Twende kovidio oini

Twende komurya

Ovahongonone vaJehova

Toorora eraka Otjiherero

 EKONDWA 1

Mukuru omungendu?

Mukuru omungendu?

1, 2. Ovandu tjinene ve pura omapuriro yeṋe?

OVANATJE ve pura omapuriro omengi. Nandi wa kondjo okuvekahururira otjiṋa, owo ngunda ve pura kutja, ‘Ongwaye?’ Nu tji wa kondjo okuvepa eziriro, owo mape ya ave pura kutja, ‘Omena ratjike?’

2 Kutja oweṱe ovanatje poo ovandu ovanene, atuhe tu pura omapuriro. Eṱe mape ya atu kara nomapuriro ohunga nokutja matu ri ye, matu zara ye, poo matu randa tjike. Poo mape ya atu kara nomapuriro omananḓengu ohunga nehupo poo ohunga noruyaveze. Nungwari tji tu hina okumuna omaziriro omasemba komapuriro nga, mape ya atu isa okupaha omaziriro.

3. Ongwaye ovandu ovengi tji ve muna kutja kamaave yenene okumuna omaziriro komapuriro wawo omananḓengu?

3 Hapo Ombeibela i nomaziriro komapuriro omananḓengu ngu tu pura? Ovandu tjiva mape ya ave munu nao, posi yokutja ve muna kutja Ombeibela onḓeu okuizuva. Owo mape ya ave munu kutja ovahonge ombe nomaziriro uriri. Nu varwe ve ṱohoni okuitavera kutja kave nomaziriro komapuriro otja ingo. Ove u noumune uṋe?

4, 5. Ove u nomapuriro yeṋe omananḓengu? Ongwaye tji mo sokupaha omaziriro nga tji we ye munu?

4 Ove mape ya u nonḓero yokumuna omaziriro komapuriro tjimuna: Hapo mbi hupira tjike? Tji mba koka me i pi? Mukuru omundu ngu ri vi? Omuhonge omutjiukwa Jesus wa tja: “Ningireye nu mamu pewa; paheye nu mamu munu; kongoreye nu mamu patururirwa.”  (Mateus 7:7) O yumbu ohama nga tji wa munu omaziriro omasemba komapuriro woye.

5 Indu tji wa ‘paha’ omaziriro, mo yevaza mOmbeibela. (Omiano 2:1-5) Omaziriro nga kamazeu okuyezuva. Mbi mo rihongo mavi ku vatere okuhupa ehupo ewa nai nu mavi ku pe omaundjiro omawa woruyaveze. Nambano ngatu hungirire kepuriro rimwe nda kurungisa ovandu ovengi.

MUKURU HAPO U NAKONATJA NA EṰE POO OMUNDU NGU HI NOMBINḒU KOMUTIMA?

6. Ongwaye ovandu tjiva tji ve muna kutja Mukuru ke nakonatja nomauzeu wawo?

6 Ovandu ovengi ve muna kutja Mukuru ke nakonatja na eṱe. Owo ve muna kutja, andakuzu Mukuru u nakonatja na eṱe, ouye atjau rira oruveze oruwa. Ouye we ura novita, onyengo noruhoze. Ovandu ve vera, ve muna omauzeu nu ve ṱa. Ovandu tjiva ve himwa kutja, ‘Ndovazu Mukuru u nakonatja na eṱe, ongwaye tje ha isa po omauzeu aehe nga?’

7. (a) Ovahonge vozokereka ve honga vi ovandu kutja Mukuru ke nombinḓu komutima? (b) Ongwaye tji matu yenene okukara nongamburiro kutja Mukuru kangu eta oviṋa ovivi mbi tjitwa?

7 Ovahonge vozokereka povikando tjiva ve tjita kutja ovandu ve ripure kutja Mukuru ke nombinḓu komutima. Tji pa tjitwa oumba ounene, owo ve tja ombango yaMukuru. Owo ve tja eye wa vanga kutja oumba mbo u tjitwe. Tji mave tja nao, owo tjiri ve yandja ondjo ku Mukuru. Nungwari Ombeibela i honga kutja Mukuru kangu eta ouvi. Jakobus 1:13 mari tu raere kutja Mukuru ka roro omundu nouvi. Oro mari tja: “Omundu ngu ri momarorero nga a ha tja: ‘Omarorero nga maye zu ku Ndjambi.’ Orondu Ndjambi ka rorerwa kouvi, nEye omuini ka roro omundu.” Ihi matji raisa kutja nandarire kutja  Mukuru keya tjaera oviṋa ovivi okutjitwa, eye kangu vi tjita. (Lesa Job 34:10-12.) Ngatu tare kotjihorera.

8, 9. Ongwaye tji ma rire navi okuyandja ondjo ku Mukuru mena romauzeu ngu tu muna? Yandja otjihorera.

8 Ripura nomuzandona ngu kara pu novanene ve. Ihe we mu suvera tjinene nu we mu honga omuano wokutjita ozondando ozombwa. Okuzambo omuzandona ngwi a utu okupirukira ihe na tjindi ponganda. Eye a katjita oviṋa ovivi na kahita moumba. Ove mo yandja ondjo ku ihe koviṋa mbya tjitwa ku ye mena rokutja kena pa tjaera omuzandona we okutjinda ponganda po? Kako! (Lukas 15:11-13) Momuano otjingewo, Mukuru ka tjaerere ovandu tji ve mu pirukira nokutjita oviṋa ovivi. Okutja, tji pa tjitwa otjiṋa otjivi, ngatu tjiwe kutja Mukuru kangwe tji tjiti. Ma rire navi okuyandja ondjo ku Mukuru.

9 Mukuru u nepu ewa nda yandjerera kutja oviṋa ovivi vi tjitwe. Ove mo kerihonga kutja Ombeibela i tja vi ohunga notjiṋa hi mEkondwa 11. Nungwari kara nongamburiro kutja Mukuru we tu suvera nu kangu eta omauzeu kovandu. Moruveze rwanao, eye Erike ongu ma yenene okuzengurura omauzeu wetu.—Jesaja 33:2.

10. Ongwaye tji matu yenene okukambura kutja Mukuru ma isa po ouhasemba auhe mbwa tjitwa i ovandu ovarunde?

10 Mukuru omuyapuke. (Jesaja 6:3) Oviṋa avihe mbye tjita ovikohoke nu oviwa. Okutja eṱe matu yenene okukambura mu ye. Ovandu kave ri nao. Povikando tjiva, owo ve tjita oviṋa ovivi. Nandarire omunane ngu nomutima omuwa tjiri, ke nomasa okuisa po onyoneno ovandu ovarunde ndji ve eta kombanda yehi. Kape nomundu ngu nomasa tjimuna owaMukuru. Mukuru ma yenene nu me yekuisa po onyoneno ndja tjitwa i ovandu ovarunde. Mukuru me yekuisa po ourunde oparukaze.—Lesa Epsalme 37:9-11.

 OMAUZEU NGU TU MUNA YE ṰUNA VI KU MUKURU?

11. Mukuru u noumune uṋe ohunga nomazeu ngu u muna?

11 Mukuru u noumune uṋe ohunga noviṋa mbi tjitwa mouye na wina mbi tjitwa mehupo roye ndino? Ombeibela i honga kutja Mukuru “wa suvera ousemba.” (Epsalme 37:28) Okutja eye tjiri u rikenda tjinene ohunga nokutja ovikeṋa mbi ri ovisemba nu ovikeṋa mbi he ri ovisemba. Eye ka vanga kutja ovandu ve mune ouzeu. Ombeibela i tja Mukuru “wa ṱoruhoze tjinene” indu ouvi tji wa takavarere mouye moruveze orukuru. (Genesis 6:5, 6) Mukuru ke ya runduruka. (Maleaki 3:6) Ombeibela i tja Mukuru tjiri u rikendera kove.—Lesa 1 Petrus 5:7.

Ombeibela i honga kutja Jehova Omuute waavihe omunarusuvero

12, 13. (a) Ongwaye tji tu suvera nokurikendera ku varwe, nu tu noumune uṋe ohunga nouhasemba mbu tjitwa mouye? (b) Ongwaye tji matu yenene okukara nongamburiro kutja Mukuru tjiri ma isapo omauzeu aehe nouhasemba auhe?

12 Ombeibela wina i tja omundu wa ungurwa kosaneno yaMukuru. (Genesis 1:26) Ihi matji hee kutja Mukuru we tu ungura novikaṋena oviwa tjimuna eye mbye na vyo. Okutja tji u hihamwa omutima tji wa munu ovandu ovehinandjo amave munu ouzeu, Mukuru wina u hihamwa omutima kombanda yanao! Matu tjiwa vi?

13 Ombeibela i tu honga kutja ‘Ndjambi orusuvero.’ (1 Johanes 4:8) Oviṋa avihe Mukuru mbye tjita u hingwa i orusuvero. Okutja, eṱe tu suvera mena rokutja Mukuru u suvera. Ripura notjiṋa hi: Andakuzu ove u nomasa wokuisapo omauzeu nouhasemba auhe, otjo tjita nao? Tjiri otjo tjita mena rokutja wa suvera ovandu. Mukuru ma tjiti vi? Eye u nomasa, nu mena rokutja we tu suvera, eye me yekuisapo omauzeu nouhasemba auhe. Kara nongamburiro kutja omakwizikiro waMukuru aehe nga  tamunwa pomautiro wembo ndi maye yenenisiwa! Nungwari, kutja u kare nongamburiro momakwizikiro nga, ove mo hepa okutjiwa ovingi ohunga na Mukuru.

MUKURU U VANGA KUTJA U MU TJIWE

Tji mo vanga okurira epanga romundu, ove u mu raera ena roye. Mukuru u tu raera ena re mOmbeibela

14. Ena raMukuru otjikwaye, nu matu tjiwa vi kutja tu sokuriungurisa?

14 Tji mo vanga okurira epanga romundu, otjikeṋa tji u mu raera rutenga? Ena roye. Hapo Mukuru u nena? Ozokereka ozengi ze tja ena re oMukuru poo Ndjambi poo Muhona, nungwari inga kamana we. Owo omaisaneno wondjozikiro uriri, tjimuna omambo nga “ombara” poo “opresindenda” tji ye ri omaisaneno wondjozikiro. Mukuru we tu raera kutja ena re oJehova. Epsalme 83:19 [EEP] mari tja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.” Ovatjange vOmbeibela va ungurisa ena raMukuru povikando ovingi. Jehova u vanga kutja u tjiwe ena re nu u ri ungurise. Eye u ku raera ena re kutja ove u rire epanga re.

15. Ena ndi Jehova ri heya tjike?

15 Ena raMukuru, Jehova ri nomaheero omananḓengu. Ena re ri heya kutja Eye ma yenenisa omakwizikiro aehe nga tjiti nu ma yenenisa ondando ngamwa ndje ripurire ko.  Kape notjiṋa tji matji mu tjaere. OJehova erike ngu ma yenene okukara nena ndi. *

16, 17. Hapo omambo nga: (a) “Omunamasaaehe” (b) “Ombara yaaruhe” (c) “Omuute,” ye heya tjike?

16 Otja tji twa lese rukuru, Epsalme 83:19 [EEP] ri tja nai ohunga na Jehova: ‘Ove erike Uokombanda kombanda jehi arihe.’ Omavandururiro 15:3 wina mari tja: “Muhona, Ndjambi, Omunamasaaehe, oviungura vyoye, tjiri,  ovinene novihimise. Mbara yoviwaṋa avihe, ozondjira zoye, tjiri, ozosemba nozouatjiri!” Omaisaneno nga “Omunamasaaehe” maye hee tjike? Maye tu hongo kutja Jehova omunamasa okukapita ngamwa omundu mouye. Nu omaisaneno nga “Ombara yaaruhe” ye heya kutja Jehova erike ongwa ri po aruhe. Epsalme 90:2 mari kahurura kutja eye ma karerere aruhe nga aruhe. Ihi katjiṋa otjiwa nao!

17 Jehova erike ongu ri Omuute. Omavandururiro 4:11 mari tja: “Muhona, Ndjambi wetu, Ove wa pwa ondjozikiro nondengero nomasa; orondu Ove wa uta oviṋa avihe; novyo avihe vya utwa navi pewa omuinyo i ombango yoye.” Avihe mbi mo yenene okuripurira ko, okuza kovaengeli nga kozonyose nḓu tu muna ouṱuku, ovihape mbi hapa komiti nga komahundju nge ri mokuvare, avihe mbi vya memwa i Jehova!

 OVE MAPE YA O RIRE EPANGA RAJEHOVA?

18. Ongwaye ovandu tjiva tji ve muna kutja kamaave yenene okurira omapanga waMukuru? Ombeibela i honga tjike ohunga notjiṋa hi?

18 Ovandu tjiva tji mave lese ohunga novikaṋena vyaJehova ovihimise, ve hara emuma kaṱiṱi nu ve ripura kutja, ‘Mukuru omunamasa tjinene, omunanḓengu nu u ri kokure na ami, mape ya e rikendere ku ami nao?’ Nu hapo, imbwi ooumune Mukuru mbwe vanga kutja tu kare na wo po? Kako, nokaparukaze. Jehova u vanga okutumbuka popezu na eṱe. Ombeibela i tja, Mukuru “ke ri kokure na eṱe atuhe.” (Oviungura 17:27) Mukuru u vanga kutja ove u tumbuke popezu na ye. Neye me ku kwizikire kutja ma ‘tumbuka popezu na ove.’—Jakobus 4:8.

19. (a) Mo yenene vi okurira epanga raMukuru? (b) Ovikaṋena viṋe vyaJehova mbi ku tjatera tjinene?

19 Ove mo yenene vi okurira epanga raMukuru? Jesus wa tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.” (Johanes 17:3) Kayende komurungu okurihonga, nu mo utu okutjiwa Jehova na Jesus. Tji wa tjiti nao mo yenene okukamuna omuinyo waaruhe. Okutara kotjihorera, twe rihonga rukuru kutja “Ndjambi orusuvero.” (1 Johanes 4:16) Posi yokutja eye wina u novikaṋena vyarwe oviwa. Ombeibela i tja Jehova ‘oNdjambi omunaunyaṋutima nomunatjari, ngu nomuretima, nu ngwa tumba otjari nouṱakame.’ (Eksodus 34:6) Eye “omuwa, nu u isira.” (Epsalme 86:5) Mukuru u nomuretima nomuṱakame. (2 Petrus 3:9; Ovaheberi 10:23) Otja tji mo lese ohunga na Ye mOmbeibela, ove mo kerihonga ohunga novikaṋena vye oviwa.

20-22. (a) Matu yenene vi okutumbuka popezu na Mukuru ndovazu katu mu munu? (b) Mo sokutjita vi indu ovandu tji mave ku tjaere okurihonga Ombeibela?

20 Mo yenene vi okutumbuka popezu na Mukuru  ndovazu komumunu? (Johanes 1:18; 4:24; 1 Timoteus 1:17) Tji mo lese ohunga na Jehova mOmbeibela, mo yenene okumutjiwa nawa. (Epsalme 27:4; Ovaroma 1:20) Otja tji mo rihongo ovingi ohunga na Jehova, mo utu okumusuvera nokutumbuka popezu na ye.

Omurumendu omukwate u suvera ovanatje ve, posi yokutja Tate womeyuru we tu suvera kombanda yanao

21 Ove mo utu okuvara Jehova otja Tate. (Mateus 6:9) Eye we tu pa omuinyo nu wina u vanga kutja tu kare nehupo ewa. Ihi otjiṋa ihe kangamwa worusuvero tje zerira ovanatje ve. (Epsalme 36:9) Ombeibela i honga kutja ove mo yenene okurira epanga raJehova. (Jakobus 2:23) Ripura notjiṋa otjiwa ho. Jehova ngu ri Omuute woviṋa avihe u vanga kutja ove u rire epanga re!

22 Ovandu tjiva mape ya ave ha vanga kutja u rihonge Ombeibela. Owo mape ya ave tira kutja mo rundurura ongamburiro yoye. Nungwari o yandjere omundu okukutjaera kutja u rire epanga raJehova. Eye Eepanga esembasemba ndi mo yenene okukara na ro.

23, 24. (a) Ongwaye tji mo sokukayenda komurungu okupura omapuriro? (b) Matu kahungirira ku ye mekondwa ndi mari kongorere ko?

23 Otja tji mo rihongo Ombeibela, mape kara oviṋa mbi u hi nakuzuva nawa. O ṱohoṋi okupura omapuriro poo okuningira ombatero. Jesus wa tja matu sokurisusuparisa tjimuna ounatje. (Mateus 18:2-4) Ovanatje ve pura omapuriro omengi. Mukuru u vanga kutja u mune omaziriro. Okutja konḓonona Ombeibela nawa, u tjiwe kutja mbi mo hongwa ouatjiri poo indee.—Lesa Oviungura 17:11.

24 Omuano omusemba wokurihonga ohunga na Jehova, okukonḓonona Ombeibela. Mekondwa ndi mari kongorere ko, matu katara kutja ongwaye Ombeibela tji ya panguka komambo warwe.

^ par. 15 Ombeibela yoye tji i hina ena ndi Jehova poo tji mo vanga okutjiwa ovingi ohunga nomaheero wena raMukuru nokutja rilesewa vi, arikana tara kOmambo wokehi 1.