Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 18

Hapo me sokuriyandja ku Mukuru ne papitisiwa?

Hapo me sokuriyandja ku Mukuru ne papitisiwa?

1. Ove mape ya o utu okuripura natjike tji wa zu nokukonḓonona embo ndi nawa?

OVE WE rihonga ouatjiri wOmbeibela momakonḓononeno woye wembo ndi, tjimuna omakwizikiro waMukuru ohunga nomuinyo waaruhe, ongaro yovaṱi nomaundjiro wombendukiro. (Omuzuvarise 9:5; Lukas 23:43; Johanes 5:28, 29; Omavandururiro 21:3, 4) Ove nai mape ya wa uta okuyenda kozombongarero zombongo zOvahongonone vaJehova nu mape ya u kambura kutja ve ungurisa ongamburiro youatjiri. (Johanes 13:35) Nove ngahino wa uta okutunga oupanga wopopezu kuna Jehova nu wina mape  ya wa tya kutja mo vanga okumukarera. Okutja mape ya u ripura kutja, ‘Hapo me sokutjita vi kutja mbi ute okukarera Mukuru momuano omusemba?’

2. Ongwaye omurumendu Omuetiopie tjaa vanga okupapitisiwa?

2 Omurumendu Omuetiopie ngwa ri ko indu Jesus tja ri kombanda yehi wina ee ripura nao. Oruveze orusupi Jesus tja za nokupendurwa, omuhongewa we Filipus wa zuvarisira omurumendu ngwi. Filipus we mu raisira kutja Jesus ongu ri Messias. Omurumendu Omuetiopie wa ṱunwa tjinene i oviṋa mbye rihonga nga tja tja: “Tara, omeva owo nga, notjikeṋa tji matji ndji tjaere okupapitisiwa?”—Oviungura 8:26-36.

3. (a) Jesus wa yandja erakiza riṋe kovahongewa ve? (b) Omundu ma sokupapitisiwa vi?

3 Ombeibela i honga oukahu kutja omundu tji ma vanga okukarera Jehova, ma sokupapitisiwa. Jesus wa raera ovahongewa ve na tja: ‘Kaise poeye ovandu ovahongewa vandje amamu ve papitisa.’ (Mateus 28:19) Jesus omuini wina wa yandja otjihorera na papitisiwa. Eye kena pa tjatjwa nomeva uriri kotjiuru, nungwari wa pundisiwa auhe momeva. (Mateus 3:16) Kundino, Omukriste tji ma papitisiwa wina ma sokupundisiwa auhe momeva.

4. Ove tji mo papitisiwa mo raisa tjike ku varwe?

4 Ove tji mo papitisiwa, mo raisire varwe kutja u nonḓero yokurira epanga raMukuru nokumukarera. (Epsalme 40:7, 8) Okutja mape ya oripura kutja, ‘Hapo me sokutjita vi kutja mbi yenene okupapitisiwa?’

ONDJIVIRO NONGAMBURIRO

5. (a) Otjikeṋa tji mo sokutjita rutenga kutja u yenene okupapitisiwa? (b) Ongwaye ozombongarero zOukriste zombongo tji ze ri ozonanḓengu?

5 Otjiṋa tji mo hepa okutjita komurungu wombapitisimo yoye, okutjiwa Jehova na Jesus. Ove wa uta rukuru  okutjita nao mokukonḓonona Ombeibela. (Lesa Johanes 17:3.) Nungwari ngundee pe novingi okutjita. Ombeibela mai tja mo ‘sokuurisiwa nondjiviro’ yombango yaJehova. (Ovakolose 1:9) Ozombongarero zombongo zOvahongonone vaJehova maze ku vatere okukara noupanga oupame kuna Jehova. Indi epu rimwe enanḓengu ndi mo sokukarera pozombongarero otja inḓo aruhe.—Ovaheberi 10:24, 25.

Ove mo sokukonḓonona Ombeibela rutenga amoo papitisiwa

6. Ondjiviro ndji ṱa pi yOmbeibela omundu ndji ma hepa okukara na yo kutja ma yenene okupapitisiwa?

6 Jehova ka undjire ko kutja u tjiwe oviṋa avihe mbi ri mOmbeibela kutja u yenene okupapitisiwa. Eye kena pa undjira komurumendu Omuetiopie okutjiwa oviṋa avihe amaa papitisiwa. (Oviungura 8:30, 31) Neṱe matu kayenda komurungu okurihonga ohunga na Mukuru nga kongaaruhe. (Omuzuvarise 3:11) Nungwari kutja u yenene okupapitisiwa, ove mo sokutjiwa omahongero omananḓengu wOmbeibela nokuyeyakura.—Ovaheberi 5:12.

7. Omakonḓononeno woye wOmbeibela ye ku vatere vi?

7 Ombeibela mai tja: “Kape nomundu ngu tjata ku Ndjambi e hi nongamburiro.” (Ovaheberi 11:6) Okutja mo sokukara nongamburiro kutja u yenene okupapitisiwa. Ombeibela i tu raera kutja ovandu tjiva motjihuro otjikuru tjaKorinte va zuva ombuze ndjaai zuvarisiwa i ovahongewa vaJesus, nu ihi tja tjita kutja owo ve ute ‘okukambura, narire tji va papitisiwa.’ (Oviungura 18:8) Momuano otjingewo, omakonḓononeno woye wOmbeibela ye ku vatera kutja u kare nongamburiro momakwizikiro waMukuru nongamburiro yokutja ombunguhiro yaJesus mai yenene okutukutura kouvi nonḓiro.—Josua 23:14; Oviungura 4:12; 2 Timoteus 3:16, 17.

RAERA VARWE OHUNGA NOUATJIRI WOMBEIBELA

8. Otjikeṋa tji matji ku hingi okuraera varwe oviṋa mbi we rihonga?

8 Otja tji mo kayenda komurungu okurihonga ovingi  mOmbeibela na tji mo munu omuano mbu mai ku vatere mehupo roye, ongamburiro yoye mai kurire ko. Ove mo hara onḓero yokuraera varwe ohunga noviṋa mbi mo rihongo. (Jeremia 20:9; 2 Ovakorinte 4:13) Nu hapo oouṋe mbu mo sokuraera?

Ongamburiro ondji mai ku hingi kutja u raere varwe ohunga na imbi mu u kambura

9, 10. (a) Ovandu veṋe mbu mape ya o utu okuraera ohunga noviṋa mbi we rihonga? (b) Ove mo sokutjita vi tji mo vanga okuzuvarisa pu nombongo?

9 Ove mo yenene okuraera ovazamumwe voye, omapanga, ovararanganda poo ovandu mbu mu ungura pamwe ohunga noviṋa mbi mo rihongo. Otjiṋa otjiwa okutjita nao, posi yokutja aruhe tji tjita momuano omuwa nu worusuvero. Nu otja oruveze tji maru kayenda ove mo yenene okuuta okuzuvarisa pu nombongo. Tji mo munu kutja wa pu okuuta okuzuvarisa, mo yenene okuraera Omuhongonone waJehova ngu ku honga Ombeibela kutja mo vanga okuuta okukara norupa motjiungura tjokuzuvarisa pu nombongo. Indu omundu ngu ku honga tja munu kutja ove wa pu okuuta otjiungura tjokuzuvarisa nu u ṱakamisa omirari vyOmbeibela mehupo roye, okutja ove na ingwi ngu mu rihonga pamwe mamu kahakaena novanene vombongo vevari.

10 Pombongarero ndjo mape katjitwa tjike? Ovanene vombongo mave kahungira kuna ove okutara kutja omahongero wOmbeibela u yezuva nawa, u kambura mu wo, u ṱakamisa imbi Ombeibela mbi i heya mehupo roye nokutja tjiri mo vanga okurira umwe wOvahongonone vaJehova poo indee. Tjiwa kutja ovanene vombongo ve rikendera kovandu avehe mombongo, na ove wina, okutja o tira okuhungira kuna wo. (Oviungura 20:28; 1 Petrus 5:2, 3) Kombunda yombongarero ndji ovanene vombongo mave ku tjivisa kutja mo yenene okuuta okuzuvarisa pu nombongo poo indee.

11. Ongwaye tje ri ounahepero okutjita omarundurukiro komurungu wokuuta okuzuvarisa pu nombongo?

 11 Ovanene vombongo mape ya ave ku kahururire kutja mo hepa okutjita omarundurukiro tjiva kutja u yenene okuuta okuzuvarisa pu nombongo. Ongwaye tje ri ounahepero okutjita omarundurukiro ngo? Tji matu hungire kuna varwe ohunga na Mukuru, eṱe tu kuramena po Jehova, okutja matu sokuhupa momuano mbu mau eta ondjozikiro ku ye.—1 Ovakorinte 6:9, 10; Ovagalate 5:19-21.

RITANAURA NU U RIVINGURURE

12. Ongwaye ovandu avehe tji ve hepa okuritanaura?

12 Pe notjiṋa tjarwe tji mo sokutjita kutja u yenene okupapitisiwa. Omuapostele Petrus wa tjere: “Ngamu tji ritanaura omitima, nu mu vingurukire ku Ndjambi, kokutja Eye e mu isire omauvi weṋu.” (Oviungura 3:19) Omambo ngo maye hee tjike? Maye hee kutja tu sokuhihamwa omutima tjiri mena roviṋa ovivi mbi twa tjita. Okutara kotjihorera, indu tjoo hupu morukatuko, okutja mo hepa okuritanaura. Nu nandarire kutja oo kondjo nomasa okutjita imbi mbi ri ovisemba, ove ngunda mo hepa okuritanaura orondu atuhe tu tjita ouvi nu tu hepa okuningira ondjesiro ku Mukuru.—Ovaroma 3:23; 5:12.

13. ‘Okuvingurukira ku Ndjambi’ ku heya tjike?

13 Okuhihamwa omutima uriri ohunga noviṋa mbi wa tjita kaku ya yenena. Petrus wa tja ove wina mo ‘sokuvinguruka.’ Ihi matji hee kutja mo sokunakaura ongaro ombi ndjoo hupu mo rukuru no utu okutjita imbi mbi ri oviwa. Okusasaneka, ngatu tje ove wa toora ouyenda kehi ku u hi ya rora okuyenda. Nu kombunda yokaruveze okaṱiṱi okamuna kutja nangwari wa toora ondjira ndji he ri yo. Ove mo tjiti vi? Otjiperi kutja mo isako omaze wotjihauto, okurama, otanauka no utu okuhinga mondjira  indji osemba. Momuano otjingewo, otja tji mo rihongo Ombeibela mo kamuna kutja pe novitjitwa poo oviṋa tjiva mehupo roye mbi mo hepa okurundurura. Kara nonḓero ‘yokurivingurura’ poo okutjita omarundurukiro ngu maye heperwa po nu u ute okutjita imbi mbi ri ovisemba.

RIYANDJA KU MUKURU

Ove wa kwizikira Jehova kutja mo mu karere?

14. Omundu u riyandja vi ku Mukuru?

14 Omukambo warwe omunanḓengu mbu mo sokutoora komurungu wokupapitisiwa, okuriyandja omuini ku Jehova. Tji mo riyandja omuini ku Jehova, u kwizikira Jehova mongumbiro kutja mo rikotamene ku ye erike nokutja okutjita ombango ye ma rire otjiṋa otjinanḓengu tjinene mehupo roye.—Deuteronomium 6:15.

15, 16. Otjikeṋa tji tji hinga omundu okuriyandja omuini ku Mukuru?

15 Okukwizika okukarera Jehova erike ku ri tjimuna okukwizika okukara pu nomundu ngu wa suvera, oure womuinyo woye. Ngatu tje omurumendu nomukazendu mave tarerasana nondando yokukupasana. Otja omurumendu pu me rihongo ovingi ohunga nomukazendu, u uta okumusuvera nokuzera okumukupa. Nandarire kutja imbwi kamukambo omupupu, omurumendu ka tira okutoora omerizirira ngo mena rokutja we mu suvera.

16 Otja tji mo rihongo ohunga na Jehova, ove mo utu okumusuvera nu mo hara onḓero yokukondja pu mo yenene kutja u mu karere. Ihi matji ku hingi kutja u mu kwizikire mongumbiro kutja mo vanga okumukarera. Ombeibela mai tja auhe ngu ma vanga okukongorera Jesus, ma ‘sokurizemba omuini.’ (Markus 8:34) Ihi matji hee tjike? Matji hee kutja onḓuviro ku Jehova ma rire otjiṋa otjinanḓengu tjinene mehupo roye. Ombango yaJehova onanḓengu tjinene pozonḓero nozondando zoye omuini.—Lesa 1 Petrus 4:2.

 O TIRA KUTJA NGOO TATAIZA

17. Ongwaye ovandu tjiva tji ve he riyandja ku Jehova?

17 Ovandu tjiva kave vanga okuriyandja ku Jehova, orondu ve tira kutja kamaave yenene okuṱiza omakwizikiro wokumukarera. Owo kave vanga okuhihamisa Jehova, poo mape ya ave ripura kutja tji ve he riyandja ku ye, okutja Jehova kemee ve pe ondjo koviṋa mbi mave tjiti.

18. Otjikwaye tji matji ku vatere kutja o ha kara nemuma rokuhihamisa Jehova?

18 Orusuvero rwoye ku Jehova maru ku vatere kutja o ha kara nemuma rokumuhihamisa. Mena rokutja we mu suvera, mo kondjo nomasa okuyenenisa omakwizikiro woye ku ye. (Omuzuvarise 5:4; Ovakolose 1:10) Ove komoo munu kutja otjiṋa otjizeu okutjita ombango yaJehova. Omuapostele Johanes wa tjanga na tja: “Norusuvero rwetu ku Ndjambi eendu tji matu ṱakamisa omatwako we. Nomatwako we kamazeu okuyeṱakamisa.”—1 Johanes 5:3.

19. Ongwaye tji u ha sokutira okuriyandja ku Jehova?

19 Ove ko nakuhepa okurira ohomonena kokutja u riyandje ku Jehova. Eye ka undjire ko kutja tu tjite oviṋa mbi tu hi nakuyenena okutjita. (Epsalme 103:14) Eye me ku vatere kutja u tjite ombango ye. (Jesaja 41:10) Kara nongamburiro mu Jehova nomutima woye auhe, neye me “ku sembamisire ondjira yoye.”—Omiano 3:5, 6.

OMAHONGONONENO NGE ETA ONDJAMO

20. Tji wa zu nokuriyandja omuini ku Mukuru mongumbiro, omukambo uṋe mbu mo sokutoora?

20 Ove mo munu kutja nai wa pu okuriyandja ku Jehova? Tji wa zu nokuriyandja ku Jehova mongumbiro, okutja mo yenene okutoora omukambo mbu mau kongorereko. Ove mo sokupapitisiwa.

21, 22. Ove mo yenene vi ‘okuhongonona’ ongamburiro yoye?

21 Tjivisa omuworonganise worutu rwovanene vombongo kutja we riyandja ku Jehova mongumbiro nu mo  vanga okupapitisiwa. Eye ma karaera ovanene vombongo kutja ve yekutara puna ove ovirihongwa ovitenga vyOmbeibela. Ovanene mba tji mave munu kutja mo yenene okupapitisiwa, owo mave ku raere kutja u papitisiwe pomaworonganeno worukondwa poo wotukondwa wOvahongonone vaJehova ngu maye ya. Pomaworonganeno ngo, pe yandjwa  ehungi ndi kahurura kutja ombapitisimo i heya tjike. Okuzambo omuyandje wehungi ma ningire avehe mbu mave papitisiwa, okuzira omapuriro yevari omapupu. Mokuzira omapuriro ngo, okutja mo “hongonona” ongamburiro yoye.—Ovaroma 10:10.

 22 Okuzambo mo papitisiwa. Mo pundisiwa auhe momeva. Ombapitisimo ndji mai raisa ku avehe kutja ove we riyandja ku Jehova nokutja nai oove umwe wOvahongonone vaJehova.

OMBAPITISIMO YOYE I KURAMENA PO TJIKE?

23. Okupapitisiwa “mena raTate nOmuna nOmbepo Ondjapuke,” ku heya tjike?

23 Jesus wa tja ovahongewa ve mave papitisiwa “mena raTate nOmuna nOmbepo Ondjapuke.” (Lesa Mateus 28:19.) Ihi matji hee tjike? Matji hee kutja ove mo yakura ouhonapare waJehova, otjiungura Jesus tje na tjo mokuyenenisa ondando yaMukuru, nomuano Mukuru mu ma ungurisa ombepo ye ondjapuke okuyenenisa ombango ye.—Epsalme 83:19, EEP; Mateus 28:18; Ovagalate 5:22, 23; 2 Petrus 1:21.

Okupapitisiwa ku raisa kutja mo vanga okutjita ombango yaMukuru

24, 25. (a) Ombapitisimo i kuramena po tjike? (b) Matu kahungirira ku ye mekondwa esenina?

24 Ombapitisimo i kuramena po otjiṋa otjinanḓengu tjinene. Okupundisiwa kehi yomeva ku heya kutja ove wa koza poo wa isa ongaro yoye moo hupu rukuru. Nu okuyeruruka okupita momeva ku heya kutja ove nai mo utu okuhupa omuinyo omupe, imbwi wokutjita ombango yaMukuru. Ku raisa kutja okuza ku nai ove mo utu okukarera Jehova. Tjiwa kutja ko yeriyandja komundu, kotjira tjorive poo kotjiungura kaaṋi. Nungwari wa yandja omuinyo woye ku Jehova.

25 Omeriyandjerero woye maye ku vatere okuhara oupanga wopopezu kuna Mukuru. (Epsalme 25:14) Ihi katji nakuheya kutja omundu opuwo ma yamwa mena rokutja wa papitisiwa. Omuapostele Paulus wa tjanga na tja: “Kareye pokuungurira ondjamo yeṋu amu nondjozikiro nondira ku Ndjambi.” (Ovafilipi 2:12) Ombapitisimo omautiro uriri. Nu hapo mo yenene vi okukara popezu na Jehova? Ekondwa esenina rembo ndi mari ziri epuriro ndo.