Salomo ngunda e rikotamena ku Jehova, mwa ri ohange moIsrael. Posiya Salomo wa kupire ovakazendu ovengi vozonganda nu ovakazendu mba aave rikotamene kovisenginina. Kouṱiṱiṱiṱi Salomo wina wa uta okurikotamena kovisenginina. Jehova wa pindikire na tja ku Salomo: ‘Ouvara waIsrael wa isakewa kove neṱunḓu roye nu wa haṋewa pokati. Ami me yandja orupa indwi orunene ku umwe wovakarere voye neṱunḓu roye mari honaparere po orupa indwi oruṱiṱi uriri.’

Jehova wina wa tjita ondyero ndji momuano warwe omukahu. Umwe wovakarere vaSalomo wena Jerobeam aa kawondja mondjira indu tja hakaena nomuprofete Ahija. Ahija wa taura ombanda ye yokombanda motupa 12 na raere Jerobeam a tja: ‘Jehova ma isako ouhona waIsrael keṱunḓu raSalomo ne u haṋa motupa tuvari. Kambura otupa murongo twi orondu ove mo rire ombara kombanda yomihoko omurongo.’ Ombara Salomo ya zuva ohunga notjiṋa hi nu ya vanga okuzepa Jerobeam! Nu Jerobeam wa taurira koEngipte. Kombunda Salomo wa ṱa, nu omuzandu we Rehabeam ongwa rira ombara. Okuzambo Jerobeam wa muna kutja onawa okuyaruka koIsrael.

 Ovanene vaIsrael va raera Rehabeam kutja, ‘Tji mo tjindi otjiwaṋa nawa, otjo matji rire otjiṱakame kove.’ Posiya omapanga waRehabeam mba ri omitanda va tja: ‘Ove mo sokuvetjinda navi! Ve ungurisa tjinene!’ Rehabeam wa puratena kondunge ndja pewa i omapanga we nga. Eye wa tjinda otjiwaṋa navi notjo atji utu okumupirukira. Owo va tjita Jerobeam ombara yomihoko omurongo mbya uta okutjiukwa otjouhona waIsrael. Omihoko vivari vyarwe vya uta okutjiukwa otjouhona waJuda nowo wa kara nouṱakame ku Rehabeam. Omihoko 12 vyaIsrael nambano vya haṋika.

Jerobeam kaa vanga kutja otjiwaṋa tje tji kerikotamene moJerusalem tji tja ri ouhona waRehabeam. Ove mo tjiwa kutja omena raye? Jerobeam aa tira kutja owo mave poka ku ye nave utu okukarera Rehabeam. Okutja otja ungura ovisenginina vivari vyozondana zongoldo na raere otjiwaṋa tje kutja, ‘Jerusalem tji ri kokure. Mamu yenene okurikotamena mba uriri.’ Otjiwaṋa tja uta okurikotamena kozondana zongoldo nḓa natji zembi Jehova rukwao.

‘Amu kara nehore rimwe na imba mbe ha kambura mu Kristus! Mape ya vi ousemba nouhasemba vi nanene kumwe? Pe noruwano rwatjike pokati komukambure nomuhakambura?’​—2 Ovakorinte 6:14, 15