Salomo tja za nokurira ombara yaIsrael, Jehova we mu pura na tja: “Mo vanga kutja mbi ku pe tjike?” Salomo wa tja: ‘Owami omuṱiṱi, nu hi notjiṋa tji me tjiwa. Arikana ndji pa ounongo kutja mbi yenene okuhonaparera otjiwaṋa tjoye.’ Jehova wa tja: ‘Mena rokutja we ndji ningire ounongo, Ami me tjiti kutja u rire omundu onongo tjinene povandu avehe kombanda yehi. Ami wina me ku pe outumbe ouingi. Tji wa kara nonḓuviro ku ami, mo hupu orure.’

Salomo wa uta okutunga ondjuwo ondjapuke yaMuhona. Eye wa ungurisa ongoldo, osilveri, omiti nomawe inga omasembasemba. Ovarumendu novakazendu mba ri nondjiviro ombwa omba tunga ondjuwo ondjapuke. Kombunda yozombura hambombari, ondjuwo ondjapuke ya manuka nu ya yenena okuyapurirwa Jehova. Oyo ya ri notjipunguhiro nu kwa ri nozombunguhiro ku tjo. Salomo wa wora ozongoro komurungu wotjipunguhiro a kumbu na tja: ‘Arikana Jehova, ondjuwo ndji kanene tjinene nu kambwa tjinene kove, posiya arikana yakura omerikotameneno nozongumbiro zetu.’ Jehova wa ri noumune uṋe ohunga nondjuwo ondjapuke ndji nongumbiro yaSalomo? Tjimanga Salomo tja mana okukumba, kwa rauka omuriro okuza keyuru nau ningiririsa ombunguhiro ndja ri kotjipunguhiro. Jehova wa yakura ondjuwo ondjapuke ndji. Ovaisrael tji va muna otjiṋa hi, va ri nondjoroka tjinene.

Ombara Salomo aai tjiukirwa kounongo wayo mehi raIsrael arihe na komahi wokokure. Ovandu aave ya ku Salomo okupaha ombatero komauzeu wawo. Nandarire ombara oserekaze yaSaba ye ya okurora Salomo nomapuriro omazeu. Oyo tji ya zuva omaziriro waSalomo, ya tja: ‘Hee kambura moviṋa ovandu mbi ve ndji raera ohunga na ove, posiya nai mba munu kutja oove onongo tjinene okukapita mbi mba zuva. Mukuru woye Jehova we ku sera ondaya.’ Ehupo ra ri ewa tjinene kotjiwaṋa tjaIsrael nu ovandu va ri nondjoroka. Posiya oviṋa vyeya pokurunduruka.

“Imba pe na umwe ngu ri omunene pu Salomo.”​—Mateus 12:42