Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 34

Gideon wa taara Ovamidian

Gideon wa taara Ovamidian

Ovaisrael va isa okukarera Jehova rukwao nu va uta okurikotamena koomukuru voposyo. Oure wozombura hambombari, Ovamidian aave vaka ovinamuinyo vyOvaisrael nokunyona ovikunwa vyawo. Mena rokuvanga okurihoreka kOvamidian, owo va kaṱara mozondimba na mozondundu. Owo ve riheka ku Jehova kutja me ve yame. Jehova wa hinda omuengeli komuzandu wena Gideon. Omuengeli wa tja: ‘Jehova we ku toorora kutja urire ombanḓe yozombanḓe.’ Gideon wa pura na tja: ‘Ovaisrael me ve kutura natjike? Ami hi nonḓengu.’

Gideon atja tjiwa vi kutja Jehova ongwe mu toorora? Eye wa yara omukova wonḓu mehi na tja ku Jehova: ‘Muhuka omunene, tji mu nomueme momukova auyerike uriri ngunda ehi meṋe yawo a ra kukuta, indino ami otji me tjiwa kutja ove mo vanga kutja mbi kuture Ovaisrael.’ Omuhuka warwe, omukova wonḓu wa ningenene nu ehi ra kukutire! Posi yokutja okuzambo Gideon wa ningira kutja omuhuka omunene warwe omukova wonḓu u kukute nungwari pehi pe ningene. Indu tji pa tjitwa nao, Gideon wa tjiwa kutja tjiri Jehova we mu toorora. Eye wa wonga ovarwe ve okukarwisa Ovamidian.

 Jehova wa raera Gideon na tja: ‘Me yandja outoṋi kOvaisrael. Posi yokutja u novarwe ovengi, tjarwe mo kamuna kutja mwa taara otjirwa oveni. Raera omundu ngu ma tira kutja ma yaruke konganda.’ Ovarwe 22 000 va yaruka, nu ape sewa 10 000. Jehova tjazumbo wa tja: ‘Ovarwe voye ngunda ovengi. Ve twara koruharwi rwomeva nu u ve raere kutja ngave nwe omeva. Imba mbu mave yevayeva ovanavita ngunda amave nu omeva ombu mave sokusewa puna ove.’ Ovarumendu 300 uriri ombaave yevayeva ngunda amave nu omeva. Jehova wa kwizika kutja ovarumendu ovaṱiṱi mba ombu mave kataara ovarwe 135 000 vOvamidian.

Mouṱuku mbwo, Jehova wa raera Gideon a tja: ‘Oruveze rwa yenene okukarwisa Ovamidian!’ Gideon wa yandja ozohiva novitjuma mu mwa ri omamunine moukoto kovarumendu. Eye we ve raera kutja, ‘Ndji tarereye, tjazumbo mu tjite otja tji me tjiti.’ Gideon wa posisa ohiva ye, a nyanyaura otjitjuma, a ṱiza emunine meke, na ravaere a tja: ‘Enga raMuhona noraGideon!’ Ovarumendu imba 300 otjiva tjita nao wina. Ovamidian va tira tjinene nave tupuka oupuruke mominda avihe. Mena romburuma owo va uta okurwisasana. Rukwao, Jehova wa vatera Ovaisrael okutaara ovanavita na wo.

“Omasa nge kapita avihe ye za mu Ndjambi, nu kaye zu mu eṱe.”​—2 Ovakorinte 4:7