OMAYUVA womasuviro nge ungurisiwa tjinene mozongamburiro ozengi na yarwe nge zemburukwa mouye kaye zire mOmbeibela. Nu hapo omayuva ngo ya za pi? Tji wa i konganda yomapwikiro womambo, mo kahimwa tji wa kakonḓonona  kutja omambo omengi maye tja vi ohunga nomayuva womasuviro nge zemburukwa mehi ndo mu u kara. Ngatu tare kovihorera tjiva.

Omayuva wOkambo kOnḓiro. Embo ndi The Encyclopædia Britannica mari tja: “Kape notjiraisiro nandarire tjimwe tjomazemburukiro womukandi wOmayuva wOkambo kOnḓiro mEtestamente Epe.” Omayuva wOkambo kOnḓiro ya uta vi? Owo ya za kozongamburiro zovanavisenginina. Nandarire kutja ku za Omayuva wOkambo kOnḓiro ye zemburuka ombendukiro yaJesus, otuzo novitjitwa mbi ungurisiwa momayuva nga kavi notjiṋa nOukriste. Ohunga nokapi ku ke ungurisiwa mOmayuva wOkambo kOnḓiro, embo ndi The Catholic Encyclopedia mari tja: “Okapi otjisanekero tji tja za kovanavisenginina nu oko aruhe aake ungurisiwa otjotjiraisiro tjorukwato.”

Omukandi wOmbura Ombe. Eyuva notuzo tu tu notjiṋa nomukandi wOmbura Ombe twa panguka mehi rimwe nga ku rarwe. Ohunga nokutja omukandi mbwi wa za pi, embo ndi The World Book Encyclopedia mari tja: “Omuhonapare wOvaroma Julius Ceasar, mombura ndji 46 O.Z., wa zikamisa eyuva ndi 1 ku Rozonḓu (Januari) otjeyuva rOmbura Ombe. Ovaroma eyuva ndi ve ri yapurira Janus, mukuru womivero nombutiro. Omueze mbwi Januari (Rozonḓu) wa rukirwa ku Janus, ngwa ri nomirungu vivari, umwe mbwaau tara komurungu na umwe mbwaau tara kongotwe.” Okutja omukandi wOmbura Ombe wa zikamena kozombazu zovanavisenginina.

Omayuva warwe womasuviro. Kamaatu yenene okuṱuna komikandi vyomayuva womasuviro avihe mbi tjitwa mouye. Nungwari, Jehova ka yakura omayuva womasuviro nge hivirika ovandu poo ovira vyovandu. (Jeremia 17:5-7; Oviungura 10:25, 26) Tjiwa nawa wina kutja ombutiro yomayuva womasuviro ootjiṋa tji tji zikamisa kutja Mukuru me ye yakura poo indee. (Jesaja 52:11; Omavandururiro 18:4) Omirari vyOmbeibela mbya tamunwa mEkondwa 16 rembo ndi mavi ku vatere okupangura kutja Mukuru u noumune uṋe ohunga nokukara norupa momazemburukiro womayuva womasuviro wouye mbwi nge hi notjiṋa nOukriste.