Twende kovidio oini

Twende komurya

 EKONDWA 3

Ondando yaMukuru kehi oyatjike?

Ondando yaMukuru kehi oyatjike?
  • Ondando yaMukuru kovandu ooiṋe?

  • Mukuru wa pirukirwa vi?

  • Ehupo kombanda yehi moruyaveze mari sana pi?

1. Ondando yaMukuru kehi oyatjike?

MUKURU u nondando ombwa tjinene nehi ndi. Jehova u vanga kutja ehi ri ure novandu ovaveruke novaṋingandu? Ombeibela mai tja “Ndjambi wa kuna otjikunino moEden” na “hapisa omiti ngamwa avihe ominanyuṋe mombunikiro, nu mbi novihape oviwa okuriwa.” Mukuru tja za nokumema omurumendu nomukazendu omutenga, Adam na Eva, we ve pa omaturiro omawa na tja ku wo: “Kwatasaneye, takavareye nu mu urise ehi, noro ngari kare kehi yeṋu.” (Genesis 1:28; 2:8, 9, 15) Okutja oyo ya ri ondando yaMukuru kutja ovandu ve kare novanatje nu ve parangise otjikunino ho nga tji tja kambura ouye auhe, nokuṱakamisa ovipuka.

2. (a) Eṱe matu tjiwa vi kutja ondando yaMukuru kehi mai yenenisiwa? (b) Ombeibela mai tja vi ohunga nomahupiro waaruhe wovandu?

2 Ove mo munu kutja mape ya ondando yaJehova Mukuru yokutja ovandu mave tura moparadisa kombanda yehi ai yenenisiwa? Mukuru ma tja: “Ami mba hungire, nu otjinga amape tjitwa.” (Jesaja 46:9-11; 55:11) Otjingaperi, ihi Mukuru tja kwizike ma yenenisa tjiri! Eye ma tja ehi “ke ri ungurire kutja ri kare ongaango, nungwari kutja ri rire poṋa povandu okutura mo.” (Jesaja 45:18) Ovandu veṋe Mukuru mbaa vanga kutja ve hupe kombanda yehi?  Neye aa vanga kutja ve hupe mu ro orure pupe ṱa pi? Ombeibela mai ziri nai: ‘Ovasemba mave rumata ehi, nu mave tura mu ro nga aruhe.’Epsalme 37:29; Omavandururiro 21:3, 4.

3. Ozongaro zeṋe ozombi nḓe ri kombanda yehi ndino, nu ihi matji eta omapuriro yeṋe?

3 Matu tjiwa kutja ihi ngunda katji ya tjitwa, orondu ovandu ndino ve vera nu ve koka. Owo wina ve rwa nokuzepasana. Pe nondataiziro yorive ndja kayenda po. Nu tjiri, indji kandja ri ondando yaMukuru kutja ehi ri kare otja tji tu ri muna nai! Pa kayenda ye? Ongwaye ondando yaMukuru tji i hi ya yenenisiwa? Kape nembo romakuruhungi nda tjangwa i ovandu ndi mape ya ari tu raere orondu oumba mbo wa utira meyuru.

OMBUTIRO YOMUNAVITA

4, 5. (a) Owaṋi ngwa hungira kuna Eva okupitira monyoka? (b) Pe ya vi omundu ngwa ri notjikaro otjiwa nomusemba ma rire erunga?

4 Embo etenga rOmbeibela ri tu raera ohunga nomupirukire waMukuru ngwe ya motjikunino tjaEden. Eye u raisiwa otja “onyoka,” nungwari eye ka ri otjipuka porwatjo. Embo esenina rOmbeibela ri mu tjiukisa otja ‘Omudiaboli poo oSatan, ngu pukisa ouye auhe.’ Neye wina u isanewa ‘onyoka onguru.’ (Genesis 3:1; Omavandururiro 12:9) Omuengeli omunamasa ngwi, poo otjiutwa tjombepo hi tja ungurisa onyoka okuhungira na Eva. Eye wa tjita kutja pe munike aayo onyoka ondja hungira naye. Omuengeli ngwi opa ri Mukuru tjaa rongerisire ovandu ehi.—Job 38:4, 7.

5 Nu nambano, indu oviutwa vyaJehova avihe tji vi ri ovihomonena, owaṋi ngwa ungura “Omudiaboli” ngo poo “Satan”? Ousupi uriri, umwe wovazandu vaMukuru vombepo ovanamasa we ritjita omuini Omudiaboli. Pe ya vi? Matu tjiwa kutja ndino omundu ngwa ri notjikaro otjiwa nomusemba mape ya arire erunga. Ihi tji tjitwa vi? Eye  mape ya a yandjere ozonḓuma ozombi ze hite momutima we. Indu eye tja kayenda komurungu okuripurira ko, mape ya ozonḓuma nḓo aze kurire ko. Nu tja munu oruveze, mape ya a tjiti otjiṋa otjivi hi tja ri ame ripurire ko.—Jakobus 1:13-15.

6. Pe ya vi omuzandu wombepo omunamasa waMukuru ma rire Satan Omudiaboli?

6 Ihi otji tja tjitwa ku Satan Omudiaboli. Eye aa puratene indu Mukuru tja raera ooAdam na Eva kutja ve panduke ovanatje nu ve urise ehi ndi norukwato rwawo. (Genesis 1:27, 28) Satan mape ya ee ripura nai: ‘Ovandu mba avehe andaku mave rikotamene kwami pendje yokurikotamena ku Mukuru!’ Okutja ouripura ouvi we ya momutima we. Kombunda eye wa pukisa Eva ne mu korere ovizeze ohunga na Mukuru. (Genesis 3:1-5) Kunao eye wa rira “Omudiaboli,” ndi heya “Omuyamburure,” nu wina a rire “Satan,” ndi mari hee “Omupirukire.”

7. (a) Ongwaye Adam na Eva tji va koka? (b) Omena ratjike ovanatje vaAdam avehe tji ve kurupa nokukoka?

7 Mokuungurisa ovizeze novineya, Satan Omudiaboli wa tjita kutja Adam na Eva ve pirukire Mukuru. (Genesis 2:17; 3:6) Otjovikongorereko, owo korusenina va koka otja Mukuru pa heya. (Genesis 3:17-19) Mena rokutja Adam ka ri ohomonena rukwao tja za nokukatuka, ovanatje ve avehe va rumata ouvi ku ye. (Ovaroma 5:12) Ihi matu tji sasaneke nombana mu mu terekerwa ozomboroto. Ombana ndji tji i nopoṋa pu ya kata, ozomboroto azehe nḓu maze zu mu yo maze sana pi? Omboroto aihe mai kata, poo mai kara notjipo. Momuano otjingewo, omundu auhe wa rumata “omakatero” okuza ku Adam, pu mape hee kutja twa rumata ouhahomonena. Mena ranao ovandu avehe opu ve zokukurupa nokukoka.—Ovaroma 3:23.

8, 9. (a) Satan wa toka Mukuru momuano uṋe? (b) Ongwaye Mukuru tje hi na wa zepa ovapirukire mbo tjimanga?

8 Indu Satan tja tjita kutja Adam na Eva ve katuke, eye  tjiri aa pirukire Mukuru. Eye wa wira omuano waJehova wokuhonapara. Pu mape hee kutja Satan aa tja: ‘Mukuru omuhonapare omuvi ngu korera ovandu ovizeze nokuverurupara oviṋa oviwa. Ovandu kave nokuhepa okuhonaparerwa po i Mukuru. Owo mave yenene okurityera oveni ouwa nouvi. Nu owo mave hupu nawa tji ve ri kehi youhonapare wandje.’ Omatokero nomakumininino omayamburure  nga Mukuru etje ye zengurura vi? Tjiva ve muna kutja andaku Mukuru wa zepa ovapirukire mbo. Nu ihi atja tji zengurura omatokero waSatan po? Atja tji raisa kutja omuano waMukuru wokuhonapara ombu ri omusemba?

9 Mena rousemba we ouhomonena, Jehova kena pa zepa ovapirukire mbo tjimanga. Eye wa tya kutja mape hepa oruveze ndwa yenene okuzengurura omatokero waSatan momuano omuwa nokuraisa kutja Omudiaboli omunavizeze. Okutja Mukuru wa tya kutja ma yandjere ovandu ve rihonaparere oveni oruveze handumba kehi youvara waSatan. Eṱe matu kerihonga mEkondwa 11 rembo ndi kutja ongwaye Jehova tje ha zepere ovemupirukire mba nokutja ongwaye tja yandjera oruveze ndu ṱa mbo amaa zengurura ombata ndji. Nu nai ma rire nawa okuripurira kotjiṋa hi: OoAdam na Eva va sora tji va kambura mu Satan ngu hi na indu we ve tjitira otjiṋa ngamwa otjiwa? Owo va sora tji va kambura kutja Jehova ngwe ve pa oviṋa avihe mbi va ri navyo, we ve korera ovizeze ovivi nao? Ove otjo tjita vi?

10. Ove mo yenene vi okurikuta kuna Jehova nokuraisa kutja Satan omunavizeze?

10 Ma rire nawa okuripurira komapuriro nga, orondu auhe wetu ndino u ya komurungu wombata otjingeyo. Ii, ove u nouyara wokurikuta kuna Jehova nokuzira omatokero waSatan nga. Ove mo yenene okuyakura Jehova otjOmunane woye nomuvatere okuraisa kutja Satan omunavizeze. (Epsalme 73:28; Omiano 27:11) Ouhumandu, movandu avehe mbe ri mouye, itjiva uriri mbe yandja oruvara ku Mukuru. Ihi matji eta epuriro enanḓengu ndi: Ombeibela tjiri i honga kutja Satan omuhonapare wouye mbwi?

OWAṊI NGU HONAPARERA PO OUYE MBWI?

Andaku omauhona aehe wouye kaya ri oyaSatan, eye atja yandja ku Jesus?

11, 12. (a) Omuano Jesus mbwa rorwa nawo wa vandurura vi kutja Satan ongu ri omuhonapare wouye mbwi? (b) Otjikwaye tjarwe tji tji raisa kutja Satan omuhonapare wouye mbwi?

11 Jesus ke na pa keyakeya kutja Satan ongu ri  omuhonapare wouye mbwi. Momuano umwe omuhimise, Satan otjikando tjimwe wa raisira Jesus “omauhona aehe wouye nounene wawo auhe.” Okuzambo Satan a tja ku Jesus: “Oviṋa avihe mbi ami me Ku pe, tji wa wora ozongoro no rikotamene ku ami.” (Mateus 4:8, 9; Lukas 4:5, 6) Ripurira kotjiṋa hi. Atja rira omarorero ku Jesus andaku Satan kangwa ri omuhonapare womauhona ngo? Jesus kena pa pataṋa kutja ozohoromende azehe zouye ozaSatan. Eye tjiri atja pataṋa andaku omauhonapare nga kaya ri momasa waSatan.

12 Ouatjiri kutja Jehova ongu ri Mukuru Omunamasaaehe, nongu ri Omuute woviṋa avihe ovihimise. (Omavandururiro 4:11) Nungwari Ombeibela kai roro kutja Jehova Mukuru poo Jesus Kristus ovahonapare vouye mbwi. Mongurova osenina Jesus ndja ri kombanda yehi, eye wa raisa oukahu kutja Satan “omuhonapare wouye mbwi.” (Johanes 12:31; 14:30; 16:11) Ombeibela wina i hungira ohunga na Satan Omudiaboli otja “omukuru omurunde wouye mbwi.” (2 Ovakorinte 4:3, 4) Ohunga nomupirukire ngwi poo Satan, omuapostele Omukriste Johanes wa tja: “Ouye auhe u ri kehi youhonapare waingwi umwe Omunaurunde.”—1 Johanes 5:19.

OUYE WASATAN MAU KAISAPEWA VI?

13. Omena ratjike tji matu hepa ouye oupe?

13 Ombura aihe, ouye u yenda amau ririre ko ouvi. Owo we ura novita novanane vopolotika ovanavizeze, novahonge ovanatjavivi na wina ovazepe mbe hi nombinḓu komitima. Ouye auhe wa zunḓaka. Ombeibela mai raisa kutja oruveze rwa tumbuka indu Mukuru tji mee kuyandeka ouye ourunde mbwi meyuva rovita vye vyaArmagedon. Ouye mbwi mau yekupingenwa i ouye oupe mu mamu kara ousemba.—Omavandururiro 16:14-16.

14. Mukuru wa toorora aṋi okurira Ombara yOuhona We, nu ihi tja hunganekwa vi?

 14 Jehova Mukuru wa toorora Jesus Kristus kutja ma rire Ombara yOuhona, poo ohoromende ye, yomeyuru. Ombeibela rukuru ya kwizika nai: “Eṱe twa kwaterwa omuatje, twa pewa omuna. Neye ma rire omuhongore wetu. Eye ma rukwa: . . . Ombara-yOhange. Ouvara wouhona we mau ryamene ko komeho, ouhona we mau karerere mohange.” (Jesaja 9:6, 7) Ohunga nohoromende ndji, Jesus wa honga ovemukongorere okukumba nai: “Ouhona woye ngau ye; ombango yoye ngai tjitwe na kombanda yehi otja meyuru.” (Mateus 6:10) Otja tji matu kamuna kombunda membo ndi, moruyaveze ropopezu Ouhona waMukuru mau nyono nau pingene ozohoromende azehe zouye mbwi. (Daniel 2:44) Okuzambo Ouhona waMukuru mau kaeta oparadisa kombanda yehi.

OUYE OUPE U RI POPEZU!

15. ‘Ehi epe’ otjikeṋa?

15 Ombeibela mai tja: “Eṱe matu undju imbi Ndjambi mbya kwizika: Eyuru epe nehi epe mu mamu tura ousemba.” (2 Petrus 3:13; Jesaja 65:17) Potuingi Ombeibela tji mai tja ‘ehi’ oyo i hungira ohunga novandu kombanda yehi. (Deuteronomium 32:1) Okutja ‘ehi epe,’ mu mamu tura ousemba mari hee omaturiro wovandu mba yakurwa i Mukuru.

16. Otjiyandjewa tjotjari tjaMukuru ku imba eye mba ingoneka ootjiṋe, nu matu sokutjita tjike kutja tu tji mune?

16 Jesus wa kwizika kutja mouye oupe mbu mau ya, imba mba ingonekwa i Mukuru mave munu otjiyandjewa ‘tjomuinyo waaruhe.’ (Markus 10:30) Arikana paturura Ombeibela yoye ku Johanes 3:16 nekondwa 17:3, nu u lese kutja Jesus wa tja ngatu tjite vi kokutja tu mune omuinyo waaruhe. Nambano tara kozondaya Ombeibela nḓu mai kwizikire imba mba pwire okuyakura otjiyandjewa otjiwa  ho okuza ku Mukuru mOparadisa ndji mai keya kombanda yehi.

17, 18. Eṱe matu yenene vi okukara nongamburiro kutja maku kakara ohange nondjeverero kombanda yehi arihe?

17 Ourunde, ovita, nozondjito zoutwe nozotjitandi mavi yanda. “Omurunde tjandje ke tji po . . . Ovanandjenda mave rumata ehi.” (Epsalme 37:10, 11) Maku kara ohange orondu ‘Mukuru ma yandisa ovita mouye auhe.’ (Epsalme 46:9; Jesaja 2:4) Okuzambo ‘ousemba mau nyomoka . . . nohange mai takavara omueze ngunda amau yere’ nu ihi matji heye kutja nga aruhe!—Epsalme 72:7.

18 Ovakarere vaJehova mave kara mondjeverero. Indu Ovaisrael oruveze rwOmbeibela tji va ri nonḓuviro ku Mukuru owo va ri nokuhinatjipo. (Levitikus 25:18, 19) Tjiri ma rire otjiṋa otjiwa okuhupa mondjeverero otjingeyo mOparadisa!—Jesaja 32:18; Mika 4:4.

19. Eṱe matu tjiwa vi kutja ovikurya mavi katakavara mouye oupe waMukuru?

19 Kaku nakukara ondjara. Meumburiro re Salomo wa tja: “Ngamu kare ovikokotwa ovingi mehi nga kozondomba zozondundu; ovyo ngavi takavare.” (Epsalme 72:16) Jehova Mukuru ma sere ovasemba ondaya nu ‘ehi mari eta ovihape vyaro.’—Epsalme 67:6.

20. Eṱe matu kara vi nongamburiro kutja ehi arihe mari rire oparadisa?

20 Ehi arihe mari rire oparadisa. Ovandu mave tungu ozondjuwo ozombwa nu ehi nda nyonenwe i ovandu ovarunde mamu kunwa ovikunino oviwa. (Jesaja 65:21-24; Omavandururiro 11:18) Otja oruveze tji maru kayenda, otupa twehi tu twa ṱunwa rukuru matu parangisiwa ngandu ehi arihe tji ra nyomoka nawa nari sana kotjikunino tjaEden. Nu kape notjiṋa tji matji tjaere Mukuru ‘okupaturura eke re nokukutisa atjihe tji tji nomuinyo.’—Epsalme 145:16.

21. Otjikwaye tji matji raisa kutja maku kakara ohange pokati kovandu novipuka?

21 Maku kara ohange pokati kovandu novipuka. Ovipuka vyokuti novyomonganda mavi ri pamwe. Nandarire  okanatje okaṱiṱi kake nakutira ovipuka mbi rumata.—Jesaja 11:6-9; 65:25.

22. Omitjise mavi katjitwa vi?

22 Omitjise kavi nakukara ko rukwao. Jesus, ngu ri Ombara yOuhona waMukuru womeyuru, ma verura ovandu pondondo yokombanda tjinene okukapita indu tja ri kombanda yehi. (Mateus 9:35; Markus 1:40-42; Johanes 5:5-9) Okuzambo “kape nomundu ngwa tura mehi retu, ngu ma unauna rukwao kutja eye wa vera.”—Jesaja 33:24; 35:5, 6.

23. Ongwaye ombendukiro tji mai ketupa ondjoroka?

23 Ovaṱi ovasuverwa mave kotorwa komuinyo nu mave kara nomaundjiro wokuhi nakukoka rukwao. Mukuru ma pendura ovaṱi avehe mbe ri mourizemburuka we. Tjiri, “ovandu avehe ovawa novavi mave penduka movakoke.”—Oviungura 24:15; Johanes 5:28, 29.

24. Ove mo munu ko vi okukahupa mOparadisa kombanda yehi?

24 Tjiri, imba mba toorora okurihonga ohunga nOmuute wetu Omunenenene, Jehova Mukuru, nokumukarera, ve noruyaveze oruhimangongo! Indu Jesus tja raera omurumendu omurunde ngwa ṱa puna ye kutja “mo kakara puna Ami moparadisa,” eye aa hungire ohunga nOparadisa ndji mai keya kombanda yehi. (Lukas 23:43) Ma rire ohepero kweṱe okurihonga ovingi ohunga na Jesus Kristus, orondu mu ye omu mamu kayenenisirwa ozondaya nḓa.