Ovaisrael ovengi va uta okurikotamena kovisenginina rukwao, okutja Jehova otja yandjera Ovafilisti okuhonaparera ehi rawo. Posiya pari Ovaisrael tjiva mba suverere Jehova. Umwe wawo wa ri omurumendu wena Manoak. Eye nomukazendu we kava ri novanatje. Eyuva rimwe Jehova wa hindire omuengeli komukazendu waManoak. Omuengeli wa tja ku ye: ‘Ove mo panduka omuatje omuzandu neye ma kutura Ovaisrael kOvafilisti. Eye ma rire Omunasirei.’ Mo tjiwa kutja Ovanasirei va ri ovangendu? Owo va ri ovakarere vaJehova vapeke. Owo kaave sokuhora ozondjise zawo.

Kombunda omuzandu waManoak wa kwatwa neye we mu ruka Simson. Indu Simson tje kura Jehova we mu pa omasa omahimise. Eye wa yenena okuzepa ongeyama nomake we omuini. Otjikando tjimwe, Simson wa zepa Ovafilisti 30 erike uriri. Ovafilisti kaave mu vanga nu tjandje ve paha omiano vyokumuzepa. Ouṱuku umwe Simson ngunda a rara moGasa, owo va ya komuvero wotjihuro okukaundja kutja ve mu zepe muhuka omunene tji pa tji. Posiya mokati kouṱuku Simson wa penduka nai komuvero wotjihuro nu a putura omuvero. We u toora omuini koviṱuve vye nga kondomba yondundu ndja ri meṋe yaHebron!

Kombunda Ovafilisti va ya komukazendu wena Delila, ave tja: ‘Eṱe matu ku sutu ovisilveri omayovi tji we tu konḓononene kutja ongwaye Simson tje nomasa nao. Matu vanga okumukambura tu mu twe monḓorongo.’ Delila aa vanga ovimariva okutja wa itavera. Rutenga Simson wa panḓa okumuraera kutja ongwaye tja ri nomasa omahimise nao. Posiya Delila wa kara pokumupura ngandu Simson tje mu raera otjiundikwa hi na tja: ‘Ozondjise zandje kaze ya rora okuhorwa mena rokutja owami Omunasirei. Ozondjise zandje tji za horwa tjandje mba pandjara omasa wandje.’ Simson wa tjita ondataiziro okumuraera otjiṋa ho nu, poo vi?

 Delila wa raera Ovafilisti tjimanga a tja: ‘Nambano mba tjiwa kutja ongwaye tje nomasa!’ Wa zezengera Simson pomatumbo we nga tja rara okuzambo a ningire omundu okuhora ozondjise zaSimson azehe. Okuzambo Delila wa ravaera na tja: ‘Simson, Ovafilisti ve ya!’ Simson wa penduka a ngundipara. Ovafilisti ve mu kambura, ave mu twiya omeho nave mu twa monḓorongo.

Eyuva rimwe Ovafilisti omayovi omengi va woronganena pondembeli yamukuru wawo wena Dagon nave tja: ‘Mukuru wetu we tu pe Simson! Pitiseye Simson, tu mu tjite ouhahu!’ Owo ve mu kuramisa pokati kozongunḓe mbari nave utu okumutjita ouhahu. Simson wa ravaera na tja: ‘Arikana Jehova, ndji pa omasa otjikando tjimwe hi uriri.’ Oruveze ndwi tjandje ozondjise zaSimson za hapa rukwao. Eye wa undura ozongunḓe zondembeli nomasa we aehe. Ondembeli aihe ya wira pehi nai zepa ovandu avehe mba ri mo, nu Simson wina wa ṱa.

“Ami me yenene okutjinda avihe, Kristus tjinga e ndji pa omasa womasorero.”​—Ovafilipi 4:13