Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 6

Tji twa koka tu yenda pi?

Tji twa koka tu yenda pi?

1-3. Ovandu ovengi ve pura omapuriro yeṋe ohunga nonḓiro, nu ozongamburiro tjiva ze yandja omaziriro yeṋe?

OMBEIBELA i tu kwizikira kutja eyuva rimwe ‘onḓiro kai tji nakukara po rukwao.’ (Omavandururiro 21:4) MEkondwa 5, twe rihonga kutja otjisuta tjonguturiro otji tji tjita kutja tu mune omuinyo waaruhe. Posi yokutja ovandu ngamba ve ṱa. (Omuzuvarise 9:5) Nu epuriro rimwe ndi tu pura orondi rokutja, Tji twa koka tu yenda pi?

2 Eziriro kepuriro ndo enanḓengu, nu tjinenenene indu tji twa zepaisa omusuverwa wetu. Eṱe mape ya atu himwa kutja, ‘Eye hapo wa ya pi? U tu tjevera? Ma yenene okutuvatera? Mape ya atu kemumuna rukwao?’

3 Ozongamburiro ozengi mouye ze yandja omaziriro pekepeke komapuriro nga. Tjiva ze honga kutja tji u ri omusemba mo i keyuru nungwari tji u ri omurunde mo kapya motjovasengwa. Zarwe ze honga kutja omundu tja koka u rira ombepo nu a kakara puna ovaṱi ve ovakuru. Nu zarwe ze honga kutja tji wa zu nokupangurwa ove u kwatwa rukwao poo u kotoka komuinyo rukwao morutu rwarwe, ngahino otjomundu warwe poo nandarire otjotjipuka.

4. Ozongamburiro ozengi ze honga tjike ohunga nonḓiro?

4 Ozongamburiro ze munika aayo ze honga oviṋa mbya panguka. Posi yokutja otjingi tja zo ze honga epu rimwe. Ozo ze honga kutja omundu tja koka, pe notjiṋa tji tji hupa komurungu. Hapo imbwi ouatjiri?

TJI TWA KOKA TU YENDA PI?

5, 6. Tji twa koka tu yenda pi?

5 Jehova u tjiwa kutja tji twa koka tu yenda pi, neye we  tu raera kutja omundu tja koka, omuinyo we u yandera mbo. Onḓiro i heya okuhinamuinyo. Okutja omundu tja ṱu, kakara noumune rukwao nu kakahupa komurungu koruveze rwarwe. * Tji twa koka katu yenene okumuna, okuzuva poo okuripura rukwao.

6 Ombara Salomo ya tjanga kutja, “ovakoke kave tjiwa otjiṋa.” Ovaṱi kave yenene okusuvera poo okutonda nu “kaku noviungura nomeripuriro nondjiviro nounongo motjovakoke.” (Lesa Omuzuvarise 9:5, 6, 10.) MEpsalme 146:4, Ombeibela i tu raera kutja ovandu tji va koka, “ourizemburuka wawo auhe” u koka.

JESUS WA HONGA TJIKE OHUNGA NONḒIRO?

Jehova wa mema ovandu kutja ve hupe nga aruhe kombanda yehi

7. Jesus wa tja tjike ohunga nonḓiro?

7 Indu epanga raJesus Lasarus tja ṱa, eye wa raera ovahongewa ve na tja: “Epanga retu Lasarus wa rara.” Posi yokutja Jesus kaa hee okusuva kwozomboṱu. Jesus arire tje ve raere komurungu na tja: “Lasarus wa ṱu.” (Johanes 11:11-14) Kunao Jesus wa sasaneka onḓiro ku nokurara. Eye kena pa tja Lasarus wari meyuru poo pu novakuru ve mba ṱa. Nu kena pa tja Lasarus aa tatumisiwa motjovasengwa poo kutja wa kakwatwa rukwao morutu rwomundu warwe poo otjipuka. Kako, yari tjimuna Lasarus wari a rara ozomboṱu ozonḓeu. Otjikando tjarwe Jesus wa sasaneka onḓiro ku nokurara ozomboṱu. Indu tja pendura omukazona waJairus ngwa ṱire, eye wa tja: “Omukazona ka kokere, wa rara ozomboṱu uriri!”—Lukas 8:52.

8. Eṱe matu tjiwa vi kutja Mukuru kamemene ovandu nondando yokutja ve koke?

8 Hapo Mukuru tja mema Adam na Eva okuza kombutiro,  eye we ve mema nondando yokutja ve koke po? Kako! Jehova we ve mema kutja ve hupe nga aruhe nu ve kare nouveruke ouwa. Indu Jehova tja mema ovandu, eye we ve mema nonḓero yokuhupa nga aruhe. (Omuzuvarise 3:11) Ovanene kave vanga ovanatje vawo okuvera nokuṱa, nu Jehova wina u noumune otjingewo ohunga na eṱe. Tjinangara Mukuru we tu mema kutja tu hupe nga aruhe, ongwaye tji tu koka?

 ONGWAYE TJI TU KOKA?

9. Ongwaye etwako Jehova nda yandja ku Adam na Eva tji ra ri epupu?

9 Jehova wa raera Adam motjikunino tjaEden na tja: ‘Mu nousemba okurya komiti avihe vyotjikunino otja pu mamu vanga, posi yakomuti mbu yandja ondjiviro okutjiwa ouwa nouvi kamu nokurya kovihape vyawo. Tji mwa tjiti nao, mamu ṱu.’ (Genesis 2:9, 16, 17) Etwako ekahu ndi, kara ri ezeu okuṱakamisa, nu Jehova wa ri nousemba wokuraera Adam na Eva imbi mbi ri oviwa na imbi mbi ri ovivi. Andakuzu va ri nonḓuviro ku Jehova, owo atjave raisa kutja ve nondengero kouhonapare we. Nu atjave mu raisira kutja ve nondangi tjinene koviṋa avihe mbye ve pa.

10, 11. (a) Satan wa pukisa Adam na Eva momuano uṋe? (b) Ongwaye otjiṋa Adam na Eva tji va tjita tji tji hari otjiisirwa?

10 Ouhumandu, Adam na Eva va toorora okuhinakupuratena ku Jehova. Satan wa tja nai ku Eva: “Indu Ndjambi otja hee, tjiri, kutja aamu ri komiti ngamwa avihe motjikunino?” Eva wa zira a tja: “Kovihape vyomiti, mbi ri motjikunino, tu nousemba okurya ku vyo, nungwari kovihape vyomuti mbu ri mokati kotjikunino, Ndjambi wa tja: ‘Eṋe amu ri ko ku wo, nu amu ṱunu ku wo; tjaa mamu ṱu.’”—Genesis 3:1-3.

11 Satan arire tja tja: “Kamambo! Indee uri, kamaamu ṱu! Nungwari Ndjambi ma tjiwa kutja tji mwa ri ku wo, omeho weṋu maye paturuka, amu sana ku Ndjambi omuini namu tjiwa ouwa nouvi.” (Genesis 3:4-6) Satan aa vanga kutja Eva me ripure kutja ma yenene okuritoororera omuini ohunga na imbi mbi ri oviwa novivi. Satan wina wa kora ovizeze ohunga na imbi mbyatja vi tjitwa Eva tje ha karere nonḓuviro ku Jehova. Satan wa raera Eva kutja kamaaṱu, okutja Eva wa pora otjihape a ri, na yandja komurumendu we. Adam na Eva aave tjiwa nawa kutja Jehova we ve raera kutja ave ri otjihape. Indu tji va rya kotjihape hi, owo va  katuka etwako nda ri ekahu nepupu. Owo va raisa kutja kava ri nondengero na Ihe yawo omunarusuvero womeyuru. Otjiṋa tji va tjita hi katja ri otjiisirwa!

12. Ongwaye tje ri otjiṋa otjihihamise kutja ooAdam na Eva kave yandjere ombakatwi kerakiza raJehova?

12 Tjiri otjiṋa otjihihamise kutja ovanene vetu ovatenga kave raisire ondengero kOmuute wawo! Ove mo kara noumune uṋe indu tji wa kondja nomasa okukurisa omuatje woye omuzandu poo omukazona, okuzambo e ku pirukire na tjiti oviṋa avihe ove mbi we mu tjaera okutjita? Otjiṋa hi mape ya atji ku hihamisa tjinene nu, katjiperi?

Adam wa za koruuma, neye wa yaruka koruuma

13. Jehova aa hee tjike indu tja tja “mo yaruka koruuma”?

13 Indu Adam na Eva tji ve hari nonḓuviro, owo va pandjara omuinyo waaruhe. Jehova wa raera Adam na tja: “Ove oove oruuma, nu mo yaruka koruuma.” (Lesa Genesis 3:19.) Omambo ngo aaye hee kutja Adam ma rire oruuma rukwao, mape sana aayo kena pa memenwe. (Genesis 2:7) Adam tja za nokukatuka, eye wa ṱa nu kari ko rukwao.

14. Ongwaye tji tu koka?

14 Andakuzu Adam na Eva va ri nonḓuviro ku Mukuru, owo atjave hupa nga kundino. Nungwari mena rokutja kave puratenene ku Mukuru, owo va katuka nu korusenina va kaṱa. Ouvi u ri tjimuna omutjise omuvi mbu twa rumata kovanene vetu ovatenga. Atuhe twa kwatwa mouvi nu opu tu zokukoka. (Ovaroma 5:12) Nungwari, indji kandji ri  ondando yaMukuru kovandu. Mukuru kena pa vanga kutja ovandu ve ṱe, nu Ombeibela i tja onḓiro ‘omunavita.’—1 Ovakorinte 15:26.

OKUTJIWA OUATJIRI KU TU KUTURA

15. Okutjiwa ouatjiri ohunga nonḓiro ku tu kutura vi?

15 Okutjiwa ouatjiri ohunga nongaro yovaṱi ku tu kutura komahongero omengi woposyo. Ombeibela i honga kutja ovaṱi kave munu omihihamo nu kave ṱunwa i ongaro yetu. Kamaatu yenene okuhungira kuna wo nowo kamaave yenene okuhungira kuna eṱe. Kamaatu yenene okuvatera ovaṱi nowo kamaave yenene okutuvatera. Katu nakuhepa okuvetira orondu owo kamaave tu hihamisa poo okutuetera ovihuha. Posi yokutja, ozongamburiro ozengi ze honga kutja ovaṱi ve nomuinyo nokutja matu yenene okuvevatera tji twa sutu ovahonge poo ovandu mbe varwa kutja ovayapuke. Nungwari tji twa tjiwa ouatjiri ohunga nonḓiro matji tu vatere kutja atu ha pukisiwa i ovizeze itja imbyo.

16. Ozongamburiro ozengi ze honga otjizeze tjiṋe ohunga novaṱi?

16 Satan u ungurisa ozongamburiro zoposyo okutukorera ovizeze nokutjita kutja tu ripure kutja ovaṱi ngunda ve nomuinyo. Okutara kotjihorera, ozongamburiro tjiva ze honga kutja tji twa koka pe notjiṋa mu eṱe tji tji hupa komurungu. Ongamburiro yoye wina i honga nao, poo i honga imbi Ombeibela mbi i honga ohunga novaṱi? Satan u kora ovizeze okupora ovandu ku Jehova.

17. Ongwaye omahongero wokutja ovandu ve kapya motjovasengwa, tji ye yamburura Jehova?

17 Oviṋa ozongamburiro ozengi mbi ze honga ovikumise. Okutara kotjihorera, ozongamburiro tjiva ze honga kutja ovandu ovarunde mave kapya motjovasengwa nga aruhe. Omahongero wovizeze ngo ye yamburura Jehova.  Jehova kamaa roro okuyandjera ovandu okuhihamisiwa momuano mbwo! (Lesa 1 Johanes 4:8.) Mo kara noumune uṋe tji wa munu omundu ngu ma vere omuatje we ngu ha zuu mokuṱizira eke re momuriro? Ove mo utu okumuna kutja omundu otja ingo ke nombinḓu komutima. Nandarire komoo vanga okumutjiwa. Satan u vanga kutja tu kare noumune otjingewo ohunga na Jehova!

18. Ongwaye tji tu ha sokutira ovaṱi?

18 Ozongamburiro tjiva ze honga kutja kombunda yonḓiro ovandu ve karira ozombepo. Ozongamburiro nḓo ze honga kutja ozombepo nḓa ze sokutengwa nokutiriwa i ovanamuinyo mena rokutja mape ya aze rire omapanga omawa poo ovanavita ovavi tjinene. Ovandu ovengi ve kambura motjizeze hi. Owo ve tira ovaṱi, kunao ve rikotamena ku wo moruveze rwokurikotamena ku Jehova. Tjiwa kutja ovaṱi kave ṱunwa i otjiṋa tji ma tji tjitwa kweṱe nu kave tjiwa otjiṋa, okutja katu nokuhepa okuvetira. Jehova ongu ri Omuute wetu. Eye ongu ri Mukuru watjiri nu matu sokurikotamena ku ye erike.—Omavandururiro 4:11.

19. Okutjiwa ouatjiri ohunga nonḓiro maku tu vatere vi?

19 Tji twa tjiwa ouatjiri ohunga novaṱi, maku tu kutura kovizeze vyozongamburiro. Ouatjiri mbwi u tu vatera okuzuva nawa omakwizikiro waJehova nga tjita ohunga nehupo noruyaveze rwetu.

20. Matu kerihonga tjike mekondwa ndi mari kongorere ko?

20 Ozombura ozonguru nḓa kapita, omukarere waMukuru wena Job wa purire epuriro ndi: “Omundu tja koka, u rira omunamuinyo rukwao are?” (Job 14:14) Omundu ngwa koka mape ya tjiri a kotorwa komuinyo rukwao? Eziriro Mukuru nde tu pa mOmbeibela enyaṋukise tjinene. Matu katara keziriro ndo mekondwa ndi mari kongorere ko.

^ par. 5 Ovandu tjiva ve kambura kutja omuinyo poo ombepo vi hupa komurungu indu omundu tja zu nokuṱa. Tji mo vanga ondjivisiro yokomurungu, tara kOmambo wokehi 17 no 18.