Jesus tja za nokuṱa, pe ya omurumendu omutumbe wena Josef, na ningire ku Pilatus kutja ma iseko orutu rwaJesus komuti. Josef we mu manga momarapi na twako ovyomoro omuwa ne mu twa meyendo mu mu hiya rora okupakwa omundu. Eye wa ningira kutja pe tu we ewe enene pomahitiro weyendo. Ovapristeri oviuru va raera Pilatus nave tja: ‘Matu tira kutja ovahongewa vaJesus tjiva mave toora orutu rwe nave tja eye wa penduka movakoke.’ Okutja Pilatus wa tja ku wo: ‘Pateye eyendo nu mu twe po ovatjevere.’

Omayuva 3 kombunda yanao, rukuru muhuka omunene, ovakazendu tjiva va ya keyendo nave kavaza ewe nda ri pomahitiro ara isapewa. Tji va hita moukoto, omuengeli ngwa ri mo wa tja ku wo: ‘Amu tira. Jesus wa pendurwa movakoke. Twendeye mu karaere ovahongewa ve kutja ve kahakaenene moGalilea.’

Maria Magdalena wa hakahana okukapaha Petrus na Johanes. Eye wa tja ku wo: ‘Pe nomundu ngwa toora orutu rwaJesus!’ Petrus na Johanes va tupuka keyendo. Tji va muna kutja ri ri tjo, owo va yaruka kozoyao.

Indu Maria tja yaruka keyendo, eye wa muna ovaengeli 2 moukoto na tja ku wo: ‘Hi nakutjiwa kutja oMuhona wandje ve mu twara pi.’ Okuzambo wa muna omurumendu, nu mena rokutja eye ee ripura kutja omuungure womovikunino eye wa tja ku ye: ‘Mutengwa, arikana ndji raera kutja ve mu twara pi.’ Posiya indu omurumendu tja tja ku ye, “Maria!” eye wa tjiwa kutja oJesus. Eye wa ravaera na tja: “Muhonge!” ne rimanga mu ye. Jesus wa tja ku ye: ‘Twende nu u karaere ovakweṋu kutja we ndji munu.’ Tjimanga Maria wa tupuka kovahongewa ne keveraera kutja wa munu Jesus.

Kombunda meyuva otjingero, ovahongewa 2 va ri mondjira okuza koJerusalem okuyenda koEmaus. Omurumendu we rikuta kuna wo mouyenda wawo na utu okuvepura kutja va ri amave hungire ohunga natjike. Owo va tja: ‘Koya zuva re? Omayuva yetatu nga kapita, ovapristeri ovanene va zepa Jesus. Nu nai ovakazendu tjiva mave tja eye wa pendurwa movakoke!’ Omurumendu we ve pura na  tja: ‘Kamu kambura movaprofete re? Owo va tja Kristus ma ṱu nu okuzambo a pendurwa.’ Eye we ve kahururira Omatjangwa. Owo tji va vaza moEmaus, ovahongewa va raera omurumendu kutja ma yende puna wo. Periro rongurova tja za nokukumbira omboroto, owo otji va muna kutja oJesus. Okuzambo eye wa zenga.

Ovahongewa 2 mba va hakahana nave i konganda koJerusalem ovaapostele ku va woronganene nave keveraera oviṋa mbya tjitwa. Ngunda ave ri moukoto wondjuwo, Jesus we rimunikisa ku wo avehe. Rutenga, ovaapostele kaave kambura kutja eye oJesus. Okuzambo eye wa tja ku wo: ‘Tareye komake wandje; ṱuneye ku ami. Pa tjangwa kutja Kristus ma penduka movakoke.’

“OwAmi ondjira nouatjiri nomuinyo; kape nomundu ngu ma i ku Tate nokuhinaami.”​—Johanes 14:6