Isebel wari nomuatje omukazona wena Atalja, ngwaa tjiti oviṋa ovivi tjimuna ina Isebel. Atalja wa kupirwe i ombara yaJuda. Indu omurumendu we tja ṱa omuatje we omuzandu wa uta okuhonapara. Posiya indu omuatje we omuzandu tja ṱa, Atalja we ritjita omuini omunane waJuda. Nu otja kondja okunyona omuhoko auhe weṱunḓu rombara, nokuzepa omundu auhe ngwaa vanga okurira omunane moruveze rwe, nandarire ovazandu vovanatje ve omuini. Ovandu avehe aave mu tira.

Omupristeri Omunene Jojada nomukazendu we wena Joseba, aave tjiwa kutja Atalja aa tjiti oviṋa ovivi. Owo va twa omiinyo vyawo moumba nave horeke omuatje womuatje waAtalja omuzandu, wena Joas. Owo ve mu kurisira pondjuwo ondjapuke yaMuhona.

Indu Joas tja ri nozombura 7, Jojada wa woronganisa ovahongore nOvalevi na tja ku wo: ‘Tjevereye omivero vyondjuwo ondjapuke yaMuhona namu yandjere kutja omundu ma hite.’ Tjazumbo Jojada wa tjita Joas ombara yaJuda nemu twako ekori rouhona kotjiuru tje. Ovandu vaJuda va ravaera nave tja: “Ombara ngai hupe orure!”

Ombara oserekaze Atalja ya zuva ovandu tjaave ravaere nu ya hakahana okuyenda kondjuwo ondjapuke yaMuhona. Indu tja muna ombara ombe otja ravaera na tja: ‘Ovineya! Ovineya!’ Ovahongore otji va kambura ombara oserekaze ndji ave twara nave kemuzepa. Nu hapo ongaro ombi ndja honga motjiwaṋa ya tjitwa vi?

Jojada wa vatera otjiwaṋa okutjita omerikutiropamwe kuna Jehova, owo mu va kwizika kutja mave rikotamene ku Ye erike. Jojada wa tjita kutja ovandu ve nyone ondembeli yaBaal nokunyanyaura oviserekarera. Eye wa toorora ovapristeri nOvalevi  okuungura pondjuwo ondjapuke yaMuhona kokutja ovandu ve ute okurikotamena mbo rukwao. Eye wa zika ovatjevere pomuvero wondjuwo ondjapuke yaMuhona okutjevera kutja ape he ya omundu omuhakohoke. Okuzambo Jojada novahongore va twara Joas kondjuwo youhona nave mu twa kotjihavero tjouhona. Ovandu vaJuda va ri nenyando tjinene. Owo va uta okukarera Jehova, nu nai va kuturwa komukazendu omurunde Atalja na komerikotameneno waBaal. Wa munu kutja Jojada wa vatera vi ovandu ovengi?

“Amu tira imba mbe zepa orutu, nungwari mbe ha sora okuzepa omuinyo; tjinene tireye Ndjambi ngu ma sora okunyonena orutu nomuinyo motjovasengwa.”​—Mateus 10:28