Ape omieze 2 kombunda yokupita moEngipte, Ovaisrael va vaza pOndundu Sinai nave tono ozondanda zawo. Jehova wa isana Moses me ye kondundu, na tja ku ye: ‘Ami mba yama Ovaisrael. Tji va kara nonḓuviro ku ami nave ṱakamisa omatwako wandje, owo mave rire otjiwaṋa tjandje omuini.’ Moses wa heruka na karaera Ovaisrael oviṋa Jehova mbya hungire. Owo va zira vi? Owo va tja: ‘Eṱe matu ṱakamisa oviṋa avihe Jehova mbye tu raere okutjita.’

Moses wa ronda kondundu rukwao. Imbo Jehova wa tja: ‘Ami me hungire kuna ove momayuva 3 ngu maye ya. Rakiza otjiwaṋa kutja ape ningi omundu ngu meya kOndundu Sinai.’ Moses wa heruka na karongerisa Ovaisrael okupuratena ku Jehova.

Kombunda yomayuva 3, Ovaisrael va muna otutjeno twombura notjikamba otjizorondu kombanda yondundu. Owo wina va zuva omuṱuṱumo omunene nombosiro yohiva. Okuzambo Jehova wa heruka neya kombanda yondundu momuriro. Ovaisrael va urumine tjinene nga tji va uta okuzezera. Ondundu aihe aai kurakura tjinene nu ya kovererwe i omuise. Ombosiro yohiva ai ririre ko onene. Okuzambo Mukuru wa tja: ‘Owami Jehova. Kona okurikotamena koomukuru varwe.’

Moses wa yaruka rukwao kondundu, nu Jehova we mu pa omatwako ngu ma sokuyandja kotjiwaṋa ohunga nokutja ve sokurikotamena vi ku Ye nokutja va sokuritjinda vi. Moses wa tjanga omatwako neye lesere Ovaisrael. Owo va kwizika nave tja: ‘Matu tjiti oviṋa avihe Jehova mbi me tu ningire okutjita.’ Owo va tjita omakwizikiro ku Mukuru. Nu hapo mape ya ave yenenisa omakwizikiro ngo?

“Suvera Muhona Ndjambi woye nomutima woye auhe nomuinyo woye auhe nozondunge zoye azehe.”​—Mateus 22:37