LESA ongoramambo ngamwa aihe. Tara kotivii yoye poo nandarire puratena koradio yoye. Mo zuu mo ovitjitwa ovingi ohunga nomazepasaneno novita. Ripurira komauzeu woye omuini. Ngahino omutjise poo onḓiro yaumwe wovasuverwa voye mape ya vi ku kurungisa. Mape ya o ripura otjomurumendu omusemba Job, ngwa tjere eye wa “ningisa ondjenda.”—Job 10:15.

Ripura omuini kutja:

• Indji ondja ri ondando yaMukuru ku ami novandu ovehe?

• Ombatero yokutjinda omaputi wandje me i munu pi?

• Pe nomaundjiro kaaṋi yokutja maaku kakara ohange kombanda yehi?

Ombeibela i yandja omaziriro omakovise komapuriro nga.

“Eye ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, nomuhihamo kavi tji nakukara po rukwao.”—Omavandururiro 21:4

“Nomuremane ma tuka peyuru otja omenye.”—Jesaja 35:6

“Indino omupoṱu ma munu.”—Jesaja 35:5

 ‘Ovaṱi avehe mave piti momayendo wawo.’—Johanes 5:28, 29

“Kape nomundu ngwa tura mehi retu, ngu ma unauna rukwao kutja eye wa vera.” —Jesaja 33:24

“Ngamu kare ovikokotwa ovingi mehi.”—Epsalme 72:16

O hakahana okumuna kutja oviṋa avihe mbya tamuna pomukuma mbu mau zu po oruroto uriri. Mukuru wa kwizika kutja ma yenenisa oviṋa mbi, nu Ombeibela i kahurura kutja eye me vi yenenisa vi.

Nungwari Ombeibela i tu kahururira ovingi kombanda yanao. Oyo i tu pa omiano vyokumuna ouṋingandu mehupo nandarire nai. Ripura ohunga nozombameno nomauzeu woye omuini. Ove ngahino u nouzeu wotjimariva, ouzeu meṱunḓu, ouveruke oungundi poo ngahino wa zepaisa umwe wovasuverwa voye. Ombeibela mai ku vatera okutjinda omauzeu ndino, nu wina mai yenene okukuvatera okuzira omapuriro otja inga:

• Omena ratjike tji tu muna ouzeu?

• Matu yenene vi okutjinda omaputi wehupo?

• Matu yenene vi okukara nouṋingandu meṱunḓu?

• Eṱe tji twa koka tu yenda pi?

• Ovasuverwa vetu mba ṱa, mape ya atu kevemuna rukwao?

• Matu yenene vi okukara nongamburiro kutja Mukuru ma yenenisa omakwizikiro we ohunga noruyaveze?

 Mokulesa embo ndi, ove mo raisa kutja mo vanga okutjiwa imbi Ombeibela mbi i honga. Embo ndi mari ku vatere okutjiwa kutja Ombeibela i honga tjike. Pe nomapuriro ngu maye hitasana nozoparagrafa. Omangete wovandu ve ungurisa omuano wokupura nokuzira mbwi indu tji mave rihongo Ombeibela puna Ovahongonone vaJehova. Eṱe matu undjire ko kutja ove wina mo tjaterwa. Mukuru nge ku sere ondaya otja tji mo yorokere otjiṋa otjiwa notjiyandjanyuṋe tjokurihonga kutja Ombeibela tjiri i honga tjike!