Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 39

Ombara ondenga yaIsrael

Ombara ondenga yaIsrael

Jehova wa yandjere ovapangure kOvaisrael kutja arire mbe ve hongorere, posiya Ovaisrael aave vanga ombara. Owo va raera ku Samuel nave tja: ‘Oviwaṋa avihe ongondoroka na eṱe vi nozombara. Eṱe matu vanga ombara wina.’ Samuel aa munu kutja ihi otjiṋa otjivi tji va tjiti, okutja wa raera otjiṋa hi ku Jehova mongumbiro. Jehova wa tja ku ye: ‘Otjiwaṋa katji ya nakaura ove. Tja nakaura ami. Ve raera kutja mave yenene okukara nombara, posiya ngave tjiwe kutja ombara ndji mai vanga oviṋa ovingi okuza ku wo.’ Posiya otjiwaṋa tja tja: ‘Eṱe katu nakonatja. Matu vanga ombara!’

Jehova wa raera Samuel kutja omurumendu wena Saul ongu ma rire ombara yawo ondenga. Indu Saul tja karyangera Samuel koRama, Samuel wa zika Saul otjombara ne mu tirire omaze motjiuru tje.

Kombunda Samuel wa isana Ovaisrael ne ve raisire ombara yawo ombe. Posiya kaave yenene okumumuna. Mo tjiwa kutja omena raye? Omena rokutja eye wa ṱara momitwaro. Korusenina ve mu muna nave mu eta pendje ave mu kuramisa mokati kotjiwaṋa. Saul wa ri omure povandu avehe nu wa ri omuwa tjinene mombuniko. Samuel wa tja: “Tareye, ingwi ngwa toorora i Muhona.” Otjiwaṋa tja ravaera natji tja: “Ombara ngai hupe orure!”

Rutenga Ombara Saul aai puratene ku Samuel nu ya ri nonḓuviro ku Jehova. Posiya eye kombunda wa runduruka. Okutara kotjihorera, ombara kaai sokutjita ozombunguhiro. Otjikando tjimwe, Samuel wa raera Saul kutja nge mu undje nga tje ya, posiya Samuel wa womba okuya. Okutja Saul wa tya kutja ma tjiti ozombunguhiro nḓo omuini. Samuel wa raisa ongaro iṋe? Eye wa tja ku ye: ‘Ove wa sokutja wa puratena ku Jehova.’ Hapo Saul we rihongera kozondataiziro ze?

Kombunda Saul tja karwa ku nOvaamalek, Samuel wa raera Saul kutja a yama ngamwa otjiṋa. Posiya Saul wa tya kutja ke nokuzepa Ombara Agag. Jehova wa raera Samuel na tja: ‘Saul wa poka ku  ami nu katjiti otja pu me mu raere.’ Samuel wa hihamwa omutima tjinene na raere Saul a tja: ‘Mena rokutja ko nonḓuviro ku Jehova rukwao, eye ma ziki ombara yarwe.’ Indu Samuel tja tanauka kutja ma yende, Saul wa nana ombanda yaSamuel yokombanda nai tauka. Okuzambo Samuel wa raera Saul na tja: ‘Jehova wa isako ouhona kove.’ Jehova aa vanga okuyandja ouhona we komundu ngwe mu suvera nu ngu nonḓuviro ku ye.

“Kokuwa okwo ngwi okukara nonḓuviro ku Ye komurungu wokumupunguhira ozonḓu ozombwa, nḓa ṋuna.”​—1 Samuel 15:22