Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 101

Paulus ma hindwa koRoma

Paulus ma hindwa koRoma

Ouyenda waPaulus outjatatu wokuzuvarisa wa kayandera moJerusalem. Ingo wa kakamburwa na tuwa mondeko. Motjirimunikise mokati kouṱuku, Jesus wa tja ku ye: ‘Ove mo i koRoma nu mokazuvarisa ngo.’ Paulus wa toorwa okuza koJerusalem na twarewa koSesarea, kakakara ozombura mbari mondeko. Indu Paulus tja ri motjombanguriro komurungu wOmuhonapare Festus, eye wa tja: ‘Ndji yandjera kutja mbi kapangurwe mombanguriro yombara oini yopondomba yaRoma.’ Festus wa tja: “Ove wa yarura mo otjiposa tjoye kotjombanguriro yombara yopondomba, okutja mo i kombara ndji.” Paulus wa tuwa moskepi na twarewa koRoma, nu ovarumendu 2 ovakambure vomana Lukas na Aristargus wina va ya puna ye.

Ngunda ave ri mokuvare, kweya otjivepo otjinamasa tji tja kara ko oure womayuva omengi. Ovandu avehe aave nangarasi mave koka. Posiya Paulus wa tja: ‘Varumendu, omuengeli we ndji raerere moruroto na tja: “O tira, Paulus! Ove mo vaza koRoma nu kapena umwe pu eṋe ngu ma ṱu.” Yanḓipareye! Kamaatu ṱu.’

Oure womayuva 14, otjivembo tja handjera ko. Korusenina va vaza pokakoverwahi kaMalta. Oskepi ye keriveta mehi nai nyanyauka, posiya ovandu avehe 276 mba ri moskepi va vaza komukuro nokuhina otjipo. Ovandu tjiva va tjaara varwe ve rihanda kovitekero vyoskepi nave tendeza kombanda yomeva nga tji va vaza komukuro. Ovature vaMalta ve ve yakura nawa nave ve yakisire omuriro kutja ve hare oupyu.

Omieze 3 kombunda yanao, ovasorondate va twara Paulus koRoma moskepi yarwe. Tja vaza ngo, ovarumendu ovakambure ve ya okumutjakanena. Paulus tje ve muna, eye wa tja okuhepa ku Jehova na yanḓipara. Nandarire kutja Paulus wa ri omukamburwa, eye aa yandjerwa okukara mondjuwo ndja yazema kehi yondjeverero yomusorondate. Eye wa kara mbo oure wozombura 2. Ovandu aave yekumutara neye we ve zuvarisira ohunga nOuhona waMukuru neve hongo ohunga na Jesus. Paulus wa tjanga otutuu kozombongo moAsie na Judea. Jehova tjiri wa ungurisa Paulus okuhandjaura ombuze ombwa moviwaṋa.

“Nungwari mu avihe mbi tu tjita tu raisa kutja oweṱe ovakarere vaNdjambi. Tu vi tjita nomuretima omunene momauzeu na mombameno na momayaraarero.”​—2 Ovakorinte 6:4