1-3. Omunavita uṋe ngu tu kondjisa atuhe, nu ongwaye tji ma rire otjihuhumiṋe tji twa tara ku imbi Ombeibela mbi i honga?

NGATU tje ove mo ramberwa i omunavita otjindandi. Nu ngatu tje eye u nomasa nu u notjikara pove. Ove mo tjiwa kutja eye ke natjari orondu wa zepa tjiva vomapanga woye. Nandi wa kondjisa okumusiyapo, eye u ri pokukuvaza. Mape ya o rihahiza. Nu tjimanga tji pe ya omuyame ngu nomasa okukapita omunavita ngo, ne ku kwizikire kutja me ku vatere, katji nakuwisa omutima woye pehi?

² Momuano otjingewo ove u nomunavita ngu ku kondjisa. U tu kondjisa atuhe. Otja tji twe rihonga mekondwa nda kapita, Ombeibela i tja onḓiro omunavita. Kapena umwe wetu ngu ma yenene okuiyepa. Omunavita ngwi twe mu muna ama zepa ovasuverwa vetu. Nungwari Jehova u nomasa tjinene okukapita onḓiro. Eye Omuyame omunarusuvero nu ngwa raisa rukuru kutja ma yenene okuitaara. Neye wa kwizika kutja ma yandeke omunavita ngwi, onḓiro, nga ko ngaaruhe. Ombeibela i honga kutja: “Nomunavita omusenina ngu sokuyandekwa, oyo ndji onḓiro.” (1 Ovakorinte 15:26) Indji tjiri ombuze ombwa!

³ Rutenga indjo tu tare kutja onḓiro yomusuverwa wetu i  tu ṱuna vi. Ihi matji tu vatere okuzuva otjiṋa tjimwe tji matji ketunyandisa omutima. Jehova wa kwizika kutja ovaṱi mave kara nomuinyo rukwao. (Jesaja 26:19) Okutja mave pendurwa. Ingo omaundjiro wombendukiro yovakoke.

4. (a) Ongwaye omuano Jesus mbwa ṱunwa i onḓiro yepanga re, tji matji tu hongo ovingi ohunga nomuano onḓiro mbwi i ṱuna ku Jehova? (b) Oowaṋi mba ri omapanga waJesus woposengo?

⁴ Ove wa rora okuzepaisa omusuverwa woye? Mape ya arire ouzeu tjinene okutjinda omuhihamo noruhoze ndo. Moruveze otja indo tu sokuriyameka kEmbo raMukuru kutja ri tu huhumiṋe. (2 Ovakorinte 1:3, 4) Ombeibela i tu vatera kutja tu zuve nawa kutja Jehova na Jesus ve noumune uṋe ohunga nonḓiro. Jesus, ngwa sisiwa i Ihe okuura, aa tjiwa kutja okuzepaisa omundu woye otjiṋa otjihihamise. (Johanes 14:9) Indu Jesus tjaa i ko Jerusalem, eye aa ryangere Lasarus novaṱena kwe, Maria na Marta, mba turire motjihuro tjopopezu, Betanie. Owo va rira omapanga woposengo. Ombeibela mai tja: “Jesus wa suverere Marta, nerumbi re na Lasarus.” (Johanes 11:5) Otja tji twe rihonga mekondwa nda kapita, Lasarus wa ṱire.

5, 6. (a) Oruhoze rwovazamumwe nomapanga waLasarus rwa ṱuna vi ku Jesus? (b) Ongwaye oruhoze rwaJesus tji maru tu tunduza?

⁵ Onḓiro yaLasarus ya ṱuna vi ku Jesus? Ombeibela mai tu raere kutja Jesus we ya kovazamumwe vaLasarus na komapanga we mba ri noruhoze. Indu tje ve muna, eye “wa kurungisiwa tjinene mombepo.” Okuzambo Ombeibela mai tja, “Jesus wa rira.” (Johanes 11:33, 35) Oruhoze rwaJesus rwa raisa kutja ke nomaundjiro po? Kako. Eye aa tjiwa kutja mape tjitwa otjiṋa otjihimise. (Johanes 11:3, 4) Posi yokutja onḓiro ndjo ye mu ṱuna.

⁶ Momuano umwe, oruhoze rwaJesus maru tu tunduza. Orondu otjo tji tu honga kutja Jesus na Ihe, Jehova, va tonda onḓiro. Nungwari Jehova Mukuru ma yenene okuyandeka  omunavita ngo! Indjo tu tare kutja Jesus wa tjita tjike momasa waMukuru.

7, 8. Ongwaye ovandu tjaave munu kutja Lasarus kamaa penduka, nungwari Jesus wa tjita tjike?

⁷ Lasarus wa ri a pakwa mondimba, nu Jesus wa ningira kutja ewe nda ri potjinyo tjondimba ri isapewe. Marta ka ri nohange notjiṋa hi, orondu kombunda yomayuva yane, orutu rwaLasarus rwa uta okurira oruvi. (Johanes 11:39) Otja koumune wovandu, kapa ri omaundjiro kaaṋi komuṱi ngwi.

⁸ Tji va za nokukunguzura ewe, Jesus wa ravaera neraka enene a tja: “Lasarus, penduka u pite!” Pa tjitwa tjike? “Omuṱi arire tja piti.” (Johanes 11:43, 44) Ripurira uriri kondjoroka ovandu mba ndji va ri nayo! Avehe, kutja ovangu, ovazamumwe, omapanga poo ovararanganda vaLasarus, aave tjiwa kutja eye wa ṱire. Nungwari, omusuverwa wawo ngwi ngwa ṱire wa kuramene mbo mokati kawo. Ihi mape ya tja ri otjizeu okukambura. Ovengi mape ya va pukata Lasarus nenyando. Tjiri onḓiro ya natwa!

9, 10. (a) Jesus omasa wokupendura Lasarus wa isa pi, nu ihi wa raisa vi? (b) Ouwa waye mbu matu munu indu tji twa lese omahungi wOmbeibela wombendukiro?

⁹ Jesus kena pa tja otjihimise hi we tji tjita momasa we omuini. Mongumbiro ye komurungu wokuisana Lasarus, eye wa raisa oukahu kutja Jehova ongwa pendura Lasarus. (Johanes 11:41, 42) Ihi ka ri otjikando atjiyerike Jehova tja ungurisa omasa we momuano mbo. Ombendukiro yaLasarus iimwe yozombendukiro muvyu nḓe ri mEmbo raMukuru. * Tji twa lese natu konḓonona omahungi nga, owo maye tu pe enyando. Owo ye tu honga kutja Mukuru  ke nambangu, orondu ovandu mba pendura va ri ovanene novaṱiṱi, ovarumendu novakazendu, Ovaisrael novandu voviwaṋa vyarwe. Nu tjiri momahungi nga mu raisiwa ondjoroka! Okutara kotjihorera, indu Jesus tja pendura omukazona waJairus, ovanene ve ‘va himinwe tjinene,’ okutja va ri nondjoroka tjinene. (Markus 5:42) Jehova tjiri we ve etera ondjoroka.

¹⁰ Otjingaperi kutja imba mba pendurwa i Jesus va ṱa rukwao. Ihi matji hee kutja ya ri omungandjo okuvependura po? Kako. Omahungi wOmbeibela nga ye ṋunisa ouatjiri ounanḓengu nu ye yandja omaundjiro.

11. Ehungi rombendukiro yaLasarus mari ṋunisa vi omambo wOmuzuvarise 9:5?

¹¹ Ombeibela i honga kutja “ovakoke kave tjiwa otjiṋa.” Ombendukiro yaLasarus mai ṋunisa ouatjiri mbwi. Indu Lasarus tja pendurwa, u na pa serekarera ohunga noviṋa meyuru? Poo wa rora okutirisa ovandu ohunga nomapiro motjovasengwa? Kako. MOmbeibela kamu nomahungi otja ingo okuza ku Lasarus. Momayuva yane ngo indu tja ṱire, eye ‘kaa tjiwa otjiṋa.’ (Omuzuvarise 9:5) Lasarus wa rarere uriri meyendo.—Johanes 11:11.

12. Ongwaye tji matu yenene okukara nongamburiro kutja ombendukiro yaLasarus tjiri ya tjitwa?

¹² Ehungi raLasarus wina mari tu hongo kutja ombendukiro otjiṋa tjakatjiri. Indu Jesus tja pendura Lasarus pa ri ovandu ovengi mba muna. Nandarire ovanane vozongamburiro, mba tondere Jesus kave na pu va pataṋa otjihimise hi. Owo va tja: “Ngatu tjite vi? Omundu ngwi [Jesus] ma tjiti ovihimise ovingi.” (Johanes 11:47) Ovandu ovengi va katara Lasarus ngwa pendurwa. Kunao, otjingi tjawo va kambura mu Jesus. Ombendukiro yaLasarus ya ri otjiraisiro otjikahu kutja Jesus wa hindwa i Mukuru. Otjiraisiro hi tja ri otjikahu ngandu ndi ovanane tjiva vozongamburiro Ovajuda tji ve ripura okuzepa Jesus na Lasarus.—Johanes 11:53; 12:9-11.

13. Ongwaye tji tu nongamburiro kutja Jehova tjiri ma yenene okupendura ovaṱi?

 ¹³ Omambo tjiri maku kakara ombendukiro? Ii, orondu Jesus wa honga kutja eyuva rimwe “ovaṱi avehe” mbe ri mourizemburuka waMukuru mave kapendurwa. (Johanes 5:28) Jehova Omuute waavihe mbi nomuinyo. Ma sokurira ouzeu okukambura kutja eye ma yenene okukotora omiinyo vyovandu rukwao? Ihi matji rekareka kourizemburuka waJehova. Eye mape ya a zemburuka ovasuverwa vetu mba ṱa? Ku nomahavarwa wozonyose, nungwari Mukuru u isana aihe kena rayo! (Jesaja 40:26) Okutja Jehova Mukuru ma yenene okuzemburuka ovaṱi vetu ovasuverwa momiano avihe nu ma yenene okuvekotora komuinyo.

14, 15. Otja Job tja raisa, Jehova u noumune uṋe ohunga nokukotora ovaṱi komuinyo?

¹⁴ Nu hapo Jehova u ripurira kokupendura ovaṱi? Ombeibela mai tja eye u ihamenwa okukotora ovaṱi komuinyo. Omurumendu omuṱakame Job wa purire a tja: “Omundu tja koka, u rira omunamuinyo rukwao are?” Job aa hungire ohunga nokuundjira meyendo ngandu oruveze tji rwa yenene ku Mukuru okumuzemburuka. Eye wa raera Jehova a tja: ‘Ove mo isana, nu ami me itavere. Nove mo ihamenwa i ami ngu mbi ri omuutwa woye.’—Job 14:13-15, sasaneka no-NW.

¹⁵ Ripura uriri! Jehova tjiri u ihamenwa okukotora ovandu komuinyo. Katjinyandise tjomutima okutjiwa kutja Jehova u noumune mbo? Nambano ngatu tare kombendukiro yoruyaveze. Ovandu veṋe mbu mave kapendurwa nu mave pendurirwa pi?

16. Ovaṱi mave pendurwa kutja ve hupe mongaro iṋe?

¹⁶ Ozombendukiro nḓe tamunwa mOmbeibela ze tu honga ovingi ohunga nombendukiro ndji mai ya. Ovandu mba pendurirwe kombanda yehi va wanisirwe novasuverwa vawo rukwao. Ombendukiro ndji mai ya mai kasana ngo  nungwari ma rire mondondo yokombanda. Otja tji twe rihonga mEkondwa 3, ondando yaMukuru oyokutja ouye auhe u rire oparadisa. Okutja ovaṱi kave nokupendurwa kutja ve hupe mouye mbwe ura novita, novitjitwa vyotjitandi, nomitjise. Owo mave hupu kombanda yehi nga aruhe mozongaro ozombwa nu ozonyaṋukise.

17. Ovangendu, novandu mbe ṱa pi mbu mave kapendurwa?

¹⁷ Ovangendu mbu mave kapendurwa? Jesus wa tja ‘ovaṱi avehe [mbe ri mourizemburuka waMukuru] mave zuu eraka re [raJesus] nave piti momayendo wawo.’ (Johanes 5:28, 29) Momuano otjingewo, Omavandururiro 20:13 mari tja: “Okuvare aku kotora imba mba ṱira mu kwo. Nonḓiro notjovakoke wina vya kotorere ovaṱi vavyo.” “Otjovakoke” matji hee omayendo wovandu avehe. (Tara kOviweziwako porupa ndwi “Otjovakoke otjikeṋa?”) Momayendo nga mamu sewa tjo. Avehe mba suva mo mave kara nomuinyo rukwao. Omuapostele Paulus wa tjere: “Ovandu avehe ovawa novavi mave penduka movakoke.” (Oviungura 24:15) Ihi matji hee tjike?

18. Ovandu “ovawa” mbu mave kapendurwa ooveṋe, nu ihi matji ṱunu vi kove otjomundu?

¹⁸ Ovandu “ovawa” owomba mbe tamunwa mOmbeibela mba ri ko ngunda Jesus ee hiye ya kombanda yehi. Okutja ovandu tjimuna Noa, Abraham, Sara, Moses, Rut, Ester na varwe ovengi. Ovarumendu novakazendu tjiva mba mba ri nongamburiro ve tamunwa mOvaheberi, ekondwa 11. Nungwari ovandu “ovawa,” wina mave kamburire mo ovakarere vaJehova mbe ṱa moruveze rwetu. Mena romaundjiro wombendukiro, eṱe kamaatu tira onḓiro rukwao.—Ovaheberi 2:15.

19. ‘Ovavi’ poo ovahasemba ovandu veṋe, nu Jehova me ve pe oruveze rwokutjita tjike?

¹⁹ Ovandu avehe mbe ha ri nondira ku Jehova mena rokutja kaave mu tjiwa nawa nu nai mba ṱa, mave tjitwa vi? ‘Ovavi’ poo ovahasemba avehe mba kave nakuzembwa. Owo wina mave kapendurwa nave pewa oruveze rwokurihonga  ohunga naMukuru uatjiri nokumukarera. Moruveze rwozombura eyovi, ovaṱi mave pendurwa nave pewa oruveze rwokukarera Jehova kombanda yehi pamwe novandu mba ovasemba. Tjiri ma rire oruveze oruwa. MOmbeibela oruveze ndwi ru isanewa, Eyuva rOmbanguriro. *

20. Gehenna orungeveze, nu ovandu veṋe mbe yenda ngo?

²⁰ Mape hee kutja ovandu avehe mba ri kombanda yehi mave pendurwa po? Kako. Ombeibela i tja ovaṱi tjiva ve ri mu “Gehenna,” poo ‘otjovasengwa’ otja kOmbeibela yOtjiherero. (Lukas 12:5) Ena ndi Gehenna ra za koruveze ndwa ri pendje yaJerusalem otjikuru pu ape yumbwa ondova. Poruveze ndo aa pe nyosirwa oturova twovandu noviyaya. Ovajuda aave vara ovaṱi mba yumbwa mo kutja kave ya pwira ombendukiro. Okutja Gehenna, poo otjovasengwa, tji sasaneka omanyoneno poo omayandekero waaruhe. Nandarire kutja Jesus ongwa pewa otjiungura tjokupangura ovanamuinyo novaṱi, Jehova ongu ri Omupangure omusenina. (Oviungura 10:42) Eye kamaa pendura imba mba pangura kutja ovarunde, nu mbe hi nonḓero yokurunduruka.

21, 22. (a) Ombendukiro iṋe yarwe ndji i ri ko? (b) Owaṋi ngwa ri omutenga okumuna ombendukiro otjomundu wombepo?

²¹ Ombeibela wina i hungira ohunga nombendukiro yarwe yokukahupa otjotjiutwa tjombepo meyuru. MOmbeibela mu notjihorera tjimwe tjombendukiro otja indjo, ihi otja Jesus Kristus.

²² Jesus tja za nokuzepewa otjomundu, Jehova kena pa yandjera Omuna We omuṱakame ma karerere meyendo. (Epsalme 16:10; Oviungura 13:34, 35) Eye wa pendura Jesus, nungwari ke mu pendurire otjomundu wonyama.  Omuapostele Petrus wa kahurura kutja Kristus wa “ṱa otja omundu na rire omunamuinyo mOmbepo.” (1 Petrus 3:18) Ihi tjiri tja ri otjihimise otjinene. Jesus wa rira omunamuinyo rukwao otjomundu wombepo omunamasa! (1 Ovakorinte 15:3-6) Jesus ongwa ri omundu omutenga okumuna ombendukiro ndji. (Johanes 3:13) Nungwari eye ka ri omusenina.

23, 24. Oowaṋi mbe ri ‘okarupanda okaṱiṱi,’ nu ovandu vengapi?

²³ Oruveze orusupi komurungu wokuyaruka keyuru, Jesus wa raera kovemukongorere kutja me ‘keveṱunina oruveze’ keyuru. (Johanes 14:2) Imba mbu mave i keyuru, Jesus we ve isana ‘okarupanda okaṱiṱi.’ (Lukas 12:32) Ovandu vengapi mbu mave kara mokambumba kOvakriste ovaṱakame nga? Otja komambo wOmavandururiro 14:1, omuapostele Johanes wa tja: “Indino ami mba tarere ne munu Ondjona [Jesus Kristus] ndja kuramene kOndundu yaSion; nu pu yo pa ri ovandu omayovi esere nomirongo vine na vane, mba ri nena rayo noraihe nga tjangerwe kovipara vyawo.”

²⁴ Ovakriste 144 000 mba, mbu mave kamburire mo ovaapostele ovaṱakame vaJesus, ve nombendukiro yomeyuru. Owo va pendurwa ruṋe? Omuapostele Paulus wa tja omoruveze Kristus tji ma kotoka otjombara. (1 Ovakorinte 15:23) Otja tji mo kerihonga mEkondwa 9, eṱe nai tu hupa moruveze ndo. Okutja otjihupe tjaimba 144 000 mbe ṱa moruveze rwetu ndwi ve pendurwa mombapaiziro yeho okukahupa meyuru. (1 Ovakorinte 15:51-55) Nungwari, otjingi tjovandu mave pendurwa moruyaveze okuhupa mOparadisa kombanda yehi.

25. Mekondwa ndi mari kongorereko matu kerihonga mo tjike?

²⁵ Ii, Jehova tjiri ma taara omunavita na eṱe, indji onḓiro, nu mai zu po nga aruhe! (Jesaja 25:8) Nu mape ya o ripura kutja, ‘Imba mbu mave kapendurwa okukahupa meyuru mave kaungura ko tjike?’ Owo mave kara norupa mohoromende ombwa yOuhona meyuru. Matu kerihonga ovingi ohunga nohoromende ndjo mekondwa ndi mari kongorere ko.