1. Tji matu vanga okurihonga ohunga noruyaveze matu sokutara pi?

OVE WA rora okupuratena kombuze moradio noripura kutja ‘Hapo ouye mbwi wa tanda pi?’ Ouye we ura noviwonga ovingi noutwe nga ovandu tjiva tji ve muna kutja omaandero wouye ye ri popezu. Hapo imbwi ouatjiri? Nu pe nomuano wokutjiwa kutja oruyaveze maru kara vi? Ii. Nandarire kutja ovandu kave munu kutja moruyaveze maku ka tjitwa tjike, Jehova Mukuru u tjiwa. Okupitira mOmbeibela eye u tu raera ohunga noruyaveze rwetu na indwi orwehi.—Jesaja 46:10; Jakobus 4:14.

2, 3. Ovahongewa vaJesus aave vanga okutjiwa tjike, nu Jesus we ve zira vi?

2 Indu tji matu lese ohunga nomaandero wouye mOmbeibela, kape nakuheya kutja omayandekero wehi nungwari omaandero wouvi auhe. Jesus aa hongo ovandu ohunga nOuhona waMukuru mbu mau yekuhonaparera ehi. (Lukas 4:43) Ovahongewa ve aave vanga okutjiwa kutja Ouhona mbwo mau ya ruṋe, nowo va pura Jesus nave tja: “Otjiraisiro tjomeero woye notjomaandero wouye mbwi ma rire tjiṋe?” (Mateus 24:3) Jesus kena pe ve pa eyuva nungwari we ve raera ohunga noviṋa mbi mavi tjitwa ngunda omaandero wouye mbwi aye hi ye ya. Oviṋa Jesus mbya tja mavi tjitwa, nai vi tjitwa.

3 Mekondwa ndi, matu kahungirira koviraisiro mbi ri po kutja nai tu hupa moruveze rwokomurungu womaandero wouye. Rutenga, matu kerihonga ohunga novita mbya ri meyuru okuzuva nawa kutja ongwaye oviṋa kombanda yehi tji vya zunḓaka nai.

 OVITA MEYURU

4, 5. (a) Kwa tjitwa tjike meyuru tjimanga indu Jesus tja za nokuzikwa otjOmbara? (b) Otja kOmavandururiro 12:12, ovikeṋa mbyaavi sokutjitwa kombanda yehi Satan tja za nokuyumbwa okuza meyuru?

4 MEkondwa 8 twe rihonga kutja Jesus wa uta okuhonapara otjOmbara meyuru mombura 1914. (Daniel 7:13, 14) Embo rOmavandururiro ri tja: “Nu pa kara ovita meyuru. Mikael [ena rarwe raJesus] novaengeli ve va rwisire otjitjupamuriro [Satan], notjo wina tje ve rwisire novaengeli vatjo.” * Satan nozondemone ze va pandjara ovita mbyo nave nakaurirwa kombanda yehi. Ripura nondjoroka ovaengeli ndji vari na yo! Nu nambano tjike ohunga novandu kombanda yehi? Ombeibela i tja orwo maru rire oruveze oruzeu kovandu. Omena ratjike? Mena rokutja Omudiaboli u nomazenge omanene orondu ‘ma tjiwa kutja u noruveze orusupi uriri.’—Omavandururiro 12:7, 9, 12.

5 Omudiaboli u eta ouzeu ouingi kombanda yehi. Eye u nomazenge mena rokutja u noruveze orusupi uriri ngunda Mukuru e he mu yandeka. Ngatu tare kutja Jesus wa tja ovikwaye mbi mavi tjitwa momayuva omasenina.—Tara kOmambo wokehi 24.

OMAYUVA OMASENINA

6, 7. Matu yenene okutja vi ohunga novita nondjara moruveze rwetu?

6 Ovita. Jesus wa tja: “Otjiwaṋa tjimwe matji sekamene otjiwaṋa otjikwao, nouhona umwe au rwisa ouhona oukwao.” (Mateus 24:7) Ovandu ovengi va ṱa movita moruveze rwetu okukapita oruveze rwarwe mekuruhungi. Ondjivisiro imwe okuza ko-Worldwatch Institute i raisa kutja okuza kombura ndji 1914, ovita vya zepa ovandu vokombanda omangete 100. Ovandu ovengi tjinene  povikando 3 va zepewa movita oure wozombura esere okuza kombura ndji 1900 nga 2000 okukapita imba mba ṱa ozombura ape 1 900 komurungu wanao. Ripura uriri ohunga nomauzeu nomihihamo ovandu ovengi mbi va muna mena rovita!

7 Ondjara. Jesus wa tja: “Maku kara ondjara.” (Mateus 24:7) Nandarire kutja nai pe ungurwa ovikurya ovingi tjinene, ovandu tjiva ngamba kave novikurya mbya yenene okurya. Omena ratjike? Mena rokutja kave novimariva mbya yenene okuranda ovikurya poo ehi romakunino. Ovandu mbe ri kombanda yetau rimwe kave novimariva mbya yenene okurihupisa. Otjira tjOuveruke tjOuye tji tja ovanatje ovengi ve ṱa ombura aihe orondu kape novikurya mbya yenene.

8, 9. Ovikeṋa mbi mavi raisa kutja omahunganekero waJesus ohunga nomanyinganyingiro wehi nomitjise ya rira ouatjiri?

8 Omanyinganyingiro wehi. Jesus wa hunganeka kutja, “Mamu kara omanyinganyingiro wehi omatirise.” (Lukas 21:11) Ombura aihe ku undjirwa ko kutja maku tjitwa omanyinganyingiro wehi omanene. Okuza kombura  ndji 1900, ovandu vokombanda yomangete 2 va ṱa mena romanyinganyingiro wehi. Nandarire kutja ounongo woviungura nai u yenena okutara komurungu woruveze kutja omanyinganyingiro wehi maye tjitwa ruṋe, ovandu ovengi ngamba ve ṱa.

9 Omitjise. Jesus wa hunganeka kutja maku kara ‘omitjise.’ Omitjise ominaumba mavi handjauka tjimanga navi zepa ovandu ovengi. (Lukas 21:11) Nandarire kutja ozonganga ze rihonga omuano wokuverura omitjise omingi, ngunda pe nomitjise mbi ha yenene okuverurwa. Orutuu rumwe rwa tjivisa kutja mombura aihe, ovandu ovengi ve ṱa i omitjise tjimuna o-TB, omalaria nokolera. Ozonganga za muna kutja mu nomitjise 30 omipe nu tjiva vyavyo ngamba kavi nomiti omipange.

OVIKARO VYOVANDU MOMAYUVA OMASENINA

10. Omambo nge ri mu 2 Timoteus 3:1-5, ye yenenisiwa vi ndino?

10 Mu 2 Timoteus 3:1-5, Ombeibela i tja: “Momayuva omasenina mamu kara otuveze otuzeu.” Omuapostele Paulus wa  kahurura kutja ovandu mave ritjindi vi momayuva omasenina. Eye wa tja ovandu mave

  • ripahere oveni ouwa

  • rire omakorokope

  • rire ovehinanḓuviro kovanene

  • rire ovehinakutjokuhepa

  • rire ovehinarusuvero koveṱunḓu rawo

  • rire overiyere vatjinene

  • rire ovanautwe novindandi

  • suvere ehore moruveze rwokusuvera Mukuru

  • tjiti aayo va suvera Mukuru, nungwari kave nakukara nonḓuviro ku ye

11. Otja kEpsalme 92:7, ovandu ovarunde mave tjitwa vi?

11 Ovandu momaturiro woye ve raisa ovikaro mbyo? Mouparanga wouye ovandu ovengi ve ritjinda nao. Nungwari moruyaveze rwopopezu Mukuru ma toora omikambo ohunga nongaro ndji. Eye wa kwizika kutja, “Nandarire kutja ovarunde mave hapa otja ehozu, novatjite vouvi mave nyomoka, komaandero owo mave yandekwa nga aruhe.”—Epsalme 92:7.

 OMBUZE OMBWA MOMAYUVA OMASENINA

12, 13. Ovikeṋa Jehova mbye tu honga momayuva omasenina?

12 Ombeibela ya hunganeka kutja momayuva omasenina ouye mau ura omihihamo nouzeu. Posi yokutja Ombeibela wina i tja maku tjitwa oviṋa oviwa.

“Nu indji Ombuze Ombwa yOuhona mai zuvarisiwa mouye auhe.”—Mateus 24:14

13 Okuzuva Ombeibela nawa. Omuprofete Daniel wa tjanga kutja momayuva omasenina, owomba “porwawo mbe ri ozonongo ombu mave zuu” ouatjiri wOmbeibela. Mukuru ma yandja ounongo kovakarere ve kutja ve zuve Ombeibela nawa okukapita oruveze orukuru. (Daniel 12:9, 10) Jehova wa tjita otjiṋa hi nu tjinene okuza mombura ndji 1914. Okutara kotjihorera, eye we tu honga ounanḓengu wena re nondando ye kehi, nouatjiri ohunga notjisuta tjonguturiro, nokutja pe tjitwa tjike ku eṱe tji twa koka, nombendukiro. Twe rihonga kutja Ouhona waMukuru auyerike ombu mau yenene okuzengurura omauzeu wetu. Wina twe rihonga omuano wokukara nondjoroka nai nokuhupa momuano mbu tjata ku Mukuru. Nu hapo ovakarere vaMukuru ve ungurisa vi ondjivisiro ndji? Omahunganekero warwe maye tu pe eziriro kepuriro ndo.—Tara kOmambo wokehi 21 no 25.

14. Ombuze ombwa yOuhona i zuvarisiwa pi, nu ovandu veṋe mbe i zuvarisa?

14 Oviungura vyokuzuvarisa mouparanga wouye auhe. Ohunga nomayuva omasenina, Jesus wa tja: “Nu indji Ombuze Ombwa yOuhona mai zuvarisiwa mouye auhe.” (Mateus 24:3, 14) Ombuze ombwa ohunga nOuhona waMukuru i zuvarisiwa mouye auhe momahi wokombanda 230 na momaraka wokombanda 700. Otjiperi, mouparanga wouye auhe, Ovahongonone vaJehova okuza “momihoko noviwaṋa avihe,” ve vatera ovandu okuzuva nawa kutja Ouhona waMukuru otjikeṋa nokutja mau  yekututjitira tjike. (Omavandururiro 7:9) Nowo ve tjita nai nokuhina okusutisa omundu. Nandarire kutja ovengi ve ve tonda nu ve tatumisiwa i varwe, kape notjiṋa tji matji yenene okutjaera oviungura vyokuzuvarisa mbi, tjimuna Jesus pa hunganeka.—Lukas 21:17.

OVE MO TJITI VI?

15. (a) Ove u nongamburiro kutja eṱe tu hupa momayuva omasenina, nongwaye tji mo tja nao? (b) Maku ka tjitwa tjike ku imba mbe nonḓuviro ku Jehova na imba mbe mu pirukira?

15 Ove u kambura kutja tu hupa momayuva omasenina? Omahunganekero omengi wOmbeibela ohunga nomayuva omasenina ye yenenisiwa. Moruyaveze rwopopezu, Jehova ma yandja erakiza rokutja omazuvarisiro wombuze ombwa ye manuke nu ‘omaandero’ otji maye ya. (Mateus 24:14) Omaandero maye hee tjike? Owo ovita vyaArmagedon indu Mukuru tji ma kaisapo ourunde auhe. Jehova mau ungurisa Jesus novaengeli ovanamasa okuyandeka avehe mbe pirukira ye nOmuna we. (2 Ovatesalonika 1:6-9) Okuzambo, Satan nozondemone ze kave nokupukisa ovandu rukwao. Nu avehe mbe nonḓuviro ku Mukuru nu mbe yakura Ouhona we mave kamuna omayenenisiro womakwizikiro waMukuru aehe.—Omavandururiro 20:1-3; 21:3-5.

16. Mena rokutja omaandero ye ri popezu, ove mo hepa okutjita vi?

16 Omaandero wouye waSatan mbwi ye ri popezu. Okutja matu sokuripura oveni kutja, ‘Ami me sokutjita tjike?’ Jehova u vanga kutja u rihonge ovingi okuza mOmbeibela. Ove mo sokuvara omakonḓononeno woye wOmbeibela otjotjiṋa otjinanḓengu. (Johanes 17:3) Ovahongonone vaJehova ve kara nozombongarero otjivike atjihe okukondja okuvatera ovandu okuzuva Ombeibela nawa. Kondja okukara pozombongarero nḓa aruhe. (Lesa Ovaheberi 10:24, 25.) Tji we rihongo kutja mo sokutjita  omarundurukiro kaaṋi, o tira okutjita omarundurukiro ngo. Otja tji mo tjiti omarundurukiro ngo, oupanga woye kuna Jehova mau pamene ko.—Jakobus 4:8.

17. Ongwaye ovandu ovengi tji mave himwa indu omaandero tji ye ya?

17 Omuapostele Paulus wa kahurura kutja omayandekero wovandu ovarunde maye ya ngunda ovandu ave hi nokuundjira ko, “otja erunga mouṱuku.” (1 Ovatesalonika 5:2) Jesus wa hunganeka kutja ovengi kave nokuyandja ombakatwi koviraisiro vyokutja tu hupa momayuva omasenina. Eye wa tja: “Omeero wOmuna wOmundu maye sana na imbi mbya tjitirwe momayuva waNoa. Omayuva nga wokomurungu womupupo ovandu iyave ri nokunwa, novarumendu novakazendu iyave kupasana nga keyuva ndi Noa nda hitire motjitendeze. Nungwari owo kave tjizire imbi mbiyavi tjitwa nga omupupo tji we ya nau ve twara avehe. Otjinga amape kara nao indu Omuna wOmundu tje ya.”—Mateus 24:37-39.

18. Jesus we tu pa erakiza riṋe?

18 Jesus we tu rakiza kutja atu yandjere kutja ‘eraru nokuṱomanuwa omazeu, nozongendo zouye mbwi,’ ze tu iseko ombango koviṋa ovisemba. Eye wa tja omaandero maye tu “vaza ohaze.” Eye wina wa tja “oro mari werereke avehe mba tura kombanda yehi arihe.” Okuzambo wa weza kutja, “Kareye katumba nu mu kumbe aruhe kutja mu hare omasa okutuurunga nokuhinotjipo mu imbi avihe mbi mavi tjitwa, nokukurama komurungu wOmuna wOmundu.” (Lukas 21:34-36) Ongwaye tje ri otjiṋa otjinanḓengu ku eṱe okuyandja ombakatwi kerakiza raJesus? Orondu moruyaveze rwopopezu ouye waSatan ourunde mbwi mau yandekwa. Owomba porwawo mba yakurwa i Jehova na Jesus ombu mave katuurunga omaandero wouye nave kahupa nga aruhe mouye oupe.—Johanes 3:16; 2 Petrus 3:13.

^ par. 4 Mikael ena raJesus Kristus rarwe. Tji mo vanga ondjivisiro yokomurungu tara kOmambo wokehi 23.