ndu ve tu raisira mokutupa otjisuta tjonguturiro. Indu tji twa kara pOmazemburukiro wonḓiro yaJesus wombura aihe, okutja matu raisa ondangi yetu kotjisuta tjonguturiro. *

22 Otjiyandjewa tjaJehova tjotjisuta tjonguturiro tjiri otjiyandjewa otjihuze tjinene. (2 Ovakorinte 9:14, 15) Otjiyandjewa hi wina matji yenene okueta ouwa ku imba mba ṱa. Ekondwa 6 no 7 maye ketukahururira kutja ihi matji yenenisiwa vi.

^ par. 21 Tji mo vanga okutjiwa ovingi ohunga nokutja Omariro Omayapuke waMuhona ye heya tjike, tara kOviweziwako porupa ndwi “Omariro Omayapuke waMuhona—Omazemburukiro nge yozika Mukuru.”