Kombunda yokuhongorera otjiwaṋa tjaJehova ozombura ozengi, Josua wa ṱa notjiwondo tjozombura 110. Eye tja ri nomuinyo, Ovaisrael aave rikotamene ku Jehova. Posi yokutja Josua tja za nokuṱa, Ovaisrael va uta okurikotamena kovisenginina tjimuna Ovakanaan tjaave tjiti. Motjimbe tjokutja Ovaisrael va isa okutjita ombango yaJehova, Eye wa yandjera ombara yOvakanaan yena Jabin okuvetatumisa. Ovaisrael va ningira ombatero ku Jehova. Nu Jehova we vepa omunane omupe wena Barak, eye ngu ma vatere Ovaisrael okukotoka ku Ye.

Omukazendu omuprofete wena Debora wa isanisa Barak. Eye wa ri nombuze yaJehova ku ye ndjaai tja: ‘Sekama, twende nu u twaerere ovarumendu 10 000, u kahakaene ku notjimbumba tjaJabin tjovita pokaruronḓu Kison. Ingo okumokataarera Sisera, omuhongore wotjimbumba tjaJabin tjovita.’ Nu Barak wa tja ku Debora: “Ove tji mo i puna ami, ami me i.” Debora wa tja: ‘Ami me i puna ove, nungwari tjiwa kutja kaove ngu mo zepa Sisera. Jehova wa tja omukazendu ongu me mu zepa.’

 Debora wa ya puna Barak notjira tje tjovita kOndundu Tabor okukerirongerisira otjirwa. Mokuzuva otjiṋa hi, Sisera wa woronganisa ovarwe ve vovita motjana tjopopezu. Debora wa tja ku Barak: ‘Ndinondi Jehova me ku pe ondoṋeno.’ Barak novarumendu ve 10 000 va heruka kondundu okukahakaena novarwe vaSisera ovanamasa.

Jehova wa tjita kutja okaruronḓu Kison ke pupe. Nu etemba raSisera rovita ra kakatera momunoko. Sisera wa heruka metemba re na tupuka. Barak novarwe ve va havera otjimbumba tjaSisera tjovita, nungwari Sisera wa taura! Nu eye wa kaṱara motenda yomukazendu wena Jael. Eye we mu pa omaihi okunwa nu emu kutjire notjirare. Omurwe ngwa urirwe ngwi, arire tja rara. Nu Jael we mu honina kaṱiṱi nu a tonene omboha yotenda motjiuru tje ne mu zepa.

Barak we ya ama paha Sisera. Jael wa pita motenda ye na tja: ‘Indjo, mbi ku raisire omurumendu ngu mo paha.’ Barak wa hita motenda na munu Sisera ngwa koka. Barak na Debora va tanga Jehova meimburiro mena rondoṋeno ndja yandja kOvaisrael. Ozombura 40 nḓa kongorera ko Ovaisrael va kara mohange.

“Ovazandu novasuko veṋu mave zuvarisa ombuze yandje.”​—Joel 2:28