Omupristeri Omunene wena Eli wa ri novazandu vevari mbaave karere otjovapristeri pondjuwo yaJehova ondjapuke. Omana wawo ya ri ooHofni na Pinhas. Owo kavari nonḓuviro komatwako waJehova nu aave tjindi ovandu navi. Indu Ovaisrael tjaave eta ozombunguhiro zawo ku Jehova, Hofni na Pinhas aave ritukire onyama indji osembasemba. Eli wa zuva ohunga noviṋa mbi nu ka tjitire otjiṋa. Hapo Jehova mape ya a yandjere ovitjitwa mbi kutja vi kayende komurungu?

Nandarire kutja Samuel wa ri omuṱiṱi pooHofni na Pinhas, eye kena pa horera ovikaro vyawo. Jehova aa tjaterwa i ongaro yaSamuel. Ouṱuku umwe Samuel ngunda a rara, eye wa zuva eraka ndaari mu isana. Eye wa penduka, a tupuka ku Eli na tja: ‘Owami ngwi!’ Posiya Eli wa tja: ‘Ami hi ku isanene. Twende u karare rukwao.’ Samuel wa ya na karara. Okuzambo wa isanewa rukwao. Indu Samuel tja zuva eraka ndi otjikando otjitjatatu, Eli wa muna kutja oJehova ngu ma isana Samuel. Okutja wa raera Samuel kutja tja zuu eraka ndo rukwao nga tje nai: ‘Hungira Jehova, omukarere woye ma puratene.’

Samuel wa karara rukwao. Okuzambo wa zuva eraka nda tja: ‘Samuel! Samuel!’ Eye wa zira na tja: ‘Hungira, omukarere woye  ma puratene.’ Jehova wa tja ku ye: ‘Raera Eli kutja Ami me mu vere nu me vere eṱunḓu re arihe. Eye u tjiwa kutja ovanatje ve ve tjita oviṋa ovivi pondjuwo yandje ondjapuke nu katjiti otjiṋa.’ Omuhuka omunene mbwa kongorera ko, Samuel wa paturura omivero vyondjuwo ondjapuke otja tje tjita aruhe. Eye aa tira okuraera omupristeri omunene ohunga noviṋa Jehova mbye mu raere. Posiya Eli we mu isana ne mu pura a tja: ‘Muatje wandje, Jehova we ku raere ye? Ndji raera avihe.’ Okutja Samuel wa raera Eli oviṋa avihe.

Otja Samuel tjee kuru, Jehova wa kara puna ye. Ovaisrael mehi arihe aave tjiwa kutja Jehova wa toorora Samuel kutja ma rire omuprofete nu omupangure.