Twende kovidio oini

Twende komurya

Ovahongonone vaJehova

Toorora eraka Otjiherero

 OVIWEZIWAKO

Omaungurisiro nomaheero wena raMukuru

Omaungurisiro nomaheero wena raMukuru

EPSALME 83:18 (mozOmbeibela tjiva ezeva 19), ra torokwa vi mOmbeibela yoye? MOmbeibela yOtjiherero indji Etestamente Epe nOmapsalme, ezeva 19 mari tja nai: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.” OzOmbeibela tjiva za toroka momuano tjingewo. Nungwari, ozengi kaze ungurisa ena ndi Jehova. MOmbeibela yOtjiherero yombura ndji 1987, ena ndi ve ri pingena nomaisaneno wondjozikiro tjimuna “Muhona.” Mezeva ndo mamu sokuya tjike? Omaisaneno wondjozikiro poo ena ndi Jehova?

Ena raMukuru mOtjiheberi

Ezeva ndi mari hungire ohunga nena. MOmatjangwa omatenga wOtjiheberi, ozOmbeibela ozengi ku za tjangururirwa, mezeva ndo mu nena rapeke. Oro ri tjangwa nai יהוה (YHWH) mOtjiheberi. MOtjiherero ena ndi ungurisiwa orondi “Jehova.” Ena ndi ri munika mezeva rimwe uriri rOmbeibela po? Kako. Oro ri munika ovikando ape 7 000 mOmatjangwa omatenga wOtjiheberi!

Ena raMukuru enanḓengu pu pe ṱa pi? Tara kongumbiro yotjihorera ndji twa pewa i Jesus Kristus. Oyo i uta nai: “Tate yetu ngu u ri momayuru: Ena roye ngari yapurwe.” (Mateus 6:9) Kombunda, Jesus wa kumba ku Mukuru na tja: “Tate, yandja ondjozikiro kena roye!” Mukuru we mu zira okuza keyuru a tja: “Ami mba yandja ondjozikiro kena randje, nu me ri pe ondjozikiro rukwao.” (Johanes 12:28) Okutja ena raMukuru tjiri enanḓengu tjinene. Nu hapo ongwaye ovatoroke tjiva tji va isamo ena ndi mozOmbeibela zawo nave ri pingenisa nomaisaneno wondjozikiro?

Pe munika aayo pe nomapu omanene yevari ngu va isamena ena ndo mOmbeibela. Rutenga, ovengi ve tja ena ndo kari sokuungurisiwa mena rokutja omaisaneno omatenga wena ndi kaye tjiukwa. Eraka rOtjiheberi ekuru kaari tjangwa nomapose (a e i o u). Nu mena ranao kape nomundu ndino ngu ma yenene okuhungira oukahu kutja ovandu voruveze rwOmbeibela ena ndi YHWH aave ri lese vi. Posi yokutja, ihi matji sokututjaera okuungurisa ena raMukuru po? Moruveze orukuru rwOmbeibela, ena ndi Jesus mape ya  aari isanewa Jesua poo ngahino Jehosua, kape nomundu ngwaa tjiwa tjiri. Posi yokutja, ovandu mouye auhe ndino ve ungurisa ena ndi Jesus, momihingo pekepeke, nu ve ri ungurisa momiano mbi tjiukwa momaraka wawo. Owo kave keyakeya okuungurisa ena ndi nandarire kutja kave nokutjiwa kutja meserewondo etenga aari isanewa vi. Ove tji wa i kehi rarwe, mape ya o kamuna kutja ena roye ri posa omuano warwe meraka rehi ndo. Okutja okuhinakutjiwa kutja ena raMukuru rukuru aari isanewa vi, kepu esemba rokuhinokuriungurisa.

Epu oritjavari potuingi ndi yandjwa kutja ena raMukuru ra isamenwa tjike mOmbeibela, oro ri notjiṋa nombazu onguru yOvajuda. Ovajuda ovengi aave kambura kutja ena raMukuru kari sokutamunwa. Ongamburiro ndji ya zikamena komazuviro woposyo wezeva rOmbeibela ndi tja: “Ko nokutambaneka ko ena raMuhona, Ndjambi woye; orondu Muhona tje hi nakumuesa nokuhaverwa ingwi ngu ma tambaneke ena re.”—Eksodus 20:7.

Etwako ndi, ri tjaera omaungurisiro omavi wena raMukuru, nungwari kari tjaere okuungurisa ena re momuano omuwa. Ovatjange vOmbeibela yOtjiheberi (indji “Etestamente Ekuru”) avehe va ri ovarumendu ovaṱakame mbaave hupu otja kOveta yaMukuru ndja yandjerwe kOvaisrael voruveze orukuru. Posi yokutja owo aruhe aave ungurisa ena raMukuru. Okuyandja otjihorera, ena ndo va twa momapsalme omengi ngaaye imburwa i ovimbumba vyovakarere vaJehova. Jehova Mukuru nandarire wa yandjera ovakarere ve okuisana ena re, nu imba ovaṱakame va tjita nao. (Joel 2:32; Oviungura 2:21) Mena ranao, Ovakriste ndino kave keyakeya okuungurisa ena raMukuru momuano wondengero, tjimuna Jesus tjaa tjiti.—Johanes 17:26.

Ovatoroke vOmbeibela va tjita ondataiziro onene tjinene, indu tji va isamo ena raMukuru nave ri pingenisa nomaisaneno wondjozikiro. Owo ve munikisa Mukuru aayo u ri kokure novandu nu ke novikaṋena vyoundu, ngunda Ombeibela amai tja “Muhona u wana na imba mbe nonḓuviro ku Ye.” (Epsalme 25:14) Ripura ohunga nepanga roye roposengo. Ove otjo rira epanga ropopezu na ye andaku ko tjiwa ena re? Momuano tjingewo, ovandu mave yenene vi okutumbuka popezu na Mukuru, owo tji ve hi nakuhongwa kutja ena re oJehova? Nu ovandu tji ve hi nakuungurisa ena raMukuru, owo wina kamaave tjiwa kutja ena ndo ri heya tjike. Ena raMukuru ri heya tjike?

 Mukuru omuini wa kahururira omukarere we omuṱakame Moses kutja ena re ri heya tjike. Indu Moses tja pura ohunga nena raMukuru, Jehova we mu zira nai: “Ami owAmi ngwi ngu mbi ri Ami.” (Eksodus 3:14) Otja kOmbeibela ndja torokwa i Rotherham, omambo ngo ye tja nai: “Ami me rire ngamwa atjihe tji me vanga.” Okutja Jehova ma yenene okurira ngamwa atjihe tji matji heperwa po okuyenenisa ombango ye.

Ngatu tje ove u yenena okurira otjiṋa ngamwa atjihe tji mo vanga. Ovikeṋa ove mbyo tjo tjitira omapanga woye? Indu umwe wawo tja vere tjinene, ove mo yenene okurira onganga kutja u yenene okumupanga ma veruke. Indu epanga roye rarwe tji ri nouzeu wotjimariva, ove mo yenene okurira omundu omutumbe kutja u mu vatere. Nungwari kape nomundu ngu ma yenene okurira ngamwa otjiṋa atjihe tji ma vanga. Otja tji mo kayenda komurungu okurihonga Ombeibela, mo kahimwa indu tji mo munu omuano Jehova mbwe yenena okurira ngamwa atjihe tji matji heperwa po kutja ma yenenise omakwizikiro we. Nu tji mu pa onyuṋe okuungurisa omasa we mena raimba mbe mu suvera. (2 Ekuruhungi 16:9) Imba mbe ha tjiwa ena raJehova kave tjiwa ovitjiukwa oviwa vyoundu vye.

Okutja tjiri, ena ndi Jehova mari sokuungurisiwa mOmbeibela. Indu eṱe tji twa tjiwa kutja ena ndi ri heya tjike natu ri ungurisa noupaturuke momerikotameno wetu, matji tu vatere okutumbuka popezu na Tate wetu womeyuru, Jehova. *

^ par. 3 Tji mo vanga ondjiviro yokomurungu ohunga nena raMukuru, nomaheero waro, nokutja ongwaye tji mari sokuungurisiwa momerikotameno, tara membo ndi The Divine Name That Will Endure Forever, nda pitisiwa i Ovahongonone vaJehovah.