OVAKRISTE va pewa erakiza rokukara nomazemburukiro wonḓiro yaKristus. Omazemburukiro nga ye isanewa “Omariro Omayapuke waMuhona.” (1 Ovakorinte 11:20) Hapo otjikeṋa tji tji ri otjinanḓengu ohunga neyuva ndi? Nu eyuva ndi ri sokuzemburukwa ruṋe, nu omomuano uṋe?

Jesus Kristus wa zikamisa eyuva ndi mongurova yOpaska mombura 33 O.Z. Opaska ya ri omukandi wOvajuda mbwaau zemburukwa otjikando tjimwe uriri mombura, momayuva 14 womueze wOvajuda Nisan. Omueze mbwi Nisan aau utu indu omueze tji wa rire omumbomba oruveze orusupi kombunda yotjivike otjitenga tjaSeninarindi (Marta). Okuzambo Ovajuda aave vara omayuva 14 narire mu va zemburuka Opaska kombunda yomahitiro weyuva.

Jesus wa zemburuka eyuva rOpaska pu novahongewa ve, okuzambo a ramba Judas Iskariot, nu tja za nokumuramba otja zikamisa Omariro Omayapuke waMuhona. Omariro nga ya pingena Opaska yOvajuda nu mena ranao maye sokuzemburukwa otjikando tjimwe mombura.

Evangeli raMateus mari tja: “Jesus wa toora omboroto, e i sere ondaya, e i koyora ne i yandja kovahongewa ve a tja: ‘Kambureye mu rye, ihi otjo orutu rwandje.’  Tjazumba wa toora otjinwino a tja okuhepa ku Ndjambi ne ve pe a tja: ‘Nwee mu tjo amuhe. Ihi otjo ombinḓu yandje yomerikutiropamwe waNdjambi, indji ombinḓu yandje ndji mai tirahirwa ovengi kondjesiro yomauvi.’”—Mateus 26:26-28.

Tjiva ve kambura kutja Jesus wa tanaurira omboroto morutu rwe omuini nomavinu mombinḓu ye omuini. Posi yokutja, oruveze ndwo Jesus tjaa yandja omboroto orutu rwe karwa ri notjipo. Ovaapostele vaJesus tjiri aave ri orutu rwe nokunwa ombinḓu ye po? Kako, orondu andakuzu pe ri nao, atjatji heya kutja owo tjiri aave ri onyama yomundu nu ihi atjatji teya oveta yaMukuru. (Genesis 9:3, 4; Levitikus 17:10) Otja komambo waLukas 22: 20, Jesus wa tja: “Otjinwino hi otjo omerikutiropamwe omape mombinḓu yandje, ndji mai tirahirwa eṋe.” Ekopi ndo orini onda rira “omerikutiropamwe omape” po? Kamaape ya, orondu omerikutiropamwe onḓuvasaneno.

Okutja omboroto nomavinu vya ri ovisanekero uriri. Omboroto aai kuramene po orutu rwaKristus oruhomonena. Jesus wa ungurisa omboroto ndja hupire keriro rOpaska. Omboroto ndjo ya rungwa nokuhina osurise. (Eksodus 12:8) Ombeibela potuingi i ungurisa osurise otjotjisanekero tjourunde poo omazunḓakero. Okutja omboroto i kuramena po orutu rwaJesus oruhomonena ndwa punguhwa. Oro karwa ri nouvi kaparukaze.—Mateus 16:11, 12; 1 Ovakorinte 5:6, 7; 1 Petrus 2:22; 1 Johanes 2:1, 2.

Omavinu omaserandu maye kuramene po ombinḓu yaJesus. Ombinḓu ndjo i sembamisa omerikutiropamwe omape. Jesus wa tja ombinḓu ye ya tirahirwa ovengi “kondjesiro yomauvi.” Kunao, okutja ovandu mave yenene okuvarwa ovakohoke komurungu waMukuru nave yenene okuhita momerikutiropamwe omape na Jehova. (Ovaheberi 9:14; 10:16, 17) Omerikutiropamwe nga poo onḓuvasaneno ndji, ya tjita kutja Ovakriste ovaṱakame mba 144 000 ve yenene okuyenda keyuru. Ingo mave kahonapara otja ozombara novapristeri nave etere ovandu ozondaya kombanda yehi.—Genesis 22:18; Jeremia 31:31-33; 1 Petrus 2:9; Omavandururiro 5:9, 10; 14:1-3.

Ovandu veṋe mbu mave sokunwa omavinu nokurya omboroto yOmariro Omayapuke waMuhona? Owomba porwawo mbe ri momerikutiropamwe ngo, okutja imba mbe  nomaundjiro wokuyenda keyuru, ombu mave sokunwa omavinu nga nokurya omboroto ndjo. Ombepo ondjapuke ondji ve hongononena kutja va toororwa okukarira ozombara meyuru. (Ovaroma 8:16) Owo wina ve ri momerikutiropamwe wOuhona pu na Jesus.—Lukas 22:29.

Nambano tjike ohunga na imba mbe nomaundjiro wokuhupa nga aruhe mOparadisa kombanda yehi? Owo ve kara pOmariro Omayapuke waMuhona otja Jesus pa rakiza. Owo ve worongana pomariro nga okuyandja ondjozikiro, nungwari kave ri komboroto nokunwa kotjinwino. Otjikando tjimwe mombura momayuva 14 ku Nisan, kombunda yomahitiro weyuva, Ovahongonone vaJehova ve worongana okuzemburuka Omariro Omayapuke waMuhona. Omazemburukiro nga omananḓengu tjinene kOvakriste avehe, nandarire kutja ovandu votjivaro otjiṱiṱi mouye auhe mbe tja mave i keyuru. Indwi oruveze oruwa kweṱe atuhe okuripurira korusuvero orunenenene rwaJehova Mukuru na Jesus Kristus.—Johanes 3:16.