Twende kovidio oini

Twende komurya

Ovahongonone vaJehova

Toorora eraka Otjiherero

 EHONGWA 87

Eriro raJesus esenina rongurova

Eriro raJesus esenina rongurova

Ovajuda aave zemburuka Opaska ombura aihe meyuva 14 momueze mbwi Nisan. Ihi aave tjitire okuzemburuka omuano Jehova mbwe ve kutura koukarere moEngipte ne ve eta mEhi Ekwizikwa. Mombura ndji 33 O.Z., Jesus novaapostele ve va zemburuka Opaska metuwo rokombanda moJerusalem. Komaandero weriro, Jesus wa tja: ‘Pena umwe pu eṋe ngu me ndji tjiti ovineya.’ Ovaapostele va himinwe nave pura Jesus ave tja: ‘Ouṋe?’ Jesus wa tja: ‘Eye ngwi ku me yandja omboroto ndji.’ Okuzambo wa yandja omboroto ku Judas Iskariot. Tjimanga, Judas wa sekama na piti metuwo.

Okuzambo Jesus wa kumba, a teya omboroto moutupa ouṱiṱi na yandja kotjihupe tjovaapostele ve. Eye wa tja: ‘Ryee omboroto ndji. Oyo mai kuramene po orutu rwandje ndu me yandja mena reṋu.’ Okuzambo wa kumbira omavinu na yandja kovaapostele ve. Eye wa tja: ‘Nwee omavinu nga. Oyo maye kuramene po ombinḓu yandje ndji me yandja kutja omauvi weṋu ye isirwe. Ami me mu kwizikire kutja mamu kahonapara puna ami otjozombara meyuru. Ihi tji tjiteye ombura aihe kokuzemburuka ami.’ Ovakongorere vaJesus ngamba ve worongana pamwe mongurova ndjo ombura aihe. Ombongarero ndjo nai i isanewa Omariro Omayapuke waMuhona.

 Kombunda yomariro ngo, ovaapostele va uta okuposa ohunga nokutja ouṋe mokati kawo ngu ri omunanḓengu tjinene. Posiya Jesus wa tja ku wo: ‘Omunanḓengu tjinene mokati keṋu eye ngwi ngu rivara otjomuṱiṱi, nu ngu he rivara ounanḓengu tjinene.’

‘Oweṋe omapanga wandje. Ami mbi mu raera avihe Tate mbye vanga kutja mbi mu raere. Moruveze rwatjimanga Ami mei ku Tate keyuru. Eṋe mamu sewa kongotwe novandu mave tjiwa kutja oweṋe ovahongewa vandje tji mwa suverasana. Mamu sokusuverasa tjimuna Ami tji mbe mu suvera.’

Okuzambo Jesus wa kumba na ningire Jehova kutja ma tjevere ovahongewa avehe. Eye wa ningira Jehova kutja me ve vatere okuungura pamwe mohange. Wa kumba kutja ena raJehova ri yapurwe. Okuzambo Jesus novahongewa ve va imbura omatangero ku Jehova nave i pendje. Oruveze ku Jesus okukamburwa rwa ri popezu.

“Amu tira ko, karupanda okaṱiṱi, orondu Iho u nonyuṋe okumupa imbwi ouhona.”​—Lukas 12:32