Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 89

Petrus ma pataṋa Jesus

Petrus ma pataṋa Jesus

Indu Jesus tja ri metuwo rokombanda pu novaapostele ve, eye wa tja ku wo: ‘Eṋe amuhe ndino mamu tupuka amu ndjesa.’ Petrus wa tja: ‘Kawami kako! Avehe nandave ku esa, ami hi nokuesa ko.’ Posiya Jesus wa raera Petrus na tja: ‘Ohunguriva ngunda ai hiya vandara, ove mo ndji pataṋa povikando vitatu.’

Indu ovarwe tji va twara Jesus kondjuwo yaKajafas, otjingi tjovaapostele va tupuka. Posiya 2 vawo aave kongorere motjimbumba. Umwe wawo wa ri Petrus. Eye wa ya morumbo rwondjuwo yaKajafas na kawota omuriro. Umwe wovakarere ovasuko wa muna Petrus mondjerera yomuriro na tja ku ye: ‘Ami me ku tjiwa! Ove wina wa ri puna Jesus!’

Petrus wa tja: ‘Kako kawami! Hi nakutjiwa kutja mo hungire tjike!’ Eye wa ya komahitiro worumbo. Posiya tjimanga omukarere warwe omusuko we mu muna na raere kotjimbumba a tja: ‘Omurumendu ngwi wina wa ri puna Jesus!’ Petrus wa tja: “Ami me yana, tjiri, kutja omurumendu ngo hi mu i.” Omurumendu umwe wa tja: ‘Ove oove umwe wawo! Nandarire okuhungira kweraka rwoye maku raisa kutja ove wa za koGalilea tjimuna Jesus.’ Posiya Petrus wa yana na tja: “Omurumendu ngo hi mu i.”

Nu moruveze ndwo, ohunguriva otji ya vandara. Petrus wa muna Jesus ama tanauka nokutara ku ye. Eye wa zemburuka omambo waJesus, ai pendje na karira tjinene.

Moruveze otjingero, Otjira tjOvajuda tja tya kutja matji pangurire Jesus mondjuwo yaKajafas. Owo va tya rukuru kutja mave zepa Jesus, nu nai aave paha epu ewa rokumuzepa. Posiya owo kaave yenene okumuna ondjo mu ye. Korusenina Kajafas wa pura Jesus na tja: ‘Ove oOve Omuna waMukuru’? Jesus wa tja: ‘Ii otjingaperi.’ Kajafas wa tja: ‘Eṱe katu nakuhepa otjiraisiro tjarwe. Wa yamburura Mukuru!’ Otjombanguriro tja itavera natji tja: ‘Omurumendu ngwi  ma sokuṱa.’ Owo va veta Jesus otupyu, ave mu tjekere omate, ave mu twa otjiṋa komeho nave mu tono, amave tja: ‘Tjinangara oove omuprofete, tu raera kutja ouṋe ngwe ku tono!’

Tji kwa tja, owo va twara Jesus ketuwo romaworonganeno wOtjira tjOvajuda ave mu pura rukwao nave tja: ‘Ove oOve Omuna waMukuru?’ Jesus we ve zira na tja: ‘Eṋe mamu tja nao.’ Okuzambo ve mu muna ondjo yokuyamburura Mukuru nave mu twara kondjuwo yaPontius Pilatus youhona, Omuhonapare wOvaroma. Okuzambo pa tjitwa tjike? Indjeye tu tare.

“Oruveze maru ya, nu nai rwe ya, eṋe amuhe tji mamu piziwa, auhe koye, nAmi e sewa erike. Nungwari hi nokusewa erike, Tate tjinga e ri [‘puna ami,’ EEP].”​—Johanes 16:32